ᐱᕙᓪᓕᐊᔪᑎᒍᑦ ᓴᖅᑭᑎᑕᐅᔪᖅ

ᓄᑖᒃ ᑲᓇᑕᒥ ᒐᕙᒪᒃᑯᖏᓐᓄᑦ ᒪᓕᒐᓕᕆᔩᑦ ᓵᖓᓅᖅᑕᐅᒻᒪᑎᒃ ᓴᐳᒻᒥᔭᐅᖁᓗᒋᑦ ᑲᓇᑕᐅᑉ ᓄᓇᖓᓃᑦᑑᒃ ᑖᒃᑯᐊᓗ ᑕᑯᒥᓇᒻᒪᕆᑦᑑᖃᑕᐅᓂᖏᒃ ᐱᖁᔭᕐᔪᐊᑎᒍᑦ ᐱᐊᓂᒃᑕᐅᓂᐊᓕᕐᒪᑎᒃ ᐋᖅᑭᒃᑕᐅᒍᑎᖏᒃ ᐊᑲᒥ−ᐅᐱᔅᑰ−ᑲᑲᓱᒃ−ᒦᓕ ᖃᖅᑲᖏᑦ ᑲᓇᑕᒥ ᒥᕐᖑᐃᓯᕐᕕᒃᓴᖓᑕ ᓴᓂᕐᕙᒃᑕᐅᓯᒪᓂᖓ (Réserve de parc national Akami-Uapishkᵁ – KakKasuak – Monts Mealy) ᐊᒻᒪ ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᑕᕆᐅᕐᒥᐅᑕᐃᑦ ᓴᐳᑎᔭᐅᕕᖓ (Aire marine nationale de conservation Tallurutiup Imanga), ᓄᑖᙳᕆᐊᖅᑕᐅᓪᓗᑎᓪᓗ ᑭᒡᓕᖏᑦ ᑕᒃᑯᐊ 7−ᖁᔪᑦ ᑲᓇᑕᒥ ᒥᕐᖑᐃᓯᕐᕖᑦ ᐊᒻᒪ ᐊᑕᐅᓯᐅᑉ ᑲᓇᑕᒥ ᒥᕐᖑᐃᓯᕐᕕᑦᓴᖓᑕ ᓴᓂᕐᕙᒃᑕᐅᓯᒪᓂᖓ.

ᑲᓇᑕᒥ ᒥᕐᖑᐃᓯᕐᕖᑦ ᑯᐃᓐ ᓄᓇᖁᑎᖏᑦ ᑕᑯᒥᓇᖅᑐᒻᒪᕆᐅᕗᑦ ᓄᓇᖏᓪᓗ ᓴᐃᒻᒪᖅᑎᑕᐅᒪᑦᓯᐊᖅᑐᑎᒃ ᐊᓂᖅᓵᕕᑦᓯᐊᕙᐅᓪᓗᑎᓪᓗ. ᑕᑯᒥᓇᒻᒪᕆᓂᓐᖏᒃ ᐱᒐᓗᐊᖅᑎᓪᓗᒋᒃ ᐱᒻᒪᕆᐅᓂᖅᓴᐅᕗᖅ ᓴᐳᔾᔭᐅᓯᒪᒋᐊᖃᕐᓂᖏᒃ ᑲᓇᑕᒥ ᐊᑑᑎᖃᕐᓂᖏᓐᓄᑦ ᐊᑦᑐᐊᔪᓂᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓴᐳᔾᔭᐅᓂᒃᑯᑦ ᖃᓄᐃᖁᓇᒋᒃ, ᓴᓐᖏᔫᑦᓯᐊᖁᓪᓗᒋᓪᓗ ᐆᒪᔪᓐᓇᖅᑐᓕᒫᑦ ᐃᑲᔪᖅᓯᒪᔭᐅᖁᓪᓗᒋᑦ ᐊᓐᓇᐅᒪᔪᓐᓇᕐᓂᖏᑦ ᐅᑎᖅᐸᓪᓕᐊᑦᓯᐊᖁᓪᓗᒋᓪᓗ ᐆᒪᔪᐃᑦ ᐅᓗᕆᐊᓇᖅᑐᒦᑦᑐᑦ.

ᐅᓪᓗᒥ, ᒪᓕᒐᓕᐅᖅᑎ ᓯᑏᕙᓐ ᒍᐃᓪᕕᐅᓪᑦ, ᒥᓂᔅᑕᐅᔪᖅ ᐊᕙᑎᓕᕆᔩᑦ ᓯᓚᐅᓪᓗ ᐊᓯᔾᔨᐸᓪᓕᐊᓂᖓᓄᑦ ᒥᓂᔅᑕᐅᓪᓗᓂᓗ ᑲᒪᒋᔭᓕᒃ ᒥᕐᖑᐃᓯᕐᕕᓕᕆᔨᒃᑯᓐᓂᑦ ᑲᓇᑕᒥ, ᑐᓴᖅᑎᑦᑎᕗᖅ ᓴᖅᑭᑕᐅᓂᖓᓂᒃ ᐱᖁᔭᕐᔪᐊᑎᒍᑦ ᐃᓕᓴᕆᔭᐅᓪᓗᑎᒃ ᐊᖏᓪᓕᒋᐊᖅᑕᐅᓗᑎᓪᓗ ᓄᓇᐃ ᓴᐳᑎᔭᐅᕕᖏᑦ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐱᖁᔭᓕᐊᖑᓂᖓ ᒪᓕᒡᓗᒍ.

ᐱᖁᔭᕈᖅᑎᑕᐅᓂᖓ ᐱᐊᓂᒃᑕᐅᓂᐊᖅᑐᖅ ᓵᖓᓅᖅᑕᐅᓚᐅᖅᑎᓪᓗᒍ ᐃᓕᓴᕆᔭᐅᓕᕐᓗᓂ ᐊᑲᒥ−ᐅᐱᔅᑰ−ᑲᑲᓱᒃ−ᒦᓕ ᖃᖅᑲᐃᑦ ᑲᓇᑕᒥ ᒥᕐᖑᐃᓯᕐᕕᒃᓴᖓ ᓴᓂᕐᕙᒃᑕᐅᓯᒪᔪᖅ (Réserve de parc national Akami-Uapishkᵁ – KakKasuak – Monts Mealy) ᓛᐸᑐᐊᒥ ᐊᐅᓚᑕᐅᓕᕐᓗᑎᓪᓗ ᐱᖁᔭᑎᒍᑦ ᐊᑐᖅᑕᐅᒍᓐᓇᕐᓂᖓ ᐱᖅᑯᓯᑐᖅᑎᒍᑦ ᐊᑐᕈᒪᔪᓄᑦ ᓄᓇᖓᓂ ᑲᓇᑕᒥ ᒥᕐᖑᐃᓯᕐᕕᒃᓴᐅᑉ ᓴᓂᕐᕙᒃᑕᐅᒪᔫᑉ ᐃᓗᐊᓂ ᐊᒻᒪ ᑭᖑᓪᓕᖅᐹᖅᓯᐅᑎᖓ ᐋᖅᑭᒃᑕᐅᓂᐊᖅᑐᖅ ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᑕᕆᐅᕐᒥᐅᑕᐃᑦ ᓴᐳᑎᔭᐅᕕᖓ (Aire marine nationale de conservation Tallurutiup Imanga) ᓄᓇᕗᒻᒥ, ᐱᐊᓂᒃᑕᐅᓚᐅᖅᑎᓪᓗᒍ ᐊᑐᖅᑕᐅᓚᐅᑲᒍᑎᖓ ᐊᐅᓚᑦᑎᓂᕐᒧᑦ ᐸᕐᓇᐅᑦ. ᓄᑖᙳᕆᐊᖅᑕᐅᓂᐊᕆᕗᑦ ᑭᒡᓕᖏᑦ 7−ᐅᔪᑦ ᑲᓇᑕᒥ ᒥᕐᙳᐃᓯᕐᕖᑦ ᐊᑕᐅᓯᕐᓗ ᑖᓐᓇ ᑲᓇᑕᒥ ᒥᕐᙳᐃᓯᕐᕕᒃᓴᖅ ᓴᓂᕐᕙᒃᑕᐅᓯᒪᔪᖅ, ᐃᓚᒋᔭᐅᓕᕐᓗᑎᒃ ᓄᓇᓄᑦ ᑲᓇᑕᒥ ᒥᕐᙳᐃᓯᕐᕕᐅᓕᖅᑐᓄᑦ ᐊᕐᕌᒍᓂ ᖁᓕᓂᒃ ᐊᓂᒍᖅᑐᓂ, ᐱᒋᐊᖅᑐᑎᒃ ᐊᓱᖓᓱᖔᓂᑦ ᐊᑦᓛᓐᑎᒃ ᓯᓈᖏᓐᓂ, ᑲᓇᑕᒥ ᐅᑭᐅᖅᑕᖅᑐᒥ ᕿᑭᖅᑕᖏᓐᓄᑦ ᐆᒪᔪᓐᓇᖅᑐᓕᒫᓪᓗ ᐃᓂᒪᕆᖏᓐᓄᑦ ᐃᕕᑦᓱᑲᖃᐅᖅᑐᓂ.

ᑖᒃᑯᐊ ᓄᓇᐃᑦ ᐊᐅᓚᑕᐅᕙᒌᕋᓗᐊᖅᑎᓪᓗᒋᑦ ᐅᒡᕙᓗ ᐱᓕᕆᐊᖑᖃᑦᑕᕇᕋᓗᐊᖅᑎᓪᓗᒋᑦ ᐊᓪᓚᕕᖏᑎᒍᑦ ᒥᕐᖑᐃᓯᕕᓕᕆᔩᑦ ᑲᓇᑕᒥ, ᐱᖁᔭᖅᑎᒍᓪᓗ ᐃᓕᓴᕆᔭᐅᓂᐊᓕᕐᓂᖏᒃ ᖃᐅᔨᒪᔾᔪᑕᐅᓂᐊᖅᑐᖅ ᑖᒃᑯᐊ ᐃᓚᓕᐅᔾᔭᐅᑦᓯᐊᕋᓗᐊᕐᒪᖔᑎᒃ ᑲᓇᑕᒥ ᒥᕐᖑᐃᓯᕐᕖᑦ ᐱᖁᔭᖏᓐᓄᑦ ᐊᒻᒪ ᑲᓇᑕᒥ ᑕᕆᐅᕐᒥᐊᑕᑦ ᓴᐳᑎᔭᐅᕕᖏᑦ ᐱᖁᔭᑎᒍᑦ ᐊᒻᒪ ᓴᐳᔾᔭᐅᓯᒪᔪᓐᓇᓕᕐᓗᑎᓪᓗ ᐱᖁᔭᑎᒍᑦ ᐊᓯᖏᓐᓄᓪᓗ ᐊᑦᑐᐅᔪᑦ ᒪᓕᒋᐊᓕᓐᓄᑦ, ᐊᖏᓪᓕᒋᐊᖅᑕᐅᒍᓐᓇᖅᓯᓗᑎᓪᓗ 12 085 851 hectares−ᓂᒃ ᓴᐳᔾᔭᐅᓯᒪᓂᖏᒃ, ᐱᖁᔭᖅᑎᒍᑦ, ᓄᓇᐅᑉ ᐊᖏᑎᒋᓂᖓ ᐆᑦᑐᑎᒋᓗᒍ ᒥᑭᓐᓂᖅᓴᐅᕌᕐᔪᑦᑐᖅ ᑲᑎᓪᓗᒋᒃ ᓂᐅ ᐳᕋᓐᔅᓱᐃᒃ ᐊᒻᒪᓗ ᓅᕙ ᔅᑰᓴ.

ᐱᖁᔭᓕᐊᖑᔪᖅ ᐃᓚᓕᐅᔾᔨᓯᒪᖕᒥᔪᖅ ᐊᕐᕕᓂᓕᖕᓂᒃ ᐋᖅᑭᒋᐊᖅᑕᐅᔪᓪᓗ ᒪᓕᖕᓂᐊᖅᑐᑦ ᑲᓇᑕᒥ ᒥᕐᖑᐃᖅᓯᕖᑦ ᐱᖁᔭᖏᓐᓂᑦ ᐊᒻᒪ ᕉᒡ (Rouge) ᑲᓇᑕᒥ ᒥᕐᖑᐃᓯᕐᕕᖕᒧᑦ ᐱᖁᔭᖓᓂᒃ ᐅᓪᓗᒥᐅᓕᖅᑐᕐᓗ ᐱᖁᔭᕐᔪᐊᖑᕙᓕᖅᑐᓄᑦ, ᓴᙱᒃᑎᒋᐊᖁᓪᓗᒋᑦ ᐱᓕᕆᔾᔪᑏᑦ ᐊᐅᓚᑦᑎᔾᔪᑎᐅᕙᑦᑐᑦ ᐊᐅᓚᑦᑎᔾᔪᑎᖏᓪᓗ ᒥᕐᖑᐃᓯᕐᕕᓕᕆᔩᑦ ᑲᓇᑕᒥ ᑖᒃᑯᓄᖓᓗ ᑲᓱᖅᑎᑕᐅᒪᔪᑦ ᓴᐳᔾᔭᐅᓯᒪᓂᖏᑦ ᓄᓇᐃᑦ.

ᐅᖃᖅᑕᐅᔪᑦ ᐅᑯᓄᖓ

ᐊᑦᓱᓐᖏᖅᑎᑦᓯᖏᐊᖅᑐᒍᑦ ᓴᓐᖏᓂᖅᓴᐅᖁᓪᓗᒍ ᓴᐳᔾᔨᓂᐅᔪᖅ ᐃᓚᖏᓐᓂᑦ ᑲᓇᑕᒥ ᐃᓕᑕᕆᔭᐅᓯᒪᔪᑦ ᓄᓇᐃᑦ. ᐊᖏᓪᓕᕙᓪᓕᐊᑐᐃᓐᓇᑎᓪᓗᒍ ᐊᑦᑐᐃᕙᓪᓕᐊᓂᖓ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᑕ ᐊᔾᔨᒌᙱᑦᑐᓂᓪᓗ ᐆᒪᔪᓂᑦ ᔭᒐᐃᕙᓪᓕᐊᓂᕗᑦ ᐱᓪᓗᒍ, ᖃᐅᔨᒪᓇᓱᐊᑦᓯᐊᖁᓪᓗᑕ ᑖᒃᑯᐊᓗ ᓄᓇᐃᑦ ᖁᑦᑎᓛᒥᑦ ᓴᐳᔾᔭᐅᓯᒪᓂᖏᑦ ᐱᒻᒪᕆᐅᓂᖅᓴᐅᓕᖅᑎᓪᓗᒍ ᑕᐃᒪᓐᖓᓂᑦ. ᑖᑦᓱᒪ ᐱᖁᔭᕈᖅᑎᑕᐅᓂᖓ ᐱᕕᔾᔪᐊᖑᒻᒪᑦ ᐊᓪᓗᕆᐊᕐᓂᐅᕙᑦᑐᓂ ᖃᐅᔨᒪᓇᓱᐊᕈᑕᐅᖁᓪᓗᒍᓗ, ᐱᓕᕆᖃᑎᒋᔭᖏᓐᓄᑦ ᒥᕐᖑᐃᓯᕐᕕᓕᕆᔩ ᑲᓇᑕᒥ ᑖᒃᑯᐊᓗ ᐱᔪᓐᓇᕐᓂᖃᖅᑎᑕᐅᓂᖏᑦ ᓴᓇᕐᕈᑎᖃᖅᑎᑕᐅᓂᖏᓪᓗ ᓴᐳᒻᒥᑦᓯᒋᐊᕈᓐᓇᕐᓂᕐᒥᑦ ᓄᓇᓂᑦ ᓯᕗᓂᑦᑎᓐᓂᓗ ᑭᖑᕚᕆᓂᐊᖅᑕᕗᓪᓗ ᐱᓪᓗᒋᑦ.

ᓴᖅᑭᖅᑕᐅᓂᖓ ᑕᓪᓗᕈᑎᐅᑉ ᐃᒪᖓᑕ ᑲᓇᑕᒥ ᑕᕆᐅᕐᒥᐅᑕᐃᑦ ᓴᐳᑎᔭᐅᓯᒪᕕᖓ ᐊᑐᕐᓂᖃᒻᒪᕆᑉᐳᖅ ᓱᕋᑦᑕᐃᓕᑎᑦᓯᓂᐅᓪᓗᓂᓗ ᑲᓇᑕᐅᑉ ᐊᕙᑎᖓᓂᒃ, ᐆᒪᔪᓂᓪᓗ ᐃᓄᓐᓄᑦ ᑕᑎᒋᔭᐅᒻᒪᕆᑦᑎᓪᓗᒋᑦ ᐃᓕᖅᑯᓯᕗᓪᓗ ᑲᔪᓰᓐᓇᖁᓪᓗᒍ, ᐃᓄᐃᑦ ᐱᔪᓐᓇᐅᑎᖏᑦ ᐃᓕᓴᕆᔭᐅᓯᒪᖁᓪᓗᒋᑦ ᐃᑉᐱᒋᔭᐅᑦᓯᐊᓂᒃᑯᑦ, ᐱᖅᑯᓯᑎᒍᓪᓗ ᐱᓕᕆᐊᖑᕙᒃᑐᑦ ᑲᔪᓯᑎᑕᐅᑦᓯᐊᖁᓪᓗᒋᑦ. ᓴᖅᑭᑎᑦᓯᓂᖅ ᐱᒻᒪᕆᐅᒋᕗᖅ ᐊᐅᓚᑦᑎᖃᑎᒌᖕᓂᕐᒧᑦ ᐊᕕᒃᑐᖅᓯᒪᔪᓂᑦ ᑭᒡᒐᖅᑐᐃᓂᕗᓪᓗ ᓄᓇᕐᔪᐊᓕᒫᒥᑦ ᐅᔾᔨᕐᓇᒻᒪᕆᒻᒪᑦ ᓄᓇ ᐱᓪᓗᒍ ᐱᖅᑯᓯᓕᕆᓂᐅᓪᓗ ᐃᓗᐊᓂ, ᐃᑲᔪᖅᓯᔭᐅᖁᓪᓗᒋᑦ ᓯᕗᓂᑦᑎᓐᓂ ᐃᓅᔪᒫᖅᑐᑦ ᐃᓄᐃᑦ ᑲᓇᑕᒥᐅᓕᒫᓪᓗ.

ᓇᐃᓈᖅᓯᒪᔪᑦ ᓇᑭᓐᖔᕐᓂᖏᑦ

• ᑲᓇᑕᒥ ᒥᙳᐃᓯᕐᕕᖕᓄᑦ ᐱᖁᔭᖅ, ᑲᓇᑕᒥ ᐃᒪᕐᒥᐅᑕᐃᑦ ᓴᐳᑎᔭᐅᕕᖏᓐᓄᑦ ᐱᖁᔭᖅ, ᐊᒻᒪ ᕉᒡ ᑲᓇᑕᒥ ᐃᓄᒋᐊᓐᓂᖅᓴᓂ ᒥᕐᙳᐃᓯᕐᕕᖕᒋᓐᓄᑦ ᐱᖁᔭᖅ ᑲᓇᑕᒥ ᒐᕙᒪᒃᑯᖏᓐᓄᑦ ᒪᓕᒐᕐᔪᐊᕆᔭᐅᕗᖅ ᐊᐅᓚᑦᑎᔾᔪᑕᐅᓪᓗᓂ ᓴᖅᑭᑕᐅᔪᓄᑦ ᓴᐳᔾᔭᐅᔾᔪᑎᖏᓐᓄᓪᓗ ᑲᓇᑕᒥ ᒥᕐᖑᐃᓯᕐᕖᑦ ᑲᓇᑕᒥᓗ ᑕᕆᐅᕐᒥᐅᑕᐃᑦ ᓴᐳᑎᔭᐅᕕᖏᓐᓄᑦ. ᑲᓇᑕᒥ ᒥᕐᙳᐃᓯᕐᕕᖏᑦ ᐅᕝᕙᓘᓐᓃᑦ ᑲᓇᑕᒥ ᑕᕆᐅᕐᒥᐅᑕᐃᑦ ᓴᐳᑎᔭᐅᕕᖏᑦ ᓴᐳᔾᔭᐅᓯᒪᓂᐊᖅᐸᑕ ᒪᓕᒐᕐᔪᐊᑎᒍᑦ ᐊᑐᓕᖅᑎᑕᐅᔪᓐᓇᕐᓂᐊᕐᒪᑦ ᑲᓇᑕᒥ ᒪᓕᒐᐃᑦ ᐊᐅᓚᑕᐅᓂᖏᑎᒍᑦ, ᐊᖏᑕᐅᒋᐊᖃᖅᐳᑦ ᖄᖏᖅᑎᑕᐅᓗᑎᒃ ᐱᖁᔭᓐᖑᖅᑎᑕᐅᓂᒃᑯᑦ.
• ᐊᑲᒥ−ᐅᐱᓯᑯ−ᑲᑲᓱᐊᒃ−ᒦᓕ ᖃᖅᑲᖏᑦ ᑲᓇᑕᒥ ᒥᕐᖑᐃᓯᕐᕕᒃᓴᐅᑉ ᓴᓂᕐᕙᖅᑕᐅᓯᒪᓂᖓ (Réserve de parc national Akami-Uapishkᵁ – KakKasuak – Monts Mealy) ᓴᐳᔾᔭᐅᓂᐊᕐᓂᖓ ᑲᓇᑕᒥ ᐅᔾᔨᓇᖅᑐᒻᒪᕆᐅᕗᖅ ᑲᓇᖕᓇᖅᐸᓯᐅᑉ ᓯᒡᔭᖅᐸᓯᖕᐊᓂ ᓄᓇᑐᐃᓐᓇᖓ ᐆᑦᑐᑎᑦᓯᐊᕙᐅᓪᓗᓂᓗ ᐊᓯᖏᓐᓄᑦ ᒥᕐᖑᐃᓯᕐᕕᐅᔪᓄᑦ. ᖃᓄᐃᓕᖓᓂᖓ ᑖᒃᓱᒪ ᓄᓇᐅᑉ ᐊᑐᕐᓂᖃᖅᑐᒻᒪᕆᐅᕗᖅ ᓄᓇᖃᖅᑳᖅᓯᒪᔪᑦ ᐃᓄᖏᓐᓄᑦ ᐃᓕᖅᑯᓯᖏᓐᓄᓪᓗ ᓛᐸᑐᐊᒥᐅᑦ. ᑕᒪᑐᒪ ᐊᓚᒡᒐᐃᓐᓂᖓ ᐅᔾᔨᕐᓇᖅᑎᑦᓯᕗᖅ ᑲᓇᑕᒥ ᒥᕐᙳᐃᓯᕐᕕᖏᑦ ᐊᐅᓚᑦᑎᖃᑎᒌᑦᓯᐊᕐᓂᖏᓐᓂᑦ, ᑲᒪᒋᔭᖃᑦᓯᐊᕐᓂᖏᓐᓂᑦ ᐊᒻᒪᓗ ᐸᕐᓇᖃᑎᒌᑦᓯᐊᐸᓐᓂᖏᓐᓂᑦ ᐱᓕᕆᐊᖑᔭᕆᐊᓖᑦ ᐃᓗᐊᓂ ᓄᓇᖃᖅᑳᖅᑐᑦ ᐱᓕᕆᖃᑎᒋᔭᕆᐊᖃᖅᑕᖏᓐᓄᑦ.
• ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᑕᕆᐅᕐᒥᐅᑕᐃᑦ ᓴᐳᑎᔭᐅᕕᖓ "ᐆᒪᔪᓐᓇᖅᑐᓕᒫᓄᑦ ᓱᕐᓗ ᐆᒻᒪᖅᑯᑎᒋᔭᐅᔪᖅ" ᑲᓇᑕᐅᑉ ᑲᓇᖕᓇᖅᐸᓯᐊᓂ ᑕᕆᐅᕐᒥᐅᑕᑦ ᓇᔪᖅᐸᑦᑕᖓ. ᑕᒪᓐᓇ ᐱᒻᒪᕆᐅᓛᖑᖃᑕᐅᕗᖅ ᓄᓇᕐᔪᐊᓕᒫᒥᑦ ᐃᓱᒪᒋᔭᐅᓪᓗᓂᓗ ᖁᑦᑎᒃᑐᒥᐅᑕᓄᑦ ᐃᓄᓐᓄᑦ “ᐆᒻᒪᑎᒋᔭᐅᓂᖓᓂ”. 108 000 km²−ᐸᓗᖕᒥ, ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᑕᕆᐅᕐᒥᐅᑕᐃᑦ ᓴᐳᑎᔭᐅᕕᖓ ᑭᒡᒐᖅᑐᐃᓪᓗᓂᓗ 1.9%−ᐸᓗᒻᒥᑦ ᐊᖏᓂᓕᒻᒥᑦ ᑲᓇᑕᒥ ᑕᕆᐅᖏᓐᓂᑦ.

ᐊᑦᑐᐊᔪᑦ ᖃᐅᔨᒋᐊᕐᕕᐅᔪᓐᓇᖅᑐᑦ

• ᐊᑲᒥ−ᐅᐱᔅᑰ−ᑲᑲᓱᒃ−ᒦᓕ ᖃᖅᑲᐃᑦ ᑲᓇᑕᒥ ᒥᕐᖑᐃᓯᕐᕕᒃᓴᖅ ᓴᓂᕐᕙᖅᑕᐅᒪᔪᖅ ᐃᑭᐊᖅᑭᕕᖓ (site Web de la réserve de parc national Akami-Uapishkᵁ – KakKasuak – Monts Mealy)
• ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᑕᕆᐅᕐᒥᐅᑕᐃᑦ ᓴᐳᑎᔭᐅᕕᖓᑕ ᐃᑭᐊᖅᑭᕕᖓ (site Web de l'aire marine nationale de conservation Tallurutiup Imanga)
• ᒥᕐᖑᐃᓯᕐᕕᓕᕆᔩᑦ ᑲᓇᑕᒥ ᐃᑭᐊᖅᑭᕕᖓ (site Web de Parcs Canada)
• ᒥᕐᖑᐃᓯᕐᕕᓕᕆᔩᑦ ᑲᓇᑕᒥ ᑐᑦᓯᕋᐅᑎᖏᑦ ᐊᑐᓕᖅᑎᑕᐅᓂᖓᓄᑦ (application mobile de Parcs Canada)

ᖃᐅᔨᒋᐊᕐᕕᐅᔪᓐᓇᖅᑐᑦ

ᑲᐃᑦᓕᓐ ᐸᐅᕈ (Kaitlin Power)
ᑐᓴᕋᑦᓴᓕᕆᔩᑦ ᐊᓪᓚᑦᑎᖓ
ᐊᓪᓚᕝᕕᖓᓂ ᒥᓂᔅᑕᖓᑕ ᐊᕙᑎᓕᕆᔩᑦ ᐊᒻᒪᓗ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ
819-230-1557
Kaitlin.power@ec.gc.ca

ᑐᓴᕋᑦᓴᓕᕆᔨᓄᑦ ᐊᑦᑐᐊᔪᓂᑦ
ᒥᕐᖑᐃᓯᕐᕕᓕᕆᔩᑦ ᑲᓇᑕᒥ
855-862-1812
pc.media@pc.gc.ca