erebus-2020-inuktitut

ᑲᓇᑕᒥ ᒐᕙᒪᖓᑦ ᐊᒻᒪ ᐃᓄᐃᑦ ᐱᖁᑎᖏᓐᓂᒃ ᓇᑦᓯᖅᑐᖅᑎᒃᑯᑦ ᑐᓴᖅᑎᑦᓯᕗᑦ ᓄᑖᒥᒃ ᐱᖁᑎᑐᖃᖅᓂᑦ ᐅᒦᔭᕈᑕᐅᔪᕕᓂᖅ ᕗᕋᐃᖕᓕᓐ ᐊᐅᓚᖅᓂᖓ ᓇᓂᓯᕕᐅᓂᖓᓂᒃ

ᓄᒡᑕᑦ ᓇᔅᕙᐅᓂᖏ ᑕᒡᕙᓂ ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪ ᑯᐄᓐ ᐅᒥᐅᖁᑖ ᑎᐅᕐᕈᕐ ᐃᑦᑕᕐᓂᓴᖃᕐᕖᑦ ᑲᓇᑕᒥ ᐃᓂᖏ ᑎᑎᖅᑕᐅᔪᑦ ᐃᓚᒐ ᒥᕐᖑᐃᓯᕐᕖᒃ ᑲᓇᑕᐅᑉ ᐊᑐᑦᑎᐊᕐᓂᖅᐹᑦ ᕗᕋᐃᖕᓕᓐ ᕿᓂᖅᑕᐅᓂᖏᓄᑦ ᐊᐅᓚᕆᐊᑦ ᐅᑉᓗᒥᓄᑦ

ᐊᖏᓂᖅᐹᖑᖃᑕᐅᓪᓗᓂ ᐱᔭᕐᓂᖏᓐᓂᖅᐹᖑᓪᓗᓂ ᐃᒪᐅᑉ ᐃᖅᑲᖓᓂ ᐃᑦᑕᕐᓂᓴᑐᖃᓕᕆᓂᖅ ᑲᓇᑕᒥᑦ ᐱᐅᓯᐅᓯᒪᓪᓗᓂ, ᑲᓇᑕᐅᑉ ᒥᕐᖑᐃᓯᕐᕕᓕᕆᔨᒃᑯᖏᑦ ᐊᒻᒪᓗ ᐃᓄᐃᑦ ᐱᓕᕆᖃᑎᒌᒃᓯᒪᕗᑦ ᑲᑐᔾᔨᖃᑎᒌᒃᖢᑎᒃ ᕿᒥᕐᕈᓂᕐᒥᒃ ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪ ᑯᐄᓐ ᐅᒥᐅᖁᑖ ᑎᐅᕐᕈᕐ - ᐅᓂᒃᑲᐅᓯᐅᓯᒪᐃᓐᓇᑦᑑᒃ ᐅᒥᐊᕐᔪᐋᒃ 1845ᒥᑦ ᕗᕋᐃᖕᓕᓐ ᐊᐅᓚᖅᓂᖓ ᐊᐅᓪᓚᖅᑐᒃ ᐃᖕᓚᓐᒥᑦ ᓇᓂᓇᓱᒃᖢᒍ ᑖᒻᓇ ᐅᑭᐅᖅᑕᖅᑐᒥ ᐊᑉᖁᑎᖓ ᑕᕆᐅᒃᑯᑦ ᐅᓪᓗᒥᐅᓕᖅᑐᖅ ᑕᐃᔭᐅᓕᕐᑐᒥᒃ ᑲᓇᑕᐅᑉ ᐅᑭᐅᖅᑕᖅᑐᖓ ᐊᒻᒪᓗ ᓄᓇᕗᑦ.

ᐅᑉᓗᒥ, ᑖᓐᓇ ᓇᓐᖕᒐᕐᓇᖅᑐᖅ ᔭᓇᑕᓐ ᕕᓪᑭᓐᓴᓐ, ᒥᓂᔅᑕᐅᔪᖅ ᐊᕙᑎᓕᖁᑎᑦ ᐊᒻᒪ ᓯᓚᐅᑉ ᐊᓯᑦᔨᖅᓂᖓ ᐊᒻᒪ ᒥᓂᔅᑕᐅᔪᖅ ᐱᓕᕆᐊᓕᒃ ᒥᕐᖑᐃᓯᕐᕖᑦ ᑲᓇᑕᒥ, ᐱᖃᑎᒋᑉᓗᒍ ᐸᒻᒥᓚ ᒍᕌᔅ, ᐊᖓᔪᖃᖅ ᑖᑉᑯᓄᖓ ᐃᓄᐃᑦ ᐱᖁᑎᑐᖃᖏ ᑎᒍᒥᐊᖅᑎᑦ, ᐊᒻᒪ ᓯᑕᓐᓕ ᐊᓇᑉᓚᒃ, ᐊᖓᔪᖃᖅ ᑖᑉᑯᓄᖓ ᕿᑎᑦᒥᐅᑦ ᐃᓄᐃᑦ ᑲᑐᑦᔨᖃᑎᒌᑦ, ᑕᓗᐃᖅᑕᖓ ᓄᑖᖅ ᓇᒡᕙᐅᔪᖅ ᑲᑐᑦᔨᖃᑎᒋᒃᖢᑎᒃ ᐱᖁᑎᑐᖃᑦ ᑕᒡᕙᖓᑦ ᑯᐄᓐ ᐅᒥᐅᖁᑖ ᐃᕆᐸᔅ ᑕᒡᕙᓂ ᒥᕐᖑᐃᓯᕐᕖᑦ ᑲᓇᑕᐅᑉ ᓄᖑᑦᑕᐃᓕᕖᑦ ᖃᐅᔨᓴᐃᕕᖓ ᐋᑐᕙᒥ.

ᐊᖅᑭᒃᓱᐃᓂᖅ ᑕᑯᔭᐅᓕᒪᖏᑦᑐᒥᒃ ᓯᕗᓪᓕᖅᐹᑦᑎᐊᒥᒃ ᖃᐅᔨᔭᐃᓯᒪᓂᖓᓂᒃ ᐃᓗᐊᓂ ᑖᑉᓱᒪ ᑯᐄᓐ ᐅᒥᐅᖁᑖ ᑎᐅᕐᕈᕐ, ᒥᕐᖑᐃᓯᕐᕖᑦ ᑲᓇᑕᐅᑉ ᐃᒪᐅᑉ ᐃᓄᐊᓂ ᐃᓂᑐᖅᓕᑐᖃᓕᕆᔨᑦ ᐱᓕᕆᖃᑎᒌᑦ ᐃᑲᔪᖅᑎᒋᑉᓗᒋᑦ ᐃᓄᐃᑦ ᐱᑖᖅᑕᖏ ᐅᖓᑖᓂ 350 ᐱᖁᑎᑐᖃᑦ ᑕᒡᕙᖓ ᑯᐄᓐ ᐅᒥᐅᖁᑖ ᐃᕆᐸᔅ, ᐃᓚᐅᑎᑦᓗᒋᑦ ᐊᑦᑕᑕᖏᑦ ᑕᑉᓱᒪᖓ ᓘᑎᓇᑦ ᐊᑕᓂᐅᖃᑕᐅᔪᑉ ᐊᓐᓄᕋᖏᓂᑦ ᐊᒻᒪ ᓯᖁᒥᓚᑦ ᐊᓪᓕᕋᐅᔭᑦ. ᐊᑕᐅᓯᖅ ᑐᓴᕈᒥᓇᕐᑐᖅ ᐊᒃᓱᖅᔪᒥᑦᔪᑎᖓ ᑖᑉᓱᒪ ᐃᓂᑐᖅᓕᑐᖃᑦ ᐃᓚᐅᑉ ᐃᓗᐊᓄᐊᕐᓂᖅ ᐱᑖᒐᐅᓂᖏ ᖃᑉᓯᑦ ᐱᖁᑎᑦ ᐱᖁᑎᒋᔭᖏ ᐃᑦᒪᓐᑦ ᕼᐅᐊᕐ, ᑖᒻᓇ ᐅᒥᐊᓕᐅᑉ ᐃᑲᔪᖅᑎᖓ, ᐃᓚᐅᑎᑦᓗᒍ ᐃᒪᓚᐃᔭᐅᑦ ᓇᓄᒃᑎᕈᑦ ᐊᓪᒐᒃᒥᑦ ᐴᔾᔪᖓᓂᑦ ᑎᑎᖅᓯᒪᓕᒃ. ᑖᑉᑯᐊᑦ ᐃᓂᑐᖅᓕᑐᖃᑦ ᐱᓕᕆᖃᑎᒌᑦ ᐱᑕᖅᑕᖏ ᓱᓇᑦ ᑕᒪᑯᐊᑐᑦ ᓄᔭᖅᓄᑦ ᐃᓚᐃᒍᑦ ᐱᖃᕐᑐᖅ ᕿᑉᓕᖅᓴᖅᓯᒪᔪᖅ ᕿᔪᒃᒥᒃ ᑎᒍᖅᐱᓕᒃ ᐊᒻᒪ ᐲᑭᐅᑉ ᐅᕙᓗᓃᑦ ᐳᐊᑭᐸᐃᓐ ᕿᕋᑕᔪᑦ ᒥᖁᖏᓂᒃ ᐃᓚᐃᒍᑎᑕᓕᒃ, ᑖᒻᓇᓗᑦᑕᐅᖅ ᕿᔪᒃᓄᑦ ᑎᑎᕋᐅᑎᑦ ᑎᑎᕋᐅᑎᖃᖅᕕᒃ ᐴᖑᔪᖅ.

ᐱᖓᓱᑦ ᐱᓇᓱᐊᕈᓰᑦ ᖃᖏᖅᓯᒪᓕᖅᑐᑦ ᐅᑭᐊᒃᓴᖓᓂ 2019, ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᐃᒪᐅᑉ ᐃᓗᐊᓄᑦ ᐃᓂᑐᖅᓕᑐᖃᓕᕆᔨᑦ ᐱᓕᕆᖃᑎ ᐱᔭᕇᖅᓯᓚᐅᖅᑐᑦ 93 ᐊᖃᐅᒪᓂᕐᓂᖅ ᑯᐄᓐ ᐅᒥᐅᖁᑖ ᐃᕆᐸᔅ, 110 ᐃᑲᕐᕋᓗᐊᓂᒃ ᐃᒪᐅᑉ ᐊᑖᓂᖢᑎᒃ. ᐊᔾᔨᒌᖏᑦᑐᓂᒃ ᐱᐅᓯᕐᓂᒃ ᐊᑐᖅᖢᑎᒃ, ᑕᒪᖏᓐᓂᒃ ᐱᐅᓯᑐᖃᖅᑎᒍᑦ ᐊᒻᒪᓗ ᓄᑖᖑᔪᓂᒃ ᐊᔾᔨᐅᖏᑦᑐᓂᒃ ᐅᐸᒍᓯᕐᓂᒃ ᐊᑐᖅᖢᑎᒃ, ᓴᐅᔭᐅᓯᒪᔪᑦ ᐲᔭᖅᑕᐅᑦᓯᐊᓚᐅᖅᑐᑦ ᐃᑦᑕᕐᓂᓴᕐᓂᑦ ᓴᐅᔭᐅᓯᒪᔪᓂᒃ, ᓴᕿᑕᐅᑦᓯᐊᖅᖢᑎᒃ ᐃᓂᕕᓂᖏᑦ ᓇᓗᓇᐃᖅᑕᐅᓪᓗᑎᒃ ᐊᒻᒪᓗ ᐊᔾᔨᓕᐅᖅᑕᐅᓪᓗᑎᒃ ᐱᐅᓕᔭᐅᑦᑎᐊᖅᖢᑎᒃ. ᐱᐅᓕᔭᐅᓯᒪᔪᑦ ᐃᑦᑕᕐᓂᓴᑐᖃᐃᑦ ᒫᓐᓇᐅᔪᖅ ᖃᐅᔨᓴᖅᑕᐅᓂᖃᖅᐳᑦ - ᐱᓕᕆᐊᖑᕙᓪᓕᐊᔪᑦ ᐃᓚᖃᖅᐳᑦ ᒪᑯᓂᖓ ᐱᖁᑎᐅᑉ ᖃᓄᐃᑦᑑᓂᖓ ᖃᓄᐃᓐᓂᖓ ᓇᓗᓇᐃᖅᑕᐅᓪᓗᑎᒃ ᐊᑐᓂᑦ ᐱᖁᑏᑦ ᑎᑎᕋᐅᔭᖅᑕᐅᓪᓗᑎᒡᓗ, ᑕᕐᕋᖅᑐᑦᑕᐅᓪᓗᑎᒃ ᐊᒻᒪᓗ ᐱᖁᑎᖃᕐᕕᖕᒥ ᐊᔾᔨᓕᐅᖅᑕᐅᓪᓗᑎᒃ. ᖃᐅᔨᓴᖅᑕᐅᓂᐅᔪᐃᑦ ᐱᔭᕇᖅᑕᐅᒃᐸᑕ, ᐃᑦᑕᕐᓂᓴᐃᑦ ᐱᖁᑎᑐᖃᐃᑦ ᓅᑕᐅᓚᖅᑐᑦ ᑲᓇᑕᒥ ᒥᕐᖑᐃᓯᕐᕕᒃᑯᑦ ᐱᑐᖃᐅᑯᑖᖅᑎᑦᓯᓂᕐᒧᑦ ᖃᐅᔨᓴᕐᕕᖓᓄᑦ ᑲᒪᒋᔭᐅᑦᓯᐊᕐᓗᑎᒃ ᓱᕋᒃᓴᕋᐃᑦᑐᓂᕐᑎᑕᐅᓗᑎᒃ.

ᑖᑉᑯᐊᑦ ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪ ᑯᐄᓐ ᐅᒥᐅᖁᑖ ᑎᐅᕐᕈᕐ ᓄᓇᖅᔪᐊᖅᒥ ᐊᑐᖅᓯᒪᔪᑐᖃᑦ ᐃᓂᖓ ᓯᕗᓪᓕᖅᐸᖅ ᐃᑲᔪᖅᑎᒋᒃᖢᑎᒃ ᐊᐅᓚᑕᐅᔪᖅ ᓄᓇᖅᔪᐊᖅᒥ ᐊᑐᖅᓯᒪᔪᑐᖃᑦ ᐃᓂᖓ ᓄᓇᕗᑦᒥ. ᐃᓄᐃᑦ ᐊᖏᔪᒥᒃ ᑐᓂᓯᓚᕆᒃᓯᒪᙵᔪᑦ ᑖᑉᓱᒧᖓ 2019 ᐃᓂᖅᓂᕐᒧᑦ ᐊᐅᓚᕆᐊᖅ. ᐅᓇ ᐃᓚᖃᕐᑐᖅ ᑖᒻᓇ ᓴᓇᕆᔭᖓ ᔮᓇᑕᓐ ᐳᑭᕐᓇᖅ, ᐃᓄᒃ ᐅᖅᓱᖅᑑᖅᒥᑦ ᑖᑉᑯᓄᖓ ᒥᕐᖑᐃᓯᕐᕖᑦ ᑲᓇᑕᒥ ᐃᒪᐅᑉ ᐃᓗᐊᓂ ᐃᓂᑐᖅᓕᑐᖃᓕᕆᔨᑦ ᐱᓕᕆᖃᑎᒌᑦ ᑖᒻᓇᐅᑦᓗᓂ ᐃᓂᑐᖅᓕᑐᖃᓕᕆᔨᑦ ᐃᑲᔪᖅᑎᖓ ᐃᓚᖃᖅᑎᑦᓗᒍ ᐱᓕᕆᐊᕆᓂᖏ ᑐᑭᓕᕆᒃᑎᑕᖅᓂᖏ ᑎᑎᕋᖅᐸᓕᐊᓂᖏᓗ ᐱᖁᑎᑐᖃᑦ ᐱᑖᒐᐅᔪᑦ ᑕᒡᕙᖓᑦ ᑯᐄᓐ ᐅᒥᐅᖁᑖ ᐃᕆᐸᔅ. ᓱᓕᒃᑲᓐᓂᖅ, ᐃᓄᐃᑦ ᒥᐊᓂᖅᓯᔨᐅᔪᑦ ᐱᓕᕆᑦᔪᑎᑦ, ᐃᓚᐅᔪᑦ ᐃᓄᐃᑦ ᐅᖅᓱᖅᑑᖅᒥᑦ, ᐊᑐᓕᖅᓯᒪᔪᑦ ᑕᐃᒪᖓᑦ 2017 ᐊᒻᒪ ᓯᕗᓕᖅᓂᖏ ᓴᐳᒻᒥᔭᐅᓂᖏᑦ ᐊᒻᒪ ᒥᐊᓂᕆᓂᖏ ᕗᕋᐃᖕᓕᓐ ᐅᒦᔭᕈᑎᖏ ᐊᑐᖅᑎᑦᓗᒍ ᓯᖁᖃᕈᐃᖅᓂᖓ ᐊᐅᔭᖓᓂ ᐃᓚᒋᑉᓗᒋᑦ ᐃᑲᔪᕐᓂᖅ ᐃᓚᓕᐅᑎᔭᖅᓂᖏ ᐃᓄᐃᑦ ᖃᐅᔨᒪᓂᖏ ᑖᑉᑯᓄᖓ ᒥᕐᖑᐃᓯᕐᕖᑦ ᑲᓇᑕᐅᑉ ᐊᐅᓚᑦᑎᓂᖏᓄᑦ.

ᓇᓂᔭᐅᓯᒪᔪᑦ ᑯᐄᓐ ᐅᒥᐅᖁᑖ ᐃᕆᐸᔅ 2019ᖑᑎᓪᓗᒍ ᕗᕋᐃᖕᓕᓐ ᕿᓂᕐᑕᐅᑎᓪᓗᒍ ᐃᑲᔪᕐᓂᖃᕐᓂᐊᖅᐳᑦ ᑐᑭᓯᕙᓪᓕᕐᓂᕐᒥᒃ ᐱᐅᓯᐅᓯᒪᔪᕕᓂᑐᖃᕐᒥᒃ ᐊᒻᒪᓗ ᐃᓄᐃᑦ ᖃᐅᔨᓯᒪᔭᖏᓐᓂᒃ ᕗᕋᐃᖕᓕᓐ ᐊᐅᓪᓚᕐᓂᕕᓂᖓᓂᒃ ᐊᒻᒪᓗ ᐃᑲᔪᕐᓂᖃᕐᓂᐊᖅᑐᑦ ᓴᕿᑎᑦᓯᓂᕐᒥᒃ ᑐᑭᓯᓇᑦᓯᐊᕐᓂᕐᓴᒥᒃ ᑕᑯᔭᒃᓴᐅᓕᕐᓂᕐᒥᒃ ᐃᓅᕕᐅᔪᕕᓂᕐᓂᒃ ᐃᒡᓗᕈᓯᕐᓂᒃ ᐊᒻᒪᓗ ᖃᓄᐃᑑᓂᕐᒪᖓᑕ ᐅᒥᐊᕐᔪᐊᕐᒦᑐᑦ ᐅᒥᐊᕐᔪᐊᑉ ᐊᑎᐊᓂ. ᐃᓚᓕᐅᔭᐅᒃᐸᑕ ᓇᓂᔭᐅᓯᒪᔪᐃᑦ ᑯᐄᓐ ᐅᒥᐅᖁᑖ ᑎᐅᕐᕈᕐ, ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᓴᕿᑎᑦᓯᔪᒪᓪᓚᕆᒃᐳᑦ ᐊᒥᓱᓂᒃ ᖃᐅᔨᒪᔭᐅᖏᑦᑐᓂᒃ ᕗᕋᐃᖕᓕᓐ ᐅᓂᒃᑲᐅᓯᕐᓂᒃ, ᐃᓚᖃᕐᓗᑎᒃ ᓱᓕᔪᖑᐊᓂᒃ ᐊᑑᑎᔭᐅᔪᕕᓂᕐᓂᒃ ᕗᕋᐃᖕᓕᓐ ᐅᒥᐊᕐᔪᐊᑯᖃᑎᕕᓂᖏᑦ ᐊᒻᒪᓗ ᐃᓄᐃᑦ.

ᑖᑉᑯᐊᑦ ᑲᕙᒪᑦᑯᑦ ᑲᓇᑕ ᐃᓕᑕᕆᔭᖏ ᐊᑐᑎᖃᖅᑎᐊᓚᕆᒃᓂᖏ ᐱᓕᕆᐊᖏ ᐃᓄᐃᑦ, ᑖᑉᑯᐊᑦ ᑲᕙᒪᑦᑯᑦ ᓄᓇᕗᑦ, ᐊᒻᒪ ᑕᒪᐃᑕ ᑲᑐᑦᔨᖃᑎᒋᑦ, ᓇᒡᕙᐅᓂᖏᓄᑦ ᑖᑉᑯᐊᑦ ᐅᒦᔭᕈᑕᐅᔪᑦ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪ ᑯᐄᓐ ᐅᒥᐅᖁᑖ ᑎᐅᕐᕈᕐ.

ᐅᖃᖅᑕᐅᓯᒪᔪᑦ

“ᐊᒃᓱᐊᓗᒃ ᐱᓕᕆᓇᓚᕆᒃᓯᒪᔪᖅ ᐊᔾᔨᖃᖏᑦᑐᓂᒃ ᐊᕋᒍᒧᑦ ᐃᓂᑐᖅᓕᑐᖃᓄᑦ ᖃᐅᔨᓴᐃᓂᖅᒧᑦ ᑕᑉᑯᓇᓂ ᐅᒦᔭᕈᑕᐅᔪᓂ ᑖᑉᑯᓄᖓ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪ ᑯᐄᓐ ᐅᒥᐅᖁᑖ ᑎᐅᕐᕈᕐ. ᓄᓇᖅᔪᐊᖅᒥ ᐊᑐᖅᓯᒪᔪᑐᖃᓄᑦ ᐃᓂᖓᓂ. ᖁᔭᒋᓚᕆᒃᐸᑲ ᑕᒪᐃᑦᓄᑦ ᐱᖃᑕᐅᓯᒪᔪᑦ. ᑖᑉᑯᐊᑦ ᑲᕙᒪᑦᑯᑦ ᑲᓇᑕ ᓴᕆᒪᓱᓚᕆᒃᑐᑦ ᐱᓕᕆᖃᑎᒋᔪᖕᓇᖅᓂᖏ ᐃᑲᔪᖅᑎᒋᒃᖢᑎᒃ ᐃᓄᐃᑦ ᑲᑐᑦᔨᖃᑎᒌᑦ ᐊᐅᓚᓂᖏᓄᑦ ᐊᒻᒪ ᕿᓂᖅᓂᖏᓄᑦ ᑕᒪᑯᐊᑦ ᐊᑐᖅᓯᒪᔪᑐᖃᑦ ᐃᓂᖏ, ᓂᕆᐅᑉᐳᒍᑦ ᐃᓚᒋᐊᖅᓂᖏ ᐊᕐᓕᒃᓇᖅᑐᑦ ᓇᒡᕙᐅᓂᖏ ᓯᕗᓂᒃᓴᓂ ᐊᕋᒍᓂ.”

ᒪᓕᒐᓕᐅᖅᑎ ᔭᓇᑕᓐ ᕗᐃᓪᑭᓐᓴᓐ, ᒥᓂᔅᑕ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒻᒪᓗ ᒥᓂᔅᑕ ᑲᒪᒋᔭᖃᖅᑐᖅ ᒥᕐᖑᐃᓯᕐᕖᑦ ᑲᓇᑕᐅᑉ

“ᕗᕋᓐᑭᓕᒧᑦ ᖃᐅᔨᒪᔨᑕᕆᔭᐅᓂᕐᒧᑦ ᑲᑎᒪᔨᕋᓛᕆᓚᐅᑲᒃᑕᖏᑦ ᖁᕕᐊᒋᔭᖃᒻᒪᕆᒃᐳᑦ ᓇᓂᓯᑦᑎᐊᖅᓯᒪᔪᒻᒪᕆᐊᓗᓂᖏᓐᓂᒃ ᐊᒻᒪᓗ ᐊᒐᒃᖢᑎᒃ ᓴᐅᔭᐅᓯᒪᔪᓂᒃ ᑕᒪᑐᒪᓂ ᐊᕐᕌᒍᒥᑦ ᑕᐃᑲᓂ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪ ᑯᐄᓐ ᐅᒥᐅᖁᑖ ᑎᐅᕐᕈᕐ ᐃᓂᖏᓐᓂᒃ ᑲᓇᑕᒥ ᐱᐅᓯᐅᔪᕕᓂᕐᓄᑦ ᐃᓂᒋᓕᖅᑕᖓᓐᓂ. ᐃᓄᐃᑦ ᑲᔪᓯᔪᒥᒃ ᐃᒪᐃᓕᐅᖅᑎᐅᓂᕐᒥᒃ ᐃᖃᓇᐃᔮᖃᕐᓂᐊᖅᑐᑦ ᕿᓂᕐᓂᕐᒥᒃ ᐊᒻᒪᓗ ᐊᐅᓚᑦᓯᓂᕐᒥᒃ ᐃᓂᐅᔪᒥᒃ ᐱᔭᕇᖅᓯᕙᓪᓕᐊᓂᑦᑎᓂ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐱᕙᓪᓕᕈᑕᐅᔪᓐᓇᖅᑐᓄᓪᓗ ᐊᖏᕈᑎᖓᓂ. ᐊᖏᓂᕆᔭᖓ ᐃᑦᑕᕐᓂᓴᐃᑦ ᓇᓂᔭᐅᓯᒪᔪᑦ 2019-ᒥᑦ ᐃᑲᔪᕐᓂᖃᕐᓂᐊᖅᑐᖅ ᓴᕿᑎᑦᓯᓂᕐᒥᒃ ᕗᕋᐃᖕᓕᓐ ᐊᐅᓪᓚᕐᓂᕕᓂᖓᑕ ᐅᓂᒃᑳᖓᓂᒃ, ᐊᒻᒪᓗ ᐃᓄᐃᑦ ᓄᓇᖏᓐᓂᒃ ᐅᒥᐊᕐᔪᐊᑉ ᐅᒦᔭᕈᑎᑦ ᐃᓂᒋᔭᖓᑦ, ᑲᓇᑕᒥᐅᓄᑦ ᐊᒻᒪᓗ ᓯᓚᖅᔪᐊᖅᒥᐅᓄᑦ.”

ᕗᕆᑦ ᐱᑐᓯᓐ, ᐃᒃᓯᕙᐅᑕᖅ, ᕗᕋᓐᑭᓕᓐᒧᑦ ᐅᖃᐅᔾᔩᒋᐊᖅᑏᑦ ᑲᑎᒪᔨᕋᓛᕆᓚᐅᑲᒃᑕᖓᑦ

“ᑲᑐᑦᔨᖃᑎᒋᑎᒍᑦ ᓇᒥᓂᖃᖅᑐᑎᒍᑦ ᑖᑉᑯᓂᖓ ᕗᕋᐃᖕᓕᓐ ᐱᖁᑎᑐᖃᓂᒃ, ᑖᑉᑯᐊᑦ ᐃᓄᐃᑦ ᐱᑦᖁᓯᑐᖃᖏᓂᒃ ᑎᒍᒥᐊᖅᑎᑦ ᖁᕕᐊᒧᒃᑐᑦ ᐱᓕᕆᐊᕆᓇᖅᓂᖏ ᓴᓇᔭᖃᑎᒋᓂᖏ ᑲᕙᒪᑦᑯᑦ ᑲᓇᑕᒥ ᐊᑐᓚᕆᖁᑉᓗᒋᑦ ᐱᕈᖅᐸᓕᐊᓂᖏ ᐃᓂᑐᖅᓕᑐᖃᓂ ᑲᑎᑎᒐᐅᓂᖏ ᓴᐳᒻᒥᓯᒪᓂᖏᓄᑦ ᐊᑐᖃᑎᒋᒍᑕᐅᓂᖏᓗ ᐃᓄᖕᓄᑦ, ᑲᓇᑕᒥᐅᓄᑦ ᐊᒻᒪ ᓯᓚᖅᔪᐊᖅᒥᐅᓄᑦ. ᑖᑉᑯᐊᑦ ᐊᖏᓂᖏ ᓇᒡᕙᐅᔪᑦ ᐆᒪᓂ ᐊᕋᒍᒥ ᑕᒡᕙᓂ ᑯᐄᓐ ᐅᒥᐅᖁᑖ ᐃᕆᐸᔅ ᖁᕕᐊᓇᕐᑐᖅ ᐱᕙᓕᐊᓂᖓ ᐱᓕᕆᓇᖅᓂᑉᑎᖕᓂ ᑕᒡᕙᓂ ᐅᒦᔭᕈᑕᐅᔪᓂ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪ ᑯᐄᓐ ᐅᒥᐅᖁᑖ ᑎᐅᕐᕈᕐ ᓄᓇᖅᔪᐊᖅᒥ ᐊᑐᖅᓯᒪᔪᑐᖃᓂ ᐃᓂᖓ. ᐃᓚᕙᓕᐊᑎᑦᓗᒋᑦ ᐅᓂᑉᖃᐅᓰᑦ ᑖᑉᑯᓄᖓ ᕗᕋᐃᖕᓕᓐ ᐊᐅᓚᕆᐊᖓ ᐱᖃᑕᐃᓗ ᐃᓄᐃᑦ ᓴᕿᖅᐸᓕᐊᓂᖏ ᑕᒪᑯᓇᖓ ᑭᖑᓪᓕᖅᓂᑦ ᓇᒡᕙᐅᓂᖏᓂᑦ, ᑖᑉᑯᐊᑦ ᑎᒍᒥᐊᖅᑎᑦ ᐃᓚᓕᐅᑦᔭᐃᓇᖅᓂᐊᖅᑕᖏ ᐃᓄᐃᑦ ᖃᐅᔨᒪᔭᑐᖃᖏᑦ ᓄᖑᑦᑕᐃᓕᒪᓂᖏᓄᑦ, ᓴᕿᖅᑎᑕᒐᐅᓂᖏᓄᑦ ᐊᐅᓚᑕᐅᓂᖏᓗ ᑕᑯᐊᑦ ᐱᖁᑎᑐᖃᑦ ᑲᑐᑦᔨᖃᑎᒋᕗᑦᓗ ᒥᕐᖑᐃᓯᕐᕖᑦ ᑲᓇᑕ.”

ᕕᓪᓕᐊᒻ ᐱᕗᕐᕆᒡᑦ, ᐊᖓᔪᖃᖅ ᑐᑭᒧᐊᖅᑎ ᐃᓄᐃᑦ ᐱᑦᑯᓯᑐᖃᖏ ᑎᒍᒥᐊᖅᑎᑦ

“ᑖᑉᑯᐊᑦ ᕿᑎᖅᒥᐅᑦ ᐃᓄᐃᑦ ᑲᑐᑦᔨᖃᑎᒌᑦ ᖁᕕᐊᓱᓚᕆᒃᑐᑦ ᐊᑐᑦᑎᐊᖅᓂᖓᓄᑦ ᐆᒪᓂ ᐊᕋᒍᒥ ᕿᓂᖅᓂᖅᒧᑦ ᐊᐅᓚᕆᐊᖓᑦ ᐊᒻᒪ ᐳᓚᖅᓂᖓ ᐅᒦᔭᖅᑐᑦ ᐃᓂᖓᓄᑦ ᑖᑉᓱᒪ ᑯᐄᓐ ᐅᒥᐅᖁᑖ ᐃᕆᐸᔅ ᑖᑉᓱᒪᖓ ᐊᑦᕙᓐᑐᕐ ᑲᓇᑕ. ᓱᓕ ᐅᑕᕿᖏᓇᖅᑎᑦᓗᑕ ᐃᓂᖅᑎᒐᐅᓂᖓᓄᑦ ᑖᒻᓇ ᐃᓄᐃᑦ ᐊᒃᑐᐊᓂᖏ ᐃᖢᐊᖁᑎᒋ ᐊᖏᕈᑎᑦ, ᑖᑉᑯᐊᑦ ᕿᑎᖅᒥᐅᑦ ᐃᓄᐃᑦ ᑲᑐᑦᔨᖃᑎᒌᑦ ᐊᒻᒪ ᒥᕐᖑᐃᓯᕐᕖᑦ ᑲᓇᑕ, ᐅᖃᐅᔨᓂᖏᓄᑦ ᑖᑉᑯᓇᖓ ᕗᕋᓐᑭᓕᓐᒧᑦ ᐅᖃᐅᔾᔩᒋᐊᖅᑏᑦ ᑲᑎᒪᔨᕋᓛᕆᓚᐅᑲᒃᑕᖓᑦ, ᐃᑲᔪᖅᑎᒋᑦᑎᐊᖏᓇᖅᑐᑦ ᐊᐅᓚᓂᖏᓄᑦ ᐃᓚᖓ ᐊᔾᔨᑯᑕᖃᖏᑦᓂᖅᓴᖅ ᓄᓇᖅᔪᐊᖅᒥ ᐊᑐᖅᓯᒪᔪᑐᖓᖅ ᐃᓇᐃᑦ ᑲᓇᑕᒥ.”

ᓯᑕᓐᓕ ᐊᓇᑉᓚᒃ, ᐊᖓᔪᖃᖅ ᕿᑎᖅᒥᐅᑦ ᐃᓄᐃᑦ ᑲᑐᑦᔨᖃᑎᒌᑦ

“ᐊᐅᔭᐅᕋᑕᕐᑐᖅ ᐱᓕᕆᓂᐅᒪᐅᖅᑐᖅ ᑯᐄᓐ ᐅᒥᐅᖁᑖ ᐃᕆᐸᔅ ᐊᒃᓱᐊᓗᒃ ᐱᓕᕆᓂᖃᑦᑎᐊᖅᑐᒻᒪᕆᐊᓘᓚᐅᖅᐳᑦ ᐃᓚᖃᖅᖢᑎᒃ ᓂᕆᐅᒋᔭᐅᖏᓐᓇᖅᑐᒥᒃ ᐃᓂᒐᓂᒃ ᐊᒡᒐᒃᖢᑎᒃ ᐱᓕᕆᐊᖃᕐᓂᕐᒥᒃ - ᐊᒥᓱᓄᑦ ᐊᕐᕌᒍᓄᑦ ᐸᕐᓇᐃᓂᐅᓯᒪᔪᖅ ᐊᑑᑎᔭᐅᓪᓚᑕᕈᓐᓇᕐᓯᓪᓗᓂ. ᐊᒡᒐᖕᓂᖅ ᖃᐅᔨᔭᐅᓪᓚᕆᓚᐅᖅᐳᖅ ᓴᐅᔭᐅᕐᔪᐊᕐᓯᒪᓂᖏᓐᓂᒃ ᐃᑦᑕᕐᓂᓴᑐᖃᐃᑦ ᐱᖁᑎᑐᖃᐃᑦ ᐅᒥᐊᕐᔪᐊᒦᖏᓐᓇᖅᑐᑦ. ᐊᒡᒐᒃᐸᓪᓕᐊᓪᓗᑕ ᐅᒥᐊᕐᔪᐊᑉ ᐃᒡᓗᑕᖏᑦᑕ ᐃᓂᖏᓐᓂᒃ, ᐃᑦᑕᕐᓂᓴᑐᖃᐃᑦ ᐱᖁᑏᑦ ᓴᕿᑎᑦᓯᕙᓪᓕᐊᖏᓐᓇᓚᐅᖅᐳᑦ ᓇᖕᒥᓂᕆᔭᐅᔪᕕᓂᕐᓂᒃ ᐃᓄᖕᓄᑦ ᐅᒥᐊᕐᔪᐊᕐᒥᑦ ᐃᖃᓇᐃᔭᖅᑎᐅᔪᕕᓂᕐᓄᑦ.”

ᐸᐃᔭᓐ ᕼᐃᐅᕆᔅ, ᑐᑭᒧᐊᖅᑎᑦᓯᔨ ᐱᓇᓱᐊᖅᑕᐅᔪᒧᑦ, ᑲᓇᑕᒥ ᒥᕐᖑᐃᓯᕐᕕᒃᑯᓐᓄᑦ

“ᐆᒪᓂ ᐊᐅᔭᖓᓂ ᐊᑐᑎᐊᓚᕆᒃᑐᖅ ᒪᓂᖓᒥ ᐊᐅᓚᑕᐅᓂᖏᑦ ᑖᑉᑯᐊᑦ ᐅᒦᔭᕈᑕᐅᔪᑦ ᑯᐄᓐ ᐅᒥᐅᖁᑖ ᐃᕆᐸᔅ ᐃᓚᖃᕐᑐᑦ ᓂᕆᐅᒋᔭᐅᓚᕆᒃᓂᖏ ᐱᒋᐊᖅᓂᖓ ᐃᓂᖓᓄᑦ ᐊᒧᓯᑦᑕᖅᓂᖏ ᐱᓕᕆᐊᖑᔪᑦ−ᑖᒻᓇ ᐊᑐᓚᕆᒃᓂᖓ ᐊᕋᒍᓄᑦ ᐊᒃᓱᒪᕆᐊᓗᒃ ᐃᖢᐊᖅᓴᒐᐅᓂᖓ ᐸᖅᓇᒍᑕᐅᓂᖏ. ᐊᒧᓯᑦᑕᖅᓂᖏ ᓇᓗᓇᐃᕈᑕᐅᓇᕆᖅᑐᑦ ᓂᕆᐅᒋᔭᐅᔪᑦ ᐊᒥᓲᓂᑦ ᐱᖁᑎᑐᖃᑦ ᓱᓕ ᐅᒥᐊᖅᔪᐊᓂᑦᑐᑦ. ᕿᓂᖅᑎᑦᓗᑕ ᐃᓚᖏᓄᑦ ᐃᒡᓗᕈᓯᐅᔪᑦ ᐃᓂᖏᓄᑦ, ᑕᒪᑯᐊᑦ ᐱᖁᑎᑐᖃᑦ ᓴᕿᖅᑎᑕᖏ ᐃᓐᒥᒍᕈᑎᓚᕆᖏ ᑕᑯᑲᐃᓇᖅᓃᑦ ᑭᓲᒃᒪᖓᖏ ᐃᖃᓇᐃᔭᖅᑎᑦ.”

ᖃᐅᔨᑎᑦᓯᑲᐅᑦᑎᕈᑏᑦ

• ᐋᒋᓯ 2019-ᒥᑦ, ᒥᕐᖑᐃᓯᕐᕖᑦ ᑲᓇᑕᒥ ᓴᕿᑎᑦᓯᓚᐅᖅᐳᑦ ᐱᒻᒪᕆᖕᒥᒃ, ᑕᑯᔭᐅᓚᐅᖅᓯᒪᖏᑦᑐᒥᑦ video footage ᑯᐄᓐ ᐅᒥᐅᖁᑖ ᑎᐅᕐᕈᕐ ᐃᓚᖓᓂᒃ ᐊᖏᓂᖅᐹᖑᖃᑕᐅᔪᒥᒃ, ᐱᔭᕐᓂᖏᓐᓂᖅᐹᒥᒃ ᐃᒪᐅᑉ ᐊᑖᓂᑦ ᐃᑦᑕᕐᓂᓴᓕᕆᔪᓂᒃ ᑲᓇᑕᐅᑉ ᐱᐅᓯᕕᓂᑐᖃᖓᓂᒃ.
• ᑕᐃᒪᖓ 2018−ᒥᑦ, ᑕᒪᐃᑕ ᓄᑖᑦ ᓇᒡᕙᐅᔪᑦ ᕗᕋᐃᖕᓕᓐ ᐱᖁᑎᑐᖃᑦ ᑲᑐᑦᔨᖃᑎᒋᒃᖢᑎᒃ−ᓇᒥᓂᕆᔭᐅᔪᑦ ᑖᑉᑯᓇᖓ ᑲᕙᒪᑦᑯᑦ ᑲᓇᑕ ᐊᒻᒪ ᐃᓄᐃᑦ.
• ᕗᕋᐃᖕᓕᓐᒧᑦ ᐅᖃᐅᔾᔩᒋᐊᖅᑏᑦ ᑲᑎᒪᔨᕋᓚᕆᓚᐅᑲᒃᑕᖏᑦ ᐅᑯᐊᓂᖓ ᐃᓚᖃᖅᐳᑦ ᓄᓇᓕᖕᓂ ᐃᓚᐅᔪᑦ ᐊᒻᒪᓗ ᑭᒡᒐᖅᑐᑦᑏᑦ ᕿᑎᕐᒥᐅᑉ ᐃᓄᐃᑦ ᑲᑐᔾᔨᖃᑎᒌᑯᖏᓐᓂ, ᐃᓄᐃᑦ ᐱᖁᑎᖏᓐᓂ ᓇᐅᑦᓯᑐᖅᑏᑦ, ᓄᓇᕗᑦ ᒐᕙᒪᖓ ᐊᒻᒪᓗ ᐱᖁᑎᑐᖃᓕᕆᔩᑦ ᐳᓚᕋᖅᑐᓕᕆᔨᒃᑯᓪᓗ, ᐅᖃᐅᔾᔩᒋᐊᖅᑏᑦ ᐊᐅᓚᑦᓯᓂᕐᒥᒃ ᕗᕋᓐᑭᓕᓐᓂ ᐅᒥᐊᕐᔪᐊᕕᓂᐊᓂᒃ ᓱᕋᒃᓯᒪᔪᒥᒃ ᐱᔭᕆᖅᑕᐅᓇᓱᖕᓂᖓᓂᒃ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐱᕙᓪᓕᕈᑕᐅᔪᓐᓇᖅᑐᓄᓪᓗ ᐊᖏᕈᑎᖓᓂᒃ ᑭᖑᓪᓕᖅᐹᖅᓯᐅᑎᖓᓂ ᐅᑯᐊ ᐊᑯᖕᖔᓂᑦ ᑲᓇᑕᒥ ᒥᕐᖑᐃᓯᕐᕕᒃᑯᑦ ᐊᒻᒪᓗ ᕿᑎᕐᒥᐅᑦ ᐃᓄᐃᑦ ᑲᑐᑦᔨᖃᑎᒌᑦ.
• ᑲᑐᑦᔨᖃᑎᒋᑉᓗᒋᑦ ᒥᕐᖑᐃᓯᕐᕖᑦ ᑲᓇᑕᒥ, ᑖᒻᓇ ᐊᑦᕕᓐᑐᕐ ᑲᓇᑕ ᐳᓚᕋᖅᑐᑦ ᐅᒥᐊᖅᔪᐊᖓᑦ ᐆᓯᓐ ᐃᓐᑎᕗᕐ (Ocean Endeavour) ᐱᐊᓂᒃᑕᖓ ᓯᕗᓪᓕᖅᐸᖅ ᐊᑐᑦᑎᐊᖅᑐᖅ ᐳᓚᕐᓂᖅ ᐳᓚᕋᖅᑐᓂᑦ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪ ᑯᐄᓐ ᐅᒥᐅᖁᑖ ᑎᐅᕐᕈᕐ ᓄᓇᖅᔪᐊᖅᒥ ᐊᑐᖅᓯᒪᔪᑐᖃᑦ ᐃᓂᖓ. ᐅᓯᐅᒋᔭᐅᔪᑦ ᐱᕕᒃᓴᖃᓚᐅᖅᓯᒪᔪᑦᓇᒥᓂᖅ ᑕᖁᓂᖏ ᐱᓕᕆᐊᖏ ᒥᓐᖑᐃᖅᓯᖅᕖᑦ ᑲᓇᑕᐅᑉ ᐃᒪᐅᑉ ᐃᓄᐊᓂ ᐃᓂᑐᖅᓕᑐᖃᑦ ᐱᓕᕆᖃᑎᒌᑦ ᐃᓕᑦᐸᓪᓕᖅᕕᒋᓂᖏ ᐱᖃᑎᒋᑉᓗᒋᑦ ᐃᓄᐃᑦ ᒥᐊᓂᖅᓯᔨᐅᔪᑦ.
• ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪ ᑯᐄᓐ ᐅᒥᐅᖁᑖ ᑎᐅᕐᕈᕐ ᐃᓂᖏᒃ ᓱᓕ ᑭᒃᑯᓕᒫᓄᑦ ᐅᑯᐃᖓᖏᒻᒪᑕ ᒫᓐᓇᐅᔪᖅ ᐱᔪᓐᓇᐅᑎᖃᕆᐊᖃᕐᓂᖏᓐᓄᑦ ᓴᐳᒻᒥᔭᐅᓯᒪᔪᐃᑦ ᐃᓂᖏᓐᓄᑦ ᐃᓯᕈᑎᒥᒃ. ᑕᐃᒪᐃᓐᓂᖓᓄᑦ ᐃᓄᐃᑦ ᐅᒪᔪᕋᓱᒡᕕᑐᖃᖏᑦ ᓴᐳᒻᒥᔭᐅᓂᖃᕐᒪᑕ ᓄᓇᕗᑦ ᐊᖏᖃᑎᒌᒎᑎᖓᓂ, ᐊᖏᖅᑕᐅᓯᒪᔾᔪᑎᖃᖏᓪᓗᓂ ᐃᓯᕐᓂᖅ ᐸᓯᔭᒃᓴᖑᕈᑎᑖᕈᓐᓇᕐᒪᑦ ᒪᓕᒡᓗᒍ ᑲᓇᑕᒥ ᒥᕐᖑᐃᓯᕐᕖᑦ ᒪᓕᒐᖓ.

ᑖᒃᑯᓄᖓᐅᓕᖓᔪᐃᑦ ᐱᑐᒃᓯᒪᕖᑦ

ᐅᓇ ᓇᕿᓪᓗᒍ ᑕᕐᕆᔭᕐᓴᖅ ᑯᐄᓐ ᐅᒥᐅᖁᑖ ᐃᕆᐸᔅ
ᑕᕐᕆᔭᕐᓇᖅ: ᒥᕐᖑᐃᓯᕐᕕᒃ ᑲᓇᑕᒥ ᓴᓇᔭᐅᓯᒪᔪᖅ ᑯᐄᓐ ᐅᒥᐅᖁᑖ ᑎᐅᕐᕈᕐ ᐃᓗᐊᓂ
ᐅᒥᐊᖅ ᑕᐃᕙᑦ ᑕᒻᓴᓐ – ᒥᕐᖑᐃᓯᕐᕕᒃ ᑲᓇᑕᐅᑉ ᖃᐅᔨᓴᕐᑎᖏᑕ ᐅᒥᐊᖓ
@PCArchaeology

ᖃᐅᔨᒋᐊᕐᕕᐅᔪᓐᓇᖅᑐᑦ

ᓱᐃᕋ ᑭᓪᓕ
ᑐᓴᒐᒃᓴᓕᐅᖅᑎ
ᐊᓪᓚᒃᕕᖓ ᒥᓂᔅᑕᐅᑉ ᐊᕙᑎᓕᕆᓂᕐᒧᑦ ᓯᓚᐅᓪᓗ ᐊᓯᔾᔨᖅᐸᓪᓕᐊᓂᖓᓄᑦ
819-271-6218
moira.kelly@canada.ca

ᐱᕙᓪᓕᐊᔪᓕᕆᔩᑦ
ᑲᓇᑕᐅᑉ ᒥᕐᖑᐃᖅᓯᕕᖓ
855-862-1812
pc.medias-media.pc@canada.ca