ᑲᓇᑕᐅᑉ ᒥᕐᖑᐃᖅᓯᕐᕕᒃᑯᑦ ᐃᑲᔪᖅᑐᐃᓇᓱᐊᕐᖓᑕ ᓄᓇᖅᑲᖄᖅᓯᒪᔪᓂᑦ ᐱᑦᑎᐊᕆᐊᖃᕐᓂᕐᒧᑦ, ᐅᕙᒍᑦ, ᓄᓇᖃᖅᑳᖅᓯᒪᔫᓪᓗᑕ ᐱᑦᑎᐊᕆᐊᖃᕐᓂᑎᓐᓂ ᑲᒪᔨᐅᓪᓗᑕ, ᐊᔭᐅᖅᑐᐃᒋᐊᖃᕋᑦᑕ ᓄᓇᖃᖅᑳᖅᓯᒪᔪᓂᒃ ᑐᑭᓯᑎᑦᑎᓂᕐᒧᑦ ᑕᐅᖅᓰᖃᑎᖃᕐᓗᑕᓗ ᓈᒻᒪᑦᑎᐊᖁᓪᓗᒋᑦ ᐅᑉᐱᕆᔭᖃᑦᑎᐊᖁᓪᓗᒋᓪᓗ ᐊᑐᓕᖅᑎᑕᐅᓂᖏᑦ ᐱᖁᔭᖅ ᑖᓐᓇ.

ᓄᓇᖃᖅᑳᖅᓯᒪᔪᑦ ᐱᖅᑯᓯᖏᓐᓄᑦ, ᐃᓄᓐᓄᑦ ᐃᓛᒃᑰᕋᔅᓴᐅᖏᑦᑎᐊᖅᑐᒥ ᐊᑦᑐᐊᓂᖃᕐᖓᑕ ᓄᓇᕗᑦ ᓯᓚᕐᔪᐊᒧᑦ. ᑕᒪᓐᓇ ᓈᒪᒋᐊᖃᕐᖓᑦ, ᑕᐃᒪᐃᓪᓗᐊᖅᑎᑕᐅᒋᐊᖃᕐᓂᖏᓐᓂ ᓯᓚᕐᔪᐊᒥ ᑕᑯᓐᓇᖅᑕᐅᓂᖏᑦ ᑐᑭᓯᐅᒪᔭᐅᓗᑎᑦ ᐃᓄᓕᒫᑦᑎᐊᑦ ᐆᒪᔪᑦ ᐊᑦᑐᐊᔪᐃᓐᓇᐅᒻᒪᑕ, ᐃᒪᐃᓪᓗᐊᖅᑐᐃᓐᓇᐅᓪᓗᑎᑦ ᐊᑦᑐᐊᔪᐃᓐᓇᐅᓪᓗᑎᓪᓗ. ᐃᓕᓴᕆᔭᐅᓯᒪᒻᒪᑕ ᐱᒋᐊᕈᑎᒋᓯᒪᔭᖏᑦ ᐊᑦᑐᐃᓂᖃᖅᓯᒪᒻᒪᑕ ᑖᒃᑯᓄᖓ ᐊᓯᖏᓐᓄᓪᓗ. ᐊᑦᑐᐊᖃᑎᖃᕐᓂᖅ ᐊᓯᖏᓐᓂ ᓇᓗᓇᐃᖅᑕᐅᖃᑦᑕᓲᖑᒻᒪᑕ “ᐃᓚᓕᒫᒃᑲ”. ᑕᕝᕙᓐᖓᑦ ᐱᓕᕆᐊᕆᔭᕆᐊᓕᑦᑎᓐᓂ ᑲᒪᒋᔭᕆᐊᓕᑦᑎᓂᓪᓗ ᐃᓅᑎᓪᓗᑕ ᑕᐃᒪᐃᓪᓗᐊᑎᑦᑎᒋᐊᖃᕋᑦᑕ ᐊᓯᖏᓐᓂ ᑎᒥᐅᔪᓂᒃ ᐅᑉᐱᕆᔭᐅᖁᓪᓗᒋᑦ ᐱᓯᒪᑦᑎᐊᖁᓪᓗᒋᓪᓗ, ᓄᓇᕗᑦ, ᐃᒪᕗᑦ, ᓯᑯᔪᑦ ᑲᑐᔾᔭᑎᓐᓂ ᓄᓇᒋᔭᑦᑎᓂᓪᓗ. ᑕᒪᒃᑯᐊ ᑲᓱᖅᓯᒪᓂᖏᑦ ᐱᓕᕆᖃᑎᒌᓐᓂᕐᒥᑦ, ᓄᓇᖃᖅᑳᖅᓯᒪᔪᑦ ᑕᑯᓐᓇᖅᑕᖏᑦ ᑲᒪᑦᑎᐊᕐᓂᕐᒧᑦ, ᑐᑭᓯᐅᒪᓪᓗᑎᓪᓗ ᐃᑲᔫᑎᖃᖅᑐᐃᓐᓇᐅᒐᑦᑕ ᑭᓪᓕᖏᓐᓂ ᓇᒥᑐᐃᓐᓇᖅ ᓯᓚᕐᔪᐊᒥ, ᑲᒪᒋᐊᖃᖅᑐᐃᓐᓇᐅᒐᑦᑕ ᑕᐃᒪᐃᓪᓗᐊᑎᑦᑎᓗᑕ ᐸᖅᑭᑦᑎᓗᑕᓗ ᑕᒪᒃᑯᓂᖓ ᑭᓪᓕᐅᔪᓂᒃ.

ᐊᑐᓕᖅᑎᑕᐅᓂᖓ ᑖᓐᓇ ᐱᖁᔭᖅ ᐋᖅᑭᓱᖅᑕᐅᓯᒪᔪᑦ ᐱᑦᑎᐊᕆᐊᖃᕐᓂᕐᒧᑦ ᐸᕐᓇᐅᑎᒥᑦ ᐊᒻᒪᓗ ᐱᑦᑎᐊᕆᐊᖃᕐᓂᕐᒧᑦ ᐱᖁᔭᓕᐅᕐᓂᕐᒥᑦ, ᐱᒻᒪᕆᐅᒻᒪᑦ ᑲᔪᓯᑎᑦᑎᐊᕆᐊᖃᕋᑦᑎᒍ ᑲᑐᔾᔨᖃᑎᒌᓐᓂᖅ, ᑕᐃᒪᐃᓪᓗᐊᑎᑦᑎᓂᖅ ᐅᑉᐱᕆᔭᖃᕐᓂᕐᓗ.

ᓄᓇᖃᖅᑳᖅᓯᒪᔪᑦ ᐱᑦᑎᐊᕆᐊᖃᕐᓂᕐᒧᑦ ᐱᖁᔭᓕᐊᕆᔭᐅᓚᐅᖅᓯᒪᔪᖅ ᓄᓇᖃᖅᑳᖅᓯᒪᔪᓄᑦ ᐱᑦᑎᐊᕆᐊᖃᕐᓂᕐᒧᑦ ᑲᑐᔾᔨᔨᖏᓐᓄᑦ ^{Footnote 1} ᐊᒻᒪᓗ ᑲᓇᑕᐅᑉ ᒥᕐᖑᐃᖅᓯᕐᕕᒃᑯᖏᓐᓄᑦ.

ᓄᓇᖃᖅᑳᖅᓯᒪᔪᓂᒃ ᐱᓯᒪᑦᑎᑦᑎᐊᕐᓂᕐᒧᑦ ᖃᓄᐃᑦᑑᓂᖓᓐᓂ ᓇᓗᓇᐃᖅᓯᓂᖏᑦ

ᖃᓄᐃᑦᑑᓂᖓᓐᓂ ᓇᓗᓇᐃᔭᐃᓯᒪᔪᑦ ᓄᓇᖃᖅᑳᖅᓯᒪᔫᓪᓗᓂ ᐊᑕᐅᓯᖅ ᐃᓱᒪᒋᔭᖓᓐᓂ ᑎᑎᕋᖅᓯᒪᓪᓗᓂ. ᑕᒪᓐᓇ ᐱᔪᑎᖓ ᐱᖁᔭᐃᓂᑦ ᐅᖃᐅᓯᖃᕐᓂᐊᖅᑐᖅ ᒪᕐᕉᓐᓂᒃ ᓲᕐᓗ ᓯᓚᕐᔪᐊᓕᒃ − ᓄᓇᖃᖅᑳᖅᓯᒪᔫᓪᓗᓂ ᖃᓪᓗᓈᖑᓪᓗᓂᓗ ᑕᑯᓐᓇᖅᑕᖏᓐᓂ − ᐃᑲᔪᖅᑐᐃᔾᔪᑏᑦ ᐱᓯᒪᖃᑦᑕᐅᑎᓗᑎᑦ. ᐃᓕᓴᖅᓯᓯᒪᔪᒍᑦ ᐱᖁᔭᓕᐅᓲᕐᓂᑦ ᖃᓪᓗᓈᑦ ᐃᓕᖅᑯᓯᖏᓐᓂ ᐊᑐᖃᑦᑕᖅᑕᖏᓐᓂᓪᓗ; ᑖᓐᓇ ᐱᖁᔭᖅ ᑐᓐᖓᕕᖃᖅᑐᖅ ᓴᓇᔭᐅᓯᒪᓪᓗᓂᓗ ᐃᓱᒪᒋᔭᒥᓂᒃ ᒪᓕᑦᑐᑎᑦ ᓄᓇᖃᖅᑳᖅᓯᒪᔪᓂᒃ.

ᐅᐊᑦᑎᐊᕈᓂᐊᓗᓐᓂ ᐃᖅᑲᐅᒪᔭᓐᓂᑦ, ᑭᓇᐅᓂᓐᓂᑦ ᓄᓇᖃᖅᑳᖅᓯᒪᔫᓪᓗᖓ ᐊᑦᑐᐊᓂᖃᐃᓐᓇᕋᒪ ᐊᕙᑎᓐᓂ ᓄᓇᒥᑦ ᐊᕙᑎᑦᑎᓐᓂ, ᐃᓚᑦᑎᓐᓂ, ᓄᓇᓕᑦᑎᓐᓂ ᓯᕗᓕᒥᓂᑦᑎᓂᓪᓗ. ᐃᓕᓐᓂᐊᖅᑎᑕᐅᓯᒪᒐᒪ ᐃᓕᓴᖅᓯᒋᐊᖃᕐᓂᓐᓂᑦ ᐅᑉᐱᕆᔭᖃᑦᑎᐊᕐᓗᖓᓗ ᐊᑦᑐᐊᖃᓂᕐᓂᕐᒥᑦ, ᐅᑉᐱᕆᑦᑎᐊᕐᓗᒋᑦ ᐱᕈᖅᑐᑦ ᐆᒪᔪᓪᓗ ᓇᒻᒥᓂᖅ ᑐᓂᔭᓐᓂᖏᓐᓂ ᐅᕙᑦᑎᓐᓄ ᑎᒥᑦᑎᐊᕆᒋᐊᖃᕐᓂᑎᓐᓄ ᓴᓐᖏᔭᕆᐊᖃᕐᓂᑎᓐᓄᑦ, ᐅᑉᐱᕆᑦᑎᐊᕐᒥᓗᒍ ᐃᒪᖅ ᐃᓅᓯᖃᖅᑎᑦᑏᓐᓇᖅᑐᖅ ᓴᓗᒪᑎᑦᑎᓪᓗᓂ ᒪᒥᓴᖅᑎᑦᑎᓪᓗᓂᓗ. ᐃᓕᓴᕆᒐᑦᑎᒍ ᐅᑉᐱᕆᓪᓗᒋᓪᓗ ᑕᒪᒃᑯᐊ ᐊᓯᖏᓪᓗ ᐊᑦᑐᐊᓂᖃᓪᓚᕆᑦᑐᑦ, ᐊᑦᑐᐊᓪᓚᕆᒻᒪᑕ ᐅᕙᓐᓂᑦ ᐆᒪᑎᑦᑎᑦᑎᐊᖅᑐᑦ, ᒪᑭᑕᑎᑦᑎᔪᑦ, ᐃᑲᔪᖅᑐᐃᔪᓪᓗ. ᑭᓇᐅᔾᔪᑎᒋᓕᖅᑐᒋᑦ.

ᐱᓕᕆᖃᑎᖃᕐᓂᐊᕐᓗᓂ ᑲᒪᒋᔭᔅᓴᑦᑕᖃᖅᑐᖅ. ᐃᓕᑦᑎᑕᐅᓯᒪᒐᒪ ᑲᒪᔭᕆᐊᖃᕋᒪ ᐊᑦᑐᐊᓂᖃᕆᐊᖃᕋᒪ ᑐᓂᓯᖃᑦᑕᖅᑐᓂᒃ ᓇᒻᒥᓂᖅ ᐃᓅᓯᖃᖅᑎᑦᑎᔪᓂᒃ ᐃᑲᔪᖅᑐᐃᕙᑦᑐᓂᒃ ᐊᑐᐊᖅᓯᔾᔪᑎᓂᒃ. ᑲᒪᒋᐊᖃᕋᒪ ᐅᑉᐱᕆᑦᑎᐊᕐᓗᒋᑦ ᐆᒪᔪᑦ, ᖁᔭᒋᓗᒋᑦ, ᐊᒻᒪᓗ ᐱᓯᒪᑦᑎᔪᑦ ᐅᕙᓐᓂᑦ ᐱᓯᒪᔭᕆᐊᖃᕐᒥᒐᒃᑭᑦ. ᑕᐃᒫᒃ ᐅᑉᐱᕆᔭᕆᐊᖃᕋᑦᑎᒍᑦ ᐃᓕᓐᓂᐊᑎᑦᑎᔾᔪᑕᐅᓯᒪᔪᑦ ᐅᕙᑦᑎᓐᓄᑦ, ᓯᓚᑐᓃᑦ, ᒪᓕᒐᐃᑦ ᐃᓚᒌᓐᓄᑦ, ᓄᓇᓕᑦᑎᓐᓄᑦ, ᑲᓇᑕᒥ, ᓯᕗᓪᓕᒥᓂᑦᑎᓂᓪᓗ, ᐊᒻᒪᓗ ᐃᓕᓐᓂᐊᖅᑎᑦᑎᔾᔪᑕᐅᓯᒪᔪᑦ ᐅᕙᑦᑐᓐᓄᑦ ᒪᑯᓂᖓ ᐱᕈᖅᑐᐃᑦ ᒥᔅᓵᓄᑦ ᓂᕐᔪᑏᓪᓗ ᐃᓕᕝᕕᒋᓯᒪᒐᑦᑎᒍ. ᑕᐃᒪᐃᓐᓂᖓᓐᓄᑦ ᑲᒪᑦᑎᐊᕆᐊᖃᖅᑐᒍᑦ ᐅᑉᐱᕆᑦᑎᕐᓗᒋᓪᓗ ᑲᑐᔾᔨᖃᑎᒌᓪᓗᑕ ᐱᓕᕆᖃᑎᒌᑦᑎᐊᕐᓗᑕᓗ.

ᑭᓇᐅᓂᕋ ᓄᓇᖃᖅᑳᖅᓯᒪᔫᓪᓗᖓ ᓇᓗᓇᐃᖅᓯᓯᒪᒻᒪᑦ ᐃᓚᖃᕐᓂᕐᒥᑦ ᑲᒪᒋᐊᖃᕐᓂᒥᓪᓗ, ᐃᓅᓯᒪᓂᕐᓂᓪᓗ ᐊᑐᖅᓯᒪᔭᕐᓂᑦ. ᐃᒻᒥᒃᑰᑦ, ᐅᑉᐱᕆᔭᕆᐊᖃᑦᑎᐊᕋᑦᑎᒍ ᑎᒍᒥᐊᖅᑎᐊᕐᓗᑎᒍᓪᓗ ᐊᑦᑐᐊᓂᕆᔭᕗᑦ ᑲᒪᒋᔭᕆᐊᖃᖅᑕᕗᓪᓗ ᑎᒍᒥᐊᖏᓐᓇᕐᓗᑎᒍ ᐅᕙᒍᑦ ᓄᓇᖃᖅᑲᖅᓯᒪᔪᓄᑦ ᑲᒪᒋᔭᐅᑦᑎᐊᕆᐊᖃᖅᓯᒪᔪᑦ.

ᑭᓯᐊᓂᓕ, ᑲᒪᑦᑎᐊᕋᓱᐊᕐᓂᐊᖅᑎᓪᓗᑲ ᐱᓕᕆᖃᑎᖃᑦᑎᐊᖏᓐᓇᕐᓗᖓᓗ ᓄᓇᑦᑎᓐᓂ ᐊᕙᑎᑦᑎᓐᓂ ᐊᑦᑐᖅᑕᐅᑲᒻᒪᔅᓯᒪᒻᒪᑕ ᒪᓕᒑᓗᓐᓄᑦ, ᐱᖁᔭᓄᑦ, ᐃᓕᖅᑯᓯᕆᕙᑦᑕᖏᓐᓄᑦ ᐃᓱᒪᒋᔭᐅᔪᓄᓪᓗ. ᐃᓚᖏᑦ ᒪᓕᒐᐃᑦ ᐱᖁᔭᐃᓪᓗ ᐃᓛᒃᑰᖓᑎᑦᑎᒻᒪᑕ ᐅᕙᓐᓂᑦ ᓄᓇᑐᖃᕐᓂᑦ, ᐊᖏᕈᑕᐅᓯᒪᔪᓂᒃ ᓄᓇᓂᑦ, ᓯᕗᓪᓕᒥᓂᖅᑕᓗ ᓄᓇᒋᓚᐅᖅᑕᖏᓐᓂ, ᐃᓱᖃᖅᑎᑦᑎᒻᒪᑕ ᐃᓯᖁᔨᓇᑎᑦ ᐊᒻᒪᓗ ᐅᐸᑦᑕᐅᒋᐊᖃᕐᓇᑎᑦ ᐃᓚᖏᑦ. ᐊᓯᖏᑦ ᓂᓪᓕᕐᕕᖃᖅᑎᑕᐅᓐᖏᓇᑦᑕ ᖃᓄᖅ ᓄᓇᕗᑦ, ᐃᒪᕗᑦ, ᓯᑯᕗᑦ, ᓂᕐᔪᑎᕗᑦ ᐱᕈᖅᑐᖁᑎᕗᓪᓗ, ᐊᓯᖏᓪᓗ ᐆᒪᔪᑦ ᐆᒪᓐᖏᑦᑐᓪᓗ ᑎᒥᐅᔪᑦ ᑲᒪᒋᔭᐊᖃᑦᑕᕐᓂᖏᓐᓂ, ᐅᑉᐱᕆᔭᐅᓂᖏᓐᓂ ᐱᓯᒪᔭᐅᓂᖏᓐᓂᓪᓗ.

ᖃᓪᓗᓈᑦ ᐃᓕᖅᑯᓯᖏᑦ ᐃᓱᒪᒋᔭᖏᓪᓗ ᐊᐳᕈᑎᖃᖅᑎᑦᑎᑲᓐᓂᕐᖓᑕ, ᐱᔭᕆᐊᑐᓕᖅᑎᑦᑎᓪᓗᑎᑦ ᓂᓪᓕᕈᒪᒐᓗᐊᖅᑎᓪᓗᑕ ᐃᓱᒪᒋᔭᕗᑦ ᐅᖃᐅᓯᕆᔪᓐᓇᕐᓇᑎᒍ, ᐅᕝᕙᓘᓐᓃᑦ ᐃᓚᒌᑦ ᓄᓇᓕᖏᓪᓗ, ᑐᓴᖅᑕᐅᔪᓐᓇᕐᓇᑎᑦ. ᑕᒪᓐᓇ ᐃᓕᖅᑯᓯᐅᔪᖅ ᐃᓱᒪᔭᐅᔪᓪᓗ ᓂᐸᐃᑦᑑᑎᑦᑎᓯᒪᒻᒪᑦ ᐅᕙᑦᑎᓐᓂ ᓯᓚᑐᓂᖏᓐᓂᓪᓗ ᓯᕗᓪᓕᒥᓂᖅᑕ, ᐱᕈᖅᑐᓂᒃ, ᐆᒪᔪᓂᒃ ᐊᓯᖏᓐᓂᓪᓗ ᑎᒥᐅᔪᓂᒃ ᓂᓪᓕᐊᔾᔪᑎᖃᕈᓐᓃᖅᑐᑕ.

ᑕᒪᒃᑯᐊ ᒪᓕᒐᓕᒫᑦ, ᐱᖁᔭᓕᒫᑦ, ᐃᓕᖅᑯᓯᕆᔭᐅᕙᑦᑐᓪᓗ ᐃᓱᒪᒋᔭᐅᔪᓂᓪᓗ ᐊᔅᓱᕉᑎᒋᒃᑲᓐᓂᕈᓐᓃᖅᑑᔮᖅᑕᕗᑦ. ᑭᓇᐅᓂᕐᓂᑦ ᓲᕐᓗ ᓴᖅᑮᑲᓐᓂᕈᓐᓇᐃᓕᕙᑦᑐᖓ ᓄᓇᖃᖅᑳᖅᓯᒪᔫᓪᓗᑕ ᐱᓯᒪᑦᑎᑦᑎᐊᕆᐊᖃᖅᑐᖓᓪᓗ. ᐃᓚᒃᑲ, ᓄᓇᖅᑲᑎᒃᑲᓗ ᐊᒥᓱᐊᓗᐃᓪᓗ ᓄᓇᖃᖅᑳᖅᓯᒪᔪᑦ, ᑲᔪᓯᑎᑦᑎᓯᒪᒍᓐᓃᕐᖓᑕ ᐱᓕᕆᐊᕆᔭᕆᐊᓕᒐᓗᐊᖏᓐᓂ ᑲᑐᔾᔨᖃᑎᒌᒋᐊᖃᕐᓂᑎᓐᓂ ᐊᕙᑎᑦᑎᓐᓄᑦ, ᐱᓯᒪᑦᑎᑦᑎᐊᕋᓱᐊᕐᓗᑕᓗ ᓄᓇᐅᔪᓂᒃ. ᑕᐃᒪᐃᓐᓂᖓᓐᓄᑦ ᑲᔪᓯᑎᑦᑎᑦᑎᒍᓐᓇᕈᓐᓃᕋᑦᑕ ᑲᒪᒋᔭᕆᐊᓕᑦᑎᓐᓂ ᓄᓇᖃᖅᑳᖅᓯᒪᔫᓪᓗᑕ ᓇᒻᒥᓂᖅ ᒪᓕᓪᓗᑕ ᐃᓕᓐᓂᐊᕈᑎᒋᓯᒪᔭᑦᑎᓐᓂ ᑭᓇᐅᓂᑦᑎᓐᓂ. ᑕᒪᓇ ᐊᑦᑐᐃᓂᖃᓪᓚᕆᑦᑎᐊᓘᖏᓐᓇᕐᖓ ᓄᓇᖃᖅᑳᖅᓯᒪᔪᓄᑦ, ᐊᕙᑎᑦᑎᓐᓄᑦ ᐅᕙᑦᑎᓄᓪᓗ. ᐃᓱᒪᓐᖑᐊᕐᓗᑎᑦ ᓲᕐᓗ ᐊᑦᑐᐊᓂᖃᕈᓐᓃᖅᑐᒍᑦ ᑭᓱᑐᐃᓐᓇᕐᓄᑦ ᐅᖃᐅᓯᑦᑎᓐᓄᑦ, ᐱᖅᑯᓯᑦᑎᓐᓄᑦ, ᑭᓇᐅᓂᑦᑎᓐᓄᑦ, ᑭᓱᓕᒫᑦᑎᐊᑦ ᐃᓕᓐᓂᐊᕈᑎᒋᓯᒪᔭᕗᑦ ᐱᓯᒪᑦᑎᑦᑎᐊᕆᐊᖃᕐᓂᑎᓐᓂ ᐅᑉᐱᕆᔭᐅᒍᓃᖅᑐᑎᑦ ᐱᔭᕆᐊᖃᖅᑑᔮᕈᓐᓃᖅᑐᑎᓪᓗ ᓲᕐᓗ.

ᓄᓇᖃᖅᑳᖅᓯᒪᔪᑦ ᐱᓯᒪᑦᑎᐊᕆᐊᖃᕐᓂᕐᔪᑦ ᐱᖁᔭᖅ ᐃᑲᔪᖅᑐᐃᒍᓐᓇᕐᖓᑦ ᓄᓇᖃᖅᑳᖅᓯᒪᔪᓂᒃ ᑲᒪᓇᓱᐊᕐᓂᐊᖅᑎᓪᓗᒋᑦ ᐃᒻᒥᒃᑯᑦ ᓄᓇᓖᓪᓗ ᐱᓕᕆᐊᕆᔭᕆᐊᓕᖏᓐᓂ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᕐᓂᕐᒧᑦ ᐊᔾᔨᐅᖏᑦᑐᓂᑦ ᐊᑐᕐᓗᑎᑦ ᐱᓕᕆᖃᑎᖃᑦᑎᐊᕐᓗᑎᑦ ᐊᐅᓚᑦᑎᑦᑎᐊᕐᓗᑎᑦ ᑲᑐᔾᔨᖃᑎᒌᓪᓗᑎᓪᓗ ᐊᐅᓚᑦᑎᔾᔪᑎᓂᒃ. ᑖᓐᓇ ᐃᓚᓕᐅᔾᔨᓯᒪᒻᒪᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂ ᐃᓱᒪᓕᐅᕐᓂᐊᖅᑎᓪᓗᒋᑦ ᐅᖃᐅᓯᕆᔪᒪᔭᖏᓐᓂᓪᓗ ᓄᓇᖃᖅᑳᖅᓯᒪᔪᑦ ᓯᕗᓕᖅᑎᖏᑦ ᐊᒻᒪᓗ ᐊᐅᓚᑦᑎᔾᔪᑎᖏᑦ ᑲᔪᓯᖁᓪᓗᖏᑦ. ᓂᓪᓕᐊᑎᑦᑎᒻᒪ ᓄᓇᖃᖅᑳᖅᓯᒪᔫᑦ ᐅᑉᐱᕆᔭᖏᓐᓂ ᐊᒻᒪᓗ ᓯᕗᓪᓕᖅᐸᐅᑎᒋᐊᓕᖏᓐᓂ ᑲᒪᑦᑎᐊᕆᐊᖃᕐᓂᕐᒧᑦ ᓄᓇᓂᑦ, ᐃᒪᕐᒥᑦ, ᓯᑯᓂᓪᓗ ᒪᓕᑦᑎᐊᖅᑐᓂᒃ ᓄᓇᖃᖅᑳᖅᓯᒪᔪᑦ ᐃᓅᓯᖏᓐᓂ ᐊᒻᒪᓗ ᓴᖅᑭᔮᖅᑎᑦᑎᑲᓐᓂᕐᓗᑎᑦ ᐸᖅᑭᑦᑎᓗᑎᓪᓗ ᓄᓇᖃᖅᑳᖅᓯᒪᔪᑦ ᐊᑐᖃᑦᑕᖅᑕᖏᓐᓂ. ᑲᔪᓰᓐᓇᕐᓗᑎᑦ ᐱᓕᕆᓂᖏᓐᓂ ᓄᓇᖃᖅᑳᖅᓯᒪᔪᓪᓗ ᖃᐅᔨᒪᓂᖏᑦ ᐆᒪᑎᑕᐅᖏᓐᓇᕐᓗᑎᑦ, ᓄᓇᖃᖅᑳᖅᓯᒪᔪᓪᓗ ᒪᓕᒐᖏᑦ ᒪᓕᑦᑕᐅᑦᑎᐊᕐᓗᑎᑦ, ᑲᔪᓯᑦᑎᑦᑎᑎᐊᕆᐊᖃᕋᑦᑕ, ᐱᓕᕆᖃᑎᒌᓪᓗᑕ ᓯᓚᕐᔪᐊᒥ, ᐃᓚᒌᓐᓂᕐᒥᑦ ᓄᓇᖅᑲᑎᒌᓐᓂᒥᓪᓗ ᐊᐅᓚᑕᐅᑦᑎᐊᖁᓪᓗᒋᑦ.

1. ᐅᓪᓗᖓ ᐱᒋᐊᕐᕕᔅᓴᖓ

ᑖᓐᓇ ᐱᖁᔭᖅ ᐊᑐᓕᖅᑎᑕᐅᓂᐊᖅᑐᖅ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕐᓂᕐᒧᑦ ᐱᖁᔭᖏᓐᓂ ᖁᕕᐊᓲᖅᑎᖃᓕᖅᑲᑕ.

2. ᐱᔾᔪᑎᖏᑦ

ᑕᒪᓐᓇ ᐱᔾᔪᑎᖓ ᐱᖁᔭᐅᑉ ᓇᓗᓇᐃᔭᕐᓗᒋᑦ ᑐᓐᖓᕕᔅᓴᐃᑦ, ᐊᔾᔨᐅᖏᑦᑐᓂᑦ ᑲᒪᓇᓱᐊᕐᓗᑎᑦ^ ^{Footnote 2}^, ᑕᐃᒪᐃᓪᓗᐊᑎᑦᑎᓂᕐᒧᑦ, ᐊᑑᑎᖃᑦᑎᐊᕐᓂᕐᒧᑦ ᐱᓕᕆᖃᑎᖃᑦᑎᐊᕐᓂᒧᓪᓗ ᒫᓐᓇ ᓯᕗᓂᑦᑎᓄᓪᓗ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ. ᑕᑯᓐᓇᖅᑕᐅᒋᐊᓕᒃ ᐱᓕᕆᐊᖑᓇᓱᐊᖅᑐᖅ ᑲᓇᑕᐅᑉ ᒥᕐᖑᐃᖅᓯᕐᕕᖓᓐᓄᑦ ᐊᑐᓕᖅᑎᑕᐅᓗᑎᑦ ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᓯᒪᓂᖏᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᑦ (‘UN ᓇᓗᓇᐃᖅᑕᐅᓯᒪᔪᑦ’). ᐊᑐᐊᒐᐃᑦ ᐊᑐᓕᖅᑎᑕᐅᓗᑎᑦ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᕐᒧᑦ ᐱᓕᕆᐊᔅᓴᖏᓐᓂ ᐊᒻᒪᓗ ᐱᒋᐊᕈᑕᐅᓗᑎᑦ ᐊᑦᑐᐃᓂᖃᕋᔭᖅᑐᑦ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ ᐊᒻᒪᓗ ᐊᑐᓕᖅᑎᑕᐅᓂᖓᓐᓂᑦ ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᓯᒪᓂᖏᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᑦ ᐱᓕᕆᖃᑎᒌᓪᓗᑎᑦ ᑲᒪᑦᑎᐊᕆᐊᖃᕐᓂᕐᒧᑦ ᐸᕐᓇᐅᑎᓂᒃ ᐊᑐᓂ ᓄᓇᐃᑦ ᐊᒻᒪᓗ ᑲᒪᑦᑎᐊᕆᐊᖃᕐᓂᕐᒧᑦ ᐸᕐᓇᐅᑎᖏᑦ ᐊᑐᓂ ᑲᓇᑕᒥ ᐊᓪᓚᕕᖏᓐᓂ.

ᑲᓇᑕᐅᑉ ᒥᕐᖑᐃᖅᓯᕐᕕᒃᑯᖏᑦ ᓴᖅᑭᖅᑕᐅᓯᒪᔪᑦ ᐊᐅᓚᑦᑎᓪᓗᑎᓪᓗ ᓄᓇᐅᔪᓂᒃ ^{Footnote 3} ᑕᐃᒪᒃ ᐃᓚᓕᐅᔾᔭᐅᓯᒪᓐᖏᑦᑐᓂᒃ ᓄᓇᖃᖅᑳᖅᓯᒪᔪᓂᒃ ᐊᓪᓛᒃ ᓄᓇᖃᖅᑳᖅᓯᒪᔪᓂᒃ ᐱᑦᑎᐊᕆᐊᖃᕐᓂᕐᒧᑦ. ᐅᑭᐅᖑᕋᑖᓚᐅᖅᑐᓂᒃ, ᓄᑖᕐᓂᑦ ᐸᖅᑭᔭᐅᒋᐊᓕᓐᓂᒃ ᓴᖅᑮᓚᐅᖅᓯᒪᒻᒪᑕ ᐱᓕᕆᖃᑎᖃᖅᑐᑎᑦ ᓄᓇᖃᖅᑳᖅᓯᒪᔪᓂᒃ, ᐊᓯᖏᓐᓂᓪᓗ ᐸᖅᑭᔭᒋᐊᓕᓐᓂᒃ ᐅᓗᕆᐊᓇᕋᔭᖅᑐᓂᒃ ᓄᓇᖃᖅᑳᖅᓯᒪᔪᓄᑦ ᐊᑦᑐᐊᓂᖃᕈᓐᓃᕐᓗᑎᑦ ᓄᓇᖃᖅᑳᖅᓯᒪᔪᑦ ᓄᓇᖏᓪᓗ. ᑖᓐᓇ ᐱᖁᔭᖅ ᐃᑲᔪᖅᑐᐃᔪᖅ ᐅᑉᐱᕆᔭᖃᖅᑐᓂᓗ ᐊᑦᑐᐊᓂᖏᓐᓂ ᒪᓂᓴᕐᓂᒧᓪᓗ. ᐃᓕᓴᖅᓯᓯᒪᔪᖅ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᕆᐊᖃᕐᓂᖏᓐᓄᑦ ᑲᔪᓯᑦᑎᐊᕐᓂᐊᖅᑲᑕ ᐸᐸᑦᑎᑎᓪᓗᒋᑦ ᓄᖑᓴᑦᑕᐅᖁᓇᒋᓪᓗ ᐆᒪᔪᑦ ᐊᔾᔨᒌᓐᖏᑦᑐᑦ ᐊᒻᒪᓗ ᒪᑭᒪᔾᔪᑎᖃᑦᑎᐊᕈᓐᓇᕐᓗᑎᑦ ᐊᑦᑐᐊᓂᖏᓐᓄᑦ, ᐃᓕᓐᓂᐊᕐᓗᑎᑦ ᑐᑭᓯᐅᒪᔭᐅᓗᑎᓪᓗ.

ᑖᓐᓇ ᐱᖁᔭᖅ ᐋᖅᑭᔅᓱᐃᖃᑎᖃᖅᑐᑎᑦ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᕆᐊᖃᕐᓂᕐᒧᑦ ᑲᒪᔨᖏᓐᓂ ᐊᒻᒪᓗ ᓴᖅᑮᓗᑎᑦ ᑐᑭᓯᐅᒪᑎᑦᑎᑦᑎᐊᕐᓂᕐᒥᑦ ᐅᑉᐱᕆᔭᖃᑦᑎᐊᕐᓗᑎᓪᓗ ᐊᑐᖅᑕᐅᓗᑎᑦ ᐅᑉᐱᕆᔭᐃᑦ ᖃᐅᔨᒪᓃᓪᓗ ᓴᖅᑭᖅᑕᐅᓯᒪᓂᖏᓐᓂ.

3. ᐱᖁᔭᐃᑦ ᑐᕌᒐᖏᑦ

ᑖᒃᑯᐊ ᑐᕌᒐᐃᑦ ᒪᕐᕉᓕᖅᑲᖓᔫᓐᓂᒃ ᐱᔾᔪᑎᓖᑦ:

ᓯᕗᓪᓕᖅᐹᒥ, ᐱᖁᔭᐃᑦ ᐊᑐᐊᕈᑎᐅᒋᐊᓖᑦ ᓄᓇᖃᖅᑳᖅᓯᒪᔪᓄᑦ ᑲᒪᑦᑎᐊᕐᓂᕐᒧᑦ ᐱᓕᕆᐊᖑᓂᐊᖅᑐᓂᒃ ((ᑕᑯᓗᒍ ᐃᓚᖓᓐᓃᑦᑐᖅ 5−ᒥ) ᓇᒧᓕᒫᖓᔪᓄᑦ ᐃᓗᐊᓂᓗ ᑲᓇᑕᐅᑉ ᐊᓪᓚᕕᖏᓐᓂ ᑐᑦᑕᕐᕕᐅᔪᓂᒃ.

ᐊᐃᑉᐸᖓ, ᐱᖁᔭᓕᐊᖑᓯᒪᔪᑦ ᐃᑲᔪᖅᑐᐃᒍᒪᓪᓗᑎᑦ ᐱᖅᑯᓯᖏᓐᓂ, ᑲᔪᓰᓐᓇᖁᓪᓗᒋᓪᓗ, ᐱᖅᑯᓯᖏᑦ ᐊᑦᑕᓇᖅᑐᒦᖁᓇᒋᑦ ᐊᒻᒪᓗ ᒪᒥᓴᕐᓂᕐᒧᑦ. ᑕᐃᒪᐃᑦᑐᒥᑦ ᐱᓂᐊᕐᓗᓂ, ᐃᑲᔪᖅᑐᐃᒋᐊᖃᕋᑦᑕ, ᒪᑭᑦᑎᑲᓐᓂᕐᓗᒋᓪᓗ, ᖁᕕᐊᓲᑎᖃᖃᑦᑕᕐᓗᓂᓗ, ᐱᓕᕆᖃᑎᖃᑦᑎᐊᕐᓗᓂ, ᐊᑦᑐᐊᓂᖃᑦᑎᐊᕐᓗᓂᓗ ᓄᓇᖃᖅᑳᖅᓯᒪᔪᓄᑦ ᓄᓇᖏᓐᓄᑦ, ᐃᒪᖏᓐᓄᑦ, ᓯᑯᖏᓐᓄᑦ, ᐃᓅᓯᖏᓐᓄᓪᓗ ᓄᓇᖃᖅᑳᖅᓯᒪᔪᑦ, ᖃᐅᔨᒪᑦᑎᐊᕋᓱᐊᕐᓗᑕᓗ, ᓯᓚᕐᔪᐊᒥ ᑕᑯᓐᓇᖅᑕᐅᔪᓂᒃ ᒪᓕᒐᖅᑎᒍᓪᓗ ᑎᓕᓯᔾᔪᑕᐅᓯᒪᔪᑦ. ᒪᑯᐊᓗ ᑐᑭᓯᐅᒪᑦᑎᐊᕐᓂᖅ ᓄᓇᓕᕆᓂᕐᒧᑦ ᒪᓕᒐᕐᓂᑦ.

4. ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᕆᐊᖃᕐᓂᕐᒧᑦ ᐊᑐᐊᒐᐃᑦ ᐅᑉᐱᕆᔭᐅᔪᓂᒃ ᒪᓕᒐᓂᓪᓗ

ᑖᓐᓇ ᐱᖁᔭᖅ ᓇᓗᓇᐃᔭᐃᓯᒪᔪᖅ ᓇᓗᓇᐃᔭᖅᓯᒪᑦᑎᐊᖅᑐᒋᑦ ᐅᑉᐱᕆᔭᐅᔪᑦ ᒪᓕᒐᐃᓪᓗ ᑕᒪᒃᑯᓄᖓ ᒥᕐᖑᐃᖅᓯᕐᕕᓕᒫᓄᑦ ᑲᓇᑕᒥ ᐱᓕᕆᖃᑎᖃᖅᐸᑦᑐᒥᒃ ᓄᓇᖃᖅᑳᖅᓯᒪᔪᓂᒃ. ᐅᑉᐱᕆᔭᐅᔪᑦ ᓱᓕᔪᖅᓴᕐᓂᖅ, ᐅᑉᐱᕆᔭᖃᕐᓂᖅ, ᐊᒻᒪᓗ ᑕᐅᖅᓰᓂᖅ ᐅᖃᐅᓯᖃᖅᑐᐃᓐᓇᐅᒻᒪᑕ ᐅᑉᐱᕆᔭᐅᔪᓂᒃ ᐅᖃᐅᓯᕆᖃᑦᑕᕐᓗᒋᓪᓗ ᑭᓱᑦ ᐱᒻᒪᕆᐅᒻᒪᖔᑕ ᐅᑉᐱᔭᑦᑎᓐᓄᑦ. ᑕᒪᒃᑯᐊ ᐅᑉᐱᕆᔭᕗᑦ ᐃᑲᔫᑎᖃᕐᓂᐊᖅᑐᑦ ᐃᓱᒪᓕᐅᖅᑎᓪᓗᑕ ᐅᑉᐱᕆᔭᑦᑎᓐᓂ ᐊᑐᐊᕆᐊᓕᑦᑎᓐᓂ ᖃᐅᑕᒫᖅᓯᐅᑎᓂᒃ ᐱᒋᐊᕈᑎᓂᒃ, ᑲᒪᒋᔭᕆᐊᓕᓐᓂᒃ, ᐊᒻᒪᓗ ᓂᕈᐊᕆᐊᖃᕐᓂᑎᓐᓂ. ᒪᓕᓪᓗᒋᓪᓗ ᐱᔪᓐᓇᐅᑏᑦ, ᑐᒍᒥᐊᖅᑕᐅᔪᑦ ᑲᒪᒋᔭᕆᐊᓖᓪᓗ; ᑎᒍᒥᐊᕐᓗᑕ ᐅᑉᐱᕆᔭᐃᑦ ᖃᐅᔨᒪᔭᐅᔪᓪᓗ; ᓄᓇ ᖃᓄᐃᑦᑎᐊᖁᓐᓇᒍ, ᐱᓕᕆᖃᑎᒌᑦᑎᐊᕐᓂᖅ, ᐊᒻᒪᓗ ᑲᔪᓯᑎᑕᐅᖏᓐᓇᕐᓗᑎᑦ ᓄᓇᖃᖅᑳᖅᓯᒪᔪᑦ ᐱᖅᑯᓯᖏᑦ ᐅᖃᐅᓯᖏᓪᓗ ᐃᑲᔫᑎᖃᕋᔭᖅᑐᑦ ᐊᑐᐊᖅᑕᐅᓗᑎᑦ ᐱᒋᐊᕈᑎᑦᑎᓐᓂ ᐃᓱᒪᓕᐅᕐᓂᑎᓐᓂᓪᓗ. ᑕᒪᒃᑯᐊ ᐱᖁᔭᐃᑦ ᐃᑲᔫᑎᖃᕐᓂᐊᖅᑐᑦ ᑲᔪᓯᑎᑦᑎᓇᓱᐊᖅᑎᓪᓗᑕ ᐅᑉᐱᕆᔭᑦᑎᓐᓂ.

ᐊᑕᐅᑦᑎᒃᑰᖅᑕᐅᓯᒪᓪᓗᑎᑦ, ᐅᑉᐱᕆᔭᐃᑦ ᒪᓕᒐᐃᓪᓗ ᖃᓄᖅᑑᕈᓐᓇᓂᖅᓴᐅᓗᑎᑦ ᐃᑲᔪᖅᑐᐃᓗᑎᑦ ᐊᕕᑦᑐᖅᓯᒪᔪᓂᒃ ᓄᓇᓕᓐᓂᓪᓗ ᑐᑭᓯᑎᑦᑎᓗᑎᑦ ᐊᐅᓚᑦᑎᓂᖏᓐᓂᓪᓗ, ᑲᓇᑕᒥᓗ ᐊᑐᐊᖅᓯᔾᔪᑎᓕᐅᖃᑦᑕᕐᓗᑎᑦ. ᑕᒪᒃᑯᐊ ᐃᓱᒪᒋᔭᐅᔪᑦ ᐅᖃᐅᓯᖃᑦᑕᕐᓗᑎᑦ ᓄᓇᖃᖅᑳᖅᓯᒪᔪᓂᒃ ᐊᒻᒪᓗ ᒪᓕᓪᓗᒋᑦ ᐊᑑᑎᔪᓄᑦ ᐱᖁᔭᕐᓄᑦ ᑐᕌᒐᐃᓪᓗ ᐅᓂᒃᑳᕆᔭᐅᖃᑦᑕᕐᓗᑎᑦ ᓱᓕᔪᓂᒃ ᓴᐃᒻᒪᖃᑎᒌᓐᓂᕐᒧᑦ ᑲᑎᒪᔨᖏᓐᓂ ᑲᓇᑕᒥ, ᑲᓇᑕᒥ ᓈᓚᑦᑎᑦᑎᓂᖏᓐᓂ ᔭᒐᓯᒪᔪᓂᒃ ᐃᓄᐊᖅᑕᐅᓯᒪᔪᓂᓪᓗ ᓄᓇᖃᖅᑳᖅᓯᒪᔪᓂᑦ ᐊᕐᓇᓂᑦ ᓂᕕᐊᖅᓯᐊᓂᓪᓗ, ᑕᐃᒪᐃᑦᑑᖃᑎᒋᔭᖓᓃᓲᓐᓂᓪᓗ ᐃᓄᓐᓂᑦ, ᐊᒻᒪᓗ ᓯᓚᕐᔪᐊᒥ ᑲᑐᔾᔨᔨᓂᒃ ᓇᓗᓇᐃᖅᑕᐅᓯᒪᔪᖅ

ᐅᑉᐱᕆᔭᐃᑦ

ᓱᓕᔪᖅᓴᕐᓂᖅ

ᓱᓕᔪᖅᓴᕆᐊᓕᑦ ᐱᓕᕆᐊᓕᒫᑦᑎᐊᑎᓐᓂ. ᑲᓇᑕᐅᑉ ᒥᕐᖑᐃᖅᓯᕐᕕᐅᒐᑦᑕ ᐅᑉᐱᕆᔭᖃᖅᑐᑕ ᓄᓇᖃᖅᑳᖅᑐᒥᓂᕐᓂᑦ ᐱᓕᕆᖃᑎᖃᕐᓂᕐᒥᑦ ᐃᓕᓴᖅᓯᓯᒪᓪᓗᑕᓗ ᓱᓕᔪᔅᓴᐃᓐᓇᖃᑦᓲᖑᓐᖏᒻᒪᑕᑦ, ᑭᓯᐊᓂᓕ ᐊᓯᔾᔨᐸᓪᓕᐊᔪᖅ ᐱᕈᖅᐸᓪᓕᐊᕙᑦᑐᖅ. ᓱᓕᔪᔅᓴᕐᓂᖅ ᐅᓗᕆᐊᓇᖅᑐᒦᒍᓐᓇᕐᒥᔪᖅ ᐃᓄᓐᓄᓪᓗ ᒪᓕᑦᑕᐅᒋᐊᓕᒃ; ᓱᓕᔪᕆᔭᐅᑐᐃᓐᓇᖏᓪᓗᑎᑦ ᑭᓯᐊᓂᓕ ᐊᑯᓂ ᐊᑐᕆᐊᓕᒃ ᒪᓗᒍᓱᑐᐃᓐᓇᖏᓪᓗᑎᓪᓗ. ᑐᓐᖓᕕᐅᔪᖅ ᐃᑉᐱᒍᓱᑦᑎᐊᕐᓂᕐᒥᑦ ᐱᓕᕆᖃᑎᖃᑦᑎᐊᓂᕐᒥᑦ ᐱᑕᖃᖅᑎᓐᓇᒍ, ᐱᓕᕆᖃᑎᒌᒍᓐᓇᔾᔮᖏᑦᑐᒍᑦ ᐅᑉᐱᕆᖃᑦᑕᐅᑎᖏᓪᓗᑕ. ᓱᓕᔪᔅᓴᖃᑦᑕᐅᑎᒋᐊᖅᑐᒍᑦ ᐊᑯᓂᐅᒍᓐᓇᕆᓪᓗᓂ ᑕᐃᒪᐃᒐᓗᐊᕐᓗᓂ ᑭᓯᐊᓕ ᑲᔪᓰᓐᓇᕆᐊᖃᖅᑐᒍᑦ ᓱᓕᔪᒃᑯᑦ ᐅᓂᒃᑳᕐᓗᑕ, ᑕᑎᒋᔭᐅᔪᓐᓇᕐᓗᑕ, ᐊᔾᔨᒌᑎᑦᑎᔫᒥᓗᑕᓗ.

ᑕᐅᖅᓰᓂᖅ

ᐅᑉᐱᕆᔭᐃᑦ ᖃᐅᔨᒪᓃᓪᓗ ᑐᑭᓯᐅᒪᓂᕐᒦᓐᖔᖅᑐᖅ ᐆᒪᔪᓕᒫᑦᑎᐊᑦ ᐊᑦᑐᐊᔪᐃᓐᓇᑦᑎᐊᖑᒻᒪᑕ. ᐊᑦᑐᐊᔪᐃᓐᓇᐅᒐᑦᑕ ᐃᓕᓴᕆᓯᒪᒐᑦᑎᒍ ᐱᒋᐊᕈᑎᓄᑦ ᐊᑦᑐᐃᓂᖃᓲᖑᒻᒪᑕ ᐊᓯᑦᑎᓐᓂ ᐊᒻᒪᓗ ᑲᒪᒋᔭᕆᐊᖃᓕᖅᑐᑎᒍᓪᓗ ᐊᑦᑐᐊᖃᑎᒌᓐᓂᕗᑦ ᐊᓯᑦᑎᓐᓄᑦ, ᑲᒪᑦᑎᐊᕆᐊᖃᓕᖅᑐᑕᓗ ᐊᔾᔨᒌᑎᑦᑎᔫᒥᓗᑕᓗ ᑭᓱᑐᐃᓐᓇᑦᑎᐊᕐᓂᑦ. ᐃᑲᔫᑎᖃᓪᓚᕆᑉᐸᒻᒪᑦ ᐱᓕᕆᖃᑎᖃᖅᑐᓂᑦ ᐊᒻᒪᓗ ᑲᒪᖃᑕᐅᑦᑎᐊᖅᑐᓂᒃ ᓄᓇᒥᑦ, ᐃᒪᕐᒥᑦ ᓯᑯᓂᓪᓗ. ᑲᑐᔾᔨᖃᑎᖃᐃᓐᓇᕋᓱᓐᓂᐊᖅᑐᒍᑦ ᑕᒪᒃᑯᐊ ᐊᑦᑐᐊᓃᓪᓗ ᐃᓱᒪᒋᓗᒋᑦ.

ᐅᑉᐱᕆᔭᖃᕐᓂᖅ

ᐅᑉᐱᕆᔭᖃᑦᑎᐊᕐᓂᖅ ᑭᓱᑐᐃᓐᓇᑦᑎᐊᕐᓂᑦ ᑕᐃᒪᐃᓪᓗᐊᑎᑦᑎᓂᐅᒻᒪᑦ, ᓇᒻᒥᓂᖅ ᓇᓪᓕᒋᓗᓂ, ᓇᓪᓕᒍᓱᒍᓐᓇᕐᓗᓂ, ᐃᓱᒫᓗᒍᓐᓇᕐᓗᓂ ᐊᒻᒪᓗ ᑐᓐᖓᓇᕐᓗᓂ. ᑕᒪᒃᑯᐊ ᐃᑲᔪᕐᓂᖃᕐᖓᑕ ᖃᓄᐃᑦᑎᐊᓐᖏᓂᕐᒧᑦ ᑐᓐᖓᓇᕐᓂᒧᓪᓗ ᓄᓇᖃᖅᑲᖅᑐᓂᒃ ᐱᓕᕆᖃᑎᒌᑦᑐᓂᒃ ᑭᒃᑯᑐᐃᓐᓇᕐᓂᑦ ᐱᔨᑦᑎᑎᓪᓗᑕ. ᐊᑦᑕᓇᖅᑐᒦᖁᓇᒋᑦ ᐃᓅᓇᓱᐊᑦᑎᐊᖁᓪᓗᒋᓪᓗ ᓄᓇᖃᖅᑳᖅᑐᒥᓃᑦ ᐱᓕᕆᖃᑕᐅᔪᑦ, ᐃᖅᑲᓇᐃᔭᖅᑏᑦ, ᐆᒪᔪᓕᒫᓪᓗ ᐃᑲᔪᖅᑐᖅᑕᓄᑦ, ᐱᓕᕆᖃᑎᖃᐃᓐᓇᓂᕐᒥᓪᓗ, ᒪᑐᐃᖓᐃᓐᓇᓂᕐᒥᓪᓗ ᐊᒻᒪᓗ ᐊᔾᔨᒌᑎᑦᑎᔫᒥᓂᖅ.

ᒪᓕᒐᐃᑦ

ᐅᑉᐱᕆᔭᖃᕐᓂᖅ ᐱᔪᓐᓇᐅᑎᓂᒃ, ᐱᓕᕆᐊᖑᔭᕆᐊᓕᓐᓂᒃ ᑲᒪᒋᔭᐅᒋᐊᓕᓐᓂᓪᓗ

ᑲᓇᑕᐅᑉ ᒥᕐᖑᐃᖅᓯᕕᖏᑦ ᐅᑉᐱᕆᔭᖃᑦᑎᐊᕐᖓᑕ ᓄᓇᖃᖅᑳᖅᓯᒪᔪᓂᒃ ᑎᒍᓯᓯᒪᔪᓂᒃ ᐊᓯᖏᓐᓂ ᓇᒻᒥᓂᕐᓗ ᐱᓕᕆᔪᒪᓂᖏᓐᓂ ᐊᑐᕐᓗᑎᑦ ᑲᔪᓯᑎᑦᑏᓐᓇᕐᓗᑎᑦ ᐱᖅᑯᓯᖏᓐᓂ, ᐅᖃᐅᓯᖏᓐᓂ, ᐃᓅᓇᓱᐊᕐᓂᖏᓐᓂᓪᓗ. ᐃᑲᔪᖅᑐᐃᓂᐊᕋᑦᑕ ᓄᓇᖃᖅᑳᖅᓯᒪᔪᓂᒃ ᐊᑐᖃᑦᑕᖅᑐᓂᒃ ᐱᔪᓐᓇᐅᑎᖏᓐᓂ ᑲᒪᑦᑎᐊᖃᑦᑕᖅᑐᓂᒃ ᓄᓇᓂᑦ, ᐃᒪᕐᒥᑦ ᓯᑯᒥᓪᓗ. ᑐᓴᐅᒪᓂᐊᕋᑦᑕ ᒪᓕᒐᕐᒥᑦ 35−ᒦᑦᑐᒥᑦ ᐱᖁᔭᕐᔪᐊᓂᑦ, 1982−ᒥᑦ, ᐊᖏᕈᑕᐅᓯᒪᔪᓂᒃ (ᑕᒪᒃᑮᒃ ᖃᓪᓗᓈᑎᑐᑦ ᐅᐊᑦᑎᐊᕈᕐᓂᓴᑎᑐᓪᓗ), ᐊᓯᖏᓪᓗ ᐊᖏᕈᑎᐅᔪᑦ ᓄᓇᖃᖅᑳᖅᓯᒪᔪᓂᒃ ᐊᒻᒪᓗ ᑭᖕ ᑭᒡᒐᖅᑐᐃᔨᒃᑯᖏᓐᓂ ᐊᒻᒪᓗ ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᓯᒪᓂᖏᓐᓂ ᐱᓗᐊᖅᑐᒥᑦ ᑕᑯᓐᓇᕐᓗᑎᒍ ᒪᓕᒐᐃᑦ ᐅᑯᐊ 1-5, 25-26, ᐊᒻᒪᓗ 29.

ᑎᒍᓯᕙᓪᓕᐊᓂᖅ ᐅᑉᐱᕆᔭᕐᓂᑦ ᖃᐅᔨᒪᓂᐅᔪᓂᓪᓗ

ᑲᓇᑕᐅᑉ ᒥᕐᖑᐃᖅᓯᕕᖏᑦ ᐱᓕᕆᖃᑎᖃᑦᑎᐊᕐᓂᕋᖅᓯᒪᔪᖅ ᓄᓇᖃᖅᑳᖅᓯᒪᔪᓂᒃ ᐅᑉᐱᕆᔭᖏᓐᓂ ᖃᐅᔨᒪᔭᖏᓐᓂᓪᓗ ᐊᒻᒪᓗ ᐱᓕᕆᖃᑎᖃᐃᓐᓇᖃᑦᑕᕐᓗᓂ. ᐃᑲᔪᖅᑐᐃᖃᑦᑕᕐᓗᑕᓗ ᑲᒪᑦᑎᐊᓂᕐᒥᑦ ᑐᓴᐅᒪᑎᑦᑎᓗᑕ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᑐᖃᖏᓐᓂ ᓯᓚᕐᔪᐊᒥᓗ ᑕᑯᓐᓇᖅᑕᐅᔪᓂᒃ, ᖃᓪᓗᓈᓪᓗ ᖃᐅᔨᒪᓂᖏᓐᓂ ᖁᕝᕙᓯᓐᓂᖅᓴᐅᖃᑦᑕᖅᓯᒪᒻᒪᑕ ᐅᑭᐅᒐᓴᐅᓚᐅᖅᑐᓂᒃ. ᑲᓇᑕᒥ ᒥᕐᖑᐃᖅᓯᕐᕖᑦ ᐱᖅᑯᓯᒃᑯᑦ ᐊᑦᑕᓇᖅᑕᐃᓕᒪᑎᑦᑎᓇᓱᐊᕐᓂᐊᖅᑐᖅ ᐃᓂᐅᔪᓂᒃ ᐅᑉᐱᕆᔭᐅᔪᓂᒃ ᖃᐅᔨᒪᔭᐅᔪᓂᓪᓗ ᓄᓇᖃᖅᑳᖅᓯᒪᔪᓂᒃ ᐃᑲᔪᖅᑐᕐᓗᒋᓪᓗ ᑲᑐᔾᔨᖃᒌᑦ ᐱᖅᑯᓯᓕᕆᖃᑦᑕᖅᑐᑦ. ᓴᖅᑮᒍᒪᓪᓗᑕ ᐅᑉᐱᕆᔭᐃᑦ ᖃᐅᔨᒪᓃᓪᓗ ᐊᒻᒪᓗ ᐱᖅᑯᓯᕐᒥᑦ ᐊᑦᑕᓇᖅᑐᒦᖁᓇᒋᑦ, ᐃᓕᓴᖅᓯᓯᒪᒍᒪᑦᑎᐊᕋᑦᑕ, ᒪᒥᐊᓐᓂᕐᒥᑦ, ᓱᓕᔪᓂᓪᓗ ᐅᓂᒃᑳᓂᕐᒥᑦ ᓴᐃᒻᒪᖃᑎᒋᓐᓂᒥᓪᓗ ᐱᒋᐊᕈᑕᐅᓯᒪᓕᕐᖓᑕ ᓄᓇᖃᖅᑳᖅᓯᒪᔪᓂᒃ. ᐱᓕᕆᖃᑎᖃᕐᓗᑕᓗ ᐊᓯᖏᓐᓂ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂ ᐃᓕᖅᑯᓯᕆᔭᐅᕙᑦᑐᓂᒃ, ᑲᓇᑕᐅᑉ ᒥᕐᖑᐃᖅᓯᕐᕕᒃᑯᖏᑦ ᐅᑉᐱᕆᔭᖃᕐᓂᐊᖅᑐᖅ ᐊᔾᔨᐅᖏᑦᑑᓂᖏᓐᓂ ᐊᒻᒪᓘᓐᓃᑦ ᓄᓇᓕᓐᓂ ᑲᒪᒋᔭᐅᖃᑦᑕᕐᓂᓐᖏᓂ ᒪᓕᒐᖅᑎᒍᑦ ᓄᓇᖃᖅᑳᖅᓯᒪᔪᑦ ᑎᒍᒥᐊᕐᓂᖏᓐᓂ ᓄᓇᓂᑦ, ᓈᒻᒪᒐᐃᑉᐸᑦ ᑕᐃᒫᒃ.

ᐱᕙᓪᓕᐊᑎᑦᑎᓂᖏᓐᓂ ᐱᐅᔪᓂᒃ, ᐅᑉᐱᕆᔭᖃᑦᑎᐊᕐᓂᓪᓗ ᐊᓯᒥᓂᒃ ᐱᓕᕆᖃᑎᒥᓂᒃ

ᑲᓇᑕᐅᑉ ᒥᕐᖑᐃᖅᓯᕕᖏᑦ ᐱᐅᔪᒃᑯᑦ ᐱᓕᕆᖃᑎᖃᐃᓐᓇᕐᓂᕋᖅᑐᑦ ᐃᑲᔪᖅᑐᐃᓗᑎᑦ ᓄᓇᖃᖅᑳᖅᓯᒪᔪᓂᒃ ᐊᑐᖅᑎᓪᓗᒋᑦ ᐱᔪᓐᓇᐅᑎᖏᓐᓂ, ᐱᖅᑯᓯᖏᓐᓂ ᐊᑐᖅᑎᓪᓗᒋᑦ, ᑲᒪᑦᑎᐊᕋᓱᐊᕐᓂᖏᓐᓂᓪᓗ. ᐅᓪᓗᒥᒧᑦ ᑎᑭᑦᑐᒍ, ᐱᐅᔪᒃᑯᑦ ᐱᓕᕆᖃᑎᖃᐃᓐᓇᕋᓱᐊᖅᓯᒪᔪᒍᑦ ᓄᓇᖃᖅᑳᖅᓯᒪᔪᓕᒫᑦ ᒐᕙᒪᒃᑯᖏᓐᓂ ᓄᓇᓕᖏᓐᓂᓪᓗ ᐊᑐᓕᖅᑎᑦᑎᓇᓱᐊᖅᑐᑕ ᓄᓇᖃᖅᑲᖅᓯᒪᔪᓂᒃ ᑲᒪᑦᑎᐊᕐᓂᕐᒨᖓᔪᓂᒃ ᐊᐳᕈᑕᐅᕙᑦᑐᑦ ᐲᔭᕋᓱᐊᖅᑐᒋᑦ ᐃᓯᕋᕐᓂᖅᑎᕋᓱᕐᓗᒋᓪᓗ. ᐅᑉᐱᕆᑦᑎᐊᖅᑕᕗᑦ ᓄᓇᖃᖅᑳᖅᓯᒪᔪᑦ ᒪᓕᒐᖏᑦ, ᐃᓕᖅᑯᓯᕆᖏᑦ, ᒪᓕᒐᖅᑎᒍᑦ ᑎᓕᓯᔾᔪᑕᐅᔪᑦ, ᓄᓇᒨᖓᔪᓪᓗ ᒪᓕᒐᖏᑦ. ᑐᓐᖓᕕᖏᓐᓂ, ᐃᓕᓴᕆᔭᐅᒋᐊᖃᕐᖓᑕ ᐊᔾᔨᒋᓐᖏᑕᖏᓐᓂ ᐱᔪᓐᓇᕐᓂᖏᓐᓂ ᐱᔪᒪᓂᖏᓐᓂᓪᓗ ᓄᓇᖃᖅᑳᖅᓯᒪᔪᑦ ᒐᕙᒪᒃᑯᖏᑦ - ᐊᑐᐃᓐᓇᕆᓇᓱᐊᖅᑐᒋᑦ ᓇᒦᓐᓂᖏᑦ ᓇᒧᓐᖓᕈᒪᓂᖏᓐᓂᓪᓗ - ᐱᔪᓐᓇᕐᓂᖏᓐᓂ ᐃᑲᔪᖅᑐᕐᓗᒋᓪᓗ, ᓈᒻᒪᒐᐃᑉᐸᑦ ᑐᔅᓯᕋᕋᐃᑉᐸᑕᓗ. ᐃᓕᓴᕆᓯᒪᒐᑦᑎᒍ ᐱᓕᕆᖃᑎᒌᓐᓂᖅ ᐊᖏᓪᓕᕙᓪᓕᐊᓂᐊᕐᓂᖓᓐᓂ ᐃᓕᑦᑐᐸᓪᓕᐊᓗᑎᒍᓪᓗ, ᓯᕗᒧᐊᑉᐸᓪᓕᐊᑦᑎᐊᕈᓐᓇᕐᓗᑕᓗ.

ᐃᓕᓴᖅᓯᓯᒪᒻᒥᔪᒍᑦ ᖃᓪᓗᓈᑦ ᐱᓕᕆᓯᒪᐃᓐᓇᖅᑕᖏᑦ ᐃᓚᖏᓐᓂ ᐊᑦᑐᐃᑲᒻᒪᔅᓯᒪᒻᒪᑕ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᓐᓂ ᒪᓕᒐᖏᓐᓂᓪᓗ ᐱᓕᕆᖃᑎᖃᕋᓱᐊᖅᑎᓪᓗᒋᑦ ᐊᓯᖏᓐᓂ ᐊᒻᒪᓗ ᐱᔭᕆᐊᑐᖃᑦᑕᖅᓯᒪᓕᖅᑐᑎᑦ ᐅᐊᑦᑎᐊᕈᕐᓂᓴᕐᓂᑦ ᐱᓕᕆᖃᑎᖃᐃᓐᓇᕋᓱᐊᖅᑐᑎᓪᓗ ᓄᓇᖃᖅᑳᖅᓯᒪᔪᑦ ᒐᕙᒪᒃᑯᖏᓐᓂ. ᐃᓛᓐᓂᒃᑯᑦ ᓄᓇᖃᖅᑳᖅᓯᒪᔪᑦ ᒐᕙᒪᒃᑯᖏᑦ ᐊᐃᕙᓂᖃᖃᑦᑕᖅᓯᒪᒻᒪᑕ ᑲᒪᑦᑎᐊᕆᐊᖃᕐᓂᕐᒧᑦ ᑲᒪᒋᔭᕆᓕᖏᓐᓂ, ᓈᒻᒪᒐᐃᒻᒪᑦ, ᓇᒻᒥᓂᖅ ᐃᓕᓴᖅᓯᓪᓗᑎᑦ ᑲᒪᒋᐊᖃᕐᓂᖏᓐᓂ ᐊᑐᓂ ᓄᓇᓖᑦ ᐃᓕᓴᕆᓪᓗᒋᓪᓗ ᐅᐊᑦᑎᐊᕉᓂᖅᓴᐃᑦ ᑲᒪᒋᔭᐃᓐᓇᕆᐊᓖᓪᓗᑦ ᐊᔾᔨᒌᓐᖏᑐᐃᓐᓇᕆᐊᖃᕐᓂᖏᓐᓂ. ᑲᓇᑕᐅᑉ ᒥᕐᖑᐃᖅᓯᕕᖏᑦ ᑲᒪᓂᐊᖅᑐᑦ ᒪᑐᐃᖓᓂᖅᓴᐅᓗᑎᑦ ᑭᒃᑯᑐᐃᓐᓇᐃᑦ ᐱᖃᑕᐅᔪᒪᔪᑦ ᓂᓪᓕᐊᔭᖅᑐᖁᔭᐅᓗᑎᑦ ᓄᓇᖃᖅᑳᖅᓯᒪᔪᓂᒃ ᐱᓕᕆᑎᓪᓗᒋᑦ ᐊᒻᒪᓗ ᒪᓕᒐᐃᑦ ᓈᒻᒪᒐᐃᑉᐸᑕ. ᐱᓕᕆᖃᑎᖃᐃᓐᓇᑦᑎᐊᕋᓱᐊᖅᑐᑎᑦ ᐅᑉᐱᕆᔭᖃᑦᑎᐊᖅᑐᑎᓪᓗ, ᑎᒍᓯᒍᒪᒐᑦᑕ ᑕᒪᒃᑯᓂᖓ ᐅᓪᓗᒥᓕᓴᐅᔪᓂᒃ ᐊᖏᕈᑎᒋᖃᑦᑕᖏᒃᑲᓗᐊᕈᑦᑎᒍᓪᓗ ᓴᖅᑭᕆᐊᓖᑦ.

ᑲᔪᓯᑦᑎᐊᖏᓐᓇᖁᓪᓗᒋᑦ ᓄᓇᖃᖅᑳᖅᓯᒪᔪᑦ ᐱᖅᑯᓯᖏᑦ ᐅᖃᐅᓯᖏᓪᓗ

ᑲᓇᑕᐅᑉ ᒥᕐᖑᐃᖅᓯᕕᖏᑦ ᐃᓕᓴᖅᓯᓯᒪᔪᑦ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᖏᓐᓂ ᑕᒪᑐᒥᖓ ᐊᔾᔨᐅᖏᑦᑐᓂᓪᓗ. ᐃᓕᓴᖅᓯᓯᒪᔪᒍᑦ ᐱᓕᕆᖃᑎᖃᕆᐊᖃᕐᓂᑎᓐᓂ ᐊᐅᓚᑦᑎᓂᐊᖅᑎᓪᓗᑕ ᑲᑐᔾᔨᖃᑎᒌᓐᓂᒃ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᖏᓐᓂ ᐋᖅᑭᐸᓪᓕᐊᓂᐊᕐᖓᑦ ᓄᓇᓕᓐᓄᑦ ᑐᓐᖓᕕᖃᕐᓗᓂ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂ ᐃᓕᖅᑯᓯᖏᓐᓂ, ᒪᓕᒐᖏᓐᓂ, ᑲᒪᓇᓱᐊᕐᓗᑕ. ᐅᑉᐱᕆᓂᐊᕋᑦᑎᒍ ᓄᓇᖃᖅᑳᖅᓯᒪᔪᑦ ᐅᐊᑦᑎᐊᕈᕐᓂᓴᖁᑎᖏᑦ, ᒪᓕᒐᖏᑦ, ᐊᐅᓚᑦᑎᔾᔪᑎᖏᑦ, ᐱᖅᑯᓯᖏᑦ, ᓯᓚᕐᔪᐊᒥᓗ ᑕᑯᓐᓇᖅᑕᐅᓂᖏᑦ, ᖃᐅᔨᒪᓂᐅᔪᓪᓗ ᐊᒻᒪᓗ ᐊᔪᕐᓇᓐᖏᒐᐃᑉᐸᑦ, ᐃᑲᔪᖅᑐᐃᖃᑦᑕᕐᓗᑕ ᑕᒪᒃᑯᐊ ᑭᖑᕚᖏᓐᓅᖅᑕᐅᕙᓪᓕᐊᑎᓪᓗᒋᑦ ᖃᐅᔨᒪᔭᑐᖃᐃᑦ ᐃᓕᓐᓂᐊᑎᑦᑎᔾᔪᑎᒋᖃᑦᑕᕐᓗᑎᒍ ᑲᔪᓰᓐᓇᖁᓪᓗᒋᑦ ᐱᖅᑯᓯᖏᑦ ᐅᖃᐅᓯᖏᓪᓗ.

5. ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᕆᐊᖃᕐᓂᕝᖅ

ᑲᓇᑕᐅᑉ ᒥᕐᖑᐃᖅᓯᕕᖏᑦ ᐱᓕᕆᖃᑕᐅᓕᕐᖓᑕ ᐱᕙᓪᓕᐊᓂᖏᓐᓂ ᓄᑖᕈᖅᑎᑕᐅᔪᓂᒃ, ᑕᑯᓐᓇᖅᑕᐅᔪᓂᒃ ᓇᒦᓐᓂᖏᓐᓂ ᐊᐅᓚᑦᑎᓂᕐᒥᑦ ᐊᑐᐊᖅᓯᓂᕐᒥᓪᓗ ᒪᓕᑦᑎᐊᖁᓪᓗᒋᑦ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᖃᑦᑕᕐᓂᖏᓐᓂ ᓄᓇᓂᑦ, ᐃᒪᕐᒥᑦ ᓯᑯᓂᓪᓗ. ᑕᒪᓐᓇ ᐱᓕᕆᐊᖑᓇᓱᐊᖅᑐᖅ ᓯᕗᕙᕆᐊᒃᑲᓂᕐᓗᒋᑦ ᓴᐃᒻᒪᖃᑎᒌᓐᓂᖅ ᐊᑐᓕᖅᑎᑦᑎᓂᕐᒥᓪᓗ ᑕᒪᑐᒥᖓ ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᒪᔭᖏᓐᓂ ᐊᔾᔨᐅᖏᑦᑐᓂᒃ ᑲᒪᓂᐊᕐᓂᖏᓐᓂ ᐊᔾᔨᐅᖏᑦᑐᓂᑦ ᐱᔪᓐᓇᐅᑎᖏᓐᓂ, ᐱᔪᒪᓂᖏᓐᓂ ᐊᒻᒪᓗ ᖃᓄᐃᑦᑑᓂᖏᓐᓂ ᐊᓪᓚᐃᑦ, ᐊᓪᓚᖓᔪᑦ ᐃᓄᐃᓪᓗ ᑎᒍᒥᐊᕐᓂᖏᓐᓂ. ᑲᓇᑕᐅᑉ ᒥᕐᖑᐃᖅᓯᕕᖏᑦ ᒫᓐᓇ ᑐᑭᓯᐅᒪᒐᑦᑕ ᐱᓕᕆᐊᖑᔪᑦ ᑲᒪᒋᔭᐅᓂᐊᕐᖓᑕ ᓄᓇᖃᖅᑳᖅᓯᒪᔪᓄᑦ ᑭᒡᒐᖅᑐᐃᔨᓄᑦ ᑲᒪᑦᑎᐊᕐᓂᕐᒧᑦ ᐱᓕᕆᐊᖏᓐᓄᑦ, ᐊᑐᓕᖅᑎᑕᐅᓗᑎᑦ ᑕᕝᕘᓇ ᐱᖁᔭᖅᑎᒍᑦ. ᐱᓕᕆᐊᖑᓂᐊᖅᑐᑦ ᒪᓕᑦᑐᑦ ᓄᓇᖃᖅᑳᖅᓯᒪᔪᑦ ᐃᓱᒪᒋᔭᖏᓐᓂ ᐃᑲᔪᖅᑐᐃᔾᔪᑎᖃᕆᐊᖃᕐᓂᖏᓐᓂ ᓄᓇᖃᖅᑳᖅᓯᒪᔪᑦ ᑲᓱᖅᓯᒪᑦᑎᐊᕐᓂᖏᓐᓄᑦ ᓄᓇᒧᑦ, ᐃᒪᕐᒧᑦ ᓯᑯᓄᓪᓗ ᓄᓇᑐᖃᖏᓐᓂ, ᐊᖏᕈᑕᐅᓯᒪᔪᓂᒃ ᓄᓇᓂᑦ, ᓯᕗᓪᓕᒥᓂᖅᑕ ᓄᓇᒥᓂᖏᓐᓂᓪᓗ. ᐱᖃᓯᐅᔾᔨᔪᑦ 7−ᓂᒃ ᑲᓱᖅᓯᒪᔪᓂᒃ ᐊᑐᐊᕈᑎᓂᒃ ᐃᑲᔪᖅᑐᐃᓪᓗᑎᓪᓗ ᖃᓄᖅ ᐱᐅᖅᓱᐊᕆᐊᖃᕐᒪᖔᑕ ᑐᕌᒐᖏᓐᓂ ᐊᓪᓚᐃᑦ, ᐃᓄᐃᑦ ᐊᓪᓚᖓᔪᓪᓗ ᐊᒻᒪᓗ ᑲᓇᑕᐅᑉ ᒥᕐᖑᐃᖅᓯᕕᖏᑕ ᑐᕌᒐᖏᑦ ᑲᔪᓯᑎᑕᐅᔪᓐᓇᖅᑐᑦ ᐱᓕᕆᖃᑎᒌᓪᓗᑎᑦ.

ᐃᑲᔪᖅᑐᐃᑦᑎᐊᕐᓂᐊᕐᓗᓂ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᓂᕐᒨᖓᔪᓂᒃ, ᑲᓇᑕᐅᑉ ᒥᕐᖑᐃᖅᓯᕕᖏᑦ ᓴᖅᑮᒋᐊᖃᕐᖓᑕ ᒪᓕᒐᕐᓂᑦ ᑲᔪᓯᑦᑎᐊᖁᓪᓗᒋᑦ. ᑖᒃᑯᐊ ᒪᓕᒐᐃᑦ ᐊᓯᔾᔨᒋᐊᖃᕐᖓᑕ ᒪᓕᓪᓗᑎᑦ ᐱᖅᑯᓯᖏᓐᓂ ᑲᓇᑕᐅᑉ ᒥᕐᖑᐃᖅᓯᕕᖏᑦ, ᐊᒻᒪᓗ ᐊᖏᓂᖅᓴᐅᓗᑎᑦ ᑐᑭᓯᐅᒪᓂᖏᑦ ᐅᔾᔨᕈᓱᓐᓂᖏᓪᓗ ᑎᒍᒥᐊᖅᑕᖏᓐᓂ ᑲᒪᒋᔭᕆᐊᓕᖏᓐᓂᓪᓗ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᖏᓐᓂ, ᑕᒪᒃᑮᒃ ᐊᓪᓚᕕᐅᑉ ᐃᓗᐊᓂ, ᐳᓚᕋᖅᐸᑦᑐᓄᓪᓗ. ᑕᒪᒃᑯᐊ ᐱᖓᓱᑦ ᐊᑐᕆᐊᓖᑦ ᐅᖃᐅᓯᖃᖅᑐᑦ ᑐᓐᖓᕕᒋᓂᐊᖅᑕᖏᓐᓂ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕐᓂᖏᓐᓂ ᐊᒻᒪᓗ ᑲᔪᑦᑎᐊᖏᓐᓇᕐᓂᐊᕋᓗᐊᕐᒪᖔᕐᓗ ᐊᑐᓕᖅᑎᑕᐅᓂᖏᑦ ᐊᓯᔾᔨᖅᑐᓕᒫᑦ ᐃᓗᐃᑦᑑᓂᖓᓐᓄᑦ:

ᐃᓕᓴᕆᔭᐅᓂᖏᑦ, ᒪᒥᐊᓃᑦ ᑲᒪᒋᔭᐅᒃᑲᓐᓂᖏᓪᓗ - ᐱᖃᓯᐅᔾᔨᔪᑦ ᐱᓕᕆᓂᐊᕐᓂᖏᓐᓂ ᐱᕙᓪᓕᐊᓗᑎᒃ ᐅᓂᒃᑳᕈᓐᓇᕐᓗᑎᑦ ᓈᓚᑦᑎᑦᑎᔪᓐᓇᕐᓗᑎᑦ ᓱᓕᔪᓂᒃ ᐅᐊᑦᑎᐊᕈᕐᓂᓴᕐᓂᑦ ᑲᒪᒋᔭᐅᑦᑎᐊᖅᓯᒪᓐᖏᑐᖅᐹᓗᓐᓂᑦ ᐱᓕᕆᖃᑎᒌᓪᓗᑎᑦ ᑕᒪᒃᑯᓂᖓ ᑲᓇᓇᓱᐊᕐᓗᑎᑦ, ᐃᑲᔪᖅᑐᐃᓯᓐᓈᕐᓗᑎᑦ ᓄᓇᖃᖅᑳᖅᓯᒪᔪᓂᒃ ᐱᓕᕆᖃᑎᖏᓐᓂ ᐅᓂᒃᑳᖅᑎᓪᓗᒋᑦ ᐅᐊᑦᑎᐊᕈᕐᓂᓴᕐᓂᓪᓗ ᓂᓪᓕᐊᔾᔪᑕᐅᖃᑦᑕᖅᓯᒪᓐᖏᑦᑐᓂᒃ ᓂᓪᓕᐊᖁᔭᐅᓯᒪᓐᖏᑦᑐᓂᓪᓗ ᐱᔮᖅᑯᒥᑦ.

ᐱᓕᕆᖃᑎᒌᑦᑎᐊᕐᓂᖅ - ᐃᓚᖃᕐᓗᑎᑦ ᐱᓕᕆᖃᑎᖃᐃᓐᓇᕐᓗᑎᑦ ᐊᑯᓂᒧᑦ ᓄᓇᖃᖅᑳᖅᓯᒪᔪᓂᒃ ᐊᓯᔾᔨᐸᓪᓕᐊᔪᓂᑦ ᐱᕈᖅᐸᓪᓕᐊᔪᓂᓪᓗ ᒪᓕᒐᖅᑎᒍᑦ ᑕᐃᒪᐃᓪᓗᐊᖅᑎᑕᐅᓂᖏᓐᓂᓪᓗ ᐱᓕᕆᖃᑎᖃᑐᐃᓐᓇᖏᓪᓗᑎᑦ ᑭᓯᐊᓂᓗ ᓴᓐᖏᓂᖅᓴᖅᑕᖃᓐᖏᓪᓗᓂ ᐊᓯᐊᓂ.

ᐃᓕᑉᐸᓪᓕᐊᓂᖅ ᑐᑭᓯᕙᓪᓕᐊᓂᕐᓗ - ᐱᖃᓯᐅᔾᔨᓗᑎᑦ ᐊᔅᓱᕉᑎᖏᓐᓂ ᑲᓇᑕᐅᑉ ᒥᕐᖑᐃᖅᓯᕐᕕᖓᓐᓂ ᐱᓕᕆᓂᐊᖅᑎᓪᓗᒋᑦ ᐱᐅᓯᕚᓪᓕᑎᑦᑎᓂᖏᓐᓂᓪᓗ ᐱᖅᑯᓯᕐᓂᑦ ᐱᓕᕆᔨᓂᒃ, ᐊᒻᒪᓗ ᐱᓕᕆᖃᑎᖃᑦᑎᐊᕐᓗᑎᑦ ᓄᓇᖃᖅᑳᖅᓯᒪᔪᓂᒃ ᑐᑭᓯᐅᒪᑦᑎᐊᒃᑲᓐᓂᖁᓪᓗᒋᑦ ᐱᓕᕆᔩᑦ ᐳᓚᕋᖅᑏᓪᓗ ᐅᐊᑦᑎᐊᕈᕐᓂᓴᕐᓂᑦ ᐅᓪᓗᒥᓕᓴᕐᓂᓪᓗ ᐱᓕᕆᖃᑎᒌᑦᑐᓂᒃ ᓄᓇᖃᖅᑳᖅᓯᒪᔪᓂᒃ ᓄᓇᖃᖅᑳᖅᓯᒪᓐᖏᑦᑐᓂᓪᓗ, ᒪᑯᓂᖓᓗ ᐊᔾᔨᐅᖏᑦᑐᓂᒃ ᐱᓕᕆᖃᑎᖃᖃᑦᑕᕐᓂᖏᓐᓂ ᐊᓪᓚᓂᑦ, ᐊᓪᓚᖓᔪᓂᑦ ᐃᓄᓐᓂᓪᓗ ᑕᒪᑐᒧᖓ ᓄᓇᖓᓐᓂ, ᐃᒪᖓᓐᓂ ᓯᑯᖓᓐᓂᓪᓗ.

ᑐᓐᖓᕕᓐᓂᑦ ᐱᓗᑎᑦ ᑕᕝᕙᓐᖓᑦ, ᑲᓇᑕᐅᑉ ᒥᕐᖑᐃᖅᓯᕕᖏᑦ ᐃᑲᔪᖅᑐᐃᓗᑎᑦ ᓄᓇᖃᖅᑳᖅᓯᒪᔪᓂᒃ ᐱᓕᕆᖃᑎᖏᓐᓂ ᑲᒪᑦᑎᐊᕐᓂᕐᒨᖓᔪᓂᒃ.

ᐅᑯᐊ ᐃᓚᖏᑦ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᕐᒧᑦ ᐱᓕᕆᐊᔅᓴᖏᑦ ᐃᒪᐃᑦᑑᓪᓗᑎᑦ:

ᐊᐅᓚᑦᑎᔾᔪᑎᓂᒃ ᑲᑐᔾᔨᓂᖏᑦ - ᐅᖃᐅᓯᓖᑦ ᑎᒍᒥᐊᖅᑕᖏᑦᑕ ᓄᓇᖃᖅᑳᖅᓯᒪᔪᑦ ᐃᓱᒪᓕᐅᕐᓂᕐᒥᑦ. ᐊᐅᓚᑦᑎᔾᔪᑎᓂᒃ ᑲᑐᔾᔨᓂᖅ ᒪᑯᓂᖓ ᒫᓐᓇᓕᓴᕐᓂᑦ ᐃᓕᖅᑯᓯᐅᔪᓂᒃ ᐱᓕᕆᖃᑎᖃᕐᓂᕐᒥᑦ ᐋᖅᑭᔅᓱᐃᖃᑦᑕᕐᓗᑎᑦ ᒪᓕᓪᓗᑎᑦ ᓄᓇᐃᑦ ᒪᓕᒐᖏᓐᓂ, ᓄᓇᖃᖅᑳᖅᓯᒪᔪᑦ ᒪᓕᒐᖅᑎᒍᑦ ᑎᓕᓯᔾᔪᑎᓂᑦ, ᐱᔪᓐᓇᐅᑎᖏᓐᓂ ᑲᒪᒋᔭᕆᐊᓕᖏᓐᓂᓪᓗ ᓄᓇᓂᑦ, ᐃᒪᕐᒥᑦ ᓯᑯᓂᓪᓗ ᓄᓇᖃᖅᑳᖅᓯᒪᔪᑦ ᑲᒪᒋᓯᒪᔭᑐᖄᓗᖏᓐᓂ ᐅᑭᐅᒐᓵᓗᓐᓄᑦ ᒥᓕᐊᖏᓃᑦᑐᓄᑦ.

ᐱᖅᑯᓯᖏᑦ ᑲᔪᓰᓐᓇᕆᐊᓖᑦ - ᐅᖃᐅᓯᓖᑦ ᓄᓇᖃᖅᑳᖅᓯᒪᔪᑦ ᖃᓄᖅ ᑲᒪᖃᑦᑕᕐᓂᖏᓐᓂ ᐆᒻᒪᑎᑦᑎᑲᓐᓂᕋᓱᐊᕐᓂᖏᓐᓂ ᐱᓕᕆᖃᑎᖃᕐᓗᑎᑦ ᐊᑦᑐᐊᓂᖃᖅᑐᑎᓪᓗ ᐱᖅᑯᓯᑐᖃᕐᒥᓂᒃ ᓄᓇᑐᖃᕐᓂᑦ, ᐊᖏᕈᑕᐅᓯᒪᔪᓂᒃ ᓄᓇᓂᑦ ᓯᕗᓕᒥᓂᖅᑕ ᓄᓇᑐᖃᒥᓂᖏᓐᓂᓪᓗ, ᒪᓕᒐᖅᑎᒍᑦ, ᐅᖃᐅᓯᒃᑯᑦ, ᐱᖅᑯᓯᒃᑯᑦ ᑲᒪᑦᑎᐊᕐᓂᑯᓪᓗ ᐊᐅᓚᑦᑏᓐᓇᖃᑦᑕᖅᓯᒪᔪᑦ ᓂᓪᓕᐊᔾᔪᑎᖃᑦᑕᖅᑐᑎᓪᓗ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂ ᑲᒪᒋᔭᕆᐊᓕᖏᓐᓂᓪᓗ.

• ᐊᑐᖃᑦᑕᖅᑕᖏᑦ ᑲᔪᓯᑐᐃᓐᓇᕐᓗᖅ ᓄᓇᓂᑦ ᒪᑯᖓᓗ ᖁᕕᐊᓲᑎᖃᖅᐸᑦᑐᑦ; ᐅᖃᐅᓯᕐᒥᓂᒃ ᑲᑐᔾᔨᓲᑦ; ᓄᓇᓂᑦ ᐃᓕᓐᓂᐊᐸᓪᓕᐊᓂᖅ ᖃᐅᔨᒪᔭᑐᖃᒥᓂᑦ ᐅᓂᒃᑳᖃᑦᑕᕐᓂᖏᑦ ᐃᓐᓇᐃᑦ, ᐃᓅᓲᑦᑐᑦ, ᖃᐅᔨᒪᔪᑐᖃᐅᔪᓪᓗ, ᓄᓇᖅᑲᑎᖏᓪᓗ, ᓂᕿᔅᓴᖅᓯᐅᖅᑏᓪᓗ, ᐋᓐᓂᐊᓲᑎᔅᓴᓂᒃ ᓄᐊᑦᑎᓲᑦ ᐊᓯᖏᓐᓂᓪᓗ ᐱᔾᔪᑎᖃᖅᑐᓂᒃ.

ᒪᑭᒪᔾᔪᑎᔅᓴᓂᑦ ᒪᓂᒪᔾᔪᑎᖃᕐᓂᖅ - ᐱᔾᔪᑎᖃᓗᐊᖅᑐᑦ ᐊᒥᓱᓂᑦ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ ᐊᐅᓚᑦᑎᓂᖏᓐᓂ ᑕᖏᓕᓐᓂ ᐃᑲᔫᑎᖃᕐᓗᑎᑦ ᐃᓄᓕᕆᓂᕐᒧᑦ ᒪᑭᒪᔾᔪᑎᔅᓴᑦᑎᐊᓄᓪᓗ ᓄᓇᖃᖅᑳᖅᓯᒪᔪᓄᑦ. ᓄᓇᖃᖅᑳᖅᓯᒪᔪᑦ ᐃᓅᓇᓱᐊᕐᓂᖏᑦ ᒪᑭᒪᓇᓱᐊᕐᓂᖏᑦ ᐊᕙᓂᑐᖄᓗᒃ ᓄᓇᑐᖃᒥᓂᕐᓂᑦ ᑲᓇᑕᐅᑉ ᒥᕐᖑᐃᖅᓯᕕᖏᓐᓃᑦᑐᓂᒃ ᐊᐅᓚᑕᐅᒋᐊᖃᕐᖓᑕ ᐊᓪᓚᕕᒻᒥ, ᐋᖅᑭᒋᐊᖅᑕᐅᑦᑎᐊᕐᓗᑎᑦ ᒪᑭᒪᔾᔪᑎᔅᓴᑦᑎᐊᕙᐅᓂᖅᓴᐅᓗᑎᓪᓗ ᐱᒻᒪᕆᐅᒻᒪᑕ ᐃᓕᓴᕆᔭᐅᒋᐊᓖᑦ ᐱᓕᕆᖃᑎᖃᖃᑦᑕᕐᓂᖏᓐᓂ ᐱᖅᑯᓯᕐᒥᑎᒍᑦ ᓄᓇᓂᑦ, ᒪᓕᒐᖃᖅᑐᓂᒃ ᓄᓇᒧᑦ ᐊᒻᒪᓗ ᓯᕗᓪᓕᒥᓂᖅᑕ ᓄᓇᑐᖃᒥᓂᖏᓐᓂ ᐊᒻᒪᓗ ᑎᒍᒥᐊᖅᑎᐊᕆᐊᖃᕐᓂᖏᓐᓂ ᓄᓇᖃᖅᑳᖅᓯᒪᔪᑦ ᐱᔪᓐᓇᑎᖏᓐᓂ ᑲᒪᒋᔭᕆᐊᓕᖏᓐᓂᓪᓗ.

ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦᑕ ᐃᓕᖅᑯᓯᖏᑦ - ᐱᖃᓯᐅᔾᔨᔪᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᑐᖃᖏᓐᓂ ᖃᐅᔨᒪᓂᖏᑦᑕ ᐃᓕᖅᑯᓯᖏᓐᓂ. ᑲᒪᑦᑎᐊᖏᓐᓇᕐᓂᖏᓐᓂ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂ ᐊᒻᒪᓗ ᖃᐅᔨᒪᔭᑐᖃᖏᑦᑕ ᐃᓕᖅᑯᓯᖏᓐᓂ ᒪᓕᑦᑐᑦ ᐱᖅᑯᓰᑦ ᑲᔪᓯᑎᑕᐅᓂᖏᓐᓂ ᖃᓄᐃᓐᖏᑦᑎᐊᕆᐊᖃᓂᕐᖏᓐᓂ ᓄᓇᐃᑦ, ᐃᒪᐃᑦ ᓯᑯᐃᓪᓗ.

ᑖᓐᓇ ᐱᖁᔭᖅ ᐃᓕᓴᖅᓯᓯᒪᔪᖅ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕐᓂᕐᒨᖓᒌᖅᑐᓂᒃ ᐊᔾᔨᒌᓐᖏᑦᑐᓂᑦ ᐱᑕᓕᒃ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ. ᐃᓕᓴᖅᓯᓯᒪᔪᖅ ᐊᑐᓕᖅᑎᑕᐅᒋᐊᖃᕐᓂᖓᓐᓂ ᐱᖁᔭᑦ ᐋᖅᑭᓱᖅᓯᒪᑦᑎᐊᕐᓗᒍ ᐊᔾᔨᐅᖏᑦᑐᓄᑦ ᓄᓇᓄᑦ ᐱᓕᕆᖃᑕᐅᔪᓄᓪᓗ.

6. ᐊᑐᕆᐊᖃᕐᓂᖏᑦ ᐊᒻᒪᓗ ᓂᕆᐅᒋᔭᐃᑦ ᖃᓄᐃᓐᓂᐊᕐᓂᖏᓐᓂ

6.1. ᑖᓐᓇ ᐱᖁᔭᖅ ᐅᑯᓄᖓ ᒪᓕᑦᑕᐅᒋᐊᓕᒃ:

6.1.1. ᓇᒥᓕᒫᖅᑐᑦ ᓄᓇᐃᑦ ᑲᓇᑕᐅᑉ ᒥᕐᖑᐃᖅᓯᕐᕕᖓᓐᓂ ᐊᐅᓚᑦᑎᒋᐊᓖᑦ ᐸᐃᑉᐹᖅᑎᒍᑦ.

6.1.2. ᑲᓇᑕᒥ ᒥᕐᖑᐃᖅᓯᕐᕕᓕᒫᑦ ᐊᓪᓚᕕᖏᑦ ᑐᑦᑕᕐᕖᑦ ^{Footnote 4}.

6.2. ᑐᕌᒐᖏᑦ ᐱᖁᔭᐅᑉ ᑖᓐᓇ ᑎᓕᓯᔾᔪᑎᖃᕐᓗᑎᑦ ᐊᑐᓕᖅᑎᑕᐅᒋᐊᓕᓐᓂᑦ ᓄᓇᖃᖅᑳᖅᓯᒪᔪᓄᑦ ᐱᓕᕆᐊᖏᓐᓂ ᓴᖅᑮᓗᑎᓪᓗ ᒪᓕᒐᕐᓂᑦ ᐃᑲᔪᖅᑐᐃᒐᔭᖅᑐᓂᒃ ᐱᖅᑯᓯᕐᒥᓂᒃ ᑲᔪᓯᑎᑦᑏᓐᓇᕐᓗᑎᑦ ᓄᓇᖃᖅᑳᖅᓯᒪᔪᑦ ᒪᓕᑦᑐᑎᑦ ᐅᑉᐱᕆᔭᖏᓐᓂ ᐊᒻᒪᓗ ᐊᑐᐊᒐᖏᓐᓂ ᐅᖃᖅᓯᒪᔪᓂᒃ ᖁᓛᓂ.

6.3. ᑖᓇ ᐱᖁᔭᖅ ᐱᔾᔪᑎᖃᖅᑐᖅ ᒪᓕᑦᑐᓂ ᐱᐅᓯᕚᓪᓕᑎᑦᑎᑲᓐᓂᕋᓱᐊᖅᑐᓂᓗ ᐊᖏᕈᑕᐅᒌᖅᓯᒪᔪᓂᒃ ᐊᑐᐊᖅᓯᔾᔪᑎᔅᓴᓂᒃ ᓯᕗᓂᑦᑎᓐᓂ, ᐊᖏᕈᑎᓂᒃ, ᑐᑭᓯᐅᒪᓂᕐᒥᓪᓗ.

6.4. ᓂᕆᐅᒋᔭᑦ ᐱᔭᕇᖅᓯᒪᓕᖅᑎᓪᓗᒋᑦ ᐱᖁᔭᐃᑦ ᐃᒫᒃ:

6.4.1. ᑲᒪᔨᐅᖃᑕᐅᔪᑦ ᑲᓇᑕᐅᑉ ᒥᕐᖑᐃᖅᓯᕐᕕᖓᓐᓂ ᑭᒡᒐᖅᑐᐃᔩᓪᓗ ᓇᓗᓇᐃᖅᑕᐅᓗᑎᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ ᐱᓕᕆᖃᑎᒌᓕᕐᓗᑎᑦ, ᐆᑦᑐᖅᑕᐅᔪᓐᓇᕐᓗᑎᑦ ᑲᒪᑦᑎᐊᕋᓗᐊᕐᒪᖔᑕᓗ ᐸᕐᓇᐅᑎᓕᕐᓗᑎᑦ ᐊᑐᓂ ᓄᓇᓂᑦ.

6.4.2. ᐱᓕᕆᓂᖏᓐᓂ ᑲᒪᓂᖏᓐᓂᓪᓗ ᐱᓕᕆᖃᑎᒌᑦᑐᑦ ᑲᒪᑦᑎᐊᕆᐊᖃᕐᓂᕐᒧᑦ ᐸᕐᓇᐅᑏᑦ ᓇᓗᓇᐃᔭᖅᑕᐅᒐᔭᖅᑐᑦ ᓄᓇᓕᓐᓂ ᓄᓇᖃᖅᑳᖅᓯᒪᔪᓂᒃ ᐱᖃᑕᐅᕙᑦᑐᓂᒃ.

6.4.3. ᐊᑐᓕᖅᑎᑦᑎᒍᒫᖅᑐᑦ ᓄᓇᖃᖅᑳᖅᓯᒪᔪᓄᑦ ᑲᒪᑦᑎᐊᕐᓂᕐᒧᑦ ᐱᓕᕆᐊᔅᓴᓂᒃ ᓯᕗᓪᓕᖅᐸᐅᑎᒋᐊᓖᓪᓗ ᐊᑐᓂ ᑲᒪᑦᑎᐊᕐᓂᕐᒧᑦ ᐸᕐᓇᐅᑎᓂᒃ ᓇᓗᓇᐃᔭᖅᑕᒐᔭᖅᑐᑦ ᓄᓇᖃᖅᑳᖅᓯᒪᔪᓄᑦ ᐱᓕᕆᖃᑕᐅᔪᓄᑦ ᐊᒻᒪᓗ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ. ᐃᓱᒪᖅᓴᖅᓯᐅᕋᔭᖅᑐᑦ ᐊᑦᑐᐊᓂᖃᕐᓂᖏᓐᓂ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᓂᕐᒨᖓᔪᓂᒃ (ᐃᓕᓐᓂᐊᕐᓂᖅ ᑐᑭᓯᓂᕐᓗ, ᐃᓕᓴᖅᓯᓂᖅ, ᒪᒥᐊᓐᓂᖅ ᑲᒪᒃᑲᓐᓂᕆᐊᖃᕐᓂᖏᓐᓂᓪᓗ, ᐱᓕᕆᖃᑎᖃᕐᓂᖅ, ᒪᑭᒪᔾᔪᑎᔅᓴᓂᑦ ᒪᓂᒪᔾᔪᑎᖃᕐᓃᑦ, ᐱᖅᑯᓯᖏᓐᓂ ᑲᔪᓯᑎᑦᑎᓂᕐᒥᑦ, ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦ ᐃᓕᖅᑯᓯᖏᑦ, ᑲᑐᔾᔨᓂᖅ ᐊᐅᓚᑦᑎᔾᔪᑎᓂᒃ) ᐊᒻᒪᓗ ᐊᓯᖏᓐᓂ ᐊᑦᑐᐊᔪᓂᒃ ᓯᕗᓪᓕᖅᐸᐅᑎᒋᐊᓕᓐᓂᑦ ᓇᓗᓇᐃᔭᖅᑕᐅᓯᒪᔪᓂᒃ ᐱᓕᕆᖃᑕᐅᔪᓂᒃ (ᓲᕐᓗ ᓄᓇᖃᖅᑳᖅᓯᒪᔪᓂᒃ ᐸᖅᑭᑦᑎᓂᕐᒥᑦ ᐊᒻᒪᓗ ᐱᐅᖅᓱᐊᖅᑕᐅᔪᓂᒃ ᓄᓇᓂᑦ, ᐊᓯᖏᓐᓂᓪᓗ).

6.4.4. ᑲᒪᑦᑎᐊᕆᐊᖃᕐᓂᕐᒧᑦ ᐸᕐᓇᐅᑏᑦ ᐃᓱᒪᖃᕋᔭᖅᑐᑦ ᒪᓕᓪᓗᑎᓪᓗ ᐱᑕᖃᕇᖅᑐᓂᒃ ᓄᓇᓕᓐᓂ ᓯᕗᓪᓕᖅᐸᐅᑎᒋᐊᓕᓐᓂᑦ ᐸᕐᓇᐅᑎᓂᓪᓘᓐᓃᑦ.

6.4.5. ᓄᓇᓂᑦ ᑲᓇᑕᐅᑉ ᒥᕐᖑᐃᖅᓯᕐᕕᖏᑦ ᐱᓕᕆᖃᑎᖃᖃᑦᑕᖅᑐᑦ ᐊᒥᓱᓂᑦ ᓄᓇᖃᖅᑳᖅᓯᒪᔪᓂᒃ, ᒥᕐᖑᐃᖅᓯᕐᕕᒃ ᑲᓇᑕᒥ ᐱᓕᕆᖃᑎᖃᒃᑲᓐᓂᕋᓱᐊᕋᔭᕐᒥᔪᖅ ᐊᓯᖏᓐᓂ ᒪᕐᕉᓕᖅᑲᖓᔫᓐᓂᒃ ᐸᕐᓇᐅᑎᓕᐅᕐᓗᑎᑦ ᐅᕝᕙᓘᓐᓃᑦ ᑲᒪᑦᑎᐊᕐᓂᕐᒧᑦ ᐸᕐᓇᐅᑎᓕᐅᕐᓗᑎᑦ ᐱᖃᓯᐅᔾᔨᓗᑎᑦ ᐊᒥᓱᓂᒃ ᓄᓇᖃᖅᑲᖅᓯᒪᔪᓂᒃ ᐱᓕᕆᖃᑎᒋᓂᐊᖅᑕᒥᓂᒃ.

6.4.6. ᑲᓇᑕᒥ ᐊᓪᓚᕕᖓᓐᓂ ᐸᕐᓇᐅᑎᓕᐅᕋᔭᖅᑐᑦ ᓇᓗᓇᐃᔭᕐᓗᒋᑦ ᐊᑐᓕᕆᐊᓖᑦ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᕐᒧᑦ ᐱᓕᕆᐊᔅᓴᓂᒃ ᐱᓕᕆᖃᑎᖃᕐᓗᑎᑦ ᕿᒥᕐᕈᓗᒋᓪᓗ ᓄᓇᖃᖅᑳᖅᓯᒪᔪᓕᕆᓂᕐᒥᑦ ᐊᓪᓚᕕᖓᓐᓂ ᐊᒻᒪᓗ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᖅᑐᓕᕆᔩᑦ.

6.4.7. ᐸᕐᓇᐅᑎᓕᒫᑦ ᐱᖁᔭᐃᓪᓗ ᐃᓚᓕᐅᔾᔨᓯᒪᔪᑦ ᐱᓕᕆᐊᓂᑦ ᐊᒻᒪᓗ ᒪᓕᑦᑐᑦ ᖃᖓᒃᑯᑦ ᕿᒥᕐᕈᔭᐅᓚᐅᖃᑦᑕᕆᐊᖃᕐᓂᖏᓐᓂ ᑕᒪᒃᑯᐊ.

6.5. ᐊᕐᕌᒍᑕᒫᑦ ᐅᓂᒃᑳᓕᐅᕆᐊᓕᑦ ᑲᒪᑦᑎᐊᕐᓂᕐᒧᑦ ᐸᕐᓇᐅᑎᓂᒃ ᐊᑦᑐᐊᓪᓗᑎᑦ ᓄᓇᖃᖅᑳᖅᓯᒪᔪᓂᒃ ᐱᓕᕆᖃᑕᐅᔪᓂᒃ ᑕᐃᑲᓂ ᓯᓚᕐᔪᐊᑉ ᑲᑐᔾᔨᔨᖏᓐᓂ ᓇᓗᓇᐃᖅᓯᓯᒪᔪᓂᑦ ᓄᓇᖃᖅᑳᖅᓯᒪᔪᓄᑦ ᐱᖁᔭᕐᓂᑦ ᐊᒻᒪᓗ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ ᐅᓂᒃᑳᓕᐅᖃᑦᑕᕆᐊᖃᕐᓂᖏᓐᓂ, ᑕᐃᒫᒃ ᒪᓕᒐᕐᓃᒻᒪᑦ.

6.6. ᐅᓂᒃᑳᓕᐅᕆᐊᓕᒃ ᐆᑦᑑᑕᐅᔪᓂᒃ ᓄᓇᖃᖅᑳᖅᓯᒪᔪᓄᑦ ᓄᓇᓕᓐᓄᑦ ᐋᖅᑭᔅᓱᐃᖃᑎᖃᕐᓗᑎᑦ ᓇᓗᓇᐃᖅᑕᐅᓗᑎᓪᓗ ᓄᓇᖃᖅᑳᖅᓯᒪᔪᓄᑦ ᐱᓕᕆᖃᑕᓐᓄᑦ.

7. ᐱᔪᓐᓇᖅᑎᑕᐅᓂᖏᑦ

7.1. ᑖᓐᓇ ᐱᖁᔭᖅ ᓇᓗᓇᐃᖅᓯᓯᒪᔪᖅ ᒪᓕᒐᕐᒥᑦ 5 ^{Footnote 5} ᓯᓚᕐᔪᐊᑉ ᑲᑐᔾᔨᔨᖏᓐᓂ ᓇᓗᓇᐃᖅᓯᓯᒪᔪᓂᑦ ᓄᓇᖃᖅᑳᖅᓯᒪᔪᓄᑦ ᐱᖁᔭᕐᓂᑦᐊᒻᒪᓗ ᓴᓐᖏᓂᖅᓴᐅᒐᔭᖅᑐᖅ ᐊᓯᖏᓐᓂ ᐱᖁᔭᐅᒌᖅᑐᓂᒃ, ᐊᑐᐊᒐᕐᓂᑦ ᐊᒻᒪᓗ ᑎᓕᓯᔾᔪᑎᓂᒃ ᒪᓕᓐᖏᑐᐃᓐᓇᕆᐊᓕᓐᓂᑦ ᐱᖁᔭᕐᓂᑦ ᐊᓯᖏᓐᓂ.

7.2. ᑖᓐᓇ ᐱᖁᔭᖅ ᓇᓗᓇᐃᖅᓯᔪᖅ ᑎᒍᒥᐊᕐᓂᖏᓐᓂ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᕐᒧᑦ ᑲᒪᔩᑦ ᐊᑐᐊᕈᑎᒋᓪᓗᓂᒋᑦ ᑲᓇᑕᐅᑉ ᒥᕐᖑᐃᖅᓯᕐᕕᖓᓐᓂ ᐊᑐᓕᖅᑎᑕᐅᒋᐊᖃᕐᓂᖏᓐᓂ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᕐᒧᑦ ᐊᒻᒪᓗ ᐱᖁᔭᖏᓐᓂ.

7.3. ᑖᓐᓇ ᐱᖁᔭᖅ ᒪᓕᑦᑕᐅᒋᐊᓕᒃ ᑲᓇᑕᐅᑉ ᒥᕐᖑᐃᖅᓯᕐᕕᖓᓐᓂ ᐱᕆᓕᓂᓄᑦ ᐊᒻᒪᓗ ᐊᓯᐊᓄᑦ ᐊᐅᓪᓛᖅᑕᐅᒋᐊᖃᓂᖏᑦᑐᑦ ᑲᒪᒋᔭᖏᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓄᑦ, ᖓᕙᒪᒃᑯᓐᓄᑦ ᑲᑐᔾᔨᖃᑎᒋᓄᓪᓘᓐᓃᑦ.

7.4. ᑖᓐᓇ ᐱᖁᔭᖅ ᐅᖃᓕᒫᖅᑕᐅᑦᑎᐊᕆᐊᓕᒃ ᐊᑐᖅᑕᐅᓗᓂᓗ ᐊᓯᖏᓪᓗ ᒪᓕᒐᐃᑦ, ᐊᑐᐊᒐᐃᑦ, ᐱᖁᔭᐃᓪᓗ ᐊᖏᕈᑕᐅᓯᒪᔪᓪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᓯᖏᓐᓄᓪᓗ ᒐᕙᒪᑐᖃᒃᑯᓐᓄᑦ, ᒪᑯᐊᓗ ᐅᓪᓗᒥᓕᓴᐃᑦ ᐅᐊᑦᑎᐊᕈᕐᓂᓴᐃᓪᓗ ᐊᖏᕈᑏᑦ ᐊᓯᖏᓪᓗ ᓴᓇᔭᐅᓯᒪᔪᑦ ᐊᖏᕈᑏᑦ.

7.5. ᑖᓐᓇ ᐱᖁᔭᖅ ᐅᖃᓕᒫᖅᑕᐅᑦᑎᐊᕆᐊᓕᒃ ᐊᒻᒪᓗ ᓯᓚᕐᔪᐊᑉ ᑲᑐᔾᔨᔨᖏᓐᓂ ᓇᓗᓇᐃᖅᓯᓯᒪᔪᓂᑦ ᓄᓇᖃᖅᑳᖅᓯᒪᔪᓄᑦ ᐱᖁᔭᕐᓂᑦ, ᐃᓄᐃᑦ ᓄᓇᖓᑦ ᐱᖁᔭᖓ, ᐊᒻᒪᓗ ᐱᓕᕆᖃᑎᖃᕐᓂᕐᒥᑦ ᐅᓪᓗᒥᓕᓴᕐᓂᑦ ᐊᖏᕈᑎᓂᒃ ᐊᑐᓕᖅᑎᑕᐅᓯᒪᔪᓂᒃ ᐱᖁᔭᕐᓂᑦ.

7.6. ᑖᓐᓇ ᐱᖁᔭᖅ ᒪᓕᑦᑕᐅᑦᑎᐊᕆᐊᓕᒃ ᓄᓇᖃᖅᑳᖅᓯᒪᔪᑦ ᓴᓐᖏᓂᖏᓐᓂ ᐊᑐᓕᖅᑎᑕᐅᓯᒪᔪᓂᒃ.

8. ᑎᒍᒥᐊᖅᑕᖏᑦ ᐱᓕᕆᐊᔅᓴᖏᓪᓗ

ᑲᓇᑕᐅᑉ ᒥᕐᖑᐃᖅᓯᕐᕕᖏᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᐱᓕᕆᖃᑕᐅᔪᑦ ᐊᑐᓂ ᑎᒍᒥᐊᕐᖓᑕ ᐱᔭᔅᓴᖃᖅᑐᑎᓪᓗ ᐊᑐᓕᖅᑎᑕᐅᓂᖓᓐᓂ ᑖᓐᓇ ᐱᖁᔭᖅ. ᓄᓇᖃᖅᑳᖅᓯᒪᔪᑦ ᐱᓕᕆᖃᑕᐅᔪᑦ ᓇᒻᒥᓂᖅ ᓇᓗᓇᐃᖅᓯᓂᐊᖅᑐᑦ ᑎᒍᒥᐊᖅᑕᖏᓐᓂ ᑲᒪᒋᔭᕆᐊᓕᖏᓐᓂᓪᓗ ᑖᓐᓇ ᐅᖃᐅᓯᓕᒃ ᑲᓇᑕᐅᑉ ᒥᕐᖑᐃᖅᓯᖅᕕᖓᑦᑕ ᑲᒪᒋᓂᐊᖅᑕᖏᓐᓂ.

8.1. ᒥᓂᔅᑕ ᑲᒪᔪᖅ ᑲᓇᑕᐅᑉ ᒥᕐᖑᐃᖅᓯᕐᕕᖓᓐᓂ ᐃᒪᐃᑦᑐᓂᑦ ᑲᒪᒋᔭᖃᖅᑐᖅ:

8.1.1 ᒪᓕᓪᓗᑎᑦ ᑐᕌᒐᕐᓂᑦ ᑖᒃᑯᓂᖓ ᐱᖁᔭᓐᓃᑦᑐᓂᒃ, ᐃᑲᔪᖅᑐᐃᓗᑎᓪᓗ ᐱᒋᐊᕈᑕᐅᓯᒪᔪᓂᒃ ᐊᑐᖅᑕᓂᑦ ᑲᓇᑕᐅᑉ ᒥᕐᖑᐃᖅᓯᕕᖓᓐᓂ ᐊᑐᓕᖅᑎᑕᐅᒋᐊᓕᓐᓂᒃ ᓯᓚᕐᔪᐊᑉ ᑲᑐᔾᔨᔨᖏᓐᓂ ᓇᓗᓇᐃᖅᓯᓯᒪᔪᓂᑦ ᓄᓇᖃᖅᑳᖅᓯᒪᔪᓄᑦ ᐱᖁᔭᕐᓂᑦ ᐊᒻᒪᓗ ᐃᓕᓴᕆᐅᖏᓐᓇᕐᓗᑎᑦ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕐᓂᕐᒧᑦ ᑎᒍᒥᐊᕐᓂᖏᓐᓂ ᑲᒪᒋᐊᖃᕐᓂᖏᓐᓂᓪᓗ ᒐᕙᒪᒃᑯᑦ ᐃᓗᐊᓂ.

8.1.2. ᓈᒻᒪᒋᔭᐅᓗᓂ ᐱᖁᔭᖅ, ᑲᑎᒪᑎᑦᑎᓗᑎᑦ ᐱᓕᕆᖃᑎᖃᕐᓗᑎᓪᓗ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᖅᑐᓕᕆᔨᒃᑯᓐᓂ.

8.2. ᐊᖏᔪᖅᑳᖅ ᐊᒻᒪᓗ ᐃᖅᑲᓇᐃᔭᖅᑎᓄ ᓯᕗᓕᖅᑎ, ᑲᑎᒪᖃᑎᖃᕐᓗᑎᑦ ᐱᓕᕆᖃᑎᖃᕐᓗᑎᓪᓗ ᓄᓇᖃᖅᑲᖅᓯᒪᔪᓂᑦ ᑲᒪᑦᑎᐊᖅᑐᓕᕆᔨᒃᑯᓐᓂ, ᑐᕌᒐᖏᑦ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕐᓂᕐᒧᑦ ᐱᖁᔭᐃᑦ ᒪᓕᑦᑕᐅᑦᑎᐊᕋᓗᐊᕐᒪᖓᑕ. 8.3. ᓄᓇᖃᖅᑲᖅᓯᒪᔪᓂᑦ ᑲᒪᑦᑎᐊᖅᑐᓕᕆᔨᒃᑯᓐᓂ, ᐱᓕᕆᖃᑎᖃᕐᓗᑎᑦ ᐊᖏᔪᖅᑳᖅ ᐊᒻᒪᓗ ᐃᖅᑲᓇᐃᔭᖅᑎᓄ ᓯᕗᓕᖅᑎ, ᑲᒪᔪᓂᑦ ᖁᕕᐊᓲᑎᖃᕐᓂᕐᒧᑦ ᓄᑖᕈᖅᑎᑕᐅᓂᖏᓐᓄᑦ ᐱᖁᔭᑦ.

8.4. ᐊᖏᔪᖅᑳᑉ ᑐᖏᓕᖓ ᓄᓇᖃᖅᑳᖅᑐᓕᕆᔨᒃᑯᓐᓂ ᐊᒻᒪᓗ ᐃᑦᑕᕐᓂᓴᓕᕆᔨᒃᑯᓐᓂ (IACH), ᐊᖏᔪᖅᑲᐅᑏᓪᓗ ᐊᖏᔪᖅᑳᑉ ᑐᖏᓕᖏᑦ ᐊᐅᑦᑎᔪᓂᒃ ᐱᓕᕆᖃᑎᖃᕐᓗᑎᑦ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᖅᑐᓕᕆᔨᒃᑯᓐᓂ ᑲᓇᑕᐅᑉ ᒥᕐᖑᐃᖅᓯᕐᕕᒃᑯᖏᓐᓂ ᐊᕐᕌᖑᑕᒫᕐᓗ ᐅᓂᒃᑳᖃᑦᑕᕐᓗᑎᑦ ᖃᓄᐃᓘᓕᕐᓂᖏᓐᓂ ᐱᕙᓪᓕᐊᓂᖏᓐᓂ.

8.5. ᐊᖏᔪᖅᑳᑉ ᑐᖏᓕᖓ IACH, ᑲᑎᒪᑎᑦᑎᓂᐅᔪᖅ ᐱᓕᕆᖃᑎᖃᕐᓗᑎᓪᓗ ᓄᓇᖃᖅᑳᖅᓯᒪᔪᓕᕆᔨᓂᒃ, ᑲᔪᓯᑦᑎᐊᖁᓪᓗᒋᓪᓗ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕐᓂᕐᒧᑦ ᐱᖁᔭᐃᑦ ᐊᒻᒪᓗ ᐃᒪᐃᑦᑐᓂᑦ ᑲᒪᒋᐊᖃᖅᑐᑎ:

8.5.1. ᐊᐅᓚᑦᑎᓂᕐᒧᑦ ᓯᕗᓕᖅᑎᖃᖃᑦᑕᕐᓗᑎᑦ ᐱᕙᓪᓕᐊᓂᖏᓐᓂ ᒪᓕᒐᕐᓂᑦ ᐱᖁᔭᕐᓂᓪᓗ ᐱᒋᐊᕈᑎᓂᒃ ᐊᑐᓕᖅᑎᑦᑎᓂᕐᒨᖓᔪᓂᒃ ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᑕᐅᓯᒪᓂᖏᑦ ᐱᔪᓐᓇᐅᑎᖏᑦ ᓄᓇᖃᖅᑳᖅᓯᒪᔪᑦ ᐱᖁᔭᖏᑦ.

8.5.2. ᐅᖃᐅᔾᔨᒋᐊᕆᔪᓐᓇᕐᓗᑎᑦ ᐸᕐᓇᐅᑎᓂᒃ, ᐱᓕᕆᔨᒻᒪᕆᐅᓂᖏᓐᓄᑦ, ᐃᑲᔪᖅᑐᐃᓗᑎᓪᓗ ᐊᓯᖏᓐᓂ ᑲᑎᒪᔨᐅᔪᓂᒃ ᓯᕗᕙᖅᑎᑦᑎᑲᓐᓂᕋᓱᐊᕐᓗᑎᑦ ᐱᓕᕆᐊᖏᓐᓂ ᐊᑐᓕᖅᑎᑦᑎᓂᕐᒧᑦ ᐱᖁᔭᕐᓂᑦ, ᐱᖃᓯᐅᑎᓗᒋᑦ ᐱᕙᓪᓕᐊᖏᓐᓂ ᑲᒪᑦᑎᐊᕐᓂᕐᒧᑦ ᐸᕐᓇᐅᑏᑦ.

8.5.3. ᐃᓕᓐᓂᐊᖅᑎᑕᐅᑦᑎᐊᖃᑦᑕᕐᓗᑎᑦ ᑲᓇᑕᐅᑉ ᒥᕐᖑᐃᖅᓯᕐᕕᖓᓐᓂ ᐃᖅᑲᓇᐃᔭᖅᑐᑦ ᓄᓇᖃᖅᑳᖅᑐᒥᓃᑦ ᑎᒍᒥᐊᖅᑎᐊᕐᓂᖓᑕ ᒥᔅᓵᓄᑦ ᑖᔅᓱᒥᖓᓗ ᐱᖁᔭᕐᒥᑦ.

8.6. ᐊᖏᔪᖅᑳᖏᑦ ᐊᖏᔪᖅᑳᖓᑕ ᑐᖏᓕᖓ ᐊᐅᓚᑦᑎᓂᕐᒧᑦ, ᑲᑎᒪᖃᑎᖃᕐᓗᑎᑦ ᐱᓕᕆᖃᑎᖃᕐᓗᑎᓪᓗ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᖅᑐᓕᕆᔨᒃᑯᖏᓐᓂ, ᐃᒪᐃᑦᑐᒥᑦ ᑲᒪᓂᐊᖅᑐᑦ:

8.6.1. ᐸᕐᓇᐅᑎᖏᑦ ᒪᓕᑦᑕᐅᑦᑎᐊᕋᓗᐊᕐᒪᖓᑕ ᑲᒪᑦᑎᐊᕐᓂᕐᒧᑦ ᐱᓕᕆᖃᑕᐅᔪᓂᒃ ᐊᑐᓂ ᓄᓇᓕᓐᓂ ᑲᓇᑕᐅ ᒥᕐᖑᐃᖅᓯᕐᕕᖏᓐᓂ ᐊᒻᒪᓗ ᓄᓇᖃᖅᑳᖅᓯᒪᔪᓂᑦ ᐱᓕᕆᖃᑕᐅᔪᓂᒃ.

8.6.2. ᖃᐅᔨᒪᑦᑎᐊᕐᓗᒋᑦ ᑲᒪᑦᑎᐊᕐᓂᕐᒧᑦ ᐸᕐᓇᐅᑏᑦ ᐊᑐᓕᖅᑎᑕᐅᓗᑎᑦ ᐅᓂᒃᑳᕆᔭᐅᖃᑦᑕᕐᓗᑎᓪᓗ ᐃᓕᖅᑯᓯᖃᑦᑎᐊᕐᓗᑎᑦ ᖃᖓᒃᑰᓂᖏᓐᓂᓪᓗ ᒪᓕᑦᑎᐊᕐᓗᑎᑦ ᑐᕌᒐᖏᓐᓂ ᓄᓇᖃᖅᑳᖅᓯᒪᔪᓂᒃ ᐱᓕᕆᖃᑎᖏᓐᓂ ᐊᒻᒪᓗ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ.

8.7. ᐊᖏᔪᖅᑳᑉ ᑐᖏᓕᖓ ᐃᖅᑲᓇᐃᔭᖅᑐᓕᕆᓂᕐᒧᑦ ᐃᖅᑲᓇᐃᔭᖅᑎᓄᓪᓗ, ᐱᓕᕆᖃᑎᖃᕐᓗᑎᑦ ᐊᖏᔪᖅᑳᑉ ᑐᖏᓕᖓᓂ ᑖᒃᑯᓄᖓ IACH ᐊᒻᒪᓗ ᑲᑎᒪᑎᑦᑎᓗᑎᑦ ᐱᓕᕆᖃᑎᖃᕐᓗᑎᓪᓗ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᖅᑐᓕᕆᔨᒃᑯᓐᓂ, ᑲᒪᓗᑎᓪᓗ ᐋᖅᑭᔅᓱᐃᓗᑎᑦ ᐊᑐᐊᕆᐊᓕᓐᓂᑦ ᐱᖅᑯᓯᖏᓐᓂ ᒪᓕᑦᑎᐊᕐᓗᑎᑦ ᒪᑯᓂᖓ ᐃᖅᑲᓇᐃᔭᖅᑎᑖᖅᑐᕐᓗᑎᑦ, ᐊᒻᒪᓗ ᐱᖅᑯᓯᕐᒥᓂᑦ ᐃᓕᓐᓂᐊᑎᑦᑎᒍᓐᓇᕐᓗᑎᑦ.

8.8. ᐊᖏᔪᖅᑳᑉ ᑐᖏᓕᖓ ᐸᕐᓇᐅᑎᓄᑦ ᐱᖁᔭᕐᓄᑦ, ᐱᓕᕆᓂᖏᓐᓂ ᐊᒻᒪᓗ ᖃᕋᓴᐅᔭᒃᑯᑦ ᐱᔨᑦᑎᕋᕐᓂᖏᓐᓂ ᐊᓪᓚᕕᖏᑦ ᐊᒻᒪᓗ ᐊᖏᔪᖅᑳᑉ ᑐᖏᓕᖓ IACH, ᑲᑎᒪᑎᑦᑎᓗᑎᑦ ᐱᕆᓕᖃᑎᖃᕐᓗᑎᓪᓗ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᖅᑐᓕᕆᔨᓂᒃ, ᐋᖅᑭᔅᓱᐃᒋᐊᓖᑦ ᐊᐅᓚᑦᑎᔨᐅᑉ ᐱᓕᕆᐊᕆᔭᕆᐊᓕᖏᓐᓂ ᐊᑐᓕᖅᑎᑦᑎᓂᐊᖅᑎᓪᓗᒋᑦ ᑖᒃᑯᓂᖓ ᐱᖁᔭᕐᓂᑦ.

8.9. ᑲᓇᑕᒥ ᒥᕐᖑᐃᖅᓯᕐᕕᓕᒪᑦ ᑎᒥᖏᑦ ᐊᖏᔪᖅᑳᑉ ᑐᖏᓕᖓ ᑲᒪᔪᖅ ᐃᒪᐃᑦᑐᓂᑦ:

8.9.1 ᐋᖅᑭᔅᓱᐃᓗᓂ ᑲᒪᑦᑎᐊᕐᓂᕐᒧᑦ ᐸᕐᓇᐅᑎᓂᒃ ᐅᖃᖅᓯᒪᔪᓂᒃ ᑲᑎᒪᔩᑦ ᐊᑐᓕᖅᑎᑦᑎᓂᐊᕐᓂᖏᓐᓂ ᑕᕝᕙᓂ ᐱᖁᔭᕐᓂᑦ.

8.9.2 ᑕᒪᒃᑯᐊ ᕿᒥᕐᕈᔭᐅᑦᑎᐊᕐᓂᐊᕋᓗᐊᕐᖔᑕ ᓇᓗᓇᐃᖅᑕᐅᓗᑎᓪᓗ ᑲᑎᒪᔩᑦ ᑲᒪᑦᑎᐊᕐᓂᕐᒧᑦ ᐸᕐᓇᐅᑏᑦ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᖅᑐᓕᕆᔨᒃᑯᖏᓐᓄᑦ.

9. ᖃᖓᒃᑯᑦ ᖃᐅᔨᓴᖅᑕᐅᒐᔭᕐᒪᖔᑦ

ᑖᓐᓇ ᐱᖁᔭᖅ ᕿᒥᕐᕈᔭᐅᖃᑦᑕᕋᔭᖅᑐᑦ ᐊᕐᕌᒍᑦ ᑕᓕᒪᑦ ᐊᓂᒍᕐᓂᑕᒪᑦ.

ᑖᓐᓇ ᐱᖁᔭᖅ ᐊᑦᑐᐊᔪᓪᓗ ᑲᒪᑦᑎᐊᕐᓂᕐᒧᑦ ᐸᕐᓇᐅᑏᑦ ᑲᒪᑦᑎᐊᓂᕐᒧᓪᓗ ᐱᖁᔭᐃᑦ ᑎᒍᔭᐅᒐᔭᖅᑐᑦ ᑲᒪᒋᔭᐅᓗᑎᓪᓗ ᐊᓯᔾᔨᐸᓪᓕᐊᒋᐊᖃᖅᑐᒧᑦ ᓄᓇᖃᖅᑳᖅᓯᒪᔪᑦ ᐱᓕᕆᖃᑕᐅᔪᑦ ᐃᓱᒪᖅᓱᕐᓂᖏᓐᓄᑦ.

10. ᐅᖃᐅᓰᑦ ᑐᑭᖏᑦ

ᐱᖅᑯᓯᕐᒥᓂᒃ ᑲᔪᓯᑏᑦᑎᓐᓇᕐᓂᖅ:

ᑖᓇ ᐃᓗᓕᖏᑦ ᐊᔭᐅᖅᑐᐃᔪᑦ ᓄᓇᖃᖅᑳᖅᓯᒪᔪᑦ ᑲᒪᐃᓐᓇᕆᐊᖃᕐᓂᖏᓐᓂ ᐱᓕᕆᖃᑎᖃᒃᑲᓂᓕᕐᓗᑎᑦ ᐊᒻᒪᓗ ᐊᑦᑐᐊᓂᖃᑦᑎᐊᕐᓗᑎᑦ ᐱᖅᑯᓯᑐᖃᕐᒥᑎᒍᑦ ᓄᓇᖏᓐᓂ, ᐊᖏᕈᑎᓂᑦ ᓄᓇᓂᑦ, ᓯᕗᓕᒥᓂᖏᑦᑕ ᓄᓇᖁᑎᖏᓐᓂ, ᐅᖃᐅᓯᒃᑯᑦ, ᐱᖅᑯᓯᒃᑯᑦ, ᑲᒪᑦᑎᐊᕐᓂᕐᒃᑯᑦ ᑲᒪᖃᑦᑕᕐᓗᑎᑦ ᐅᖃᐅᓯᐅᖃᑦᑕᕐᓗᑎᓪᓗ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᑦ ᑲᒪᒋᔭᐊᕆᐊᓕᖏᓪᓗ. ᐱᖅᑯᓯᕐᒥᓂᑦ ᑲᔪᓯᑎᑦᑏᓐᓇᕐᓗᑎᑦ ᓄᓇᓂᑦ ᒪᑯᓂᖓ ᐱᖅᑯᓯᒃᑯᑦ ᐊᑦᑕᓇᖅᑐᒦᖁᓇᒋᑦ ᖁᕕᐊᓲᑎᖃᖃᑦᑕᓂᒃᑯᑦ; ᐅᖃᐅᓯᒥᓂᑦ ᐅᓂᒃᑳᖃᕐᓂᖅ; ᐃᓕᓐᓂᐊᕐᓗᑎᑦ ᓇᒦᓐᓂᖏᓐᓂ ᖃᐅᔨᒪᓂᖏᓐᓂᓪᓗ ᐅᓂᒃᑳᖃᖃᑦᑕᕐᓗᑎᑦ ᐃᓐᓇᐃᑦ ᐃᓅᓱᑦᑐᓄᑦ, ᖃᐅᔨᒪᔨᑦᑕᐃᑦ, ᓄᓇᖅᑲᑎᒌᓪᓗ, ᐊᒻᒪᓗ ᓂᕿᔅᓴᖅᓯᐅᑏᑦ, ᐋᓐᓂᐊᓲᑎᔅᓴᓄᑦ ᓄᐊᑦᑎᔨᑦ ᐊᓯᖏᓐᓂᓪᓗ ᐱᔾᔪᑎᖃᖅᑎᓪᓗᒋᑦ.

ᐱᖅᑯᓯᖏᑎᒍᑦ ᐱᔪᓐᓇᕐᓂᖏᑦ:

ᐊᑕᐅᓯᕐᒥᑦ ᐅᖃᐅᓯᕐᒥᑦ ᓈᒻᒪᑦᑐᑕᖃᓐᖏᑦᑐᖅ ᑐᑭᖓᓐᓂ ᑕᒪᒃᑯᓂᖓ ᐅᖃᐅᓯᖃᖅᑎᓪᓗᑕ ᐱᖅᑯᓯᓕᕆᓂᕐᒧᑦ ᐱᔪᓐᓇᕐᓂᖏᓐᓂ, ᓱᓕ ᑕᒪᓐᓇ ᓇᓗᓇᐃᖅᑕᐅᒋᐊᓕᒃ ᑲᓇᑕᐅᑉ ᒥᕐᖑᐃᖅᓯᕕᖏᓐᓂ ᐃᓗᓕᖏᓐᓃᑦᑐᓪᓗᒍ ᐱᖁᔭᕐᒥᑦ. ᓱᓕ ᑲᒪᕙᓪᓕᐊᒻᒪᑕ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᖅᑐᓕᕆᔨᒃᑯᑦ ᓇᓗᓇᐃᖅᓯᓇᓱᐊᕐᓂᖏᓐᓂ ᑕᒪᑐᒥᖓ ᐅᖃᐅᓯᕐᒥᑦ ᐊᑕᐅᓯᕐᒥᑦ.

ᒫᓐᓇᑲᐃᓐᓇᖅ, ᑖᓐᓇ ᐱᖁᔭᖅ ᐅᖃᐅᓯᖃᖅᑐᖅ ᐱᑕᖃᕇᖅᑐᒥᑦ ᑐᑭᖓᓐᓂ, ᐃᓚᒋᓪᓗᒋᑦ ᑐᑭᖏᑦ ᐋᖅᑭᓱᖅᑕᐅᓯᒪᔪᑦ ᓯᓚᑦᑐᖅᓴᕐᕕᔾᔪᐊᖓᓐᓂ ᑐᕌᓐᑐ ᓇᓗᓇᐃᖅᓯᓯᒪᔪᑦ ᐱᖅᑯᓯᕐᒥᑦ ᐱᔪᓐᓇᕐᓂᖏᓐᓂ “ᐱᓕᕆᖃᑎᖃᕐᓗᑎᑦ ᓄᓇᖃᖅᑳᖅᓯᒪᔪᓂᒃ ᐱᓕᕆᖃᑕᐅᔪᓂᒃ ᐊᒻᒪᓗ ᐱᖅᑯᓯᖃᑎᒋᓐᖏᑕᖏᓐᓂ ᓄᓇᖃᖅᑳᖅᓯᒪᔫᑦ ᐃᖅᑲᓇᐃᔭᕐᕕᖏᓐᓂ”. ᑲᑐᔾᔨᖃᒌᓐᓂᑦ ᐱᑕᖃᕋᔪᒻᒪᑦ ᐃᒻᒥᒃᑰᖅᑐᓪᓗ ᑐᑭᓯᓯᒪᓂᖏᑦ ᑕᒪᑐᒥᖓ. ᑐᑭᖏᑦ ᐃᓕᓯᒪᑲᐃᓐᓇᕐᓂᐊᖅᑐᑦ ᐃᓇᖏᑦᑕᐅᓛᕐᓗᑎᑦ ᑐᑭᖓᓐᓂ ᐊᑐᕐᓗᑎᑦ ᓄᓇᖃᖅᑲᖅᓯᒪᔪᓄᑦ ᑲᒪᑦᑎᐊᖅᑐᓕᕆᔨᒃᑯᓐᓂ ᓴᓇᔭᐅᓯᒪᔪᒥᑦ.

ᐅᑉᐱᕆᔭᐃᑦ ᖃᐅᔨᒪᓃᓪᓗ:

ᐅᑉᐱᕆᔭᐃᑦ ᖃᐅᔨᒪᓃᓪᓗ ᐃᓗᓕᕆᓂᐊᖅᑕᒥᒃ ᐸᕐᓇᐅᑎᖃᖅᑐᖅ ᒪᑯᓂᖓ ᐅᑉᐱᕆᔭᐅᔪᓂᑦ ᖃᐅᔨᒪᓂᓕᒫᑦᑎᐊᕐᓂᑦ ᐊᓯᖏᓐᓂᓪᓗ ᐅᑉᐱᕆᔭᐅᔪᓂᒃ ᒪᓕᒐᕐᓂᓪᓗ. ᐊᑐᕆᐊᓕᓐᓄᑦ ᑭᒃᑯᑐᐃᓐᓇᕐᓄᑦ ᑐᑭᓯᐅᒪᒋᐊᓖᑦ ᐱᖅᑯᓯᖃᑎᒌᓐᖏᑦᑐᓪᓗ ᓯᓚᕐᔪᐊᒥ ᑕᑯᓐᓇᖅᑕᐅᔪᓂᒃ, ᐃᓱᒪᒋᔭᐅᖃᑦᑕᕐᖓᑕ ᐊᔾᔨᒋᓐᖏᑦᑎᐊᖅᑕᖏᓐᓂ, ᐱᖅᑯᓯᖏᓐᓂᓪᓗ ᐅᖃᐅᓯᕐᓂᑦ ᑐᑭᓯᓇᖅᑐᓂᑦ ᐱᑕᖃᕐᓗᓂ. ᐋᖅᑭᔅᓱᐃᓗᑎᑦ ᐅᑉᐱᕆᔭᐃᑦ ᖃᐅᔨᒪᓃᓪᓗ, ᐱᓕᕆᖃᑎᖃᓕᕐᓗᑎᑦ ᐊᔾᔨᒌᓐᖏᑦᑐᓂᑦ ᖃᐅᔨᒪᓂᓕᓐᓂᑦ ᐃᓱᒪᖃᖅᑐᓂᓪᓗ ᐱᓕᕆᖃᑎᒋᓪᓗᑎᑦ ᐃᓱᒪᑐᓂᖏᓐᓂ ᐃᓕᓴᖅᓯᒪᓗᑎᑦ ᐅᑉᐱᕆᔭᖃᑦᑎᐊᕐᓗᑎᓪᓗ. ᐅᑉᐱᕆᔭᐃᑦ ᖃᐅᔨᒪᓃᓪᓗ ᑭᓪᓕᓯᓂᐊᕐᓂᐅᓐᖏᑦᑐᖅ ᑭᓯᐊᓂᓕ ᐱᐅᓯᑎᑦᑎᓇᓱᐊᖅᑐᖅ ᐊᖏᕈᑕᐅᓯᒪᔪᓂᑦ ᒪᓕᒐᕐᓂᑦ. ᑕᒪᓐᓇ ᐃᓗᓕᖓ ᐅᑉᐱᕆᔭᖃᕐᓂᖅ ᖃᐅᔨᒪᓂᕐᓗ ᐃᑲᔪᖅᑐᖅᑕᐅᔪᖅ ᓄᓇᖃᖅᑳᖅᓯᒪᔪᓂᒃ ᐃᓕᓴᐃᔨᓂᒃ ᐃᓐᓇᓂᓪᓗ ᓲᕐᓗ ᐸᐃᑉᐹᓕᒃ ᐅᐃᓕ ᐆᒪᐃᓐ ᐊᒻᒪᓗ ᐸᐃᑉᐹᓕᒃ ᕋᔾ ᑯᕉᓲ.

ᓇᒦᓐᓂᖏᑦ:

ᑖᓐᓇ ᐃᓚᓕᐅᑎᓯᒪᔪᖅ ᐅᖃᐅᓯᖅ ᐅᖃᐅᓯᖃᖅᑐᖅ ᓄᓇᓕᒫᑦᑎᐊᕐᓂᑦ, ᐃᒪᓃᑦᑐᓂᑦ ᓄᓇᕐᓂᑦ, ᐃᒪᕐᓂᑦ ᐊᒻᒪᓗ ᓯᑯᖏᓐᓂ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ ᐊᐅᓚᑕᐅᔪᓂᒃ, ᒪᑯᓂᖓᓗ ᑲᓇᑕᒥ ᓄᓇᑐᖃᒥᓂᕐᓂᑦ, ᑲᓇᑕᒥ ᒥᕐᖑᐃᖅᓯᕕᓐᓂᑦ ᓴᓂᕐᕙᖅᑕᐅᓯᒪᔪᓂᓪᓗ ᒥᕐᖑᐃᖅᓯᕐᕕᒻᒥ, ᑲᓇᑕᒥ ᐃᒪᕐᒥ ᐱᐅᖅᓱᐊᖅᑕᐅᔪᓂᑦ ᓴᓂᕐᕙᖅᑕᐅᓯᒪᔪᓂᓪᓗ, ᐊᓯᒃᑲᓂᖏᓐᓂᓪᓗ.

ᑲᑐᔾᔨᓂᖅ ᐊᐅᓚᑦᑎᔾᔪᑎᓂᑦ:

ᐊᐅᓚᑦᑎᔾᔪᑎᓂᒃ ᑲᑐᔾᔨᓂᖅ ᐅᖃᐅᓯᖃᖅᑐᖅ ᐱᔪᓐᓇᕐᓂᖏᓐᓂ ᐃᓱᒪᓕᐅᕐᓂᒃᑯᑦ. ᐱᓕᕆᖃᑕᐅᔪᑦ ᒪᓕᒐᐃᑦ ᐅᖃᐅᓯᐅᓪᓗᑎᑦ ᑕᐃᒫᒃ ᐋᖅᑭᓱᖅᑕᐅᓯᒪᔪᓂᒃ ᐊᔾᔨᐅᖏᓐᓂᖏᓐᓂ ᐃᓚᖏᑦ ᐱᔪᓐᓇᕐᓂᖃᓂᖏᓐᓂ ᑲᒪᒋᐊᖃᕐᓂᖏᓐᓂᓪᓗ ᑲᑐᔾᔭᓂᖏᓐᓂ. ᐅᐊᑦᑎᐊᕈᓕ, ᑲᓇᑕᐅᑉ ᒥᕐᖑᐃᖅᓯᕐᕕᖏᑦ ᐊᑐᖃᑦᑕᖅᓯᒪᒻᒪᑕ ᐅᖃᐅᓯᕐᒥᑦ “ᐱᓕᕆᖃᑎᒌᓐᓂᖅ” ᐊᒻᒪᓗ “ᑲᑐᔾᔨᓂᕐᒥᑦ ᐊᐅᓚᑦᑎᓗᑎᑦ” ᑕᐃᒫᒃ ᒪᓕᓪᓗᒋᑦ. ᐊᓯᖏᑦ ᒐᕙᒪᐅᔪᑦ ᐊᑐᖅᓯᒪᒻᒪᑕ “ᐊᐅᓚᑦᑎᖃᑎᒌᓐᓂᕐᒥᑦ”.

ᑲᑎᒪᑎᑦᑎᓂᖅ ᐱᓕᕆᖃᑎᖃᕐᓂᓪᓗ:

ᑖᓐᓇ ᓇᓗᓇᐃᔭᐃᓯᒪᔪᖅ ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᓯᒪᓂᖏᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᑦ ᐱᖁᔭᖏᓐᓂ, ᑐᑭᓯᒋᐊᕐᕕᖃᖅᑐᑎᑦ ᒪᓕᒐᕐᓂᑦ ᒪᓕᒋᐊᓕᓐᓂᑦ ᑲᑎᒪᑎᑦᑎᖃᑦᑕᕐᓗᑎᑦ ᐱᓕᕆᖃᑎᖃᕐᓗᑎᓪᓗ ᓄᓇᖃᖅᑳᖅᓯᒪᔪᓂᒃ. ᐅᖃᐅᓰᑦ ᓴᖅᑭᖅᓯᒪᔪᑦ ᒪᓕᒐᕐᓂᑦ 18−ᒥᑦ ᐊᒻᒪᓗ 19−ᒥᑦ ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᒪᔭᖏᓐᓂ ᐊᒻᒪᓗ ᑐᑭᓯᔭᐅᒋᐊᓖᑦ ᑭᒡᒐᖅᑐᐃᔨᖃᕆᐊᖃᒃᖓᑕ ᑎᒥᐅᔪᑦ ᓂᕈᐊᖅᑕᐅᓯᒪᔪᑦ ᓄᓇᖃᖅᑳᖅᓯᒪᔪᓄᑦ “ᓄᖅᑲᖓᔾᔪᑎᖃᓐᖏᑦᑎᐊᕐᓗᑎᑦ, ᓯᕗᓂᖓᓂ ᑐᓴᐅᒪᑎᑦᑎᑦᑎᐊᕐᓗᑎᑦ ᐊᖏᕈᓐᓇᕐᓗᑎᑦ ᐊᑐᓕᖅᑎᑦᑎᓚᐅᓐᖏᓐᓂᖏᓐᓂ ᒪᓕᒐᕐᔪᐊᓃᑦ ᐅᕝᕙᓘᓐᓃᑦ ᑲᒪᒋᔭᐅᓚᐅᓐᖏᓐᓂᖏᓐᓂ ᐸᐃᑉᐸᖅᑎᒍᑦ ᐊᑦᑐᐃᓂᖃᖅᑐᓄᑦ”. ᑲᑎᒪᑎᑦᑎᓂᖅ ᐱᓕᕆᖃᑎᖃᕐᓂᓪᓗ ᑲᔪᓰᓐᓇᕐᓂᐊᖅᑐᖅ ᐊᑕᐅᓯᑐᐊᑲᓪᓚᒨᓐᖏᑦᑐᖅ ᐱᓕᕆᖃᑎᖃᕐᓗᑎᑦ. ᐅᖃᐅᓯᖃᓐᖏᑦᑐᕐᓕ, ᐊᑦᑐᐃᓂᖃᓐᖏᑦᑐᖅ, ᐅᕝᕙᓘᓐᓃᑦ ᐃᓇᖐᓐᖏᑦᑐᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐱᓕᕆᐊᕆᔭᕆᐊᓕᖏᓐᓂ ᑲᑎᒪᑎᑦᑎᓂᕐᒥᑦ ᐊᑦᑐᐃᓂᖃᖅᑐᓂᓪᓗ ᐅᕝᕙᓘᓐᓃᑦ ᐋᖅᑭᓱᖅᑕᐅᓯᒪᔪᓂᒃ ᓄᓇᖃᖅᑳᖅᓯᒪᔪᓂᒃ ᐅᕝᕙᓘᓐᓃᑦ ᐊᖏᕈᑕᐅᓯᒪᔪᓂᒃ ᐱᔪᓐᓇᐅᑎᓂᒃ.

11. ᓇᑭᓐᖔᖅᓯᒪᒻᒪᖔᑕ

ᐅᑯᐊ ᖃᐅᔨᒋᐊᕐᕕᔅᓴᐅᒻᒥᔪᑦ ᐃᓱᒪᖅᓴᖅᓯᐅᕈᑎᒋᔪᓐᓇᖅᑐᑎᒍ, ᐃᓕᓴᕆᔭᐅᓪᓗᑎᓪᓗ ᑎᑎᕋᖅᓯᒪᔪᑦ ᐃᓕᕝᕕᒋᔪᒪᔭᑦᑎᓐᓂ ᓯᕗᒧᐊᑦᑎᐊᕈᒪᓪᓗᑕ.

• ᓯᓚᕐᔪᐊᒥ ᓇᓗᓇᐃᖅᑕᐅᓯᒪᔪᑦ ᐱᔪᓐᓇᐅᑎᖏᑦ ᓄᓇᖃᖅᑳᖅᓯᒪᓄᑦ ᐱᖁᔭᐃᑦ
• ᓯᓚᕐᔪᐊᒥ ᓇᓗᓇᐃᖅᑕᐅᓯᒪᔪᑦ ᐱᔪᓐᓇᐅᑎᖏᑦ ᓄᓇᖃᖅᑳᖅᓯᒪᓄᑦ ᐱᖁᔭᐃᑦ ᐱᒋᐊᕈᑕᐅᓯᒪᔪᓄᑦ ᐸᕐᓇᐅᑏᑦ
• ᑲᓇᑕᒥ ᐱᓕᕆᖃᑎᖃᕐᓂᖅ ᐅᓪᓗᒥᓕᓴᕐᓂᑦ ᐊᖏᕈᑎᓂᒃ ᐊᑐᓕᖅᑎᑕᐅᓯᒪᔪᓂᒃ ᐱᖁᔭᕐᓂᑦ
• ᐃᓄᐃᑦ ᓄᓇᖓᑦ ᐱᖁᔭᐃᑦ
• ᑲᓇᑕᒥ ᒥᕐᖑᐃᖅᓯᕐᕖᑦ ᐱᖁᔭᖏᑦ
• ᑲᓇᑕᒥ ᒥᕐᖑᐃᖅᓯᕐᕖᑦ ᐃᒪᕐᒥ ᐱᐅᖅᓱᐊᕐᓂᕐᒧᑦ ᐱᖁᔭᐃᑦ
• ᒥᕐᖑᐃᖅᓯᕐᕖᑦ ᑲᓇᑕᒥ ᑎᒥᐅᔪᑦ ᐱᖁᔭᐃᑦ
• ᓄᓇᑐᖃᐃᑦ ᐃᖅᑲᐅᒪᔭᐅᒋᐊᓕᓐᓄᓪᓗ ᐱᖁᔭᐃᑦ
• ᐊᓪᓚᐃᑦ ᐱᖁᔭᖏᑦ (R.S.C., 1985, c. I-5)
• ᐅᓂᒃᑳᑦ ᓱᓕᔪᓂᒃ ᓴᐃᒻᒪᖃᑎᒋᓐᓂᒧᓪᓗ ᐱᓕᕆᔩᑦ ᑲᓇᑕᒥ
• ᕈᐃᔪ ᑲᑎᒪᔨᖏᑦ ᓄᓇᖃᖅᑳᖅᓯᒪᔪᓂᒃ.
• ᒪᓕᒐᐃᑦ ᒪᑯᓄᖓ ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᖃᑎᖃᖅᑎᓪᓗᒋᑦ ᓄᓇᖃᖅᑳᖅᓯᒪᔪᓂᒃ
• ᓯᓚᕐᔪᐊᒥ ᑲᑐᔾᔨᖃᔩᑦ ᓇᓗᓇᐃᖅᓯᓯᒪᓂᖏᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᑦ, ᓯᓚᕐᔪᐊᒥ ᑲᑐᔾᔨᔩᑦ (2007)
• ᐊᑕᐅᑦᑎᒃᑯᑦ ᒪᑭᑉᐳᒍᑦ: ᑲᔪᓯᑎᑦᑎᓂᖏᓐᓂ ᐊᖅᑯᑕᐅᔪᓂᒃ ᑲᓇᑕᒥ ᓯᕗᓪᓕᖅᐹᒥ ᐱᓕᕆᐊᖏᓐᓂ ᓴᖅᑮᓯᒪᔪᑦ ᓄᓇᖃᖅᑳᖅᓯᒪᔪᓂᒃ ᐸᖅᑭᑦᑎᓂᖏᓐᓂ ᐱᐅᖅᓱᐊᓂᖏᓐᓂᓪᓗ ᐅᑉᐱᕆᔭᑐᖃᕐᓂᑦ ᓄᓇᓂᑦ ᓴᐃᒻᒪᖃᑎᒌᓐᓂᒥᓪᓗ ᐊᑐᖅᑐᑎᑦ. ᓄᓇᖃᖅᑳᖅᓯᒪᔪᑦ ᑲᑐᔾᔨᔨᖏᑦ ᓯᓚᑎᖔᖓᓃᓐᖔᖅᑐᑦ ᐅᓂᒃᑳᑦ ᐊᑐᓕᖁᔭᐅᔪᓪᓗ