ᖃᓄᐃᓕᐅᖅᐸᓪᓕᐊᓂᐅᓯᒪᔪᑦ

ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐅᖁᑖ ᑎᐅᕐᕈᕐ ᐃᑦᑕᕐᓂᓴᖃᕐᕕᒃ ᑲᓇᑕᒥ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᑦ ᐊᑎᓕᐅᕐᑕᐅᔪᑦ ᑲᓇᑕᐅᑉ ᒐᕙᒪᑐᖃᑯᓐᓂᑦ ᐊᒻᒪᓗ ᕿᑎᖅᒥᐅᑦ ᐃᓄᐃᑦ ᑲᑐᑦᔨᖃᑎᒋᖏᑦᑕᒍᑦ

ᑕᑯᐊᑦ ᕿᑎᖅᒥᐅᑦ ᐃᓗᐊᓂᑦᑐᑦ (ᓄᓇᕗᒻᒥ), ᐅᒥᐊᕐᔪᐊᕕᓃᒃ, ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐅᖁᑖ ᑎᐅᕐᕈᕐ ᐃᑦᑕᕐᓂᓴᖃᕐᕕᒃ ᑲᓇᑕᒥ ᐊᕿᐅᒪᑎᑕᐅᓗᑎᒃ ᐱᓕᕆᐊᖑᓂᐊᓕᕐᑐᑦ ᐊᑐᕐᑕᐅᓂᐊᕐᑐᑦ ᐃᓄᒃᓄᑦ ᐊᐅᓚᑕᐅᒻᒪᕆᒃᓗᑎᒃ ᐃᑦᑕᕐᓂᓴᖃᕐᕕᒃ ᑲᓇᑕᒥ. ᑕᑯᐊᑦ ᓇᔪᕐᑕᖏᑦ ᒪᕐᕉᒃ ᓴᐳᑦᔭᐅᓯᒪᓂᐊᕐᑐᒃ ᐊᐅᓚᑦᑎᕕᐅᓂᐊᕐᑐᑦ: ᕕᓪᒪᑦ (Wilmot) ᐊᒻᒪ ᑯᕋᒻᑕᓐ ᕙᐃ (Crampton Bay) ᐊᒻᒪᓗ ᐃᓚᖓᒍᑦ ᑎᐅᕐᕈᕐ ᕙᐃ (Terror Bay) ᓂᒋᕐᐸᓯᐊᓂ ᓯᒃᔭᒥ ᐅᖅᓱᖅᑑᑉ ᓄᓇᖓᓂ ᕿᑭᕐᑕᒥ. ᑕᑯᐊᑦ ᓇᔪᕐᑕᖏᑦ, ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐅᖁᑖ ᑎᐅᕐᕈᕐ, ᑕᑯᐊᑦ ᐅᒥᐊᕐᔪᐊᕕᓂᒃ ᐱᖓᓱᓂᒃ ᓇᐸᕈᑕᖃᕐᑐᑦ, ᕿᔪᐊᕐᔪᒃ ᐅᒥᐊᕐᔪᐊᓕᐅᕐᑕᐅᓯᒪᔪᑦ ᐊᐅᓚᑦᑎᔨᖃᓚᐅᕐᑐᑦ ᓱᕐ ᔭᓐ ᕗᕋᐃᖕᓕᓐ ᑕᒪᓂ ᐅᑭᐅᖅᑕᖅᑐᒥ ᐊᖏᕋᒪᓚᐅᕐᑐᖅ ᑕᐃᑉᓱᒪᓂ, ᒪᓐᓇ ᐅᒦᔭᕈᑕᐅᔪᕕᓃᒃ ᑭᕕᓯᒪᔪᒃ ᑕᕆᐅᑉ ᓇᑎᐊᓂ ᓱᓕ ᑕᑯᒃᓴᐅᔪᒃ.

ᐅᑭᐅᓄᑦ ᐊᒥᓱᓄᑦ, ᖃᐅᔨᓴᕐᑐᑦ ᖃᓄᖅ ᓯᕕᑭᓐᓂᕐᓴᑯᑦ ᐅᒥᐊᕐᔪᐊᑯᑦ ᐃᖏᕋᖃᑦᑕᕈᓐᓇᕋᔭᕐᓂᖏᓐᓂᒃ ᑕᒪᓂ ᕿᑎᖅᒥᐅᑦ ᑕᕆᐅᕐᔪᐊᖓᓂ ᐃᕕᐊᓗᐃᑦᓗ ᑕᕆᐅᖁᑎᖓᓂ. ᑕᐃᑉᓱᒪᓂ 1845ᒥ, ᑖᑉᑯᐊᒃ ᒪᓪᕈᒃ ᑯᐄᓐ ᐅᓇᑕᖅᑎᖏ ᑕᕆᐅᒃᑯᑦ ᐅᒥᐊᖏ ᐊᐅᓚᖅᑐᒃ ᐃᖕᓚᓐᒥᑦ ᐅᒥᐊᕐᔪᐊᕐᒥᐅᑕᐃᑦ 134-ᖑᓚᐅᕐᐳᑦ ᕿᓂᕐᑕᐅᔪᑐᖃᖅ ᐅᑭᐅᖅᑕᖅᑐᒥ ᐊᑉᖁᑎᖓ ᑕᕆᐅᒃᑯᑦ. ᐃᓱᒪᑕᖓᑦ ᐅᒥᐊᕐᔪᐊᒃ ᓱᕐ ᔭᓐ ᕗᕋᐃᖕᓕᓐ (ᑯᐄᓐ ᐅᒥᐅᖁᑖ ᐃᕆᐸᔅ) - ᐊᐅᓚᑦᑎᔪᖅ ᐊᐅᓚᖅᓂᖓ - ᐊᒻᒪᓗ ᐃᓱᒪᑕᖓᑦ ᐳᕋᓐᓯᔅ ᑯᕈᓯᐅᕐ (ᑯᐄᓐ ᐅᒥᐅᖁᑖ ᑎᐅᕐᕈᕐ), ᑕᑯᐊᑦ ᕗᕆᑎᔅ ᐅᓇᑕᖅᑐᓴᖁᑎᖏᓐᓄᑦ ᐱᓕᕆᐊᖃᕐᑎᑕᐅᓚᐅᕐᑐᑦ ᓄᓇᖑᐊᓕᐅᕐᑎᑕᐅᑉᓗᑎᒃ ᐅᑭᐅᖅᑕᖅᑐᒥ ᐊᑉᖁᑎᖓ ᑕᕆᐅᒃᑯᑦ ᓱᓕ ᒪᓐᓇ ᐱᐊᖃᓂᒃᑕᐅᓯᒪᓚᐅᖏᒻᒪᑦ. ᑕᒪᕐᒥᒃ ᐅᒥᐊᕐᔪᐊᒃ ᓯᑯᓄᑦ ᐊᑉᖁᑕᐃᕈᔭᐅᕗᑦ ᓴᑕᐸ 1846 ᐅᖅᓱᕐᑑᑉ ᖃᓂᒋᔭᖓᓂ, ᕿᒪᓚᐅᕐᐸᖓᑦ ᐅᒥᐊᕐᔪᐊᑦ ᐃᐳ 1848 ᑕᑯᐊᑦ ᐊᒥᐊᑰᔪᑦ ᐅᒥᐊᕐᔪᐊᕐᒥᐅᑕᐃᑦ, ᐊᒻᒪᓗ ᑭᖑᓂᐊᒍᑦ ᐅᒥᐊᒃ ᑕᒪᕐᒥᒃ ᑭᕕᓚᐅᕐᐳᑦ.

ᑕᐃᒪᖓᓂᑦ 1848ᒥᑦ 1880ᒧᑦ, ᕿᓂᖃᑦᑕᓚᐅᕐᐳᑦ ᑐᑭᓯᓇᓱᐊᕐᖢᑎᒃ ᖃᓄᐃᓕᓚᐅᕐᐸᑦ ᑕᑯᐊᒃ ᐅᒥᐊᕐᔪᐊᒃ ᐅᒥᐊᕐᒥᐅᑕᐃᑦᓗ; ᐊᓐᓇᒃᑐᓂᒃ ᓇᓂᔭᐅᔪᖃᓚᐅᕐᓯᒪᖏᑦᑐᖅ. ᑕᑯᐊᑦ ᕿᓂᓚᐅᕐᑐᑦ ᐅᖓᓯᒃᑐᓄᑦ ᕿᓂᒪᓚᐅᕐᑐᑦ ᓄᓇᒥᒃ ᑲᓇᑕᐅᑉ ᐅᑭᐅᖅᑕᖅᑐᐊᓂ. ᐃᓄᐃᑦ ᑐᓴᐅᒪᔪᑦ ᐅᓂᑲᐅᓯᕆᕙᓚᐅᕐᑕᖏᑦ ᑐᓴᐅᒪᔭᒥᓐᓂᒃ ᕗᕋᐃᖕᓕᓐ ᐊᐅᓚᖅᓂᖓ ᐊᑐᕐᖢᑎᒃ ᑕᐃᒪᖓᑦ ᕿᓂᒪᐃᓐᓇᕐᐳᑦ ᐅᑭᐅᓄᑦ ᐊᒥᓱᓄᑦ ᑭᓯᐊᓂᒃᓕ ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐅᖁᑖ ᑎᐅᕐᕈᕐ ᓇᓂᔭᐅᓕᑕᐃᓇᓚᐅᕐᐳᑦ 2014ᒥ ᐊᒻᒪᓗ 2016ᒥ.

ᑲᓇᑕᒥ ᒥᕐᖑᐃᓯᕐᕕᐅᑉ ᐃᑦᑕᕐᓂᓴᖃᕐᕕᓯᐅᕐᓂᖅ ᐊᒻᒪᓗ ᖃᐅᔨᓴᖅᑕᐅᔫᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐅᖁᑖ ᑎᐅᕐᕈᕐ, ᑲᑐᔾᔨᖃᑎᖃᕐᑎᓪᓗᒋᑦ ᐃᓄᓐᓂᑦ, ᐊᖏᓛᖑᕗᖅ, ᐊᔾᔨᐅᖏᓐᓂᖓ ᐅᖃᐅᓯᕆᒋᐊᖓ ᐃᒪᐅᑉ ᐃᓄᐊᓂ ᐃᓂᑐᖅᓂᑐᖃᖏᑦ ᑲᒪᒋᔭᐅᓂᖓ ᑲᓇᑕᐅᑉ ᖃᐅᔨᓴᕐᓂᖅ ᑎᑎᖅᑲᑎᒍᑦ ᖃᓄᐃᓕᐅᖅᑕᐅᖃᑦᑕᕐᓂᑯᒃ. ᓇᓂᔭᐅᓂᖓ ᔭᒐᐃᔭᐅᓂᑯ ᕗᕋᐃᖕᓂᓐ ᐅᒥᐊᔪᐊᖏᑦ ᓴᖅᑮᓯᒪᔪᖅ ᐱᐅᔪᒥᒃ ᑲᓇᑕᐅᑉ ᐅᑭᐅᖅᑕᖅᑐᖓᓂᒃ ᐊᒻᒪᓗ ᓴᖅᑮᓯᒪᔪᖅ ᐱᒻᒪᕆᐅᓂᖏᓐᓂᑦ ᐃᓄᐃᑦ ᖃᐅᔨᒪᔭᖏᑦ, ᐅᕝᕙᓘᓐᓃᑦ ᐃᓄᐃᑦ ᖃᐅᔨᒪᔭᑐᖃᖏᑦ, ᕿᓂᕐᓂᒃᑯᑦ ᓇᓂᓯᓂᒃᑯᑦ ᒪᕐᕉᒃ ᐅᒥᐊᕐᔪᐊᕐᓂᒃ ᓴᖅᑭᔮᖅᑎᑎᒃᓯᓐᓈᑦ ᐃᓕᖁᓯᕐᓂᑦ ᐅᑭᐅᖅᑕᖅᑐᒥ.

ᑲᓇᑕᒥ ᒥᕐᖑᐃᓯᕐᕕᒃ ᓯᕗᓪᓕᐅᔨᕗᖅ ᐊᖏᖅᓯᒪᓂᖃᖅᑐᑦ ᐊᑐᖅᑐᑎᒃ ᐃᓄᐃᑦ ᖃᐅᔨᒪᔭᖏᓐᓂᒃ ᐊᒻᒪ ᐸᕐᓇᐃᖃᐅᔪᑦ, ᐊᐅᓚᑦᑎᖃᑕᐅᓗᑎᒃ ᑲᒪᖃᑕᐅᓗᑎᒃᓗ ᐱᔾᔪᑎᒋᓪᓗᒍ ᐃᑦᑕᕐᓂᓴᖃᕐᕕᒃ ᑲᓇᑕᒥ. ᑲᑐᔾᔨᓗᑎᒃ ᐱᓕᕆᐊᕆᔭᐅᔪᓂᒃ ᐃᑲᔫᓂᖃᓲᑦ ᑐᑭᓯᐅᒪᖃᑎᒌᓗᑎᒃ ᕗᕋᐃᖕᓕᓐ ᐅᓂᒃᑳᖏᓐᓂᒃ, ᐊᒻᒪ ᖃᓄᖅ ᓴᐳᒻᒥᒍᓐᓇᕐᒪᖔᑕ ᑖᒃᑯᓂᖓ ᐃᓂᒋᔭᐅᔪᓐᓂᒃ, ᐊᒻᒪ ᐊᕙᑎᖁᑎᖓᑕᐅᖅ ᑕᐃᑲᓂ ᐃᓂᖏᓐᓂᒃ.

ᑕᐃᒪᖓᓂᑦ 2018, ᐱᖁᑎᑐᖃᕐᓂᒃ ᓇᓂᓯᖃᑦᑕᓕᕐᐳᑦ ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐅᖁᑖ ᑎᐅᕐᕈᕐ ᐅᒥᐊᕐᔪᐊᒃ ᐃᓗᓕᖏᑦᓗ ᐊᕙᑖᓂᑦ ᓇᒃᒥᓂᕆᔭᐅᕗᑦ ᑲᓇᑕᒥ ᒐᕙᒪᑐᖃᑯᓐᓂᑦᓗ ᐃᓄᒃᓂᑦᓗ. ᐸᑐᓕᕐᑎᑦᓗᒍ 2019, ᑲᓇᑕᐅᑉ ᒐᕙᒪᑯᖏᑦ ᐊᒻᒪᓗ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑎᑦ ᐊᖏᕈᓯᐅᕐᖢᑎᒃ ᐊᑎᓕᐅᓚᐅᕐᐳᑦ ᐊᕙᑖᓐᓂᑦ ᐱᓕᕆᖃᑎᒌᒃᓂᐊᕐᖢᑎᒃ ᓴᐳᑎᓯᒪᖃᑦᑕᐅᑎᓗᑎᒃ, ᖃᐅᔨᓴᐃᓗᑎᒃ, ᖃᐅᔨᓴᕐᑎᒃ ᑎᑎᕋᕐᐸᑦᓕᐊᓗᒋᑦ ᐅᓂᑳᐅᓯᓕᐅᕐᓗᒋᑦ ᐅᒥᔪᐊᖃᐅᕐᑐᑦ ᑐᑭᓯᔭᐅᕙᑦᓕᐊᓂᐊᕐᒪᑕ ᐃᑦᑕᕐᓂᑕᓕᕆᓂᑯᑦ.

ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐅᖁᑖ ᑎᐅᕐᕈᕐ ᐃᑦᑕᕐᓂᓴᖃᕐᕕᒃ ᑲᓇᑕᒥ ᓴᖅᑭᑦᑕᐅᓚᐅᕐᐳᑦ ᑐᑭᓕᐅᕐᑕᐅᑉᓗᑎᒃ 1992ᒥ ᓱᓕ ᓇᓂᔭᐅᖏᑎᑦᓗᒋᑦ. 2015ᒥ, ᐅᒦᔭᕈᑕᐅᔪᕕᒃ ᑯᐄᓐ ᐅᒥᐅᖁᑖ ᐃᕆᐸᔅ ᐃᓚᓕᐅᑎᔭᐅᓚᐅᕐᐳᑦ ᐃᑦᑕᕐᓂᓴᖃᕐᕕᒃ ᑲᓇᑕᒥ ᒪᓕᒐᑯᑦ ᓴᐳᑦᔭᐅᓯᒪᓂᐊᕐᖢᑎᒃ ᐅᒦᔭᕈᑕᐅᔪᕕᓃᒃ ᑲᓇᑕᒥᐅᑦ ᒥᕐᖑᐃᓯᕐᕕᒃ ᑲᓇᑕᒥ ᐱᖁᔭᖅ, ᐅᒦᔭᕈᑕᐅᔪᕕᒃ ᑯᐄᓐ ᐅᒥᐅᖁᑖ ᑎᐅᕐᕈᕐ ᐃᓚᔭᐅᓗᓂ 2017ᒥ ᓇᓂᔭᐅᓯᒪᓕᖅᑎᓪᓗᒍ. ᑕᑯᐊᑦ ᒪᓐᓇᒧᑦ ᑭᑯᑐᐃᓐᓇᕐᓄᑦ ᑕᑯᔭᒃᓴᐅᑎᑕᐅᖏᑦᑐᑦ ᒪᓕᒃᑐᒍ ᐃᓱᒪᑕᐅᑉ ᒪᓕᖁᔭᖓᓂᒃ, ᑭᓯᐊᓂᒃ ᐃᓄᐃᑦ ᐊᔪᕐᑎᑕᐅᖏᑦᑐᑦ ᐊᖑᓇᓱᐊᕈᒪᒍᑎᒃ ᐊᖑᓇᓱᐊᕐᓂᕐᒧᑦ ᐱᔪᓐᓇᐅᖃᕐᒪᑕ ᐃᓄᐃᑦ.

ᓇᕿᑕᐅᓚᐅᕐᐳᑦ 2016-ᖑᑎᑦᓗᒍ ᕗᕋᐃᖕᓕᓐ ᐅᖃᐅᔾᔩᒋᐊᖅᑏᑦ ᑲᑎᒪᔨᕋᓛᕆᑲᐃᓐᓇᖅᑕᖏᑦ ᐊᕿᑕᐅᓯᒪᔪᑦ ᑭᒡᒐᕐᑐᕐᑎᖃᕐᖢᑎᒃ ᕿᑎᖅᒥᐅᑦ ᐃᓄᐃᑦ ᑲᑐᑦᔨᖃᑎᒋᖏᓐᓂᖓᕐᑐᓂᒃ, ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑎᑦ, ᓄᓇᕗᑉ ᒐᕙᒪᑯᖏᓐᓂᑦ, ᐃᑦᑕᕐᓂᑕᓕᕆᔨᑯᓐᓂᑦ ᐳᓚᕋᕐᑐᓕᕆᔨᑯᓐᓂᑦ ᐊᒻᒪᓗ ᑲᓇᑕᒥ ᒥᕐᖑᐃᓯᕐᕕᓕᕆᔨᖏᓐᓂᑦ, ᐊᒻᒪᓗ ᐅᖃᐅᔨᒋᐊᑎᐅᓗᑎᒃ ᐊᕿᑕᐅᑉᓗᑎᒃ ᐊᐅᓚᑦᑎᓕᕆᔨᓂᑦ ᐅᒦᔭᕈᑕᐅᔪᕕᓃᒃ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᑦ ᓴᕿᑦᑎᔪᖃᕐᐸᑦ ᐊᑐᕐᑕᐅᔪᒃᓴᓂᒃ ᑕᒪᑐᒧᖓ ᐊᑎᓕᐅᓚᐅᕐᑎᑦᓗᒋᑦ ᒥᕐᖑᐃᓯᕐᕕᓕᕆᔨᑯᑦ ᑲᓇᑕᒥ ᐊᒻᒪᓗ ᕿᑎᖅᒥᐅᑦ ᐃᓄᐃᑦ ᑲᑐᑦᔨᖃᑎᒋᖏᑦ.

ᐅᖃᐅᔾᔩᒋᐊᖅᑏᑦ ᑲᑎᒪᔨᕋᓛᕆᑲᐃᓐᓇᖅᑕᖏᑦ ᑲᑎᒪᖃᖅᑕᖅᓯᒪᔪᖅ 50 ᐅᖓᑖᓂ ᑕᐅᒪᓐᖓᓂ 2016, ᑲᔪᓯᒍᓐᓇᑎᒃᑎᓯᒪᕗᑦ ᖃᐅᔨᓴᕐᓂᕐᒥᒃ, ᐱᖃᑕᐅᓗᑎᒃ ᐃᓄᐃᑦ ᐊᑑᑎᖃᕐᓯᓐᓈᑦ ᐱᒋᐊᕐᐸᓪᓕᐊᑎᓪᓗᒍ ᓴᖅᑭᑎᑕᐅᕙᓪᓕᐊᓕᖅᑎᓪᓗᒍ. ᒥᕐᖑᐃᓯᕐᕕᒃ ᑲᓇᑕᒥ ᖁᔭᓕᕗᑦ ᐱᕕᖃᕈᓐᓇᓚᐅᕐᓂᖏᓐᓂᒃ ᑲᑎᒪᔨᕋᓛᑦ ᑕᒃᓱᒧᖓ ᑐᕌᖓᔪᑦ ᐃᑦᑕᕐᓂᓴᖃᕐᕕᒃ ᑲᓇᑕᒥ.

ᓴᕿᑕᐅᓚᐅᕐᑐᑦ ᐅᖃᓯᕆᔭᖏ ᕗᕋᐃᖕᓕᓐ ᐅᖃᐅᔾᔩᒋᐊᖅᑏᑦ ᑲᑎᒪᔨᕋᓛᕆᑲᐃᓐᓇᖅᑕᖏᑦ, ᐅᒦᔭᕈᑕᐅᔪᕕᓃᒃ ᓴᐳᑦᔨᓯᒪᓂᐊᕐᐳᑦ ᑕᑯᐊᑦ ᐊᕿᑕᐅᔪᖅ 2017ᒥ. ᑕᒪᓐᓇ ᐊᕿᐅᒪᑎᑕᐅᔪᖅ ᓇᑦᑎᓕᒃ ᐃᑦᑕᖅᓂᑕᓕᕆᔨᑦ ᑲᑐᑦᔨᖃᑎᒋᖏᓐᓂᑦ ᐊᒻᒪᓗ ᐃᑲᔪᕐᑎᖃᕐᖢᑎᒃ ᐃᓄᖏᓐᓂᑦ ᐅᖅᓱᕐᑐᕐᒥᐅᑦ, ᓄᓇᕗᑦ ᑕᑯᐊᑦ ᐱᓕᕆᖃᑎᖃᕐᑐᑦ ᑲᓇᑕᒥ ᒥᕐᖑᐃᓯᕐᕕᓕᕆᔨᑯᓐᓂᑦ ᓴᐳᑦᔭᐅᓂᖓ ᐊᒻᒪᓗ ᑲᒪᔨᐅᔪᓂᒃ ᐃᑦᑕᕐᓂᓴᖃᕐᕕᒃ ᑲᓇᑕᒥ. ᒥᐊᓂᕆᔭᐅᓂᐊᕐᑐᑦ ᐅᒦᔭᕈᑕᐅᔪᕕᓃᒃ ᐃᓂᖓ ᐊᑉᖁᓵᕐᑕᐅᖃᑦᑕᖁᖏᑦᓗᒋᑦ ᐅᒥᐊᕐᔪᐊᓄᑦ ᐅᒥᐊᓄᑦᓗ ᐃᖏᐸᔭᕐᑐᓂᑦ, ᑎᑭᑕᐅᓇᔭᕐᐸᑕ ᑎᑭᑕᐅᒋᐊᖃᖏᑦᑐᓄᑦ ᐅᖃᐅᓯᐅᓂᐊᕐᐳᑦ ᑲᒪᔨᒻᒪᕆᐅᔪᓄᑦ. ᒥᐊᓂᕐᓯᔨᐅᔪᑦ ᑕᑯᓂᖓ ᐊᑐᖁᔭᐅᔪᓂᒃ ᓇᒪᒃᓴᕐᐳᑦ ᑕᑯᔭᕐᑐᖃᑦᑕᖅᓂᐊᕐᑐᓂᒃᓗ ᖃᔨᓴᖃᑦᑕᖅᓂᐊᕐᑐᓂᒃᓗ ᐃᓄᐃᒃ ᖃᐅᔨᒪᓂᖑᑦ ᖃᐅᔨᒪᔭᑐᖃᖏᑦᓗ ᒪᓕᒃᓗᒋᑦ.

ᒪᔨ 2, 2023, ᕿᑎᖅᒥᐅᑦ ᐃᓄᐃᑦ ᑲᑐᑦᔨᖃᑎᒋᖏᑦ ᐊᒻᒪᓗ ᑲᓇᑕᐅᑉ ᒐᕙᒪᑯᖏᑦ ᐊᑎᓕᐅᖃᑎᒋᓚᐅᕐᐳᑦ ᐅᑭᐅᓄᑦ ᖁᓕᓄᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᑦ. ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᑦ ᓴᕿᑦᑎᕗᑦ ᑕᑯᑎᒍᓇ ᐊᑐᕐᖢᒋᑦ ᐊᖏᕈᓯᐅᕐᓯᔪᑦ ᐃᑲᔪᕐᑎᒋᒃᓗᑎᒃ ᑲᓇᑕᒥ ᒥᕐᖑᐃᓯᕐᕕᓕᕆᔨᑯᑦ ᐃᓄᐃᓪᓗ ᐱᓕᕆᖃᑎᒋᒋᒃᐊᖃᐳᑦ. ᑐᓴᐅᒪᖃᑎᒋᒃᓂᑯᑦ ᐊᒻᒪᓗ ᐱᓕᕆᖃᑎᒋᒃᓂᑯᑦ ᐊᑕᐅᓯᕐᒧᑦ ᑐᕋᕐᓂᐊᕐᐳᑦ, ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐅᖁᑖ ᑎᐅᕐᕈᕐ ᑕᑯᐊᒃ ᐊᕿᐅᒪᑎᑕᐅᓂᒃᓴᖏᑦ ᓴᕿᐸᑦᓕᐊᕗᑦ ᐃᓄᒃᓄᑦ ᐊᐅᓚᑕᐅᒻᒪᕆᒃᓗᑎᒃ ᐃᑦᑕᕐᓂᓴᖃᕐᕕᒃ ᑲᓇᑕᒥ. ᐊᖏᖃᑎᒋᒃᓂᖅ ᓴᕿᑦᑎᓯᒪᒃᒪᑦ ᑭᓇᐅᔭᓕᐅᕈᑕᐅᓂᐊᕐᑐᓂᒃ ᐱᕙᑦᓕᐊᔪᑕᐅᓂᐊᕐᑐᓂᒃ ᐅᖅᓱᖅᑐᕐᒥᐅᓄᑦ ᐊᒻᒪᓗ ᐃᖃᓗᒃᑐᑦᑎᐊᕐᒥᐅᓄᑦ ᐃᓄᒃᓄᑦ ᓇᒃᒥᓂᖅ ᐱᓕᕆᕕᖃᕐᑐᓄᑦ ᐱᕙᑦᓕᐊᑎᑦᑎᓂᐊᕐᒪᑦ ᑭᓇᐅᔭᑦ, ᐃᓄᐃᑦ ᐃᓕᖁᓯᑐᖃᖏᓐᓄᑦ ᐃᓕᓐᓂᐊᕈᑕᐅᓗᑎᒃ, ᐃᓄᒃᓄᑦ ᐃᓕᓐᓂᐊᕐᓂᕐᒧᑦ ᐃᑲᔪᕐᑐᐃᓗᑎᒃ, ᐃᓄᐃᑦ ᓴᓇᔭᒃᓴᓄᑦ ᓴᓇᔭᒃᓴᕐᑕᕐᓂᕐᒧᑦᓗ, ᐃᑲᔪᕐᓂᖃᕐᓂᐊᕐᑐᒃ ᑕᑯᐊᒃ ᐅᒦᔭᕈᑕᐅᔪᕕᓃᒃ ᓯᕗᓂᕐᒧᑦ.