ᓇᑭᓐᖔᕐᓂᖓ
ᓇᓗᓇᐃᒃᑯᑕᓗᐊᑕᖏᑦ
ᐱᓕᕆᖃᑎᒌᖕᓂᖏᑦ ᐃᓄᐃᑦ, ᒥᕐᙳᐃᖅᓯᕖᑦ ᑲᓇᑕᒥ, ᑭᒃᑯᑐᐃᓐᓇᐃᓪᓗ ᐊᒥᓱᑦ, ᓇᖕᒥᓂᖃᖅᑎᑦ, ᑮᓇᐅᔭᓕᐅᕋᓱᐊᖅᑎᐅᙱᑦᑐᓪᓗ, ᑲᑐᔾᔨᖃᑎᒌᓪᓗ ᓴᖅᑭᑎᑦᑎᒍᓐᓇᖅᓯᒪᔪᑦ ᖃᑦᓯᑲᓪᓚᓐᓂᑦ ᐊᓂᒍᐃᒍᑕᐅᔪᓂᑦ ᐱᕚᓪᓕᕈᑎᓂᑦ ᐊᕐᕌᒎᓵᖅᑐᓂ ᖁᓕᓂᑦ.
ᐅᑯᐊ ᑕᕝᕙ ᐅᔾᔨᕐᓇᑦᑎᐊᖅᑐᑦ ᐊᓂᒍᖅᑎᑕᐅᓯᒪᔪᑦ ᑐᖏᓕᕇᑦ:
- 1992: ᐅᒦᔭᕐᓂᑰᒃ ᑯᐃᓐ ᐅᒥᐊᖁᑖ ᐃᕆᐸᔅ (HMS Erebus) ᐊᒻᒪ ᑯᐃᓐ ᐅᒥᐊᖁᑖ ᑎᐅᕈᕐ (HMS Terror) ᑲᓇᑕᒥ ᐃᑦᑕᕐᓂᓴᖃᕐᕕᒃ ᓴᖅᑭᑕᐅᓚᐅᖅᓯᒪᕗᖅ 1992-ᒥ ᐅᒥᐅᕐᔪᐊᕕᓃᒃ ᓇᓂᔭᐅᓚᐅᖅᑳᑎᓐᓇᒋᒃ.
- ᓯᑎᐱᕆ 2, 2014: ᐅᒥᐊᕐᔪᐊᕕᓂᖅ ᑯᐃᓐ ᐅᒥᐊᖁᑖ ᐃᕆᐸᔅ (HMS Erebus) ᓇᓂᔭᐅᕗᖅ.
- 2015: ᐅᒥᐊᕐᔪᐊᕕᓂᖅ ᐅᒦᔭᕐᓂᑯ ᑯᐃᓐ ᐅᒥᐊᖁᑖ ᐃᕆᐸᔅ (HMS Erebus) ᐃᓕᑕᕆᔭᐅᕗᖅ ᑲᓇᑕᒥ ᐃᑦᑕᕐᓂᓴᖃᕐᕕᖏᓐᓄᑦ ᑲᓇᑕᒥ ᑎᒃᑯᐊᖅᑕᐅᓯᒪᔪᓄᑦ, ᒪᓕᒐᖅᑎᒍᑦ ᓴᐳᔾᔭᐅᓯᒪᖁᓪᓗᒍ ᑲᓇᑕᒥ ᒥᙳᐃᓯᕐᕕᖕᓄᑦ ᐱᖁᔭᖅ ᒪᓕᒃᖢᒍ.
- ᓯᑎᐱᕆ 3, 2016: ᐅᒥᐊᕐᔪᐊᕕᓂᖅ ᑯᐃᓐ ᐅᒥᐊᖁᑖ ᑎᐅᕈᕐ (HMS Terror) ᓇᓂᔭᐅᕗᖅ
- 2015-2023: ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐃᒪᐅᑉ ᐃᖅᑲᖓᓂ ᐃᑦᑕᕐᓂᓴᓕᕆᔩᑦ ᐱᐊᓂᒃᓯᕗᑦ 11-ᓂᒃ ᐃᒪᐅᑉ ᐃᖅᑲᖓᓂ ᐃᑦᑕᕐᓂᓴᖃᕐᕕᐊᓂ ᐅᒦᔭᕐᓂᑯᒥᑦ ᑯᐃᓐ ᐅᒥᐊᖁᑖᓂᑦ ᐃᕆᐸᔅᒥᑦ (HMS Erebus) ᐊᒻᒪ ᑯᐃᓐ ᐅᒥᐊᖁᑖᓂᑦ ᑎᐅᕈᕐᒥᑦ (HMS Terror) ᑲᓇᑕᒥ ᐃᑦᑕᕐᓂᓴᖃᕐᕖᒃ ᐃᓂᖏᓐᓂ. 2019−ᒥ ᓄᓇᖓᓂ ᓇᓗᓇᐃᖅᑕᐅᒪᔪᒥ ᖃᐅᔨᓴᕐᕕᑦᓴᐅᓂᖓᓂ ᓇᓂᓯᓚᐅᖅᐳᖅ 350 ᐅᖓᑖᓃᑦᑐᓂᒃ ᐱᖁᑎᑐᖃᕕᓂᕐᓂᒃ ᑕᒫᓐᖓᑦ ᐃᓂᖓᓂᑦ ᑯᐃᓐ ᐅᒥᐊᖁᑖᑕ ᐃᕆᐸᔅ (HMS Erebus) ᐅᔾᔨᕐᓇᑦᑎᐊᖅᑐᒥᓪᓗ ᐃᓗᐊ ᐊᔾᔨᓕᐅᖅᑕᐅᓪᓗᓂ ᑯᐃᓐ ᐅᒥᐊᖁᑖ ᑎᐅᕈᕐ (HMS Terror).
- 2016: ᕗᕌᖕᒃᓕᓐ ᐅᖃᐅᔾᔨᒋᐊᖅᑎᐅᓚᐅᑲᒃᑐᑦ ᑲᑎᒪᔨᕋᓛᑦ, ᓄᓇᓕᖕᓂᙶᖅᑐᑦ ᐊᒻᒪ ᑭᒡᒐᖅᑐᐃᔨᐅᔪᑦ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᐃᓄᐃᑦ ᐱᖁᑎᖏᓐᓂᒃ ᓇᐅᑦᑎᖅᓱᖅᑎᑦ, ᓄᓇᕗᑦ ᒐᕙᒪᒃᑯᑦ, ᐃᑦᑕᕐᓂᓴᓕᕆᔩᑦ ᐊᒻᒪ ᐳᓚᕋᖅᑐᓕᕆᔨᑦ ᐊᒻᒪ ᒥᕐᖑᐃᓯᕐᕕᓕᕆᔩᑦ ᑲᓇᑕᒥ ᐋᖅᑭᒃᑕᐅᓚᐅᖅᓯᒪᕗᑦ ᐅᖃᐅᔾᔪᐃᖁᔭᐅᓪᓗᑎᒃ ᐅᒥᐊᕕᓂᐅᑉ ᐊᐅᓚᑕᐅᓂᖏᓐᓂᒃ ᑭᓯᐊᓂ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᓄᓪᓗ ᐊᖏᖃᑎᒌᒍᑎᖓ ᐱᐊᓂᒃᑕᐅᒃᐸᑦ ᒥᕐᖑᐃᓯᕐᕕᓕᕆᔨᒃᑯᓐᓄᑦ ᑲᓇᑕᒥ ᐊᒻᒪ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.
- 2017: ᑯᐃᓐ ᐅᒥᐅᖁᑖ ᑎᐅᕈᕐ (HMS Terror) ᐃᓕᑕᕆᔭᐅᕗᖅ ᑲᓇᑕᒥ ᐃᑦᑕᕐᓂᓴᖃᕐᕕᖏᓐᓄᑦ ᑲᓇᑕᒥ ᑎᒃᑯᐊᖅᑕᐅᓯᒪᔪᓄᑦ, ᒪᓕᒐᖅᑎᒍᑦ ᓴᐳᔾᔭᐅᓯᒪᖁᓪᓗᒍ ᑲᓇᑕᒥ ᒥᙳᐃᓯᕐᕕᖕᓄᑦ ᐱᖁᔭᖅ ᒪᓕᒃᖢᒍ
- 2017: ᕗᕌᖕᒃᓕᓐ ᐅᖃᐅᔾᔨᒋᐊᖅᑎᑦ ᑲᑎᒪᔨᕋᓛᖏᑦ ᐊᑐᓕᖁᔨᔪᑦ ᓴᖅᑭᑦᑎᖁᔨᓪᓗᑎᒃ ᐃᓄᐃᑦ ᐸᖅᑭᔨᑦ ᐱᓕᕆᐊᖏᓐᓂᒃ ᓴᐳᔾᔨᔾᔪᑎᒃᓴᓂᒃ ᐅᒥᐅᕐᔪᐊᕕᓂᕐᓂᒃ ᐊᒻᒪ ᐱᓕᕆᖃᑎᖃᕐᓗᑎᒃ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᓯᓚᒥ ᖃᐅᔨᓴᖅᑎᑦᑎᓗᑎᒃ ᐊᒻᒪ ᐃᑲᔪᖅᑐᐃᓗᑎᒃ ᐱᕙᓪᓕᐊᑎᑕᐅᔪᓂᒃ ᑲᔪᓯᑎᑕᐅᒋᐊᓕᓐᓂᓗ ᐳᓚᕋᑦᑐᓅᓕᖓᔪᓂᑦ.
- 2018: ᑲᑎᒋᐊᕐᓯᒪᔪᑦ ᐊᑕᓂᐅᕕᖏᑦ ᔪᓇᐃᑎᑦ ᑭᖕᑕᒻᑯᑦ (United Kingdom) ᐊᑎᓕᐅᖅᐳᑦ ᑐᓐᓂᖅᑯᓯᐊᒥᒃ ᐊᒻᒪ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᕐᒥᒃ ᓅᑎᑦᑎᔪᒪᓪᓗᑎᒃ ᓇᖕᒥᓂᖃᕐᓂᕐᒥᒃ ᐅᒥᐊᕐᔪᐊᕕᓂᕐᓂᒃ ᑲᓇᑕᒧᑦ, ᐊᒻᒪ ᑲᑎᒋᐊᕐᓯᒪᔪᑦ ᐊᑕᓂᐅᕕᖏᑦ ᔪᓇᐃᑎᑦ ᑭᖕᑕᒻᑯᑦ (United Kingdom) ᐱᓯᒪᖁᓪᓗᒋᑦ ᑭᒡᒐᖅᑐᐃᔪᒥᒃ ᖃᐅᔨᓴᒐᒃᓴᒥᒃ ᐃᑦᑕᕐᓂᓴᓂᑦ.
- 2018: ᖃᐅᔨᔭᐅᓵᖅᓯᒪᔪᑦ ᐱᖁᑎᑐᖃᕕᓃᑦ ᑯᐃᓐ ᐅᒥᐊᖁᑖᓂᑦ ᐃᕆᐸᔅᒥᑦ (HMS Erebus) ᐊᒻᒪ ᑯᐃᓐ ᐅᒥᐊᖁᑖᓂᑦ ᑎᐅᕈᕐᒥᑦ (HMS Terror) ᓇᖕᒥᓂᕆᔭᐅᓕᖅᓗᑎᒃ ᑲᓇᑕᒥ ᒐᕙᒪᒃᑯᓐᓄᑦ ᐊᒻᒪ ᐃᓄᖕᓄᑦ.
- 2019: ᑲᓇᑕᐅᑉ ᒐᕙᒪᒃᑯᖏᑦ ᐃᓄᐃᓪᓗ ᐱᖁᑎᖏᓐᓂᒃ ᓇᐅᑦᑎᖅᓱᖅᑎᒃᑯᑦ ᐊᑎᓕᐅᓚᐅᕐᑐᑦ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᕐᒥᒃ ᓇᓗᓇᐃᔭᐃᔪᒥᒃ ᖃᓄᖅ ᑖᒃᑯᐊᒃ ᒪᕐᕉᒃ ᑲᑐᔾᔨᖃᑎᒌᒃ ᐱᓕᕆᖃᑎᒌᖕᓂᐊᕐᒪᖔᑎᒃ ᓴᐳᔾᔨᓯᒪᓂᐊᕐᓗᑎᒃ, ᖃᐅᔨᓴᕐᓗᑎᒃ, ᓴᐳᔾᔨᓗᑎᒃ ᐊᒥᖅᑳᕈᑎᖃᕐᓗᑎᒡᓗ ᕗᕌᖕᒃᓕᓐ ᐱᖁᑎᑐᖃᖏᓐᓂᒃ.
- 2023: ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑎᓕᐅᖃᑎᒋᓚᐅᕐᑐᑦ $23 ᒥᓕᐊᓐ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓄᑦ ᐃᑲᔫᖅᑕᐅᔾᔪᑎᒃᓴᖏᓄᓪᓗ ᐊᖏᕈᒻᒥᑦ ᓴᖅᑭᔮᖅᑎᑦᑎᓂᕐᒧᑦ ᐃᓄᐃᑦ ᓯᕗᓕᖅᑎᐅᓂᖏᓐᓄᑦ ᐅᒥᐅᕐᔪᐊᓂᑦ ᑯᐃᓐ ᐅᒥᐊᖁᑖᓂᑦ ᐃᕆᐸᔅᒥᑦ (HMS Erebus) ᐊᒻᒪ ᑯᐃᓐ ᐅᒥᐊᖁᑖᓂᑦ ᑎᐅᕈᕐᒥᑦ (HMS Terror) ᑲᓇᑕᒥ ᐃᑦᑕᕐᓂᓴᖃᕐᕕᖏᓐᓂ.
ᕗᕌᖕᒃᓕᓐ ᕿᓂᖅᑕᐅᓂᖓ
1845−ᒥ, ᕗᕌᖕᒃᓕᓐ ᖃᐅᔨᓇᓱᐊᖅᑎᖏᒃ – ᒪᕐᕉᒃ ᐳᕆᑎᔅ ᐅᓇᑕᖅᑐᒃᓴᑦ ᐅᒥᐊᕐᔪᐊᖏᑦ 129−ᓂᒃ ᐱᓕᕆᔨᖃᖅᑐᑎᒃ ᑯᐃᓐ ᐅᒥᐊᖁᑖ ᐃᕆᐸᔅ (HMS Erebus) ᐊᒻᒪ ᑯᐃᓐ ᐅᒥᐊᖁᑖ (HMS Terror) – ᐅᑭᐅᖅᑕᖅᑐᓕᐊᖅᑐᑎᒃ ᐊᓯᐅᓚᐅᕐᓯᒪᔪᑦ ᕿᓂᖅᑎᓪᓗᒋᑦ ᐅᑭᐅᖅᑕᖅᑑᑉ ᑕᕆᐅᖓᑕ ᓱᓪᓗᖓᓂᑦ.
ᐊᒥᓱᐃᖅᓱᖅᑐᑎᒃ ᐊᕐᕌᒍᒐᓴᖕᓄᓪᓗ ᕿᓂᖃᑦᑕᕋᓗᐊᖅᑎᓪᓗᒋᑦ ᐅᒥᐅᕐᔪᐊᕕᓃᓐᓂᑦ ᐅᕝᕙᓘᓐᓃᑦ ᓇᓗᓇᐃᕈᑎᒃᓴᓂᒃ ᕗᕌᖕᒃᓕᓐ ᐱᓕᕆᔨᒋᓚᐅᕐᑕᖏᓪᓗ ᖃᓄᐃᓕᓐᖓᓐᓂᕆᓚᐅᕐᑕᖏᓐᓂᑦ, ᕿᓂᕐᑐᑦ ᑲᔪᓯᑦᑎᐊᖃᑦᑕᓚᐅᙱᑦᑐᑦ. ᕿᓂᕐᑐᑦ ᕗᕌᖕᒃᓕᓐ ᐅᒥᐊᕐᔪᐊᖁᑎᖏᓐᓂᑦ ᐃᑲᔪᓚᐅᖅᐳᖅ ᓄᓇᙳᐊᓕᐅᕈᓐᓇᕐᓯᓪᓗᑎᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᑕᐃᒪᓕ, ᑕᓪᓗᕈᑎᐅᑉ ᐃᒪᖓ ᐃᖏᕋᕐᕕᒃᓴᐅᓂᖓ ᐅᒥᐊᕐᔪᐊᒃᑯᑦ ᓇᓂᔭᐅᓕᓚᐅᖅᑐᖅ ᓇᓗᓇᐃᖅᑕᐅᓪᓗᓂᓗ.
ᓂᐸᕐᒪᑎᒃ ᑖᒃᑯᐊᒃ ᒪᕐᕉᒃ ᐅᒥᐊᕐᔪᐊᒃ 129−ᓂᒃ ᐊᖏᔪᖅᑲᐅᑎᖃᖅᑐᑎᒃ ᐊᒻᒪ ᐊᖑᑎᓂᒃ ᑭᒃᑯᑐᐃᓐᓇᕐᓄᑦ ᑐᓴᖅᑕᐅᔪᒪᓕᓚᐅᕐᐳᑦ ᐅᔾᔨᕆᔭᐅᓇᓱᐊᓕᕐᑐᑎᓪᓗ 160 ᐅᑭᐅᑦ ᐅᖓᑖᓄᑦ. ᐊᕐᕌᒍᐃᑦ, ᐊᔾᔨᒌᙱᑦᑐᑦ ᑭᒃᑯᑐᐃᓐᓇᐃᑦ ᐱᓕᕆᖃᑎᒌᓪᓗ ᖃᐅᔨᓇᓱᐊᖃᑦᑕᓚᐅᕐᐳᑦ ᑲᖐᓐᓇᖅᑐᓂᑦ ᖃᐅᔨᒍᑎᑦᓴᓂᑦ, ᐋᖅᑭᒃᓱᐃᓪᓗᑎᒃ ᓇᖕᒥᓂᖅ ᑐᑭᓯᓱᕆᔭᒥᓂᑦ ᕿᓂᕆᐊᖃᑦᑕᓚᐅᕐᑐᑦ. 1992-ᒥ, ᐃᑦᑕᕐᓂᓴᓕᕆᔩᑦ ᓇᓗᓇᐃᒃᑯᑎᖅᑐᐃᔩᓪᓗ ᑲᑎᒪᔨᖏᑦ ᑲᓇᑕᒥ ᑎᒃᑯᐊᖅᓯᓚᐅᖅᐳᑦ ᐅᒥᐊᕐᔪᐊᕕᓃᓐᓂᒃ ᑯᐃᓐ ᐅᒥᐊᖁᑖᓂᑦ ᐃᕆᐸᔅᒥᑦ (HMS Erebus) ᐊᒻᒪ ᑯᐃᓐ ᐅᒥᐊᖁᑖᓂᑦ ᑎᐅᕈᕐᒥᑦ (HMS Terror) ᑲᓇᑕᒥ ᐃᑦᑕᕐᓂᓴᖃᕐᕕᕈᑯᔭᐅᓪᓗᑎᒃ ᓴᐳᔾᔨᔾᔪᑎᒃᓴᓂᒃ ᓇᓂᔭᐅᓐᓂᖅᐸᑕ. ᑖᓐᓇ ᑎᒃᑯᐊᖅᑕᐅᓂᖏᒃ ᐃᓚᖃᖅᑐᑎᒃ 1997-ᒥ ᐊᖏᖃᑎᖃᕐᓂᖓᓂᑦ ᐳᕆᑎᔅ ᒐᕙᒪᖏᓐᓂᒃ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐱᓕᕆᐊᒃᓴᖃᖅᑎᑦᑎᓚᐅᖅᐳᑦ ᓇᓂᓯᓇᓱᒃᑐᑎᒃ ᓴᐳᔾᔨᔪᒪᓪᓗᑎᓪᓗ ᐅᒥᐊᕐᔪᐊᓐᓂᒃ.
2008−ᒥ, ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐃᒪᐅᑉ ᐃᖅᑲᖓᓂ ᐃᑦᑕᕐᓂᓴᓕᕆᓂᕐᒧᑦ ᐱᓕᕆᖃᑎᒌᑦ, ᐃᑲᔪᖅᓱᖅᑕᐅᓪᓗᑎᒃ ᐊᔾᔨᒌᙱᑦᑐᓄᑦ ᐱᓕᕆᔨᐅᖃᑎᖏᓐᓄᑦ, ᐱᒋᐊᓚᐅᖅᐳᑦ ᐊᕐᕌᒍᒐᓴᕐᓄᑦ ᒫᓐᓇᓕᓴᕐᓂᒃ ᕿᓂᕈᑎᖃᖅᑐᑎᒃ. ᓴᐱᓕᖅᑕᐃᓕᓂᖅ, ᐱᓕᕆᔾᓱᑎᖃᑦᓯᐊᕐᓂᖅ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᑦ ᖃᐅᔨᔾᔪᑕᐅᔪᓐᓇᖅᓯᓚᐅᖅᐳᑦ ᑯᐃᓐ ᐅᒥᐊᖁᑖᓂᑦ ᐃᕆᐸᔅᒥᑦ (HMS Erebus) ᐊᒻᒪ ᑯᐃᓐ ᐅᒥᐊᖁᑖᓂᑦ ᑎᐅᕈᕐᒥᑦ (HMS Terror) 2016-ᒥ. ᐅᓂᒃᑳᖅᑕᐅᓂᑯ ᕗᕌᖕᒃᓕᓐ ᕿᓂᖅᑎᓪᓗᒋᑦ ᐅᕙᓂ ᐅᖃᓕᒫᖅᑕᐅᔪᓐᓇᖅᐳᑦ.
