ᐊᕌᒍᓕᒫᖅ ᐊᐅᓚᓯᓂᕐᒧᑦ ᐸᕐᓇᐅᑎᐅᑉ ᐊᑐᓕᕐᑎᑕᐅᓂᖓᑕ ᖃᓄᐃᓕᖓᓕᕐᓂᖓ 2019-20

Parc national Quttinirpaaq

Français

ᖁᑦᑎᖕᓂᖅᐹᑉ ᒥᕐᖑᐃᖅᓯᕕᖓ ᑲᓇᑕᒥ ᐊᐅᓚᑦᑎᓂᕐᒧᑦ ᐸᕐᓇᐅᑎ ᓇᓗᓇᐃᖅᓯᕗᖅ ᓯᕗᓂᒃᓴᑐᖃᕐᒪᑦ ᖃᓄᖅᑑᕈᑎᓂᒃ ᐊᐅᓚᑦᑎᓂᕐᒧᓪᓗ ᐱᓕᕆᔭᐅᔪᒪᔪᓂᒃ ᖁᑦᑎᖕᓂᖅᐹᑉ ᒥᕐᖑᐃᖅᓯᕕᖓ ᑲᓇᑕᒥ. ᐸᕐᓇᐅᑎ ᒪᓕᒃᓯᒪᑦᑎᐊᖅᑐᖅ ᓄᓇᕗᑦ ᐊᖏᖃᑎᒌᒍᑎᒥᒃ, ᐃᓄᐃᑦ ᐊᒃᑐᖅᑕᐅᑐᐃᓐᓇᕆᐊᖃᕐᓂᖓᓄᑦ ᐃᑲᔫᓯᐊᖅᑖᕈᑎᓕᕆᓂᕐᒧᓪᓗ ᐊᖏᖃᑎᒌᒍᑎᒥᒃ ᐊᐅᔪᐃᑦᑐᕐᒧᑦ, ᖁᑦᑎᖕᓂᖅᐹᒧᑦ ᓯᕐᒥᓕᖕᒧᓪᓗ ᒥᕐᖑᐃᖅᓯᕕᖏᓐᓄᑦ, ᑲᓇᑕᐅᓪᓗ ᒥᕐᖑᐃᖅᓯᕕᓕᕆᔨᒃᑯᖏᓐᓄ ᑎᓕᔭᐅᓯᒪᔪᑦ ᓴᐳᔾᔨᔨᐅᒋᐊᖁᓪᓗᒋᑦ ᑕᑯᒃᓴᐅᑎᑦᑎᔨᐅᓗᑎᒡᓗ ᑲᓇᑕᐅᑉ ᑲᔾᔮᕐᓇᕐᓂᖓᓂᒃ, ᐃᑦᑕᕐᓂᓴᖃᐅᕐᓂᖏᓐᓂᒃ, ᑐᑭᓯᑦᑎᑎᔨᐅᓗᑎᒡᓗ ᐃᓄᓕᒫᑦ ᑐᑭᓯᐅᒪᔭᕆᐊᓕᖏᓐᓂᒃ, ᑲᔾᔮᕈᓱᒡᓗᑎᒃ ᐊᓕᐊᓇᐃᒍᓱᒡᓗᑎᒃ ᐸᖅᑭᔨᐅᑦᑎᐊᖃᑕᐅᓂᕐᒪᑕ ᓄᓇᒋᔭᕗᑦ ᐃᓕᓴᕆᔭᐅᑦᑎᐊᕐᓗᑎᒡᓗ ᐋᖅᑭᑦᑎᐊᖅᓯᒪᐃᓐᓇᕆᐊᖃᕐᓂᖓ ᐅᓪᓗᒥ ᑭᖑᕚᒃᓴᑦᑎᓐᓄᓪᓗ ᓯᕗᓂᒃᓴᑐᖃᕐᒧᑦ. ᖁᑦᑎᖕᓂᖅᐹᑉ ᒥᕐᖑᐃᖅᓯᕕᖓᓄᑦ ᐊᐅᓚᑕᐅᖃᑕᐅᓂᐊᖅᑐᖅ ᖁᑦᑎᖕᓂᖅᐹᑉ ᒥᕐᖑᐃᖅᓯᕕᖓᑕ ᐃᓄᐃᑦ/ ᒐᕙᒪᒃᑯᓪᓗ ᒥᕐᖑᐃᖅᓯᕕᓕᕆᓂᕐᒧᑦ ᐸᕐᓇᐃᔨᖏᓐᓂᒃ ᐊᐅᓚᑦᑎᓂᕐᒧᓪᓗ ᑲᑎᒪᔨᕋᓛᖏᓐᓂᒃ ᓴᖅᑭᑕᐅᓯᒪᔪᑦ ᐃᓄᐃᑦ ᐊᖏᖃᑎᒌᒍᑎᖏᓐᓄᑦ.

ᑐᓴᒐᒃᓕᐊᖅ ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ 2019-20 ᐊᕐᕌᒍᑕᒫᑦ ᖃᓄᐃᓕᐅᖅᐸᓪᓕᐊᓂᖓᑕ ᐅᓂᒃᑳᓕᐊᖓᑕ ᐃᓚᖓ ᐊᑐᓕᖅᑎᑕᐅᕙᓪᓕᐊᓂᒃᓴᖓᓄᑦ ᐊᐅᓚᑦᑎᓂᕐᒧᑦ ᐸᕐᓇᐅᑎᒥᒃ ᐱᓕᕆᖃᑎᑦᑎᓐᓄᑦ, ᐃᓚᐅᔨᓄᑦ, ᐃᓄᖕᓄᓪᓗ ᐱᔪᓐᓇᐅᑎᓖᑦ ᑕᒪᑐᒧᖓ ᐃᓄᓕᒫᓄᓪᓗ. ᒫᓐᓇ ᐊᐅᓚᑦᑎᔪᓐᓇᕐᓂᕐᒧᑦ ᐸᕐᓇᐅᑎ ᐃᓱᓕᓐᓂᐊᓕᕐᒪᑦ ᐊᕐᕌᒍᑦ ᖁᓖᑦ ᐊᑐᖅᑕᐅᓂᓯᒪᓕᕐᓂᖓᓄᑦ (ᐅᑐᐱᕆ 2009-2019) ᓄᑖᕐᒥ ᐸᕐᓇᐅᑎᒥᒃ ᑎᑎᕋᕆᐊᖅᓯᒪᔪᖃᓕᖅᑎᖅ, ᐃᓄᓕᒫᓄᑦ ᑐᓴᕆᐊᕈᑎᐅᔪᓐᓇᖅᓯᔫᒐᓗᐊᖅ. ᒥᕐᖑᐃᖅᓯᕕᓕᕆᔨᒃᑯᒃ ᑲᓇᑕᒥ ᐱᔭᕇᖅᓯᓯᒪᓕᖅᑐᑦ 50% 2010 ᒥ ᐱᒋᐊᖅᖢᓂ ᐊᐅᓚᑦᑎᓂᕐᒧᑦ ᐸᕐᓇᐅᑎᓕᐊᖑᓚᐅᖅᓯᒪᔪᓄᑦ ᑐᕌᒐᕆᔭᐅᔪᖅ ᐃᓚᖓᓗ 25%ᒥ ᐱᔭᕇᖅᓯᓯᒪᓕᖅᖢᑎᒃ ᑐᕌᒐᕆᔭᐅᓚᐅᖅᓯᒪᔪᖅᔭ.

Trois employés de Parcs Canada se tiennent debout sur un terrain rocailleux, avec des montagnes en arrière-plan.
ᓴᐅᒥᖕᒥ ᑕᓕᖅᐱᖕᒧᑦ: ᑲᓇᑕᐅᑉ ᒥᕐᖑᐃᖅᓯᕕᓕᕆᔨᒃᑯᖏᓐᓄᑦ ᐃᖅᑲᓇᐃᔭᖅᑏᑦ ᓯᓐᑎᐊ ᐱᐊᓚᖅ, ᓕᕙᐃ ᐃᔨᑦᓯᐊᖅ ᓄᑲᖅᖠᖅ, ᕚᓗᕆ ᐊᒪᕈᐊᓕᒡᓗ ᐅᓇᑕᖅᑐᒃᓴᒃᑯᑦ ᓇᖅᓴᖓᓃᑎᓪᓗᒋᑦ: ᐊᔾᔨᓕᐅᕆᔪᖅ: ᕚᓗᕆ ᐊᒪᕈᐊᓕᒃ

ᐃᓗᓕᖏᑦ

ᐱᓕᕆᖅᑳᖅᑕᐅᔭᕆᐊᓕᒃ 1: ᖁᑦᑎᖕᓂᖅᐹᑉ ᐊᑐᖅᑕᐅᓂᖓᓄᑦ ᐊᐅᓚᔾᔪᑎ ᓴᐳᑎᒋᐊᕐᓗᒍ ᑲᒪᒋᑦᑎᐊᕆᐊᕐᓗᒍᓗ ᓄᓇᖓ, ᐃᑦᑕᕐᓂᓴᖃᕐᕕᖏᑦ ᐅᑭᐅᖅᑕᖅᑐᒥᓪᓗ ᐆᒪᔪ ᑕᑯᔭᐅᔪᓐᓇᑦᑎᐊᖁᓪᓗᒋᑦ.

ᑲᔪᓯᔪᑦ/ᓇᓗᓇᐃᔭᖅᓯᒪᓂᖏᑦ

  • 17 ᐃᒡᓗᕐᔪᐊᑦ ᐱᖁᑏᓪᓗ ᖃᐅᔨᓴᖅᑕᐅᓚᐅᕐᒪᑕ ᐊᒃᑐᐊᖓᓂᖏᓐᓄᑦ ᐅᓇᑕᖅᑐᒃᓴᒃᑯᑦ ᖃᐅᔨᓴᖅᑐᓕᕆᔨᒃᑯᖏᑕ 14ᖑᓪᓗᑎᒡᓗ ᐃᑦᑕᕐᓂᓴᖃᕐᕖᑦ.

ᐱᓕᕆᖅᑳᖅᑕᐅᔭᕆᐊᓕᒃ 2: ᓇᓗᓇᐃᔭᕐᓗᒋᑦ ᑐᑭᓯᓗᒋᓪᓗ ᒥᕐᖑᐃᖅᓯᕕᐅᑉ ᓄᓇᖓ ᑭᒡᓕᓯᓂᐊᕐᓂᒃᑯᑦ ᐃᓄᐃᓪᓗ ᖃᐅᔨᒪᔭᑐᖃᖏᑎᒍᑦ ᐅᓂᒃᑳᖅᓂᒃᑯᑦ ᖃᐅᔨᒪᔭᐅᓂᖏᓐᓄᓪᓗ ᐃᓄᖕᓄᑦ ᑕᒪᓐᓇ ᓄᓇᖓ, ᐃᓚᐅᑎᒋᐊᕐᓗᒋᓪᓗ ᑕᒪᒃᑯᐊ ᑐᓴᖅᑕᐅᔪᑦ ᐱᖅᑯᓯᓕᕆᓂᕐᒧᑦ ᑕᑯᒃᓴᐅᑎᑦᑎᓂᐊᓕᕌᖓᑕ.

ᑲᔪᓯᔪᑦ/ᓇᓗᓇᐃᔭᖅᓯᒪᓂᖏᑦ

  • ᓄᓇᐅᑉ ᐊᓐᓂᕐᓇᕐᓂᖓᓄᑦ ᖃᐅᔨᓴᖅᑐᓕᕆᓂᖅ ᐃᒪᑦᑎᐊᕙᒃ ᓄᓇᐅᓪᓗ ᐆᒪᓂᖓ ᑲᔪᒦᓐᓇᖅᑐᖅ 2019ᒧᑦ.
  • ᖁᑦᑎᖕᓂᖅᐹᑉ ᒥᕐᖑᐅᖅᓯᕕᖓᓄ ᑲᑐᔾᔨᖃᑎᒌᑦ ᑲᑎᒪᔨᕋᓛᖏᑦ ᕿᒥᕐᕈᐃᓚᐅᖅᑐᑦ ᐅᖃᐅᔾᔪᖅᑐᐃᓪᓗᑎᒡᓗ ᑭᒡᓕᓯᓂᐊᕐᓂᕐᒧᑦ ᓄᐊᑦᑎᓂᖓᓄᓪᓗ ᐱᔪᓐᓇᐅᑎᑖᕈᑎᒃᓴᒥᒃ. 9ᖑᓚᐅᖅᑐᑦ ᑐᒃᓯᕋᐅᑏᑦ ᐱᓕᕆᐊᖑᔪᑦ 2019ᒥ.
  • ᐃᒪᖅ ᖃᐅᔨᓴᖅᑕᐅᓚᐅᕐᒥᔪᖅ ᒪᐃ ᑰᕈᖓᓂ, ᑖᖕᑯᕆᐅᕆ ᑕᖕᒫᕐᕕᖓᑕ ᐃᒪᖃᕐᕕᖓ, ᑕᑯᒃᓴᕈᖅᑎᑦᑎᓚᐅᖅᑐᑦ ᑰᕈᖅ ᓯᕐᒥᕐᒥᖔᕈᓐᓃᕐᓂᖓᓂᒃ, ᓯᓚᒥᖔᖅᑐᒥᒃ ᒪᖁᖕᒥᒃ, ᐊᐳᒻᒥᒃ, ᓄᓇᐅᓪᓗ ᐃᑭᐊᖓᑕ ᐊᐅᒃᐸᓪᓕᐊᓂᖓᓄᑦ ᐃᒪᖃᐃᓐᓇᖅᑑᒐᓗᐊᖅ ᑕᖕᒫᕐᕕᖕᒥ.
  • ᑭᐊᑐᓪ ᑕᓯᖅ ᐱᓱᔪᒡᕕᐅᔪᓐᓇᓕᐅᖅᓯᒪᔪᖅ ᑕᐅᑐᖕᓂᖃᕐᓂᖅᓴᐅᑎᑕᐅᕗᖅ ᐃᓄᐃᑦ ᐱᖅᑯᓯᖏᓐᓂᒃ ᐊᑐᖅᓯᒪᔭᕕᓂᖏᓐᓂᓪᓗ.

ᐱᓕᕆᖅᑳᖅᑕᐅᔭᕆᐊᓕᒃ 3: ᓇᔪᒐᕆᔭᐅᔪᖅ ᐊᑲᐅᓯᒋᐊᖅᑕᐅᓗᓂ ᓄᓇᖓ ᐊᓐᓂᕐᓇᕐᓂᖓᓄᑦ ᐊᑐᖅᓗᓯᒃ ᐊᕙᑎᓕᕆᓂᕐᒧᑦ ᐊᐅᓚᑦᑎᔾᔪᑎᐅᕙᒃᑐᓂᒃ, ᓴᓗᒻᒪᖅᓴᐃᓂᒃᑯᑦ, ᓄᓇᖓᑕᓗ ᑕᐅᑦᑐᕆᔭᖓᓄᑦ ᐅᑎᖅᑎᑕᐅᒋᐊᕐᓗᓂ.

ᑲᔪᓯᔪᑦ/ᓇᓗᓇᐃᔭᖅᓯᒪᓂᖏᑦ

  • ᓄᓇᐅᑉ ᐃᓕᖅᑯᓯᖓᓄᑦ ᐅᑎᖅᑏᒋᐊᕐᓂᖅ ᐱᓗᐊᖅᑐᒥᒃ ᓱᕈᖅᓯᒪᔪᓖᑦ ᑖᖕᑯᕆᐊᕆ ᑲᖏᖅᖢᒃ, ᑕᓯᖅ ᕼᐊᐃᓴᓐ, ᕗᐊᑦ ᑰᖕᑯᓗ ᐱᔭᕇᖅᑕᐅᓚᐅᖅᓯᒪᔪᑦ 2018u.

ᐱᓕᕆᖅᑳᖅᑕᐅᔭᕆᐊᓕᒃ 4: ᓇᓗᓇᐃᔭᕐᓗᒋᑦ ᐃᓄᖕᓄᑦ ᐃᑦᑕᕐᓂᓴᖃᕐᕖᑦ ᐱᑐᖃᒻᒪᕇᓪᓗ ᒥᕐᖑᐃᖅᓯᕕᖕᒥ ᖃᐅᔨᓴᖅᑕᐅᖏᓐᓇᖅᑐᑦ ᐊᔾᔨᐅᖏᓂᖓᓗ ᐃᓂᖓ.

ᑲᔪᓯᔪᑦ/ᓇᓗᓇᐃᔭᖅᓯᒪᓂᖏᑦ

  • ᖃᐅᔨᓴᖅᑕᐅᔭᕆᐊᖃᕐᓂᖓ ᑭᐊᑐ ᑕᓯᖅ, ᐱᓕᔅᑐ ᑰᕉᖅ, ᕗᐊᑦ ᑳᖑᓗ ᕿᒥᕐᕈᔭᐅᓚᐅᖅᑐᑦ, ᑐᓴᒐᒃᓴᓕᐊᖑᓪᓗᓂᓗ 2018ᒥ ᖃᐅᔨᓴᖅᑕᐅᒃᑲᓐᓂᓕᕆᓪᓗᓂᓗ 2019ᒥ. ᖃᐅᔨᓴᖅᑐᓕᕆᓂᕐᒧᑦ ᓄᐊᑕᐅᓯᒪᔪᑦ 2019ᒥ ᑕᑯᓇᒃᑕᐅᓂᐊᖅᑐᑦ ᖃᓄᐃᓕᖓᓕᕐᒪᖔᑕ ᑕᐃᔅᓱᒪᓂᒃᑲᓐᓂᖅ ᖃᐅᔨᓴᖅᑕᐅᔾᔪᑎᐅᓚᐅᖅᑐᑦ ᓴᖅᑭᑦᑎᔾᔪᑎᐅᓗᑎᒃ.
  • 12 ᐃᒡᓗᕐᔪᐊᑦ ᒪᕐᕉᒃ ᐱᖁᑏᒃ, ᐃᓚᐅᓪᓗᓂ ᐃᓕᓴᕆᔭᐅᓯᒪᔪᑦ ᐃᖅᑲᐃᔾᔪᑎᓕᐊᖅ ᓯᑏᕙᓐᓴᓪᓗ ᐅᖅᑯᐃᕕᕕᓂᖓ (ᐅᖅᑯᐃᕕᕕᓂᖅ ᓯᓚᓐᓂᐊᖅᑎᒃᑯᑦ ᐱᖁᑎᖓᑦ), ᖃᐅᔨᓴᖅᑕᐅᓚᐅᖅᑐᖅ ᐱᑐᖃᐅᓂᖓᓄᑦ ᐃᓕᓴᕆᔭᐅᓪᓗᓂ ᐅᓇᑕᖅᑐᒃᓴᒃᑯᑦ ᖃᐅᔨᓴᖅᑐᓕᕆᓂᕐᒧᑦ ᑲᑎᒪᔨᖏᓐᓂᒃ.
  • ᑭᓱᓂᒃ ᖃᐅᔨᔭᐅᔪᓂᒃ ᑎᑎᕋᖅᑐᐃᔩᑦ, ᐆᓇᖅᓯᕙᓪᓕᐊᓂᕐᒧᓪᓗ ᒪᓴᖃᑦᑕᕐᓂᕐᒧᓪᓗ ᖃᐅᔨᓴᐅᑏᑦ, ᐃᓕᔭᐅᓚᐅᖅᑐᑦ ᕗᐊᑦ ᑳᖕᑯᒥ ᑕᑯᔭᐅᒋᐊᓚᐅᕐᒪᑕ, ᑎᑎᕋᖅᓯᒪᓂᖏᓪᓗ ᖃᕆᓴᐅᔭᕐᔪᐊᖅᑲᖅᑕᐅᓪᓗᑎᒃ, ᐊᑐᓕᖅᑎᑕᐅᒋᐊᒃᑲᓐᓂᖅᖢᓂᓗ. ᑖᒃᑯᐊ ᓴᖅᑭᑕᐅᔪᑦ ᐱᓕᕆᐊᒧᑦ ᖃᐅᔨᓴᐅᑎᐅᓂᐊᖅᑐᖅ ᐊᕙᑎᐅᑉ ᖃᓄᐃᓕᖓᓂᖓᓄᑦ ᐱᐅᕆᐅᑉ ᐃᒡᓗᕋᓛᕕᓂᖏᓐᓄᑦ ᓱᕋᓇᒍᑕᐅᓇᓱᒋᔭᐅᔪᑦ; ᖃᐅᔨᓴᖅᑕᐅᔾᔪᑏᑦ ᖃᐅᔨᓴᖅᑕᐅᒃᑲᓐᓂᖃᑦᑕᕐᓂᐊᖅᑐᑦ ᐊᕐᕌᒍᑦ ᐊᓂᒍᕌᖓᑕ ᓄᐊᑕᐅᒃᑲᓐᓂᖅᐸᒃᓗᑎᒃ.

ᐱᓕᕆᖅᑳᖅᑕᐅᔭᕆᐊᓕᒃ 5: ᓴᖅᑭᑕᐅᔪᒃ ᐅᓂᒃᑳᕆᔭᕆᐊᖃᕐᓂᖏᓐᓄᑦ ᖃᐅᔨᓴᖅᑕᐅᖏᓐᓇᖅᑐᓄᑦ ᖃᐅᔨᓴᖅᑕᐅᔾᔪᑎᓕᕆᓂᕐᒧᓪᓗ, ᐱᔾᔪᑎᒋᓗᐊᕐᓗᒍ ᓄᓇᕐᔪᐊ ᐊᕙᑎᖓᑕ ᐊᓯᔾᔨᖅᐸᓪᓕᐊᓂᖓ, ᖁᑦᑎᖕᓂᖅᐹᖅ ᑲᓇᑕᒥᐅᓄᑦ ᐱᕐᔪᐊᖑᕆᐊᖃᕐᒪᑦ.

ᑲᔪᓯᔪᑦ/ᓇᓗᓇᐃᔭᖅᓯᒪᓂᖏᑦ

  • ᐱᔪᓐᓇᐅᑎᖃᖅᖢᑎᒃ ᑭᒡᓕᓯᓂᐊᖅᑐᓕᕆᔾᔪᑏᑦ ᑎᑎᕋᖃᓯᐅᔾᔭᐅᓚᐅᖅᑐᑦ ᐊᕐᕌᒍᑕᒫᑦ ᒥᕐᖑᐃᖅᓯᕕᓕᕆᓂᕐᒧᑦ ᐅᓂᒃᑳᓕᐊᓂᒃ ᑐᓴᖅᑕᐅᔪᓪᓗ ᑎᑎᕋᖅᑕᐅᕙᒃᖢᑎᒃ ᓴᖅᑭᑕᐅᓪᓗᑎᒃ ᑲᓇᑕᐅᑉ ᒥᕐᖑᐃᖅᓯᕕᓕᕆᔨᒃᑯᖏᓐᓂ, ᖃᐅᓱᐃᑑᑉ ᐊᐅᓱᐃᑦᑖᓪᓗ ᕼᐋᒪᓚᒃᑯᖏᓐᓄᑦ, ᑲᑐᔾᔨᖃᑎᒌᒃᖢᑎᒡᓗ ᒥᕐᖑᐃᖅᓯᕕᓕᕆᓂᕐᒧᑦ ᑲᑎᒪᔨᕋᓛᖏᓐᓄᓪᓗ.
  • ᖁᑦᑎᖕᓂᖅᐹᖅ ᑕᑯᒥᓴᐅᑎᓕᐊᖑᖃᑦᑕᖅᑐᖅ ᐊᕐᕌᒍᑕᒫᑦ ᑲᑎᒪᑎᓪᓗᒋᑦ ᐅᑭᐅᖅᑕᖅᑐᒥᒃ ᑭᒡᓕᓯᓂᐊᖅᑐᓕᕆᓂᕐᒧᑦ ᑲᓇᑕᒥ.
  • ᖃᐅᔨᓴᖅᑕᐅᔪᓕᒫᑦ ᖃᐅᔨᓴᖅᑐᔨᕆᔾᔪᑎᓕᒫᓪᓗ ᓴᖅᑭᑕᖏᑦ ᑕᑯᒃᓴᐅᑎᑕᐅᖃᑦᑕᖅᑐᑦ ᑲᑐᔾᔨᖃᑎᒌᒃᖢᑎᒃ ᒥᕐᖑᐃᖅᓯᕕᓕᕆᓂᕐᒧᑦ ᑲᑎᒪᔨᕋᓛᒃᑯᖏᓐᓄᑦ; ᓇᓗᓇᐃᔭᖅᑕᐅᓯᒪᔪᑦ ᐱᓕᕆᐊᓄᑦ ᓴᖅᑭᑕᐅᖃᑦᑕᕐᒥᔪᑦ ᖁᑦᑎᖕᓂᖅᐹᑉ ᒥᕐᖑᐃᖅᓯᕕᓕᕆᓂᕐᒧᑦ ᐃᑭᐊᖅᑭᕕᖓᓂ ᐅᕙᓂ (https://www.pc.gc.ca/en/pn-np/nu/quttinirpaaq/nature/conservation/recherche-research).
  • ᓄᓇᐅᑉ ᐊᓐᓂᕐᓇᕐᓂᖓᓄᑦ ᖃᐅᔨᓴᖅᑐᓕᕆᓃᑦ ᑕᑯᒃᓴᐅᑎᑕᐅᖃᑦᑕᕐᒥᔪᑦ ᐊᑐᐃᓐᓇᐅᑎᑦᑎᓪᓗᑎᒃ ᖃᐅᔨᓴᖅᑕᐅᔾᔪᑎᕕᓂᕐᓂᒃ, ᑕᑯᔭᐅᔪᓐᓇᕐᓂᐊᕐᒪᑕᑦᑕᐅᖅ ᐊᓯᖏᓐᓄᑦ ᖃᐅᔨᓴᖅᑐᔨᕆᔪᓄᑦ. 2019-20 ᑎᓴᒪᐃᖅᑐᖅᖢᑎᒃ ᑐᒃᓯᕋᕐᕕᐅᓯᒪᔪᑦ ᖃᐅᔨᓴᖅᑕᐅᔾᔪᑎᕕᓂᕐᓂᒃ ᐃᓕᓐᐊᕐᕕᒡᔪᐊᑦ ᐱᖓᓱᓂᒃ ᐃᓕᓐᓂᐊᕐᕕᒡᔪᐊᓂᒃ ᑲᓇᑕᒥ, ᐃᓚᐅᑎᑕᐅᓪᓗᑎᒃ ᖃᐅᔨᓴᖅᑕᐅᔪᕕᓃᑦ ᓯᓚᓐᓂᐊᕐᕕᖕᒥ ᑕᓯᖅ ᕼᐊᐃᔭᓐᒥ, ᑕᖕᑯᕆᐅᕆᐅᑉ ᑲᖏᖅᖢᐊᓂ ᐊᒻᒪᓗ ᓄᓇᐅᑉ ᖁᓕᕇᖕᓂᖏᑦ ᖃᐅᔨᓴᖅᑕᐅᔾᔪᑎᕕᓃᑦ ᓄᓇᒧᑦ ᖃᐅᔨᓴᖅᑐᓕᕆᓂᕐᒥᒃ.

ᐱᓕᕆᖅᑳᖅᑕᐅᔭᕆᐊᓕᒃ 6: ᐅᔾᔨᕈᓱᓕᖅᑎᑦᑎᒋᐊᕐᓗᑕ, ᑐᑭᓯᑎᑦᑎᖏᐊᕐᓗᑕ ᐃᑲᔪᖅᑐᕆᐊᕐᓗᒍᓗ ᖁᑦᑎᖕᓂᖅᐹᖅ ᑲᓇᑕᒥᐅᓄᑦ, ᐳᓛᕆᐊᖅᑐᓄᑦ, ᐊᐅᓱᐃᑦᑐᕐᒥᐅᓄᑦ ᖃᐅᓱᐃᑦᑐᕐᒥᐅᓄᓪᓗ ᑕᑯᒃᓴᐅᑎᑦᑎᓂᒃᑯᑦ ᑭᓱᖃᐅᕈᓘᔭᕐᓂᖏᓐᓂᒃ.

ᑲᔪᓯᔪᑦ/ᓇᓗᓇᐃᔭᖅᓯᒪᓂᖏᑦ

  • ᑭᖑᓪᓕᖅᐹᒥ ᑎᑎᕋᖅᓯᒪᓕᖅᑐᑦ ᓇᖕᒥᓂᖅᓱᕐᓗᑎᒃ ᐱᓱᔪᒍᒪᔪᓄᑦ ᑭᐊᑐᓪ ᑕᓯᖓᓂ ᐱᓱᔪᒡᕕᖕᒧᓪᓗ ᓄᓇᙳᐊᓕᐅᖅᓯᒪᔪᖃᖅᖢᓂ ᑖᖕᑯᕆᐅᕆᐅᑉ ᑲᖏᖅᖢᐊᓂ ᕿᒥᕐᕈᔭᐅᑐᐃᓐᓇᕆᐊᖃᓕᖅᑐᑦ ᐱᓕᕆᖃᑎᒌᒃᖢᑎᒃ ᒥᕐᖑᐃᖅᓯᕕᓕᕆᓂᕐᒧᑦ ᑲᑎᒪᔨᕌᓛᖏᓐᓂᒃ. ᑭᐊᑐᓪ ᑕᓯᖅ ᐱᓱᔪᒡᕕᖓ ᑕᐅᑐᖕᓂᖃᓗᐊᖅᑐᖅ, ᐃᑦᑕᕐᓂᓴᑦ ᑐᓃᑦ, ᐃᓄᑐᖃᑦ ᐊᒻᒪᓗ ᓯᕗᓕᖅᐹᖑᓂᕋᖅᑕᐅᓯᒪᔪᑦ ᐃᓄᐃᑦ ᓇᔪᖃᑦᑕᖅᑕᕕᓂᖏᑦ ᖁᑦᑎᖕᓂᖅᐹᒥ.

ᐱᓕᕆᖅᑳᖅᑕᐅᔭᕆᐊᓕᒃ 7: ᐳᓛᕆᐊᖅᑕᐅᔪᓐᓇᖁᓪᓗᒋᑦ ᓄᓇᓖᑦ ᐅᓄᕐᓂᖅᓴᓂᒃ ᑐᑯᔭᒃᓴᖃᑦᑎᐊᕐᒪᑕ ᐃᑲᔪᕐᑐᐃᔪᓐᓇᖅᖢᓂᓗ ᐳᓚᕋᑦᑐᓕᕆᓂᖅ ᐊᐅᓱᐃᑦᑐᕐᒥᐅᓄᑦ ᖃᐅᔨᓱᐃᖅᑐᕐᒥᐊᓄᓪᓗ ᐱᓕᕆᖃᑎᖃᕐᓗᑕ ᐊᓯᑦᑎᓐᓂ.

ᑲᔪᓯᔪᑦ/ᓇᓗᓇᐃᔭᖅᓯᒪᓂᖏᑦ

  • ᓄᓇᕗᑦ ᒐᕙᒪᖓ ᐱᕆᖃᑎᒋᓗᑎᒍᑦ, ᑲᓇᑕᐅᑉ ᒥᕐᖑᐃᖅᓯᕕᓕᕆᔨᒃᑯᖏᑦ ᐳᓚᕋᑦᑐᓕᕆᓂᕐᒧᑦ ᐱᕙᓪᓕᐊᑎᑦᑎᓪᓗᑎᒃ ᑲᑎᑦᑎᑎᓚᐅᕐᒪᑕ ᖃᐅᓱᐃᑦᑐᕐᒥ ᐊᐃᕐᕆᓕ 2019ᒥ. ᒪᕐᕉᒃ ᓄᓇᓕᖕᒥᐅᑖᒃ ᐃᓚᐅᓚᐅᖅᑑᒃ ᐱᕙᓪᓕᐊᑎᑦᑎᓇᓱᒍᑎᒥᒃ ᐱᖅᑯᓯᓕᕆᓂᕐᒧᓪᓗ ᑐᑭᓯᕙᓪᓕᕆᐊᖅᑎᑦᑎᓂᕐᒧᑦ ᑕᑯᓇᒃᑎᑦᑎᓪᓗᑎᒃ ᑕᒪᓐᓇ ᐋᖅᑭᒃᓱᖅᑕᐅᓯᒪᓚᐅᖅᑐᖅ ᓄᓇᐊᕐᔪᐊᕐᒥᐅᑦ ᐳᓚᕋᑦᑐᓕᕆᔨᒃᑯᖏᑕ ᓵᑕᖅᓯᒪᓪᓗᓂᐅᒃ 2019 ᐊᐅᔭᖓᓂ.

ᐱᓕᕆᖅᑳᖅᑕᐅᔭᕆᐊᓕᒃ 8: ᖁᑦᑎᖕᓂᖅᐹᖅ ᐱᓕᕆᖃᑎᒌᖕᓂᒃᑯᑦ ᐊᐅᓚᑕᐅᖏᓐᓇᕐᓗᓂ.

ᑲᔪᓯᔪᑦ/ᓇᓗᓇᐃᔭᖅᓯᒪᓂᖏᑦ

  • 2019ᒥ, ᑲᑐᔾᔨᖃᑎᒌᒃᖢᑎᒃ ᒥᕐᖑᐃᖅᓯᕕᓕᕆᓂᕐᒧᑦ ᑲᑎᒪᔨᕋᓛᑦ ᑕᑯᖃᑦᑕᐅᑎᓪᓗᑎᒃ ᑲᑎᒪᓂᖃᓚᐅᖅᑐᑦ, ᐊᐃᕐᕆᓕ 9-11, ᐅᑐᐱᕆᒥᓗ 28-30ᒧᑦ, ᕿᒥᕐᕈᐃᓪᓗᑎᒃ ᖃᐅᔨᓴᖅᑐᓕᕆᓂᕐᒧᑦ ᐱᔪᓐᓇᐅᑎᑖᕈᒪᔪᓂᒃ, ᐊᐅᓚᑦᑎᓂᕐᒧᑦ ᐸᕐᓇᐅᑎᒥᒃ, ᐊᐅᓚᑦᑎᔾᔪᑎᐅᓂᐊᖅᑐᒧᓪᓗ ᓄᑖᕐᒥᒃ ᐸᕐᓇᐅᑎᓕᐊᒥᒃ, ᓄᑖᕈᕆᐊᖅᑕᐅᓂᖓ ᑲᓇᑕᒥ ᒥᕐᖑᐃᖅᓯᕕᓕᕆᓂᕐᒧᑦ ᐃᓄᖕᓂᒃ ᐃᖅᑲᓇᐃᔭᖅᑎᑖᕋᓱᖕᓂᕐᒧᑦ ᐸᕐᓇᐅᑎᒥᒃ ᐅᖃᐅᔾᔪᖅᑐᐃᓪᓗᑎᒡᓗ ᖃᐅᔨᓴᖅᑐᓕᕆᓂᐅᔪᓄᑦ ᒥᕐᖑᐃᖅᓯᕕᖕᓂ.
  • ᒥᕐᖑᐃᖅᓯᕕᓕᕆᓂᕐᒧᑦ ᐸᕐᓇᐃᔩᑦ ᐱᔭᕇᖅᓯᓚᐅᖅᑐᑦ ᐊᐅᓚᑦᑎᔾᔪᑎᓕᕆᓂᕐᒧᑦ ᐸᕐᓇᐅᑎᒥᒃ ᑕᐅᑐᖕᓂᖃᕐᓂᖅᓴᐅᓪᓗᓂ ᐃᓄᖕᓂᒃ ᐃᓚᐅᑎᑦᑎᓂᕐᒥᒃ, ᕿᒥᕐᕈᔭᐅᓂᖓ ᐊᖏᖅᑕᐅᓚᐅᖅᖢᓂ ᑲᑐᔾᔨᖃᑎᒌᒃᖢᑎᒃ ᒥᕐᖑᐃᖅᓯᕕᓕᕆᓂᕐᒧᑦ ᑲᑎᒪᔨᕋᓛᖏᓐᓂᒃ ᑐᓴᕆᐊᕐᓂᕐᒧᑦ, ᐃᓚᐅᑎᑦᑎᓪᓗᑎᒡᓗ ᕿᑭᖅᑕᓂ ᐃᓄᐃᒃ ᑲᑐᔾᔨᖃᑎᒌᒃᑯᓂᖔᖅᑐᒥ.

ᐱᓕᕆᖅᑳᖅᑕᐅᔭᕆᐊᓕᒃ 9: ᐃᓄᖕᓂᒃ ᐃᖅᑲᓇᐃᔭᖅᑎᑖᕋᓱᖕᓂᕐᒧᑦ ᑭᒡᒐᖅᑐᐃᓂᖃᕆᐊᖃᖅᐳᖅ ᓄᓇᕗᒻᒥ ᒥᕐᖑᐃᖅᓯᓕᕆᔨᒃᑯᖏᓐᓂ ᑲᓇᑕᐅᑉ ᒥᕐᖑᐃᖅᓯᕕᖏᓐᓂᒃ ᐊᕐᕌᒍ 2020 ᑐᖔᓂ.

ᑲᔪᓯᔪᑦ/ᓇᓗᓇᐃᔭᖅᓯᒪᓂᖏᑦ

  • ᑲᓇᑕᒥ ᒥᕐᖑᐃᖅᓯᕕᓕᕆᔨᒃᑯᑦ ᐃᓄᖕᓂᒃ ᐃᖅᑲᓇᐃᔭᖅᑎᑖᕋᓱᖕᓂᕐᒧᑦ ᐸᕐᓇᐅᑎ ᓄᑖᕈᕆᐊᖅᑕᐅᓚᐅᖅᑐᖅ 2019ᒥ. ᐱᓕᒻᒪᒃᓴᐃᕕᒃ ᑲᓇᑕᒥ ᒥᕐᖑᐃᖅᓯᕕᓕᕆᔨᒃᑯᑦ ᒪᓕᒐᓕᕆᔨᒃᑯᖏᒍᑦ, ᑲᓇᑕᒥ ᒥᕐᖑᐃᖅᓯᕕᓕᕆᔨᒃᑯᑦ ᓄᓇᖃᖅᑳᖅᓯᒪᔪᓂᒃ ᐃᖅᑲᓇᐃᔭᖅᑎᑖᕋᓱᖕᓂᕐᒧᑦ ᖃᓄᖅᑑᕈᑎᓕᕆᔨᒃᑯᖏᓐᓂᒃ, ᑕᓪᓕᒪᓪᓗ ᑲᓇᑕᒥ ᒥᕐᖑᐃᖅᓯᕕᓕᕆᔩᑦ ᑲᑐᔾᔨᖃᑎᒌᒃᖢᑎᒃ ᐃᓄᐃᑦ/ᒐᕙᒪᒃᑯᓪᓗ ᒥᕐᖑᐃᖅᓯᕕᓕᕆᓂᕐᒧᑦ ᐸᕐᓇᐅᑎᓕᕆᔨᒃᑯᖏᑦ ᐊᐅᓚᑦᑎᓂᕐᒧᓪᓗ ᑲᑎᒪᔨᕋᓛᖏᑦ ᕿᒥᕐᕈᐃᓚᐅᖅᑐᑦ ᐃᓄᖕᓂᒃ ᐃᖅᑲᓇᐃᔭᖅᑎᑖᕋᓱᖕᓂᕐᒧᑦ ᐸᕐᓇᐅᑎᖏᓐᓂᒃ. ᑲᓇᑕᒥ ᒥᕐᖑᐃᖅᓯᕕᓕᕆᔨᒃᑯᑦ ᐊᖓᔪᖅᑳᖓᑕ ᑐᒡᓕᖓ ᐊᐅᓚᑦᑎᓂᕐᒧᑦ ᐸᕐᓇᐅᑎᓕᐊᖑᔪᒥᒃ ᑲᔪᓯᑎᑦᑎᓚᐅᖅᖢᑎᒃ ᐊᐃᕐᕆᓕ 2020ᒥ.
  • ᒪᔾᔨ 31, 2020ᒥ, ᓄᓇᕗᒻᒥ ᒥᕐᖑᐃᖅᓯᕕᓕᕆᔨᒃᑯᑦ 62%ᖑᓚᐅᖅᑐᑦ ᐃᓄᖕᓂᒃ ᐃᖅᑲᓇᐃᔭᖅᑎᖃᓂᖏᓐᓄᑦ (ᐃᓚᐅᓪᓗᑎᒃ ᐃᓄᖃᖏᑦᑐᑦ ᐃᖅᑲᓇᐃᔮᒃᓴᑦ). ᐃᓄᖃᖏᑦᑐᑦ ᐃᖅᑲᓇᐃᔮᒃᓴᑦ ᐃᓚᐅᑎᑕᐅᖏᑦᑐᑦ, ᐃᓄᖕᓂᒃ ᐃᖅᑲᓇᐃᔭᖅᑎᑖᕋᓱᖕᓂᕐᒧᑦ 51%ᖑᓪᓗᑎᒃ.

ᐱᓕᕆᖅᑳᖅᑕᐅᔭᕆᐊᓕᒃ 10: ᐱᒋᐊᖅᑎᑦᓗᓂ, ᑲᔪᓯᑎᑦᑏᓐᓇᕐᓗᓂ, ᐃᓚᐅᑎᑦᑎᓗᓂᓗ ᐱᓕᕆᖃᑎᑦᑎᓐᓂᒃ, ᑭᒡᓕᓯᓂᐊᕐᓂᕐᒧᑦ, ᐱᖅᑯᓯᓕᕆᓂᕐᒧᓪᓗ ᐊᐅᓚᑦᑎᓂᕐᒥᒃ, ᖃᓄᐃᓕᐅᕆᐊᓕᖕᓄᑦ, ᐳᓚᕋᑦᑐᓕᕆᓂᕐᒧᑦ ᑕᑯᒥᓴᐃᓂᕐᒧᓪᓗ, ᐃᓕᓐᓂᐊᖅᑎᑦᑎᓂᕐᒧᓪᓗ.

ᑲᔪᓯᔪᑦ/ᓇᓗᓇᐃᔭᖅᓯᒪᓂᖏᑦ

  • ᑲᓇᑕᐅᑉ ᒥᕐᖑᐃᖅᓯᕕᓕᕆᔨᒃᑯᖏᑦ ᐅᑭᖅᑕᖅᑑᓪᓗ ᓯᕐᒥᓕᕆᓂᕐᒧᑦ ᖃᐅᔨᓴᖅᑐᓕᕆᔨᒃᑯᖏᑦ ᑲᑎᒪᖃᑎᖃᐃᓐᓇᖅᐳᑦ ᑐᑭᓯᐊᒪᖃᑎᒌᒍᑎᒃᓴᒥᒃ ᓴᖏᒃᑎᒋᐊᖁᓪᓗᒍ ᐃᑲᔪᖅᑲᑎᒌᖕᓂᖅᓴᐅᖁᓪᓗᒋᓪᓗ ᐱᓕᕆᕖᑦ ᑎᓕᔭᐅᓯᒪᔪᑦ ᐱᓕᕆᐊᖏᓪᓗ ᐊᑕᐃᓯᐅᓕᖑᖅᐹᓪᓕᖁᓪᓗᒋᑦ.
  • ᐃᒪᑦᑎᐊᕙᓕᕆᔨᒃᑯᑦ ᐃᓚᑦᑎᐊᕙᖃᕐᓂᕐᒧ ᖃᐅᔨᓴᖅᑐᓕᕆᓂᖅ ᐱᒋᐊᖅᑕᐅᓚᐅᖅᐳᖅ ᐱᓕᕆᖃᑎᒌᒃᖢᑎᒃ ᐊᕙᑎᓕᕆᔨᒃᑯᑦ ᓯᓚᐅᓪᓗ ᐊᓯᔾᔨᖅᐸᓪᓕᐊᓂᖓᓄᑦ ᑲᓇᑕᒥ ᐊᕐᕌᒍᑕᒫᑦ.
  • ᒥᕐᖑᐅᖅᓯᕕᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ ᐱᓕᕆᖃᑎᖃᑦᑎᐊᖅᐳᑦ ᒪᕐᕉᖕᓂᒃ ᖃᐅᔨᓴᖅᑐᓕᕆᔨᓂᒃ ᖁᑦᑎᖕᓂᖅᐹᓂ ᐃᓕᓐᓂᐊᕐᕕᔨᔪᐊᖅ ᓚᕕᐅᓪ ᐃᓕᓐᓂᐊᕐᕕᒡᔪᐊᕐᓗ ᐃᐅᓪᐴᑕᒥ ᐱᖁᑎᖃᑦᑎᐊᖁᓪᓗᒍ ᖃᐅᔨᓴᖅᑕᐅᔪᓪᓗ ᐊᒥᖅᑲᕆᔭᐅᖁᓪᓗᒋᑦ ᖃᐅᔨᓴᖅᑐᓕᕆᓂᕐᒧᓪᓗ ᐱᔭᕆᐊᓖᑦ ᐱᔭᐅᖁᓪᓗᒋᑦ.
  • ᐊᕐᕌᒍᓄᑦ ᐱᖓᓱᓄᑦ ᐱᓕᕆᖃᑐᑎᒌᓂᕐᒧᑦ ᐊᖏᖃᑎᒌᒍᑎ ᐸᓛᒃ ᕕᐊᓗᒃᑯᓐᓂ, ᐱᒋᐊᓚᐅᖅᑐᖅ 2018 ᑎᓯᐱᕆᒥ, ᑲᔪᓰᓐᓇᖅᑐᖅ ᐳᓚᕋᑕᐅᑦᑎᐊᖁᓪᓗᒍ ᐸᖅᑭᒃᓯᑦᑎᐊᕈᓐᓇᖅᑐᓂᒃ ᑕᑯᑎᑦᑎᑦᑎᐊᕐᓂᐊᕐᒪᑕ.
  • ᒥᕐᖑᐃᖅᓯᕕᓕᕆᔨᒃᑯᑦ ᐃᑲᔪᖃᑎᖃᖅᖢᑎᒃ ᑎᐊᔅᑎᓇᐃᓴᓐ ᓄᓇᕗᒻᒥ ᓴᖅᑭᔮᖅᑎᑦᑎᖁᓪᓗᒋᑦ ᖁᑦᑎᖕᓂᖅᐹᒥ ᑐᕌᖕᑐᒥ ᓯᓚᒥᐅᑕᓕᕆᓂᕐᒧᑦ ᑕᑯᒃᓴᐅᑎᑦᑎᓂᕐᒥᒃ ᕕᕗᐊᕆ 2020ᒥ ᑕᑯᒃᓴᐅᑎᑦᑎᓂᖓᓗ ᐱᓕᒻᒪᒃᓴᐅᑕᐅᓪᓚᐅᖅᖢᓂ ᖃᐅᓱᐃᑐᕐᒥ.

ᐱᓕᕆᖅᑳᖅᑕᐅᔭᕆᐊᓕᒃ 11: ᐱᕙᓪᓕᐊᑎᑦᑎᓗᓂ ᖃᐅᔨᔾᔪᑎᐅᒐᔭᖅᑐᓂᒃ ᑐᕌᒐᓂᓪᓗ ᖁᑦᑐᖕᓂᖅᐹᑉ ᐊᐅᓚᑕᐅᓂᖓᓄᑦ.

ᑲᔪᓯᔪᑦ/ᓇᓗᓇᐃᔭᖅᓯᒪᓂᖏᑦ

  • ᓄᓇᐅᑉ ᐊᓐᓂᕐᓇᕐᓂᖓᓄᑦ ᖃᐅᔨᔾᔪᑏᑦ ᓄᓇᒥ ᐃᒪᖏᓐᓂᓪᓗ ᓇᓗᓇᐃᖅᑕᐅᓯᒪᕗᑦ, ᖃᓄᐃᑐᐃᓐᓇᕆᐊᓕᖕᒧᓪᓗ ᖃᐅᔨᓴᐅᑏᑦ ᐋᖅᑭᒃᐅᓯᒪᓕᖅᖢᑎᒃ.

ᑭᖑᓪᓕᖅᐹᖅ — ᖃᓄᐃᓕᖓᓂᐊᓕᖅᐱᑕ

ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥᓄᓇᕗᑦ ᒥᕐᖑᐃᖅᓯᕕᓕᕆᔨᒃᑯᖏᑦ ᖁᑦᑎᖕᓂᖅᐹᑉ ᑲᑐᔾᔨᖃᑎᒌᒃᖢᑎᒃ ᒥᕐᖑᐃᖅᓯᕕᓕᕆᓂᕐᒧᑦ ᑲᑎᒪᔨᕋᓛᖏᑦ ᓂᕆᐅᓂᖃᑦᑎᐊᖅᐳᑦ ᐊᕐᕌᒍᖃᑦᑎᐊᕐᓂᐊᓕᕐᓂᖏᓐᓂᒃ. ᐸᕐᓇᐅᑏᑦ 2020-21 ᐋᖅᑭᒋᐊᖅᑕᐅᒃᑲᓐᓂᓕᖅᑐᑦ ᑭᐅᔾᔪᑎᖃᕆᐊᖅᖢᑎᒃ ᓄᕙᖕᓇᕐᔪᐊᖅ 19 ᓄᓇᕐᔪᐊᕐᒧᑦ ᐊᒃᑐᐃᔪᓂᒃ, ᐱᓕᕆᓪᓗᐊᑕᖅᑕᐅᔪᒪᔪᑦ ᐅᑭᐊ ᐊᕐᕌᒍᒥ:

  • ᑐᓴᕆᐊᕈᑕᐅᓗᑎᒃ ᐊᐅᓚᑦᑎᓂᕐᒧᑦ ᐸᕐᓇᐅᑎᓕᐊᖑᔪᖅ ᓴᖅᑭᑦᑏᓗᓯᒃ ᓄᑖᒥ ᐸᕐᓇᐅᑎᒥᒃ.
  • ᖁᑦᑎᖕᓂᖅᐸᖅ ᐃᖅᑲᓇᐃᔭᖅᑎᖏᑦ ᓴᖅᑭᔮᕐᓂᖅᓴᐅᓕᕐᓗᑎᒃ ᐅᑭᐅᑕᖅᑐᒥᒃ ᐃᖅᑲᓇᐃᔮᒃᓴᑦ ᐃᓄᖃᖏᑦᑐᑦ ᑐᓴᐅᒪᑎᑦᑎᓂᕐᒧᒃ ᐸᖅᑭᔨᐅᓂᕐᒧᓪᓗ ᐃᖅᑲᓇᐃᔮᒃᓴᑦ ᐃᓐᓄᒃᑎᓪᓗᒋᑦ ᖃᐅᓴᐃᑦᑐᕐᒥ ᐊᒥᖅᑳᐅᑎᐅᖃᑦᑕᕐᓂᐊᖅᑐᒃ ᖃᐅᓱᐃᑦᑐᖅ ᑲᓇᑕᐅᑉ ᒥᕐᖑᐃᖅᓯᕕᖓᓂ.
  • ᑐᓴᐅᒪᖃᑦᑕᐅᑎᓂᖅ ᑲᓇᑕᐅᑉ ᒥᕐᖑᐃᖅᓯᕕᓕᕆᔨᒃᑯᖏᓐᓂ ᓄᓇᓕᖕᒥᐅᑕᓂᒡᓗ ᖃᐅᓱᐃᑦᑐᕐᒥ ᐊᐅᓱᐃᑦᑐᕐᒥᓪᓗ ᐊᑲᐅᓯᒋᐊᕐᓗᒋᑦ ᐊᑐᕐᓗᑎᒃ ᑐᓴᕆᐊᕈᑎᓕᕆᔾᔪᑎᓂᒃ ᓲᕐᓗ ᓄᓇᓕᖕᓂ ᐱᖅᑯᓯᓕᕆᓂᕐᒧᑦ ᑲᑎᒪᑎᑦᑎᓂᒃᑯᑦ ᐃᓕᓐᓂᐊᕐᕕᖕᓄᓪᓗ ᐳᓚᕋᓐᓂᒃᑯᑦ.
  • ᐱᕙᓪᓕᐊᑎᑦᑎᓗᓂ ᒪᓕᒋᐊᓕᖕᓂᒃ ᐳᓚᕋᓐᓂᕐᒧᑦ ᐱᖅᑯᓯᖃᕐᕕᐅᔪᓂᒃ ᐃᓚᐅᑎᑦᑎᓗᑎᒃ ᐃᓕᖅᑯᓯᕆᔭᐅᔪᓂᒃ.
  • ᐱᕙᓪᓕᐊᔭᐅᔪᑦ ᐱᓕᒻᒪᒃᓴᐅᑎᓕᕆᓂᕐᒧᑦ ᓄᓇᕗᑦ ᒥᕐᖑᐃᖅᓯᕕᓕᕆᔨᒃᑯᖏᓐᓂ ᑐᓂᓯᒪᔪᓐᓇᖅᑕᖏᑦ ᓄᓇᓕᖕᒥᐅᓄᑦ ᐊᑐᐃᓐᓇᐅᓕᕐᓂᖅᓴᐅᓗᑎᒃ ᒥᕐᖑᐃᖅᓯᕕᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᑳᓐᑐᕌᒃᑎᒍᓪᓘᓐᓃᑦ, ᓄᓇᓕᖕᓂ ᐱᓕᒻᒪᒃᓴᐅᑎᐅᔪᓐᓇᖅᑐᑦ ᐃᖅᑲᓇᐃᔭᕈᓐᓇᖅᓯᓕᖅᑎᑦᑎᔪᓐᓇᖅᑐᓪᓗ..
  • ᐱᓕᕆᖃᑎᒌᓐᓇᕐᓗᒋᑦ ᓄᓇᓕᖕᒥᐅᑦ ᐳᓚᕋᑦᑐᓕᕆᓂᕐᒧᑦ ᐃᓚᐅᔪᓐᓇᖁᓪᓗᒋᑦ, ᓲᕐᓗ ᓇᔪᒐᐅᔪᓂᒃ ᑐᑭᓯᑎᑦᑎᒋᐊᕐᓂᕐᒧᑦ ᐱᓕᒻᒪᒃᓴᐃᓂᕐᒥᒃ.
  • ᐱᓕᕆᕙᒌᕐᓗᒋᑦ ᐱᖁᑏᑦ ᐱᔭᕆᐊᓖᑦ ᐃᓚᐅᑎᒃ ᐱᕙᓪᓕᐊᑎᑦᒃᑎᓂᖅ ᐱᖁᑎᖃᕐᓂᕐᒧᑦ ᖃᓄᖅᑑᕈᑎᓂᒃ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᓱᕋᓇᑐᐃᓐᕆᐸᓕᖕᓄᑦ ᖃᐅᔨᓴᐃᓂᕐᒥᒃ ᐸᕐᓇᐅᑎᓕᕆᓂᕐᒥᒃ, ᒥᑦᑕᕐᕕᐅᓪᓗ ᖃᐅᔨᓴᖅᑕᐅᓂᒃᓴᖓᓄᑦ ᐸᕐᓇᐃᓂᕐᒥᒃ.
  • ᐱᒋᐊᖅᑎᑦᑎᓗᓂ ᖃᐅᔨᓴᖅᑐᓕᕆᓂᕐᒧᑦ ᖃᓄᐃᓕᖓᓂᐅᔪᓂᒃ ᐃᖅᑕᕐᓂᓴᖃᕐᕖᑦ ᐊᑭᖏᓐᓂᒃ ᐱᒋᐊᖅᑎᑦᑎᓗᓂᓗ ᖃᐅᔨᓴᐅᑏᑦ ᓇᓕᖅᑲᕇᒃᑎᑕᐅᓂᖏᓐᓄᑦ ᐃᑲᔪᕋᓱᒡᓗᒍ ᓯᕗᓂᒃᓴᑦᑎᓐᓂ ᐸᕐᓇᒃᑕᐅᔾᔪᑎᒃᓴᖓ ᓂᕈᐊᖅᑕᐅᖁᓪᓗᒍ ᖁᑦᑎᖕᓂᖅᐹᑉ ᓇᓗᓇᐃᔭᖅᓯᒪᓂᖓ ᓄᓇᕐᔪᐊᕐᒥᐅᑦ ᓴᐳᔾᔨᔨᖏᓐᓂᒃ ᐃᑦᑕᕐᓂᓴᓂᐃᒃ ᑎᑎᕋᖅᑕᐅᓯᒪᔪᑦ ᓄᓇᕐᔪᐊᒥ ᐃᑦᑕᕐᓂᓴᖃᐅᖅᑐᓂᒃ ᐅᖃᐅᔾᔪᖅᑕᐅᓯᒪᓕᖅᑎᓪᓗᒋᑦ ᐊᑐᓕᖁᔭᐅᑎᓪᓗᒋᓪᓗ ᐊᐅᓚᑦᑎᓂᕐᒧᑦ ᐱᓕᕆᖃᑎᒋᔭᐅᔪᓂᒃ.

Liens connexes

Date de modification :