ᐊᕌᒍᓕᒫᖅ ᐊᐅᓚᓯᓂᕐᒧᑦ ᐸᕐᓇᐅᑎᐅᑉ ᐊᑐᓕᕐᑎᑕᐅᓂᖓᑕ ᖃᓄᐃᓕᖓᓕᕐᓂᖓ 2019-2020

Parc national Ukkusiksalik

Français 

ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᐊᐅᓚᑦᑎᓂᕐᒧᑦ ᐸᕐᓇᐅᑦ ᓇᓗᓇᐃᔭᐃᕗᖅ ᓯᕕᑐᔪᒧᑦ ᐸᕐᓇᐅᑕᐅᓯᒪᔪᓂᒃ ᑐᑭᒧᐊᕈᑎᓂᒃ ᐊᒻᒪ ᐊᐅᓚᑦᑎᓂᕐᒧᑦ ᑐᕌᒐᖏᑦ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᖓᓄᑦ. ᐸᕐᓇᐅᑦ ᒪᓕᑦᑎᐊᖅᓯᒪᔪᖅ ᓄᓇᕗᑦ ᐊᖏᕈᑎᖓᓂᒃ, ᐃᓄᐃᑦ ᐊᒃᑐᖅᑕᐅᓂᕐᒧᑦ ᐃᑲᔫᓯᐊᓪᓗ ᐊᖏᕈᑎ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᖓᓄᑦ, ᐊᒻᒪ ᑲᓇᑕ ᒥᕐᙳᐃᖅᓯᕐᕕᓕᕆᔨᑦ ᑐᕌᒐᖓᑦ ᓴᐳᒻᒥᑎᑦᑎᓂᕐᒥᒃ ᐊᒻᒪ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᓕᒫᒧᑦ ᐅᔾᔨᕐᓇᖅᑑᑎᒋᔭᐅᔪᓂᒃ ᑲᓇᑕᐅᑉ ᓇᖕᒥᓂᓪᓚᑦᑖᖓᓂᒃ ᐊᒻᒪ ᐱᖅᑯᓯᑐᖃᖏᓐᓂᒡᓗ, ᐊᒻᒪ ᓴᖅᑭᔮᖅᑎᑦᑎᓂᕐᒥᒃ ᐃᓄᑐᐃᓐᓇᕐᓄᑦ ᑐᑭᓯᐅᒪᑎᑦᑎᓗᑎᒃ, ᐊᒻᒪ ᐱᓐᓇᕈᓱᒡᓗᑎᒃ ᖁᕕᐊᒋᔭᖃᕐᓗᑎᒃ ᑕᐃᒫᒃ ᐆᒪᔪᕈᓯᐊᑦ ᐊᕙᑎᖏᑦ ᐊᒻᒪ ᐃᖅᑲᐅᒪᔾᔪᑎᑦᑎᐊᕙᐅᓂᐊᕐᓗᓂ ᒫᓐᓇᒧᑦ ᐊᒻᒪ ᓯᕗᓂᕐᒥᒃ ᑭᖑᕚᕆᓂᐊᖅᑕᑉᑎᓐᓄᑦ. ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᐊᑕᐅᑦᑎᒃᑯᑦ ᐊᐅᓚᑕᐅᔪᖅ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᐊᐅᓚᑦᑎᓂᕐᒧᑦ ᑲᑎᒪᔨᖏᓐᓄᑦ ᓴᖅᑭᑕᐅᓚᐅᖅᑐᖅ ᒪᓕᒃᖢᒋᑦ ᐃᓄᐃᑦ ᐊᒃᑐᖅᑕᐅᓂᕐᒧᑦ ᐃᑲᔫᓯᐊᓄᓪᓗ ᐊᖏᕈᑎᖏᑦᑎᒍᑦ.

ᑖᖕᓇ ᓄᑖᓂᒃ ᓇᓗᓇᐃᔭᐃᓂᖅ ᑲᓇᑕ ᒥᕐᙳᐃᖅᓯᕐᕕᓕᕆᔨᒃᑯᑦ 2019-20 ᐅᑭᐅᖓᓂᒃ ᐊᕌᒍᑕᒫᖅᓯᐅᑎᐅᑉ ᐱᕙᓪᓕᐊᓂᖓᑕ ᐅᓂᒃᑳᓕᐊᕐᒥᒃ ᒥᕐᓵᓄᑦ ᐊᑐᓕᖅᑎᑦᑎᓂᕐᒧᑦ ᐊᐅᓚᑦᑎᓂᕐᒧᑦ ᐸᕐᓇᐅᑎᖓᓐᓂᒃ ᐱᓕᕆᖃᑎᒌᖏᓐᓄᑦ, ᐸᐸᑦᑎᔨᐅᖃᑕᐅᔪᓄᑦ, ᐃᓄᐃᑦ ᐱᔪᓐᓇᐅᑎᓂᒃ ᑎᒍᒻᒥᔨᓄᑦ ᐊᒻᒪ ᐃᓄᑐᐃᓐᓇᕐᓄᑦ.

Des membres de la communauté et du personnel de Parcs Canada discutent autour d’une table dans une salle de conférences.
ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐋᖅᑭᒃᓱᖅᓯᒪᓂᖏᓐᓂᒃ ᐃᓕᓐᓂᐊᕐᓂᖅ ᓇᐅᔮᓂ ᐅᒃᑑᐱᕆ 2019-ᖑᑎᓪᓗᒍ. [ᔮᑭ ᓇᑯᓛᖅ, ᐃᓕᓴᐱ ᐊᒡᓘᒃᑲᖅ, ᐃᓕᓴᐱ ᑭᓪᓛᐱᒃ, ᑎᕇᓯ ᑐᖏᓕᒃ, ᑑᓇ ᒥᓗᖅᑐᖅ, ᒪᕇᔅ ᒫᕼᐃ, ᐋᑐᕆ ᖃᒪᓂᖅ, ᐲᑕ ᑭᑦ, ᔨᐊᓐ ᓘᑲᓯᒃ, ᐅᓄᕆ ᐊᒡᓘᒃᑲᖅ, ᔫᓐ ᓯᒃᑲᑎ, ᒪᐃᑯ ᑕᒃᑑ]

ᐃᓗᓕᕆᔭᖏᑦ

ᐸᕐᓇᐅᑕᐅᓯᒪᔪᖅ 1: ᐊᖏᔫᑎᑦ ᐱᖁᑎᑦ − ᐊᑐᐃᓐᓇᐅᑦᑎᐊᕋᓗᐊᕐᒪᖔᑕ ᓇᔪᕐᕖᑦ ᓴᐳᔾᔭᐅᓂᐊᕐᓗᑎᒃ, ᑕᑯᒥᓇᕐᓗᑎᒃ, ᐊᒻᒪ ᓴᖅᑭᔮᖅᑎᑦᑎᓇᓱᐊᕐᓗᑎᒃ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᖓᓂᒃ.

ᑐᕌᒐᖅ 1.1: ᐊᐅᓚᑦᑎᕝᕕᐅᔪᒃᓴᖅ ᐊᒻᒪ ᓯᑎᔪᒥᒃ ᐊᑭᓐᓇᓖᑦ ᓇᔪᕐᕖᑦ ᐊᑐᐃᓐᓇᐅᓕᖅᑐᑦ ᒥᕐᙳᐃᖅᓯᕐᕕᐅᑉ ᐃᓗᐊᓂ.

ᐱᕙᓪᓕᐊᓂᖏᑦ / ᐅᔾᔨᕐᓇᕐᓂᖏᑦ
  • ᑕᖕᒫᕐᕕᐅᓚᐅᑲᖕᓂᐊᖅᑐᒥᒃ ᒪᑭᑎᑦᑎᓯᒪᓕᖅᑐᒍᑦ ᓯᓚ ᓛᔾ ᒥᕝᕕᖓᓂᒃ ᐊᒻᒪ ᐱᓕᕆᐊᕆᔭᐅᕙᓪᓕᐊᑉᓗᓂ ᐊᐅᓚᑦᑎᕝᕕᒋᔭᐅᓂᐊᖅᑐᒥᒃ ᐊᒻᒪ ᒪᑭᑎᑦᑎᓗᑕ ᓯᑎᔪᒥᒃ ᐊᑭᓐᓇᓕᖕᓂᒃ. ᐊᑕᐅᓯᖅ ᓯᑎᔪᒥᒃ ᐊᑭᓐᓇᖃᖅᑐᖅ, ᖁᕐᕕᒃ, ᐊᒻᒪ ᑐᙵᕝᕕᒃᓴᖓᓂᒃ ᑐᐱᕐᒧᑦ ᐋᖅᑭᐅᒪᓕᖅᑐᑦ 50-ᒦᑕᑦ ᐊᒻᒪ 50-ᒦᑕᑲᓐᓂᕐᒥᒃ ᐊᖏᓂᖃᖅᑐᖅ ᓴᐳᔾᔭᐅᔾᔪᑎᒥᒃ ᐊᕙᓗᒥᒃ ᓇᓄᖃᖅᑎᑦᑎᑦᑕᐃᓕᔾᔪᑎᒥᒃ ᐃᑲᔪᕈᑕᐅᓂᐊᖅᑐᖅ ᐊᐅᓚᔾᔪᑎᖏᓐᓄᑦ ᒥᕐᙳᐃᖅᓯᕐᕕᒥ ᐊᖑᔫᑎᑦ ᐱᖁᑎᑦ ᑲᒪᒋᔭᐅᔭᕆᐊᓖᑦ ᓇᓗᓇᐃᖅᑕᐅᑎᓪᓗᒋᑦ ᐊᒻᒪ ᐸᕐᓇᐅᑎᑦ ᐱᕙᓪᓕᐊᑎᓪᓗᒋᑦ.
  • ᐱᒋᐊᕐᖓᐅᒻᒥᒃ ᐊᖏᔫᑎᓄᑦ ᐱᖁᑎᓄᑦ ᐸᕐᓇᐅᒻᒥᒃ, ᐃᓚᖃᖅᖢᒍᖅ ᐊᐅᓚᑦᑎᕝᕕᒋᔭᐅᓂᐊᖅᑐᒥᒃ, ᐱᕙᓪᓕᐊᕋᐅᔭᖅᑐᑦ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᐊᐅᓚᑦᑎᓂᕐᒧᑦ ᑲᑎᒪᔨᖏᑦᑕ ᕿᒥᕐᕈᕙᒃᖢᓂᔾᔪᒃ ᐊᒻᒪ ᐊᐅᑐᖁᔨᓂᕐᒧᑦ ᐱᕕᖃᖅᖢᓂ ᐸᕐᓇᐅᑦ ᐱᕙᓪᓕᐊᕋᐅᔭᖅᑎᓪᓗᒍ. ᐸᕐᓇᐅᑦ ᐱᔭᕇᖅᑕᐅᓂᐊᕋᓱᒋᔭᐅᔪᖅ ᑎᓯᐱᕆ 2020-ᒥᒃ.
  • ᓴᓇᓯᒪᕙᒌᖅᑐᒥᒃ ᓯᑎᔪᒥᒃ ᐊᑭᓐᓇᓕᖕᒥᒃ ᓇᔪᕐᕕᒃᓴᒥᒃ ᑎᑭᓚᐅᖅᐳᖅ ᓇᐅᔮᓄᑦ ᐅᒥᐊᕐᔪᐊᑎᒍᑦ 2019-ᖑᑎᓪᓗᒍ. ᐊᓯᖓᓂᒃᑕᐅᖅ ᓯᑎᔪᒥᒃ ᐊᑭᓐᓇᓕᖕᒥᒃ ᓂᐅᕕᓚᐅᕐᒥᔪᒍᑦ ᐊᒻᒪ ᑎᑭᓛᖅᖢᓂ ᐅᒥᕐᔪᐊᑎᒍᑦ 2020-ᒥᒃ.

ᑐᕌᒐᖅ 1.2: ᐊᖅᑯᑏᑦ ᑐᕌᕐᕖᓪᓗ, ᑐᓚᒃᑕᕐᕖᑦ, ᐊᒃᑐᖅᑕᐅᓴᕋᐃᑦᑐᑦ ᐃᓃᑦ, ᐊᒻᒪ ᐊᓯᖏᓪᓗᑦ ᓇᓗᓇᐃᖅᑕᐅᕗᑦ ᐊᒻᒪ ᐅᖃᐅᓯᕆᔭᐅᑉᓗᑎᒃ ᒥᕐᙳᐃᖅᓯᕐᕕᓕᐊᖅᐸᒃᑐᓄᑦ.

ᐱᕙᓪᓕᐊᓂᖏᑦ / ᐅᔾᔨᕐᓇᕐᓂᖏᑦ
  • ᐊᖅᑯᑏᑦ, ᐃᓃᓪᓗ ᐱᒻᒪᕆᐅᓂᖃᖅᑎᑕᐅᔪᑦ ᐃᓄᖕᓄᑦ ᐊᒻᒪ ᐊᒃᑐᖅᑕᐅᓴᕋᐃᑦᑐᑦ ᐃᑦᑕᕐᓂᑕᖃᕐᕖᑦ ᓇᓗᓇᐃᖅᑕᐅᓯᒪᓕᖅᑐᑦ ᐊᒻᒪ ᐅᖃᐅᓯᐅᓯᒪᑉᓗᑎᒃ ᐊᑭᓐᓇᕐᒧᑦ ᓂᕕᙵᖅᑕᐅᖃᑦᑕᖅᑐᓂᒃ ᑐᑭᓯᒋᐊᕈᑎᓂᒃ ᑕᐃᑲᓂ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᑎᑎᕋᕐᕕᖓᓂᒃ ᓇᐅᔮᓂ. ᓂᕕᙵᖅᑕᐅᖃᑦᑕᖅᑐᓂᒃ ᐅᔾᔨᕐᓇᖅᑑᑎᑕᐅᔪᑦ ᐊᑐᖁᔭᐅᑉᓗᓂ ᑎᓕᐅᕆᓂᒃᑯᑦ ᓄᓇᒥ ᐱᓕᕆᔨᓄᑦ ᐃᓱᒪᑕᖓᑕ ᐳᓛᖅᑎᑦ ᐊᑎᓕᐅᕆᐊᖃᖃᑦᑕᕐᓂᖏᓐᓄᑦ, ᑐᑭᓯᐅᒪᑎᑕᐅᓗᑎᒃ ᖃᓄᐃᓕᐅᕆᐊᖃᕐᓂᕐᒧᑦ, ᐊᒻᒪ ᓇᓄᕐᓂᒃ ᖃᐅᔨᓴᖅᑎᖃᕐᓗᑎᒃ. ᓂᕕᙵᖅᑕᐅᔪᒃᓴᖅ ᓇᓗᓇᐃᖅᓯᓯᒪᒋᕗᖅ ᓇᒥ ᐊᒻᒪ ᖃᖓ ᖃᓄᐃᓕᐅᕈᓘᔭᕐᓂᐊᕐᒪᖔᑕ ᐅᕝᕙᓘᓐᓃᑦ ᖃᓄᐃᓕᐅᕈᓐᓇᖏᓐᓂᖏᒃ ᐊᒃᑐᖅᑕᐅᓴᕋᐃᓐᓂᖏᓐᓄᑦ ᐃᓂᐅᑉ ᐅᕝᕙᓘᓐᓃᑦ ᓇᓄᐃᑦ ᓯᑎᖃᕐᓂᖏᓐᓄᑦ ᐱᔾᔪᑎᖃᕐᓗᑎᒃ, ᑐᒃᑐᐃᑦ ᓄᕐᕆᐅᒃᑎᓪᓗᒋᑦ, ᐊᒻᒪ ᐱᑦᓯᐅᓛᑦ ᐃᕝᕙᕝᕕᖏᓐᓂᒃ.
  • ᑐᐊᕕᕐᓇᖅᑐᒥᒃ ᓇᔪᕐᕕᒃᓴᖅ ᐊᒻᒪ ᐱᖁᑎᓂᒃ ᐱᕉᕐᕖᑦ ᐊᑐᐃᓐᓇᐅᕗᑦ ᓯᓚ ᒥ ᕝᕕᖓᓂᒃ ᐊᒻᒪ ᐅᒥᐊᕐᒧᑦ ᓯᕐᓗᐊᕐᒥᒃ. ᐊᑕᐅᓯᖅ ᐱᕉᕐᕕᒃ ᐃᓂᖃᖅᐳᖅ ᑕᐃᑲᓂ ᓄᓇᕗᑦ ᒐᕙᒪᒃᑯᖏᑦᑕ ᐃᒡᓗᕋᓛᖓᓂᒃ ᑕᐃᑲᓂ ᐱᖅᓯᒪᓂᕐᒥ.
  • ᑐᓚᒡᕕᐅᔪᓐᓇᖅᑐᓂᒃ ᐊᑐᐃᓐᓇᐅᔪᑦ ᓇᓗᓇᐃᖅᑕᐅᓯᒪᓕᖅᑐᑦ ᐱᓕᕆᔨᓄᑦ. ᑐᑭᓯᒋᐊᕈᑎᑦ ᐃᑲᔪᕈᑕᐅᓇᔭᖅᑐᖅ ᒥᕐᙳᐃᖅᓯᕐᕕᒧᑦ ᐳᓛᖅᑎᓄᑦ ᐊᒻᒪ ᐊᑐᖅᐸᒃᑐᑦ ᖃᐅᔨᓴᖃᑦᑕᕐᓗᑎᒃ ᐊᑦᑕᓇᙱᒃᑲᓗᐊᕐᒪᖔᑦ ᑐᓚᒡᕕᐅᓂᐊᖅᑐᖅ, ᓲᕐᓗ ᐅᓕᓐᓃᑦ ᐊᒻᒪ ᐋᖅᑭᐅᒪᓂᖓᑦᑕ ᓇᔪᕐᕕᐅᓂᐊᖅᑑᑉ ᐊᓄᕆᒥᒃ ᐅᔾᔨᕈᓱᒋᔭᖃᕆᐊᖃᖅᖢᑎᒃ, ᑲᑎᖅᓱᖅᑕᐅᓯᒪᓕᖅᑐᑦ ᐊᒥᖅᑳᖅᑕᐅᓗᑎᒃ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᐅᑉ ᐃᖅᑭᐊᕿᕝᕕᖓᑦᑎᒍᑦ ᒪᒃᕉᒃ ᐅᑭᐅᓂᒃ
  • ᐃᓱᒪᒋᔭᐅᓂᖓᑦ ᓇᓗᓇᐃᔭᐅᑎᒋᔭᐅᔪᒃᓴᐅᓗᓂ ᑕᑯᔭᒐᖅ ᓴᖅᑭᔮᖅᑎᑦᑎᔪᖅ ᒥᕐᙳᐃᖅᓯᕐᕕᒥᒃ ᐊᒻᒪ ᑐᑭᓯᐅᒪᑎᑦᑎᔪᖅ ᐊᑐᖅᐸᒃᑐᑦ ᒥᕐᙳᐃᖅᓯᕐᕕᒥᒃ ᓴᖅᑭᑕᐅᓯᒪᓕᖅᑐᖅ ᐅᖃᖃᑎᒌᖕᓂᒃᑯᑦ ᐊᒻᒪ ᐊᖏᖅᑕᐅᓯᒪᑉᓗᓂ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᐊᐅᓚᑦᑎᓂᕐᒧᑦ ᑲᑎᒪᔨᖏᓐᓄᑦ. ᓄᓇᙳᐊᖑᔮᓪᓚᑦᑖᖅᑐᓂᒃ ᓄᓇᙳᐊᖃᖅᐳᖅ ᒥᕐᙳᐃᖅᓯᕐᕕᒃ ᑐᑭᓯᒋᐊᕈᑎᖃᖅᖢᓂ ᓴᓂᐊᒍᑦ ᐅᔾᔨᕐᓇᖅᑑᑎᖃᖅᖢᓂ ᓂᐅᕕᕐᕕᓂᑐᖃᖅ, ᐊᒃᖢᖏᑕᐅᑎᑕᓕᒃ ᐊᒻᒪ ᐃᓕᖅᑯᓯᑎᒍᑦ ᐃᓅᓯᖃᓚᐅᕐᓂᖏᑦ ᐅᔾᔨᕐᓇᖅᑑᑎᒋᔭᐅᓂᐊᖅᑐᑦ ᑕᑯᔭᒐᐃᑦ. ᓴᓇᔭᐅᕙᓪᓕᐊᓂᖏᑦ ᐊᒻᒪ ᐃᓕᔭᐅᓂᖏᑦ ᑲᖏᖅᖠᓂᕐᒥ, ᖃᒪᓂᑦᑐᐊᕐᒥ ᐊᒻᒪ ᓇᐅᔮᓂ ᓂᕆᐅᒋᔭᐅᔪᑦ 2020-ᒥ ᐊᒻᒪ 2021-ᒥ.

ᐸᕐᓇᐅᑕᐅᓯᒪᔪᖅ 2: ᐆᒪᔪᖅ ᓄᓇ − ᓴᙱᒃᑎᑦᑎᓂᖅ ᐃᓄᐃᑦ ᐊᒃᑐᐊᓯᒪᓂᖓᑦ ᐅᒃᑯᓯᒃᓴᓕ ᒥᕐᙳᐃᖅᓯᕐᕕᖓᓄᑦ.

ᑐᕌᒐᖅ 2.1: ᐃᓄᐃᑦ ᐊᒃᑐᐊᓯᒪᓂᖓᑦ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᖓᓄᑦ ᓴᙱᒃᓯᒋᐊᑕᐅᓯᒪᕗᑦ ᐊᒻᒪ ᐊᒥᖅᑳᖅᑕᐅᑉᓗᑎᒃ.

ᐱᕙᓪᓕᐊᓂᖏᑦ / ᐅᔾᔨᕐᓇᕐᓂᖏᑦ
  • ᐅᒃᑯᓯᒃᓴᓕᒃ ᐊᐅᓚᑦᑎᓂᕐᒧᑦ ᑲᑎᒪᔨᖏᑦ ᒪᕐᕉᖕᓂᒃ ᑲᑎᖃᑎᒌᒃᖢᑎᒃ ᑲᑎᒪᖃᑎᒌᒃᓯᒪᓕᖅᑐᑦ (ᐊᐃᕆᓖᑦ 24-25 ᐊᒻᒪ ᐅᒃᑑᐱᕆ 22-23) ᐊᒻᒪ ᒪᕐᕉᓂᒃ ᐅᖃᓘᑎᒃᑯᑦ ᑲᑎᒪᖃᑎᒌᒃᓯᒪᑉᓗᑎᒃ (ᔪᓚᐃ 12 ᐊᒻᒪ ᑎᓯᐱᕆ 13) 2019-20-ᖑᑎᓪᓗᒍ.
  • ᑲᑎᖦᖢᒋᑦ 9-ᖑᔪᑦ ᐃᑲᔫᓯᐊᒃᓴᓄᑦ ᐱᓕᕆᐊᒃᓴᑦ ᐊᒻᒪ ᐱᖁᑎᑦ ᑎᑭᖦᖢᑎᒃ ᓇᐅᔮᓄᑦ, ᖃᒪᓂᑦᑐᐊᖅ, ᐊᒻᒪ ᓴᓪᓕᓄᑦ ᐃᓚᖃᖅᖢᑎᒃ ᐅᑯᓂᖓᑦ: ᐃᒪᕐᒥᒃ ᐆᒻᒪᖅᑯᑎᓂᒡᓗ ᐱᒪᑐᐃᓂᕐᒧᑦ ᓴᖅᑭᑕᐅᓯᒪᓕᖅᑐᑦ 45-ᖑᔪᓄᑦ ᐃᓕᓐᓂᐊᖅᑐᑦ ᓄᑲᖅᖠᐅᔪᓄᑦ ᑐᓂᐅᖅᑲᖅᑕᐅᓯᒪᔪᑦ ᓄᑕᖅᑲᓄᑦ ᓇᐅᔮᓂ; ᕿᒻᒥᓕᕆᓂᕐᒧᑦ ᐊᒻᒪ ᐊᓄᓕᐅᕐᓂᕐᒧᓪᓗ ᐃᓕᓐᓂᐊᕐᓂᖃᖅᑎᑦᑎᓚᐅᕆᕗᑦ 33-ᖑᔪᑦ ᖁᑦᑎᖕᓂᖅᓴᒥᒃ ᐃᓕᓐᓂᐊᖅᑎᐅᔪᓄᑦ ᓇᐅᔮᓂ; ᐊᒡᒐᒃᑯᑦ ᓴᓇᐅᒐᐃᑦ ᓂᐅᕕᖅᑕᐅᓯᒪᓕᕐᒥᔪᑦ ᐃᓄᖕᓂᖔᖅᑐᓂᒃ ᓇᐅᔮᓂ ᐊᒻᒪ ᖃᒪᓂᑦᑐᐊᕐᒥ ᐃᑲᔪᕈᑎᒃᓴᐅᓗᑎᒃ; ᑳᑐᕌᒃᑎᒍᑦ ᐊᕐᕕᓂᓕᐅᔪᓂᒃ ᐃᓛᒃᑯᑦ ᐃᓄᐃᑦ ᐱᖅᑯᓯᖏᓐᓂᒃ ᑕᑯᔭᒐᒃᓴᓂᒃ ᑲᓇᑕ ᒥᕐᙳᐃᖅᓯᕐᕕᖓᑕ ᑎᑎᕋᕐᕕᖓᓄᑦ ᓇᐅᔮᓂ ᑕᐃᑯᓂᖔᖅᖢᑎᒃ ᓄᓇᓕᐅᔪ ᑕᓪᓕᒪᑦ ᐊᒃᑐᐊᓂᖃᖅᑐᑦ ᒥᕐᙳᐃᖅᓯᕐᕕᒧᑦ; 14-ᖑᔪᑦ ᖃᕆᑕᐅᔭᑎᒍᑦ ᓄᑖᓂᒃ ᓇᓗᓇᐃᔭᖃᑦᑕᕐᓂᖅ ᑲᓇᑕ ᒥᖅᙳᐃᖅᓯᕐᕕᓕᕆᔨᑦ ᓄᓇᕗᒻᒥ ᕙᐃᔅᐳᒃ−ᖑᓂᕋᖅᑕᐅᔪᑎᒍᑦ; ᒪᒃᐱᒐᖃᖅᑐᓂᒃ ᐊᔾᔨᓕᐅᕆᔭᐅᓯᒪᔪᑦ ᐊᒻᒪ ᑎᑎᖅᑭᕆᓯᒪᑉᓗᑎᒃ ᐃᓄᖕᓄᑦ ᑲᓇᑕ ᒥᕐᙳᐃᖅᓯᕐᕕᓕᕆᔨᑦ ᐱᓕᕆᔨᖏᓐᓄᑦ ᑎᑎᕋᕐᕕᖓᓂᒃ ᓇᐅᔮᓂ ᑎᑎᕋᖅᑕᐅᓚᐅᖅᑐᑦ ᓄᓇᓕᖕᓂᖔᖅᖢᑎᒃ ᑕᓪᓕᒪᐅᔪᓂᒃ ᐊᒃᑐᐊᓂᖃᖅᑐᑦ ᒥᕐᙳᐃᖅᓯᕐᕕᒧᑦ ᐊᑐᖅᑕᐅᔪᒃᓴᐅᓗᑎᒃ ᐱᓕᕆᐊᕐᒧᑦ; ᖃᐅᔨᒃᑲᐃᒋᐊᖕᖓᐅᑎ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᖓᓄᑦ ᓴᖅᑭᔮᖅᑎᑕᐅᔪᒃᓴᖅ ᑐᓂᔭᐅᓯᒪᓕᖅᑐᑦ ᐃᓕᓐᓂᐊᕐᕕᓄᑦ ᖃᒪᓂᑦᑐᐊᕐᒥ ᐊᒻᒪ ᓴᓪᓕᓂ; ᓯᓚᒥ ᐃᒐᑉᓗᑎᒃ ᐱᓚᐅᖅᐳᑦ ᐳᑭᖅᑕᓕᖕᓂᓪᓗ ᐃᓚᖃᖅᖢᑎᒃ ᓄᓇᖃᖅᑳᖅᓯᒪᔪᑦ ᐅᑉᓗᖓᓂᒃ ᓇᐅᔮᓂ ᐊᒻᒪ; ᓯᑕᒪᑦ ᐅᑉᓗᓂᒃ ᒥᕐᓱᕐᓂᕐᒧᑦ ᐃᓕᓐᓂᐊᕐᓂᖃᓚᐅᕆᕗᒍᑦ ᐃᓐᓇᕐᒧᑦ ᐃᓕᓐᓂᐊᖅᑎᑕᐅᑉᓗᑎᒃ ᐊᒻᒪ ᑲᓇᑕ ᒥᕐᙳᐃᖅᓯᕐᕕᓕᕆᔨᓄᑦ
  • ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᐊᐅᓚᑦᑎᓂᕐᒧᑦ ᑲᑎᒪᔨ, ᑎᕇᓯ ᑐᖏᓕᒃ, ᐃᓚᐅᖃᑕᐅᓚᐅᖅᐳᖅ ᑲᓇᑕ ᒥᕐᙳᐃᖅᓯᕐᕕᓕ ᕆᔨᒃᑯᑦ ᓄᓇᕗᑦ ᑐᑭᓯᒋᐊᕐᕕᖃᓚᐅᖅᐳᖅ ᑕᐃᑲᓂ ᑐᕌᓐᑐ ᓯᓚᒥ ᐊᕙᒻᒧᕈᓘᔭᖃᑦᑕᕐᓂᕐᒧᑦ ᑕᑯᔭᒐᖃᖅᑎᓪᓗᒋᑦ ᕕᕝᕗᐊᕆ 2020-ᖑᑎᓪᓗᒍ.
  • ᐱᖓᓱᑦ ᓄᓇᓕᖕᓂᖔᖅᑐᑦ ᖃᒪᓂᑦᑐᐊᕐᒥᑦ ᐊᒻᒪ ᒪᕐᕉᒃ ᓇᐅᔮᓂ ᐱᓕᕆᑎᑕᐅᓚᐅᖅᐳᑦ ᓇᓄᕐᓂᒃ ᓇᐅᑦᑎᖅᑐᐃᔨᐅᑉᓗᑎᒃ ᑲᓇᑕ ᒥᕐᙳᐃᖅᓯᕐᕕᓕᕆᔨᒃᑯᑦ ᐱᓕᕆᔨᖏᓐᓄᑦ ᐊᒻᒪ ᐳᓛᖅᑎᓄᑦ ᐊᐅᔭᖓᓂᒃ 2019-ᒥ.
  • ᐅᒃᑯᓯᒃᓴᓕᒃ ᐊᐅᓚᑦᑎᓂᕐᒧᑦ ᑲᑎᒪᔩᑦ ᐃᒃᓯᕙᐅᑕᖓᑦ, ᔮᑭ ᓇᑯᓛᖅ, ᑕᐃᑯᙵᐅᖃᑕᐅᓚᐅᕐᒪᑦ ᐃᑲᔪᖅᖢᓂ ᐊᒻᒪ ᐅᖃᐅᔾᔪᐃᑉᓗᓂ ᐱᓕᕆᐊᕆᔭᐅᔪᓂᒃ ᓂᐅᕕᕐᕕᓂᑐᖃᕐᒥ ᐊᒻᒪ ᓄᓇᒥᒃ ᖃᐅᔨᓴᖅᖢᑎᒃ ᐊᐅᔭᐅᓚᐅᖅᑐᖅ.
  • ᒪᕐᕉᖕᓂᒃ ᐃᓕᓐᓂᐊᖅᑎᓂᒃ ᓴᓇᑎᑦᑎᓚᐅᖅᐳᑦ ᓇᐅᔮᕐᒥᐅᑕᒥᒃ ᐊᒻᒪ ᑲᖏᖅᖠᓂᕐᒥᐅᑕᒥᒃ.
  • ᐆᒃᑑᑎᒃᓴᕐᒥᒃ ᖃᓄᐃᓕᖓᓕᕐᓂᕐᒧᑦ ᖃᐅᔨᓴᕈᑎᒃᓴᒥᒃ ᒥᕐᙳᐃᖅᓯᕐᕕᐅᑉ ᐱᖁᑎᖏᓐᓄᑦ ᓴᓇᔭᐅᓚᐅᖅᐳᖅ, ᐊᒻᒪ ᐱᖁᑎᓗᒃᑖᑦ ᐃᓚᒋᖃᑕᐅᑉᓗᒋᑦ ᐃᑦᑕᕐᓂᑕᑦ ᐃᒡᓗᕐᔪᐊᑦ, ᐅᖅᓱᐊᓗᖃᑎᕖᑦ ᐊᒻᒪ ᓇᐸᔪᐊᓗᒃ ᖃᐅᔨᓴᖅᑕᐅᓚᐅᖅᐳᑦ. ᖃᓄᐃᓕᖓᓂᖏᑦ ᕿᒥᕐᕈᔭᐅᓛᖅᑐᑦ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᐊᐅᓚᑦᑎᓂᕐᒧᑦ ᑲᑎᒪᔨᖏᓐᓄᑦ ᐅᐱᕐᖓᒃᓵᖓᓂᒃ 2020-ᒥ.

ᑐᕌᒐᖅ 2.2: ᐱᕕᒃᓴᐃᑦ ᒥᕐᙳᐃᖅᓯᕐᕕᒧᑦ ᐳᓛᖅᑎᓄᑦ ᐊᑐᕐᓂᐊᖅᑕᖏᓐᓄᑦ ᓄᓇᒥ ᐊᒻᒪ ᑐᓵᓗᑎᒃ ᐅᓂᒃᑳᓂᒃ ᐅᒃᑯᓯᒃᓴᓕᐅᑉ ᒥᕐᓵᓅᖓᔪᓂᒃ.

ᐱᕙᓪᓕᐊᓂᖏᑦ / ᐅᔾᔨᕐᓇᕐᓂᖏᑦ
  • ᓂᐅᕕᕐᕕᓂᑐᖃᖅ ᐊᒻᒪ ᐊᒃᖢᖏᑕᐅᑎᓕᒃ ᑕᑯᒃᓴᐅᑎᑕᐅᓚᐅᖅᐳᖅ ᖃᕆᑕᐅᔭᑎᒍᑦ ᐅᓂᒃᑳᓄᑦ ᐃᓚᒋᔭᐅᖃᑕᐅᔪᖅ ᖃᕆᑕᐅᔭᑎᒍᑦ ᑕᑯᒃᓴᐅᑎᑦᑎᔪᒪᓇᓱᐊᖅᖢᑎᒃ ᑲᓇᑕᐅᑉ ᐃᑦᑕᕐᓂᑕᖃᕐᕕᐅᔪᓄᑦ ᐅᑉᓗᖓᓂᒃ ᔪᓚᐃᖑᑎᓪᓗᒍ 2019. ᐅᓂᒃᑳᑦ ᓴᖅᑭᑕᐅᓚᐅᖅᑐᑦ ᐅᖃᖃᑎᒌᖕᓂᖃᖅᖢᑎᒃ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᐊᐅᓚᑦᑎᓂᕐᒧᑦ
  • ᐱᖓᓱᑦ ᓄᓇᓕᖕᓂ ᑕᑯᔭᒐᐃᑦ ᐃᓂᖏᑦ ᓇᓗᓇᐃᖅᑕᐅᓯᒪᓕᖅᑐᑦ ᑲᖏᖅᖠᓂᕐᒥ, ᖃᒪᓂᑦᑐᐊᕐᒥ, ᐊᒻᒪ ᓇᐅᔮᓂ. ᐅᔾᔨᕆᔭᐅᓗᐊᕈᒪᔪᑦ ᑕᑯᔭᒐᕐᓂᒃ ᐃᓚᖃᖅᐳᖅ ᓂᐅᕕᕐᕕᕕᓂᖅ ᐊᒻᒪ ᐊᒃᖢᖏᑕᐅᑎᑕᓕᒃ. ᑳᑐᕌᒃᑎᒍᑦ ᑐᑭᓯᐅᒪᑎᑦᑎᓇᓱᐊᕐᓂᕐᒧᑦ ᐃᓗᓕᐅᔪᓂᒃ ᓴᖅᑭᑦᑎᓂᕐᒧᑦ ᓂᕆᐅᒋᔭᐅᔪᖅ ᑐᓂᔭᐅᔪᒃᓴᐅᓗᓂ 2020-2021 ᐅᑭᐅᖏᓐᓂ.
  • ᐳᓛᕐᕕᐅᓂᐊᖅᑐᖅ ᐃᓂᖓᑦ ᖃᐅᔨᓴᕐᓂᖅ ᑲᒪᒋᔭᐅᓚᐅᖅᐳᖅ ᓯᓚ ᑰᖓᑕ ᖃᓂᒋᔮᓂ, ᓂᐅᕕᕐᕕᕕᓂᖅ, ᐊᒃᖢᖏᑕᐅᑎᑕᓕᒃ, ᐱᖅᓯᒪᓂᖅ, ᐃᒃᓯᕋᕐᔪᐊᑦ ᑐᒃᓯᐊᕐᕕᖓᑦ, ᑲᖏᖅᖢᐊᕐᔪᒃ ᑲᖏᓪᓕᖅ ᐊᒻᒪ ᑲᖏᖅᖢᐊᕐᔪᒃ ᑲᖏᓪᓕᖅ ᐊᒻᒪ Berthie Bay−ᒥ ᐱᕙᓪᓕᐊᑎᑦᑎᓗᑎᒃ ᐳᓛᕐᓂᕐᒧᑦ ᒥᒃᖠᒋᐊᖅᑎᑦᑎᓂᕐᒧᑦ ᐃᓃᑦ ᐅᓗᕆᐊᓇᖅᑐᒦᑦᑐᓂᒃ. ᐃᓂᒧᐊᖅᑕᐅᓕᖁᔨᓂᖅ ᓇᓗᓇᐃᒃᑯᑕᐃᑦ ᑕᑯᒃᓴᐅᑎᑕᐅᖃᑦᑕᖅᑐᑦ ᓂᕕᙵᖅᑕᐅᓯᒪᔪᑎᒍᑦ ᐊᒻᒪ ᐊᖓᔪᖅᑳᑉ ᑎᓕᐅᕆᓂᒃᑯᑦ.
  • ᐆᒪᔪᓂᒃ ᑕᐅᑑᔭᕐᓂᕐᒧᑦ ᐊᑐᕆᐊᖃᖅᑎᑕᐅᔪᑦ ᓴᖅᑭᑕᐅᓯᒪᓕᖅᑐᖅ ᐊᒻᒪ ᐅᑕᖅᑭᑐᐃᓐᓇᓕᖅᖢᑎᒃ ᐅᒃᑯᓯᒃᓴᓕᒃ ᐊᐅᓚᑦᑎᓂᕐᒧᑦ ᑲᑎᒪᔨᖏᑦ ᕿᒥᕐᕈᓂᐊᕐᓗᓂᔾᔪᒃ. ᐋᖅᑭᒃᓱᖅᓯᒪᓂᖓᑦ ᐃᑭᐊᖅᑭᕝᕕᐅᑉ ᖃᕆᑕᐅᔭᑎᒍᑦ ᐊᒻᒪ ᐊᓕᓚᔪᑎᒍᑦ ᑎᑎᖅᑭᕆᓯᒪᓂᖏᑦ ᐆᒪᔪᓂᒃ ᑕᐅᑑᔭᕐᓂᕐᒧᑦ ᐱᓱᔪᕈᓘᔭᕐᓂᕐᒧᓪᓗ ᒪᓕᒃᑕᐅᔭᕆᐊᓕᖕᓂᒃ ᐳᓛᖅᑎᓄᑦ ᐱᒋᐊᕐᖓᐅᑎᖓᓂᒃ ᑎᑎᕋᓕᖅᑐᑦ.
  • ᐱᒻᒪᕆᐅᓂᖃᖅᑐᑦ ᐃᓂᐅᔪᓄᑦ ᑐᑭᓯᒋᐊᕈᑎᑦ ᐅᑯᓄᖓ ᐱᒃᓯᒪᓂᖅ ᑰᖓᑦ, ᓄᕗᑦᓕᒃ ᕿᑭᖅᑕᖏᑦ, ᐊᒃᖢᖏᑕᐅᑎᑕᓕᒃ, ᓂᐅᕕᕐᕕᕕᓂᖅ ᐊᒻᒪ ᓯᓚᐅᑉ ᑰᖓᑕ ᖃᓂᒋᔭᖏᑦ ᑲᑎᖅᓱᖅᑕᐅᔪᑦ ᐃᑲᔪᕈᑕᐅᓂᐊᕐᓗᑎᒃ ᓴᖅᑭᑦᑎᓂᕐᒥᒃ ᖃᕆᑕᐅᔭᑎᒍᑦ ᐊᑐᖅᑕᐅᔾᔪᑎᖏᓐᓄᑦ ᐃᑲᔪᕐᓂᐊᕐᓗᓂ ᑕᕐᕆᔭᐅᑎᑎᒍᑦ ᓲᕐᓗ ᐳᓛᕐᓗᓂ ᐊᒃᖢᖏᑎᑕᐅᑎᑕᓕᖕᒥ (ᐱᙳᐊᕈᓯᐊᖅ ᐊᒃᖢᓈᕐᒥᒃ ᐊᑐᕐᓗᓂ ᐃᓂᖓᑦ).
  • ᐊᒥᖅ/ᕿᓯᖕᒥᒃ ᑐᐱᓕᐅᕆᓂᕐᒧᑦ ᐱᓕᕆᐊᖅ ᒫᓐᓇᐅᔪᖅ ᐱᓕᕆᐊᕆᔭᐅᔪᖅ ᓄᓇᓕᖕᓄᑦ ᐊᒻᒪ ᐳᓛᖅᑎᓄᑦ ᐊᑐᕐᓂᐊᖅᑕᖏᓐᓄᑦ
  • ᐱᓱᔪᖕᓂᐊᕐᓗᓂ ᐊᑐᕆᐊᖃᖅᑎᑕᐅᔪᑦ ᐱᓕᕆᐊᕆᔭᐅᔪᖅ ᑕᐃᑯᖓ ᓯᓚ ᑰᖓᑕ ᖃᓂᒋᔭᖓᓂᒃ ᐅᖃᐅᓯᐅᕋᐅᔭᖅᑐᑦ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᐊᐅᓚᑦᑎᓂᕐᒧᑦ ᑲᑎᒪᔨᖏᓐᓄᑦ ᐊᒻᒪ ᓂᕆᐅᒋᔭᐅᑉᓗᓂ ᐱᐊᓂᒃᑕᐅᔪᒃᓴᐅᓗᓂ 2021-22−ᒥ.

ᐸᕐᓇᐅᑕᐅᓯᒪᔪᖅ 3: ᑲᑎᖅᓱᐃᓂᖅ ᖃᐅᔨᒪᔭᐅᔪᓂᒃ − ᑲᑎᖅᓱᐃᓂᖅ ᖃᐅᔨᓴᖅᓂᒃᑯᑦ ᑐᑭᓯᒋᐊᕈᑎᑦ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᑦ ᐃᑲᔪᖅᑐᐃᓂᕐᒧᑦ ᓴᐳᔾᔨᓂᕐᒥᒃ, ᑕᑯᒥᓇᕐᓗᑎᒃ ᐊᒻᒪ ᓴᖅᑭᔮᖅᑎᑦᑎᓂᖅ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᖓᑕ ᓄᓇᒥᙶᖅᑐᑦ ᐊᒻᒪ ᐱᖅᑯᓯᑐᖃᓂᒃ ᐱᕕᒃᓴᖏᓐᓂᒃ.

ᑐᕌᒐᖅ 3.1: ᖃᐅᔨᓴᕐᓂᒃᑯᑦ ᑐᑭᓯᒋᐊᕈᑎᑦ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᑦ ᑲᑎᖅᓱᖅᑕᐅᕗᑦ ᓇᓗᓇᐃᕈᑕᐅᓂᐊᕐᓗᓂ ᒫᓐᓇᐅᔪᖅ ᖃᓄᐃᒻᒪᖔᑦ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᖓᑕ ᐆᒪᔪᕈᓯᐊᖏᑦ ᐊᕙᑎᖏᑦ ᐊᒻᒪ ᐅᔾᔨᕈᓱᒡᓗᑎᒃ ᐊᓯᙳᖅᐸᓪᓕᐊᓂᖏᑦ ᓯᕗᓂᕐᒥ.

ᐱᕙᓪᓕᐊᓂᖏᑦ / ᐅᔾᔨᕐᓇᕐᓂᖏᑦ
  • ᖃᖓᑦᑕᖅᑎᑕᐅᓯᒪᔪᑎᒍᑦ ᖃᐅᔨᓴᕈᑎᑦ (ᓯᑰᑉ ᐊᒃᑎᒋᓂᖓᑦ ᐊᒻᒪ ᐊᓯᙳᖅᐸᓪᓕᐊᓂᕆᕙᒃᑐᖏᑦ ᐅᑭᐅᑉ ᐊᕕᒃᑐᖅᓯᒪᓂᖏᑦ ᒪᓕᒡᓗᒋᑦ, ᐃᒪᐃᑦ ᖃᓄᐃᓕᐅᖅᐸᓪᓕᐊᓂᖏᑦ/ᐊᖃᔭᓕᒃ ᐃᒪᖅ, ᐃᒪᐅᑉ ᖄᖓᑕ ᐆᓇᕐᓂᖓᑦ/ᓂᒡᓕᓇᕐᓂᖓᑦ) ᒥᕐᙳᐃᖅᓯᕐᕕᐅᑉ ᑕᕆᐅᖓᓂᒃ ᓇᐅᑦᑎᖅᑐᐃᓂᕐᒧᑦ ᐱᓕᕆᐊᒃᓴᖓᓂᒃ ᑲᔪᓯᐅᔭᖅᑐᖅ ᐊᒻᒪ ᑲᒪᒋᔭᐅᑉᓗᑎᒃ ᑲᓇᑕ ᒥᕐᙳᐃᖅᓯᕐᕕᓕᕆᔨᒃᑯᑦ ᑎᑎᕋᕐᕕᖓᓄᑦ. ᐱᕝᕙᓪᓕᐊᓂᖏᑦ ᓄᓇᒥ ᖃᐅᔨᓴᕐᓂᖅ ᐸᕐᓇᒃᑕᐅᓯᒪᔪᖅ 2020-ᒧᑦ.
  • 2019-ᖑᑎᓪᓗᒍ, ᐅᒃᑯᓯᒃᓴᓕᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐱᓕᕆᖃᑎᒌᒃᑐᑦ, ᐊᒻᒪ ᐊᓯᖏᑦ ᑎᒍᒻᒥᔨᑦ ᖃᐅᔨᒪᓂᕐᒧᑦ, ᕿᒥᕐᕈᓚᐅᖅᐳᑦ ᐅᓂᒃᑳᓕᐊᒥᒃ ᑐᕌᖓᔪᖅ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᒥᕐᙳᐃᖅᓯᕐᕕᐅᑉ ᑕᕆᐅᖓᑕ ᐆᒪᔪᕈᓯᐊᖏᑦᑕ ᐊᕙᑎᖏᓐᓂᒃ, ᑲᑎᖅᓱᖅᑕᐅᑉᓗᑎᒃ 2016-ᖑᑎᓪᓗᒍ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᐅᑉ ᑕᕆᐅᖓᓂᒃ ᖃᐅᔨᓴᕐᓂᖃᖅᑎᓪᓗᒋᑦ. ᑕᒪᓐᓇ ᐊᒻᒪ ᐊᓯᖏᓪᓗ ᑭᖑᕙᖅᓯᒪᔪᑦ ᐅᓂᒃᑳᓕᐊᑦ (ᐆᒪᔪᕈᓯᐊᓗᒃᑖᑦ ᐃᓂᖏᓐᓂᒃ ᓇᓗᓇᐃᔭᐃᓂᖅ) ᑕᐃᑲᙵᑦ ᐱᓕᕆᐊᕐᒥᒃ ᓂᕆᐅᒋᔭᐅᔪᑦ ᐱᐊᓂᒃᑕᐅᓯᒪᓕᕐᓗᑎᒃ 2020-21-ᒥ. ᐱᐊᓂᒃᑕᐅᒍᑎᒃ, ᑖᒃᑯᐊ ᐊᒻᒪ ᐊᓯᓗᒃᑖᖏᓪᓗ 2016-ᒥ ᑕᕆᕐᒥ ᖃᐅᔨᓴᖅᑕᐅᔾᔪᑎᑦ ᑲᑎᖅᓱᐃᓂᕐᒧᑦ ᐱᓕᕆᐊᕐᒧᑦ ᐅᓂᒃᑳᓕᐊᑦ ᐊᑕᐅᓯᕐᒧᑦ ᐃᓕᔭᐅᓂᐊᖅᑐᑦ ᐅᓂᒃᑳᓕᐊᕐᒧᑦ; ᐱᔭᕇᖅᑕᐅᓯᒪᓂᖏᑦ ᐊᒻᒪ ᐊᑐᓕᖁᔭᐅᔪᑦ ᐊᑐᐃᓐᓇᐅᑎᑕᐅᓂᐊᕐᒥᔪᑦ ᐃᓄᑐᐃᓐᓇᕐᓄᑦ.
  • ᖃᐅᔨᓴᕐᓂᖅ ᐱᕈᖅᑐᑦ ᐊᔾᔨᒌᖏᑦᑑᑎᓂᒃ ᑲᑎᖅᓱᖅᑕᐅᓚᐅᖅᐳᑦ ᔪᓚᐃ 2019-ᖑᑎᓪᓗᒍ ᐊᒻᒪ ᑕᓪᓕᒪᓄᑦ ᐅᒃᑯᓄᑦ ᓇᐅᑦᑎᖅᑐᖅᑕᐅᕙᒡᓗᑎᒃ ᐱᒋᐊᕈᓐᓇᖅᓯᔪᖅ.
  • ᓄᓇᐅᑉ ᐃᑭᐊᖓᑦ ᐊᐅᒍᓐᓇᙱᓐᓂᖓᑕ ᐃᑎᓂᖓᓄᑦ ᓇᐅᑦᑎᖅᑐᖅᑕᐅᓂᖓᑦ ᐱᔭᕇᖅᑕᐅᓚᐅᖅᑐᖅ ᐋᒡᒍᓯ 2019-ᖑᑎᓪᓗᒍ ᐊᒻᒪ ᐊᕐᕌᒍᑕᒫᑦ ᓇᐅᑦᑎᖅᑐᖅᑕᐅᔪᓐᓇᖅᓯᑉᓗᓂ.
  • ᐱᖓᓱᓂᒃ ᐃᓄᖕᓂᒃ ᓇᐅᔮᕐᒥᐅᑕᑦ ᐃᓚᐅᖃᑕᐅᓚᐅᖅᐳᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐆᒪᔪᕈᓯᐊᑦ ᐊᐅᓚᓂᕆᕙᒃᑕᖏᓐᓂᒃ ᓇᐅᑦᑎᖅᑐᐃᓂᕐᒧᑦ ᐱᒋᐊᕐᖓᐅᑎᒋᔭᐅᑉᓗᓂ ᐱᓕᕆᐊᖅ ᐊᔾᔨᓕᐅᕆᓂᐊᕐᓗᑎᒃ ᐊᒻᒪ ᐅᔾᔨᕈᓱᕈᓘᔭᕐᓗᑎᒃ ᒥᕐᙳᐃᖅᓯᕐᕕᖕᒦᑎᓪᓗᒋᑦ. ᐅᔾᔨᕆᔭᐅᓯᒪᔪᑦ ᐅᖃᐅᓯᐅᓂᐊᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐱᓕᕆᖃᑎᒌᒃᑐᓄᑦ ᐊᒻᒪ ᑲᓇᑕ ᒥᕐᙳᐃᖅᓯᕐᕕᓕᕆᔨᒃᑯᑦ ᐱᓕᕆᔨᖏᓐᓄᑦ ᐃᓚᒋᔭᐅᖃᑕᐅᓂᐊᕐᓗᓂ ᒥᕐᙳᐃᖅᓯᕐᕕᐅᑉ ᐆᒪᔪᕈᓯᐊᑦ ᐊᐅᓚᓂᕆᕙᒃᑕᖏᓐᓂᒃ ᓇᐅᑦᑎᖅᑐᐃᓂᕐᒧᑦ ᐱᓕᕆᐊᖓᓄᑦ.

ᑐᕌᒐᖅ 3.2: ᖃᐅᔨᓴᐃᓂᕐᒧᑦ ᑐᑭᓯᒋᐊᕈᑎᑦ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᑦ ᐊᑐᖅᑕᐅᔪᑦ ᑐᑭᓯᒋᐊᕈᑕᐅᑉᓗᑎᒃ ᐊᒻᒪ ᐃᑲᔪᕈᑕᐅᑉᓗᑎᒃ ᓯᕕᑐᔪᒧᑦ ᐊᐅᓚᑦᑎᕐᓂᒧᑦ ᐃᓱᒪᓕᐅᕈᓐᓇᕐᓂᕐᒧᑦ.

ᐱᕙᓪᓕᐊᓂᖏᑦ / ᐅᔾᔨᕐᓇᕐᓂᖏᑦ
  • ᑲᑎᖃᑎᒌᒃᖢᑎᒃ ᑲᑎᒪᓂᖃᓚᐅᖅᐳᑦ ᓇᐅᔮᓂ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᐊᐅᓚᑦᑎᓂᕐᒧᑦ ᑲᑎᒪᔨᖏᑦ, ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐱᓕᕆᖃᑎᒌᒃᑐᑦ, ᐊᒻᒪ ᑲᓇᑕ ᒥᕐᙳᐃᖅᓯᕐᕕᓕᕆᔨᒃᑯᑦ ᐱᓕᕆᔨᖏᑦ ᐱᒋᐊᖅᑎᑦᑎᔪᒪᑉᓗᑎᒃ ᐱᕙᓪᓕᐊᑎᑦᑎᓗᑎᒃ ᐋᖅᑭᒃᓱᖅᓯᒪᔪᒥᒃ ᑲᒪᒋᔭᖃᕐᓂᕐᒧᑦ: ᖃᓄᖅ ᐃᓄᐃᑦ ᖃᐅᔨᒪᔭᑐᖃᖏᑦ ᐃᓚᓕᐅᑎᔭᐅᓂᐊᕐᒪᖔᑕ ᐊᐅᓚᑦᑎᓂᕐᒧᑦ ᐃᓱᒪᓕᐅᕐᓂᕐᒧᑦ; ᖃᓄᐃᖅ ᐱᓕᕆᖃᑎᒌᒃᑐᓗᒃᑖᑦ ᐅᖃᖃᑎᒌᖕᓂᐊᕐᒪᖔᑕ ᐊᒻᒪ ᐱᓕᕆᖃᑎᒌᒡᓗᑎᒃ; ᐊᒻᒪ; ᐋᖅᑭᒃᓱᕐᓗᒋᑦ ᐃᓗᓕᖅᑯᖅᑐᔪᑦ ᑐᑭᓯᒋᐊᕈᑎᑦ ᐊᐅᓚᑦᑎᓂᐊᕐᓗᒋᑦ ᐃᓄᐃᑦ ᖃᐅᔨᒪᔭᑐᖃᖏᑦ ᐱᓕᕆᖃᑎᒌᒃᑐᑦ. ᖃᐅᔨᒋᐊᒃᑲᓐᓂᕈᑕᐅᓚᐅᖅᐳᖅ ᑲᑎᒪᒃᑲᓐᓂᓕᖅᑎᓪᓗᒋᑦ ᑕᒪᒃᑯᐊ ᖁᓛᓂ ᐅᖃᐅᓯᐅᔪᑦ ᐱᓕᕆᖃᑎᒌᒃᑐᓂᒃ ᐊᒻᒪ ᐱᒋᐊᕐᖓᐅᒻᒥᒃ ᑎᑎᖅᑭᕆᔭᐅᓕᖅᑐᖅ ᕿᒥᕐᕈᔭᐅᔪᒃᓴᐅᓗᓂ ᑕᒪᑮᖕᓄᑦ ᐱᓕᕆᖃᑎᒌᒃᑐᓄᑦ ᐅᑭᐊᖓᓂᒃ 2020-ᒥ.
  • ᐱᔪᓐᓇᐅᑎᑖᕈᑎ ᑕᑕᑎᕈᑦ ᐱᒋᐊᕐᙵᖅᑕᐅᓯᒪᓕᖅᑐᖅ ᑐᓂᔭᐅᓂᐊᕐᓗᓂ ᓄᓇᕗᑦ ᖃᐅᔨᓴᖅᑎᑦ ᑐᑦᑕᕐᕕᖓᓂᒃ ᑲᑎᖅᓱᐃᓂᐊᕐᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑐᕌᖓᔪᓄᑦ ᐅᒃᑯᓯᒃᓴᓕᖅᒧᑦ ᓄᓇᓕᖃᖅᑎᐅᔪᓂᖔᕐᓗᑎᒃ ᑕᐃᑲᙵᑦ ᖃᒪᓂᑦᑐᐊᕐᒥ, ᐃᒡᓗᓕᒑᕐᔪᖕᒥ, ᓴᓪᓕᕐᓂ, ᓇᐅᔮᓂ, ᐊᒻᒪ ᑲᖏᖅᖠᓂᕐᒥ.
  • ᐊᑑᑎᖃᑦᑎᐊᖅᑐᑦ ᑐᑭᓯᒋᐊᕈᑎᒥᒃ ᐊᑐᓕᖅᑎᑦᑎᓂᕐᒥᒃ ᐃᖃᓪᓕᐊᕈᓐᓇᖏᓐᓂᕐᒧᑦ ᑐᑭᓯᒋᐊᕈᑎ ᑎᑎᕋᖅᓯᒪᔪᖅ 10.8-ᒥ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᖓᑦ ᐃᓄᐃᑦ ᐊᒃᑐᖅᑕᐅᓂᕐᒧᑦ ᐃᑲᔫᓯᐊᓪᓗ ᐊᖏᕈᑎᖓᓂᒃ ᒪᓕᒋᐊᖃᖅᐳᖅ ᓄᑖᖑᖅᑎᖅᓯᒪᔪᒥᒃ ᑲᓇᑕ ᒥᕐᙳᐃᖅᓯᕐᕕᓕᕆᔨᑦ ᐃᖃᓗᓕᕆᓂᕐᒧᑦ ᒪᓕᒐᖏᓐᓂᒃ ᑐᓂᔭᐅᓯᒪᓕᖅᑐᖅ ᑲᓇᑕ ᒥᕐᓯᐃᖅᓯᕐᕕᓕᕆᔨᑦ ᑎᑎᕋᕐᕕᖓᓄᑦ. ᐋᖅᑭᒋᐊᖅᑕᐅᓯᒪᔪᑦ ᒪᓕᒐᓄᑦ ᐊᒻᒪ ᖃᖓᔪᓐᓇᕐᓂᖏᑦ ᒫᓐᓇᐅᔪᖅ ᐅᑕᖅᑭᔭᐅᖕᒪᑕ ᑕᐃᑲᙵᑦ ᒪᓕᒐᓕᐅᕐᕕᒡᔪᐊᕐᒥ ᐊᖏᖅᑕᐅᓂᖓᑦ.

ᑐᕌᒐᖅ 3.3: ᐱᕙᓪᓕᐊᓯᒪᓂᖃᖅᐳᖅ ᓇᓗᓇᐃᔭᐃᓂᕐᒥᒃ ᐊᒻᒪ ᓴᐳᔾᔨᓂᕐᒥᒃ ᐱᖅᑯᓯᑐᖃᐃᑦ ᐱᕕᒃᓴᖏᓐᓂᒃ ᐅᓂᒃᑳᕆᓇᔭᖅᑕᖓᑦ ᐅᒃᑯᓯᒃᓴᓕᐅᑉ ᒥᕐᙳᐃᖅᓯᕐᕕᐅᑉ ᒥᒃᓵᓄᑦ.

ᐱᕙᓪᓕᐊᓂᖏᑦ / ᐅᔾᔨᕐᓇᕐᓂᖏᑦ
  • ᐱᓕᕆᐊᕆᔭᐅᓂᖓᑦ ᓂᐅᕕᕐᕕᕕᓂᐅᑉ ᑐᙵᑎᑦᑎᐊᕋᓱᐊᕐᓂᕐᒧᑦ ᐱᓕᕆᐊᖅ ᑲᔪᓯᐅᔭᖅᐳᖅ ᐊᐅᔭᐅᔪᖅ. ᐃᓗᓕᖏᑦᑎᒍᑦ ᒪᑭᑕᔾᔪᑎᑦ ᐊᒻᒪ ᕿᔪᕐᓘᑎᑦ ᐲᔭᖅᑕᐅᓚᐅᖅᐳᑦ ᒪᒃᕉᒃ ᐃᒡᓗᕐᔪᐊᓂ ᐱᖓᓲᑉᓗᑎᒃ ᐃᒡᓗᕐᔪᐊᑦ. ᑖᖕᓇ ᐱᓕᕆᐊᖅ ᐃᑲᔪᖅᑐᐃᕗᖅ ᑲᓇᑕ ᒥᕐᙳᐃᖅᓯᕐᕕᓕᕆᔨᒃᑯᑦ ᑐᓂᕐᕈᑎᒋᓯᒪᓂᕆᔭᖏᓐᓂᒃ ᒪᓕᒃᖢᒍ ᑎᑎᕋᖅᓯᒪᓂ 12.6.4 ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᐃᓄᐃᑦ ᐊᒃᑐᖅᑕᐅᓂᕐᒧᑦ ᐃᑲᔫᓯᐊᓄᓪᓗ ᐊᖏᕈᑎᖓᓂᒃ ᓴᓗᒻᒪᖅᓴᐃᓗᑎᒃ ᐊᒻᒪ ᑐᙵᑎᑦᑎᐊᕋᓱᐊᕐᓗᒋᑦ ᐃᒡᓗᕐᔪᐊᑦ ᑕᐃᑲᓂ ᓂᐅᕕᕐᕕᕕᓂᐅᑉ ᐃᓂᖓᓂᒃ ᑕᐃᒫᒃ ᓈᒻᒪᒃᓯᑎᑦᑎᐊᖁᑉᓗᒋᑦ ᐊᑐᖅᑕᐅᔪᓐᓇᖅᓯᓗᑎᒃ ᐃᓚᒋᔭᐅᓂᖏᓐᓄᑦ ᑐᑭᓯᓇᖅᑑᓗᓂ ᐱᓕᕆᐊᕐᒧᑦ ᑕᐃᑲᓂ ᒥᕐᙳᐃᖅᓯᕐᕕᐅᑉ ᐃᓗᐊᓂ.

ᐃᓱᓕᔾᔪᑎ — ᑭᖑᓪᓕᕐᒥ ᐊᑐᕆᐊᖃᓂᐊᖅᑕᕗᑦ

ᑲᓇᑕ ᒥᕐᙳᐃᖅᓯᕐᕕᓕᕆᔨᑦ ᓄᓇᕗᑦ ᐃᓗᐊᓂ ᐊᒻᒪ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᐊᐅᓚᑦᑎᓂᕐᒧᑦ ᑲᑎᒪᔨᖏᑦ ᓂᕆᐅᑦᑎᐊᖅᑐᑦ ᐱᔭᕇᑦᑎᐊᖅᓯᒪᔪᒥᒃ ᐅᑭᐅᒥᒃ ᓯᕗᓂᑉᑎᓐᓂᒃ. ᐸᕐᓇᐅᑎᑦ 2020-21-ᒧᑦ ᐋᖅᑭᒋᐊᖅᑕᐅᕗᑦ ᐱᔾᔪᑎᒋᔭᐅᑉᓗᓂ ᓄᓇᒡᔪᐊᕐᓇᖅ-19 ᓄᓇᕐᔪᐊᓗᒃᑖᕐᒧᑦ ᐊᒃᑐᐊᓂᓂᓕᒃ. ᐱᒻᒪᕆᐅᓂᓖᑦ ᐱᒋᐊᕈᑕᐅᔪᑦ ᓄᑖᕐᒥ ᐅᑭᐅᒥ ᐅᑯᓂᖓ ᐃᓚᖃᖅᐳᖅ:

  • ᐱᐊᓂᒡᓗᒍ ᐊᖏᔫᑎᓄᑦ ᐸᕐᓇᐅᑦ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᑦᑕ ᐋᖅᑭᒃᓱᖅᓯᒪᓂᖏᑦ ᐊᑕᐅᑦᑎᒃᑯᑦ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᐊᐅᓚᑦᑎᓂᒧᑦ ᑲᑎᒪᔨᖏᓐᓂᒃ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐱᓕᕆᖃᑦᒌᒃᑐᓄᑦ.
  • ᑲᔪᓯᑎᑦᑎᓂᖅ ᐱᕙᓪᓕᐊᓂᖓᑦ ᐆᒪᔪᕈᓯᐊᑦ ᐊᐅᓚᓂᕆᕙᒃᑕᖏᓐᓂᒃ ᓇᐅᑦᑎᖅᑐᐃᓂᕐᒧᑦ ᐱᓕᕆᐊᑦ.
  • ᐱᒋᐊᖅᑎᑦᑎᓂᖅ ᐱᕙᓪᓕᐊᓂᖓᑦ ᐱᖅᑯᓯᑐᖃᕐᓂᒃ ᐱᕕᒃᓴᓂᒃ ᓇᐅᑦᑎᖅᑐᐃᓂᕐᒧᑦ ᐱᓕᕆᐊᑦ.
  • ᕿᒥᕐᕈᓗᒋᑦ ᖃᐅᔨᓴᕐᓂᕐᒧᑦ ᓯᕗᓪᓕᐅᔾᔭᐅᓂᓖᑦ ᐊᑕᐅᑦᑎᒃᑯᑦ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᐊᐅᓚᑦᑎᓂᕐᒧᑦ ᑲᑎᒪᔨᖏᓐᓂᒃ.
  • ᓴᙱᒃᑎᒋᐊᒃᑲᓐᓂᕐᓗᒍ ᐊᐅᓚᑦᑎᐊᕈᓐᓇᕐᓗᑎᒃ ᐅᒃᑯᓯᒃᓴᓕᒃ ᒥᕐᙳᐃᖅᓯᕐᕕᒃ ᐊᐅᓚᑦᑎᓂᕐᒧᑦ ᑲᑎᒪᔨᖏ ᑕᐃᒫᒃ ᑐᓂᓗᒋᑦ ᐊᔪᕈᓐᓃᖅᓴᓂᕐᒧᑦ ᑲᑎᒪᔨᐅᔪᑦ ᒥᕐᓵᓄᑦ ᐃᓄᐃᑦ ᐊᒃᑐᖅᑕᐅᓂᕐᒧᑦ ᐃᑲᔫᓯᐊᓄᓪᓗ ᐊᖏᕈᑎᒥᒃ, ᐊᐅᓚᑦᑎᓂᕐᒧᑦ ᐊᒻᒪ ᑲᒪᒋᔭᕆᐊᓕᖏᓐᓂᒃ ᒥᕐᙳᐃᖅᓯᕐᕕᒥᒃ ᐊᐅᓚᑦᑎᓂᐊᕐᓗᓂ, ᐊᒻᒪ ᐱᐅᓯᒋᐊᒃᑲᓐᓂᕐᓗᒋᑦ ᑲᑎᒪᔩᑦ ᐊᐅᓚᑦᑎᔾᔪᑎᖏᑦ (ᒪᓕᒋᐊᖃᖅᑎᑕᐅᔪᑦ, ᒪᓕᒐᕋᓛᑦ) (ᓇᓗᓇᐃᖅᓯᓂᖅ: ᐊᔪᕈᓐᓃᖅᓴᐃᓂᖅ ᐸᕐᓇᒃᑕᐅᓚᐅᖅᑑᒐᓗᐊᖅ ᒫᔾᔨ 2020-ᖑᑎᓪᓗᒍ ᑲᖏᖅᖠᓂᕐᒥ, ᑭᓯᐊᓂ ᐅᖓᕙᕆᐊᖅᑕᐅᓚᐅᕐᒪᑦ ᐱᔾᔪᑎᒋᑉᓗᒍ ᓄᕙᒡᔪᐊᕐᓇᖅ-19).

Liens connexes

Date de modification :