ᑐᓴᒐᒃᓴᐅᔪᖅ ᓴᕿᑕᐅᔪᖅ
ᐃᕐᖐᓐᓇᖅ ᓴᖅᑭᖅᑕᐅᔭᕆᐊᓕᒃ
ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᑐᓴᖅᑎᑦᓯᕗᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐆᑦᑐᕋᐅᑎᖓ ᒥᐊᓂᕐᓯᓂᕐᒧᑦ ᐃᑉᐱᐊᔪᒻᒥ
ᐆᑦᑐᕋᐅᑦ ᒥᐊᓂᕐᓯᓂᕐᒧᑦ ᖃᐅᔨᓇᓱᐊᕐᓂᐅᓂᐊᖅᑐᖅ ᖃᓄᖅ ᐃᓄᐃᑦ ᐃᑲᔪᕈᓐᓇᕐᒪᖔᑕ ᐊᐅᓚᑦᓯᓂᕐᒥᒃ ᐅᑭᐅᖅᑕᖅᑑᑉ ᐃᒪᖓᓂ ᑕᓪᓗᕈᑎᐅᑉ ᐃᒪᖓ ᓴᖅᑭᖅᑕᐅᖏᓐᓂᖓᓂ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᓂᖓ.ᔪᓚᐃ 18, 2018 ᐃᑉᐱᐊᕐᔪᒃ, ᓄᓇᕗᑦ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᑎᒥᖓ
ᐊᐅᒡᒍᓯ 2017−ᒥ, ᑭᒡᓕᓕᐊᖑᓯᒪᔪᑦ ᓄᑖᖑᓂᕐᐹᒥ ᐊᖏᓂᕐᐹᖑᓪᓗᓂᓗ ᑕᕆᐅᖅ ᓴᐳᔾᔭᐅᓯᒪᔪᖅ ᑲᓇᑕᒥ − ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᔪᖅ − ᑐᓴᖅᑎᑦᓯᒍᑕᐅᓚᐅᖅᑐᖅ ᑲᓇᑕ ᒐᕙᒪᒃᑯᖏᓐᓂᒃ, ᓄᓇᕗᑦ ᒐᕙᒪᖓᓂᒃ, ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ (ᕿᑭᖅᑕᓂ).
ᐅᓪᓗᒥ ᐃᑉᐱᐊᔪᒻᒥ, ᓄᓇᕗᑦ, ᐊᕙᑎᓕᕆᔨᒃᑯᑦ ᐊᒻᒪᓗ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᒥᓂᔅᑕ ᐊᒻᒪᓗ ᒥᓂᔅᑕ ᑲᒪᒋᔭᖃᖅᑐᖅ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ, ᑳᑐᕆᓐ ᒪᑭᓐᓇ, ᐊᒻᒪᓗ ᐲᔭᐃ ᐊᕿᐊᕈᖅ, ᐊᖓᔪᖅᑳᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂ), ᑐᓴᖅᑎᓯᖅᑲᐅᔫᒃ ᓴᖅᑭᖅᑕᐅᓂᖓᓂᒃ ᐆᑦᑐᕋᐅᑦ ᒥᐊᓂᕐᓯᓂᕐᒧᑦ ᓴᐳᔾᔭᐅᓯᒪᔪᒥᒃ.
ᓄᓇᖃᖅᑳᕐᓯᒪᔪᓄᑦ ᒥᐊᓂᕐᓯᓂᕐᒧᑦ ᐱᓕᕆᐊᒃᓴᖅ ᐃᑲᔪᕐᓯᓯᒪᔪᖅ ᓄᓇᖃᖅᑳᕐᓯᒪᔪᓂᒃ ᐃᖅᑲᓇᐃᔭᖅᑎᑦᓯᓂᕐᒥᒃ ᓇᓕᒧᖓᓂᒃ ᐱᓕᕆᖃᑕᐅᔪᑦ ᒐᕙᒪᒃᑯᑦ ᐊᒻᒪᓗ ᓴᓇᒡᕕᔾᔪᐊᑦ ᓴᐳᔾᔨᓯᒪᓂᕐᒧᑦ ᐊᐅᓚᑦᓯᓂᕐᒧᓪᓗ ᓄᓇᒥᒃ ᓄᓇᒦᓐᖔᖅᑐᓂᓪᓗ, ᐊᒻᒪᓗ ᑕᐃᒪᐃᑎᓪᓗᒍ, ᐃᑲᔪᕐᓂᐊᖅᑐᑦ ᖃᐅᔨᓴᕐᓂᕐᒥᒃ ᓴᐳᔾᔭᐅᓯᒪᓂᖓᓂᒃ ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᔪᖅ.
ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ $900,000-ᓂᒃ ᑮᓇᐅᔭᓖᓂᐊᖅᑐᑦ ᑐᕋᐃᓐᓇᖅᑐᒥᒃ ᐃᑲᔫᑎᒃᓴᒥᒃ ᕿᑭᖅᑕᓂᒃᑯᑦ ᑲᔪᓯᑎᑦᓯᒍᑎᒃᓴᖏᓐᓂᒃ ᐆᑦᑐᕋᐅᒻᒥᒃ ᒥᐊᓂᕐᓯᓂᕐᒧᑦ, ᐊᒻᒪᓗ ᖃᐅᔨᓴᕐᓂᕐᒥᒃ ᖃᓄᖅ ᐃᓄᐃᑦ ᐃᓚᒋᔭᐅᔪᓐᓇᓂᐊᕐᒪᖔᑕ ᐊᐅᓚᑦᓯᓂᕐᒥᒃ ᑕᓪᓗᕈᑎᐅᑉ ᐃᒪᖓᓂᒃ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᔪᖅ. ᑲᔪᓯᑎᑕᐅᓂᖓᒍᑦ ᓇᓗᓇᐃᕈᑕᐅᓂᐊᖅᑐᖅ ᐃᓕᓐᓂᐊᖅᑎᑦᓯᓂᖏᓐᓂᒃ ᐱᖅᑯᓯᕐᒥᒃ ᖃᐅᔨᒪᓂᖏᓐᓂᒃ ᐃᓐᓇᕐᓂᒃ ᒪᒃᑯᑦᑐᓄᑦ, ᐊᒻᒪᓗᑦᑕᐅᖅ ᐊᑯᓂᐅᔪᒧᑦ−ᒪᑭᒪᔪᓐᓇᕐᓂᖓᓂᒃ ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᔪᖅ ᒥᐊᓂᕐᓯᓂᕐᒧᑦ. ᐊᒻᒪᓗ ᑮᓇᐅᔭᓕᑕᐅᒍᑏᑦ ᕿᑭᖅᑕᓂᒃᑯᓐᓄᑦ ᖃᐅᔨᓴᕈᓐᓇᕈᑕᐅᓂᐊᖅᑐᑦ ᖃᓄᖅ ᐱᓕᕆᐊᒃᓴᖅ ᐃᑲᔫᑎᖃᑦᓯᐊᓂᕐᐸᐅᒍᓐᓇᓂᐊᕐᒪᖔᖅ ᐊᐅᓚᑦᓯᓂᕐᒥᒃ ᐃᓘᓐᓈᓂᒃ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᔪᖅ.
ᑕᓪᓗᕈᑎᐅᑉ ᐃᒪᖓ, ᐃᓄᐃᑦ ᐊᑎᖓ ᑖᑦᓱᒧᖓ ᖃᓪᓗᓈᑎᑐᑦ ᓛᓐᑳᔅᑕ ᓴᐅᓐ ᑕᒫᓃᑦᑐᖅ ᑲᓇᑕᒥ ᖁᑦᑎᑦᑐᕐᒥ, ᓄᓇᖓ ᓯᕕᑐᔪᕐᔪᐊᖑᓪᓗᓂ ᓱᕐᕋᐃᑦᑐᖅ ᑕᕆᐅᖓ ᐊᒻᒪᓗ ᓄᓇᖓ ᐊᖏᕐᕋᕆᔭᐅᖃᑦᑕᕐᓯᒪᔪᖅ ᐃᓄᓐᓄᑦ ᐅᑭᐅᕋᓴᕐᔪᐊᕌᓗᓐᓂᒃ. ᓴᖅᑭᖅᑕᐅᓂᖓ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᓂᖓ ᑐᓐᖓᕕᓪᓗᐊᑕᖅ ᐃᑲᔫᑕᐅᔪᖅ ᓯᕗᒧᐊᒃᑎᑕᐅᕙᓪᓕᐊᓂᖓᓄᑦ ᑲᓇᑕᒥ ᐊᔾᔨᒌᓐᖏᑦᑐᓂᒃ ᐆᒪᔪᓂᒃ ᑐᕌᒐᖃᖅᑐᓂ ᐊᒻᒪᓗ ᓴᐳᔾᔨᓯᒪᓂᕐᒥᒃ ᐆᒪᔪᓪᓗᐊᑕᖏᓐᓂᒃ, ᓇᓗᓇᐃᕐᓯᒪᒍᑕᐅᓯᓐᓈᑦ ᐃᓄᐃᑦ ᐱᖅᑯᓯᕐᒥᑎᒍᑦ ᐊᐅᓚᓂᖏᑦ ᑲᔪᓯᑦᓯᐊᕐᓂᖏᓐᓂᒃ ᐊᐅᓚᑕᐅᖏᓐᓇᓂᐊᕐᓗᑎᒃ ᑕᒫᓂ ᑭᖑᕚᕆᓂᐊᖅᑕᑎᓐᓄᑦ. ᑐᒃᕋᐅᑦ 109,000 km2 ᑭᓛᒥᑕ ᓴᐳᔾᔭᐅᓯᒪᓂᖓ ᑕᓪᓗᕈᑎᐅᑉ ᐃᒪᖓ ᐃᑲᔫᑎᔪᖅ 1.9%−ᓃᑦᑐᓂᒃ ᑲᓇᑕᒥ ᑲᑎᓪᓗᒋᑦ ᑕᕆᐅᖅ ᓴᐳᔾᔭᐅᓯᒪᓂᖏᓐᓂᒃ, ᐃᑲᔫᑕᐅᔪᖅ ᓇᓗᓇᐃᖅᑕᐅᓯᒪᓪᓗᓂ ᑲᔪᓯᑎᑕᐅᓯᒪᓂᖓᒍᑦ ᐋᔩᕋᕈᑕᐅᓪᓗᓂ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᑎᒃᓴᓄᓪᓗ ᐊᖏᖃᑎᒌᒍᑏᑦ. ᒐᕙᒪᒃᑯᑦ ᐊᖏᓪᓕᒋᐊᕆᐊᓂᒃᓯᒪᔪᑦ ᑕᕆᐅᕐᒥᒃ ᓴᐳᔾᔨᓯᒪᓂᕐᒥᒃ 1%-ᒥᒃ 8%-ᑲᓴᒻᒧᑦ.
ᑲᓇᑕ ᒐᕙᒪᖓ ᐊᖏᕈᑎᖃᕐᓯᒪᔪᖅ ᓄᑖᓐᖑᕆᐊᖅᑎᑦᓯᓂᕐᒥᒃ ᐱᓇᓱᐊᖃᑎᒌᓐᓂᖏᓐᓂᒃ ᓄᓇᖃᖅᑳᕐᓯᒪᔪᑦ ᑐᓐᖓᕕᖃᖅᑐᒥᒃ ᐃᓕᓴᕆᔭᐅᓯᒪᓂᖏᓐᓂᒃ ᐱᔪᓐᓇᐅᑎᖏᑦ, ᐃᓕᓴᕐᓯᓯᒪᓂᕐᒥᒃ, ᐃᖅᑲᓇᐃᔭᖃᑎᒌᓐᓂᕐᒥᒃ ᐊᒻᒪᓗ ᐱᓇᓱᐊᖃᑎᒌᓐᓂᕐᒥᒃ. ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᐃᖅᑲᓇᐃᔭᖃᑎᖃᐃᓐᓇᓂᐊᖅᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐋᖅᑭᑦᓱᐃᓗᑎᒃ ᐊᑐᖅᑕᐅᓚᐅᐱᓪᓚᓂᐊᖅᑐᒥᒃ ᐊᐅᓚᑦᓯᓂᕐᒧᑦ ᐸᕐᓇᐅᑎᓂᒃ ᐊᒻᒪᓗ ᐋᔩᕋᕈᑎᖃᕐᓗᑎᒃ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᓂᕐᒧᓪᓗ ᐊᖏᖃᑎᒌᒍᑎᓂᒃ ᐱᔭᕆᐊᖃᖅᑎᑕᐅᓂᖏᑎᒍᑦ ᓄᓇᕗᒻᒥ ᐊᖏᕈᑎᓂ, ᐃᓕᓴᕆᔭᐅᓯᒪᓂᖏᓐᓄᑦ ᐱᖕᒪᕆᕐᔪᐊᕌᓗᐃᑦ ᐃᑲᔫᑎᒋᖃᑦᑕᕐᓯᒪᓂᖏᑦ ᐃᓄᐃᑦ ᓴᖅᑮᓂᕐᒥᒃ ᓴᐳᔾᔭᐅᓯᒪᓂᖓᓂᓪᓗ ᑲᓇᑕᒥ ᓱᕐᕋᐃᑦᑐᑦ ᓄᓇᑦ.
ᐅᖃᐅᓯᐅᖃᑦᑕᕐᓯᒪᔪᑦ
“ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐅᐱᒍᓱᑦᑐᑦ ᐃᖅᑲᓇᐃᔭᖃᑎᖃᕐᓂᐊᓂᕐᒥᓂᒃ ᐃᓄᓐᓂᒃ ᓴᐳᔾᔨᓯᒪᓂᕐᒥᒃ ᒥᐊᓂᕐᓯᓂᕐᒥᓪᓗ ᑕᓪᓗᕈᑎᐅᑉ ᐃᒪᖓᓂᒃ. ᓴᖅᑮᖃᑎᖃᕐᓯᒪᓂᒃᑯᑦ ᒥᐊᓂᕐᓯᒍᑎᒃᓴᓂᒃ ᕿᑭᖅᑕᓂ ᐃᓄᐃᑦ ᑲᔾᑐᔨᖃᑎᒌᓂᒃ, ᓴᖅᑮᓂᐊᖅᑐᒍᑦ ᓄᑖᓂᒃ ᐃᖅᑲᓇᐃᔮᒃᓴᓂᒃ ᐊᒻᒪᓗ ᒪᑭᒪᔾᔪᑎᒃᓴᓂᒃ ᑕᒪᐅᖓ, ᐊᒻᒪᓗ ᐃᑲᔪᕐᓗᒋᑦ ᐃᓄᐃᑦ ᓴᐳᔾᔨᓯᒪᓂᕐᒥᒃ ᐃᒪᖏᓐᓂᒃ ᐊᒻᒪᓗ ᑲᓱᖅᑎᓪᓗᒋᑦ ᑲᓇᑕᒥᐅᓄᑦ ᐊᒻᒪᓗ ᐳᓛᕆᐊᕐᐸᑦᑐᓄᑦ ᓯᓚᕐᔪᐊᒦᓐᖔᖅᑐᓄᑦ.”ᓂᖅᑐᕐᓇᖅᑐᖅ ᑳᑐᕆᓐ ᒪᑭᓐᓇ,
ᒥᓂᔅᑕ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᐊᒻᒪᓗ ᒥᓂᔅᑕ ᑲᒪᒋᔭᖃᖅᑐᖅ ᑲᓇᑕᒥ ᒥᕐᖑᐃᓯᕐᕕᓕᕆᓂᕐᒥᒃ
“ᓴᖅᑭᖅᑕᐅᓂᖓ ᑕᓪᓗᕈᑎᐅᑉ ᐃᒪᖓᑕ ᐆᑦᑐᕋᐅᑦ ᐃᑉᐱᐊᔪᒻᒥ ᐅᔾᔨᓇᖅᑐᖅ ᓇᓗᓇᐃᒃᑯᑕᐅᓂᐊᕆᐊᖓ 60−ᓂᒃ ᐅᑭᐅᓂᒃ ᐊᖅᑯᑕᐅᓚᐅᖅᑐᒥᒃ ᐱᒋᐊᖅᑎᑕᐅᓚᐅᖅᑐᒥᒃ ᐃᓄᓐᓄᑦ ᓯᕗᓕᖅᑎᓄᑦ ᕿᑭᖅᑕᓂ ᓄᓇᖓᓂ ᓴᐳᔾᔨᓯᒪᓂᕐᒥᒃ ᑕᒪᑦᓱᒥᖓ ᐃᒪᖓᓂᒃ ᐊᒻᒪᓗ ᐱᑕᓕᕐᔪᐊᒻᒪᕆᐊᓘᔪᒥᒃ ᑕᕆᐅᕐᒥ ᐆᒪᔪᓂᒃ. ᑖᓐᓇ ᐱᖕᒪᕆᐅᒍᑎᖓ ᐱᓕᕆᐊᖑᔪᖅ ᓇᓗᓇᐃᕐᓯᒍᑕᐅᒻᒪᑦ ᐃᓄᐃᑦ ᒥᐊᓂᕐᓯᔨᐅᓂᖏᓐᓂᒃ ᐊᒻᒪᓗ ᑐᓐᖓᕕᓕᐊᖑᓪᓗᓂ ᐱᑕᖃᕆᐊᓕᒻᒪᕆᐊᓘᔪᒥᒃ ᐱᓕᖕᒪᓴᕐᓂᕐᒥᒃ, ᐃᖅᑲᓇᐃᔮᒃᓴᓂᒃ ᐊᒻᒪᓗ ᒪᑭᒪᔾᔪᑎᒃᓴᖏᓐᓂᒃ ᐃᓄᐃᑦ. ᒥᐊᓂᕐᓯᓂᕐᒧᑦ ᐊᑐᖅᑕᐅᔪᖅ ᐃᓕᓴᕐᓯᓯᒪᒻᒥᔪᖅ, ᐃᑉᐱᒋᔭᖃᖅᑐᓂ, ᐃᑲᔪᕐᓯᓯᒪᓪᓗᓂ ᐊᑐᖅᑕᐅᖏᓐᓇᖅᑐᒥᒃ ᐊᖑᓇᓱᓐᓂᕐᒥᒃ ᐊᒻᒪᓗ ᓂᕿᓂᒃ ᒥᓇᕋᖃᑦᑕᐅᑎᓂᕐᒥᒃ ᐃᓄᐃᑦ ᐃᓕᖅᑯᓯᖓᒍᑦ ᐅᓪᓗᒥ.”
ᐲᔭᐃ ᐊᕿᐊᕈᖅ,
ᐊᖓᔪᖅᑳᖅ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ
ᖃᐅᔨᒪᔾᔪᑎᒃᓴᓪᓗᐊᑕᑦ
- ᑕᓪᓗᕈᑎᐅᑉ ᐃᒪᖓ, ᖃᐅᔨᒪᔭᐅᓂᖃᕐᒥᔪᖅ ᓛᓐᑳᒡᑕ ᓴᐅᓐ, ᐆᒻᒪᕆᑦᑐᖅ ᓄᓇᖓ. ᓂᓪᓕᓇᖅᑐᑦ ᐅᑭᐅᖅᑕᖅᑑᑉ ᐃᒪᖏᑦ ᐊᖏᕐᕋᕆᔭᐅᔪᑦ ᐱᑕᓕᕐᔪᐊᒻᒪᕆᐊᓘᓪᓗᓂᓗ ᐅᑎᖅᑕᐸᑦᑐᓄᑦ ᑎᖕᒥᐊᓄᑦ, ᐃᖃᓗᐃᑦ, ᓇᓄᐃᑦ ᐊᒻᒪᓗ ᕿᓚᓗᒐᐃᑦ, ᓴᖅᑭᐅᒪᓂᓕᒃ ᐊᔾᔨᐅᖏᑦᑐᕐᔪᐊᖑᓂᕐᐸᐅᔪᒥᒃ ᓯᓚᕐᔪᐊᒥ ᒪᑭᒪᓂᖓᓂᒃ ᓄᓇᖓᑕ ᐆᒪᔪᖃᐅᕐᓂᖓᓄᑦ ᐊᔾᔨᒌᓐᖏᑦᑐᓂᒃ; ᑕᒪᓐᓇ ᑕᐸᐃᕐᓇᑐᐃᓐᓇᖅᑐᖅ ᐊᒻᒪᓗ ᒪᑭᒪᕕᐅᖃᑦᑕᕐᓯᒪᔪᖅ ᐃᓄᓐᓄᑦ ᐊᕐᕌᒍᕋᓴᕐᔪᐊᕌᓗᓐᓂᒃ.
- ᑕᒪᓐᓇ, ᖃᐅᔨᒪᔮᖑᒻᒥᔪᖅ ᑕᐃᒎᓯᓕᒻᒥᒃ “ᒪᑭᒪᓂᓕᒃ ᓄᓇᖓ ᐊᐅᓚᐃᓐᓇᖅᑐᖅ” ᐅᑭᐅᖅᑕᖅᑑᑉ ᑲᓇᓐᓈᓂ, ᐃᓕᓴᕆᔭᐅᓯᒪᔪᖅ ᓯᓚᕐᔪᐊᒥ ᑲᑐᔾᔨᖃᑎᒌᖏᓐᓄᑦ ᐆᒪᔪᓂᒃ ᐊᔾᔨᒌᓐᖏᑦᑐᓂᒃ ᐊᒻᒪᓗ ᐃᓕᖅᑯᓯᒃᑯᑦ ᐱᖕᒪᕆᐅᔪᖁᑎᑕᐅᔪᓂᒃ. ᐃᓄᐃᑦ, ᒐᕙᒪᑦ ᐊᒻᒪᓗ ᑎᒥᓐᖑᖅᑎᑕᐅᓯᒪᔪᑦ ᐊᖏᕈᑎᑎᒍᑦ ᑲᑐᔾᔨᖃᑎᒌᑦ ᓴᐳᔾᔨᓯᒪᓂᕐᒥᒃ ᐱᓇᓱᐊᖃᑦᑕᕐᓯᒪᔪᑦ ᑕᒪᑦᓱᒥᖓ ᐅᑭᐅᕋᓵᓗᓐᓂᒃ.
- ᑕᓪᓕᒪᑦ ᓄᓇᓖᑦ ᖃᓂᒋᔮᓃᑦᑐᑦ ᑭᒡᓕᓕᐊᖑᒍᒪᔫᑉ ᑕᓪᓗᕈᑎᐅᑉ ᐃᒪᖓᓄᑦ ᐊᐅᓱᐃᑦᑐᖅ, ᖃᐅᓱᐃᑦᑐᖅ, ᐃᑉᐱᐊᕐᔪᒃ, ᒥᑦᑎᑕᒪᓕᒃ ᐊᒻᒪᓗ ᑲᖏᕐᖢᒑᐱᒃ. ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᔪᖅ ᐊᕙᑖᓃᓐᓂᐊᕐᒥᔪᑦ ᐃᓚᖓᓂᒃ ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᒃ, ᒪᕐᕉᒃ ᐅᑎᖅᑕᖅᑐᓄᑦ ᑎᖕᒥᐊᖃᐅᓯᑉᕖᒃ ᐊᒻᒪᓗ ᐊᑕᐅᓯᖅ ᑲᓇᑕᒥ ᓂᕐᔪᑎᖃᐅᓯᑉᕕᒃ.
- ᑖᓐᓇ ᐆᑦᑐᕋᐅᑦ ᒥᐊᓂᕐᓯᒍᑎᒃᓴᖅ ᑐᖔᒍᑦ−ᑲᔪᓯᑎᑕᐅᒋᐊᓐᖏᓐᓂᖓᓂ ᖃᐅᔨᓴᕈᑎᒃᓴᖅ ᓇᓗᓇᐃᖅᑕᐅᓯᒪᔪᖅ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᓐᓂᒃ ᐊᒻᒪᓗ ᕿᑭᖅᑕᓂᒃᑯᓐᓂ ᓯᕗᓕᐅᕈᑕᐅᓂᐊᖅᑐᖅ ᐱᐊᓂᒃᑕᐅᖏᓐᓂᖏᓐᓂ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᑎᒃᓴᖏᓐᓄᑦ ᐊᖏᖃᑎᒌᒍᑏᑦ ᑕᓪᓗᕈᑎᐅᑉ ᐃᒪᖓᓄ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᔪᖅ, ᐃᑲᔫᓯᐊᓵᓕᖁᓪᓗᒋᑦ ᐊᒃᑐᖅᑕᐅᓯᒪᔪᑦ ᓄᓇᓖᑦ.
- ᑏᓰᒻᕙ 20, 2017-ᒥ, ᑕᓪᓗᕈᑎᐅᐃ ᐃᒪᖓᓂ ᓴᐳᔾᔭᐅᓯᒪᔪᑦ ᐃᓃᑦ ᑕᕆᐅᑉ ᐊᑭᐊᓂ ᐃᓕᓐᓂᐊᕈᑎᒃᓴᑦ, ᖃᐅᔨᓴᕈᑏᑦ ᐊᒻᒪ ᐃᓕᖅᑯᓯᓕᕆᓂᕐᒧᑦ ᑲᑐᔾᔨᖃᑎᒌᑦ ᐊᒻᒪᓗ ᖃᓂᒋᔭᓃᑦᑐᑦ ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᒃ ᐃᓚᓕᐅᔾᔭᐅᓚᐅᖅᑐᑦ ᑲᓇᑕᒥ ᑎᑎᕋᖅᑕᐅᒍᒪᔪᓄᑦ ᑕᕆᐅᑉ ᐊᑭᐊᓂ ᐃᓕᓐᓂᐊᕈᑎᒃᓴᑦ, ᖃᐅᔨᓴᕈᑏᑦ ᐊᒻᒪ ᐃᓕᖅᑯᓯᓕᕆᓂᕐᒧᑦ ᑲᑐᔾᔨᖃᑎᒌᑦ ᓯᓚᕐᔪᐊᒥ ᐃᑦᑕᕐᓂᓴᓄᑦ ᓄᓇᓄᑦ.
- ᐄᑉᕈ 2018-ᒥ, ᕿᑭᖅᑕᓂᒃᑯᑦ ᐊᒻᒪᓗ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦ ᐃᑉᐱᐊᔪᒻᒦᓚᐅᖅᑐᑦ ᑐᓴᕆᐊᕆᐊᖅᑐᕐᓱᑎᒃ ᐆᑦᑐᕋᐅᑕᐅᓂᐊᖅᑐᒥᒃ ᒥᐊᓂᕐᓯᓂᕐᒧᑦ. ᕼᐊᒻᓚᑦᑯᑦ ᐅᖃᓚᐅᖅᑐᑦ ᐃᑲᔪᕐᓱᐃᔪᒻᒪᕆᐅᓂᕋᖅᑐᑎᒃ, ᐊᒻᒪᓗ ᓄᓇᓕᑦᑎᒍᑦ ᖃᐅᔨᒪᔨᑕᕐᓂᒃ ᑲᑎᒪᔨᕋᓛᓕᐅᖁᔨᓪᓗᑎᒃ ᖃᐅᔨᒪᔨᐅᓂᐊᖅᑐᓂᒃ ᒥᐊᓂᕐᓯᔨᓄᑦ.
- ᒥᐊᓂᕐᓯᔩᑦ ᐃᖅᑲᓇᐃᔮᖃᕐᓂᐊᖅᑐᑦ ᐊᐅᓚᑦᓯᓂᕐᒥᒃ ᒥᐊᓂᕐᓯᓂᕐᒥᓪᓗ ᒥᑭᓈᕐᓯᒪᔪᒥᒃ ᓄᓇᖓᓂᒃ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᔪᓕᐊᖑᒍᒪᔪᒥ, ᑲᒪᒋᔭᖃᕐᓗᑎᒃ ᑕᒪᒃᑯᓂᖓ ᐃᖅᑲᓇᐃᔮᒃᓴᓂᒃ ᓲᕐᓗ ᖃᐅᔨᓴᕐᓂᕐᒥᒃ ᓄᓇᖓᑕ ᖃᓄᐃᓐᖏᓐᓂᖓᓂᒃ, ᐋᖅᑭᐅᒪᑦᓯᓂᕐᒥᒃ ᐃᓕᖅᑯᓯᒃᑯᑦ ᓄᓇᑐᕐᓕᒥᓂᕐᓂᒃ, ᐃᑲᔫᑎᒃᓴᓂᒃ ᓄᓇᒧᑦ ᐊᒻᒪᓗ ᑕᕆᐅᕐᒧᑦ ᐸᕐᓇᐅᑎᓄᑦ ᐊᐅᓚᑦᓯᒍᑎᓄᓪᓗ, ᐊᒻᒪᓗ ᐱᕚᓪᓕᕈᑎᒃᓴᓂᒃ ᑭᖑᕚᕇᕋᓴᐅᓂᐊᖅᑐᑦ ᐅᓂᒃᑲᐅᓯᖏᓐᓂᒃ ᓄᓇᖃᖅᑳᕐᓯᒪᔪᓄᑦ ᖃᐅᔨᒪᓂᐅᔪᓂᒃ. ᐃᑉᐱᐊᔪᒻᒥ ᐅᖃᓚᐅᕐᒥᔪᑦ ᐱᔪᒪᓂᖃᒻᒪᕆᓐᓂᕐᒥᓂᒃ ᒥᐊᓂᕐᓯᓂᕐᒥᒃ ᖃᐅᔨᓴᕐᓂᕐᒥᒃ ᐅᒥᐊᕐᔪᐊᓂᒃ, ᑖᓐᓇᑦᑕᐅᖅ ᐃᓚᒋᓂᐊᕐᒥᔭᖓ ᐱᓕᕆᐊᒃᓴᖏᑕ.
- ᐱᓕᖕᒪᓴᕐᓂᖅ ᐃᓚᓕᐅᔾᔭᐅᓯᒪᔪᒻᒪᕆᐅᒻᒥᔪᖅ ᐆᑦᑐᕋᐅᒻᒧᑦ, ᒥᐊᓂᕐᓯᔩᑦ ᐊᑦᑕᓇᐃᕐᓯᒪᓂᖓ ᓇᓗᓇᐃᖅᑕᐅᓯᒪᒋᓪᓗᓂ ᓯᕗᓪᓕᐅᔾᔭᐅᒋᐊᓕᓐᓂ. ᐱᓕᕆᐊᒃᓴᖅ ᐱᕙᓪᓕᐊᓂᖓᒍᑦ, ᒪᓕᑐᐃᓐᓇᓂᐊᕐᒥᔪᑦ ᐱᓕᕆᐊᒃᓴᖏᑦ ᒥᐊᓂᕐᓯᔩᑦ ᓇᓕᖅᑯᑦᓯᓯᒪᖁᓪᓗᒋᑦ ᓄᓇᓖᑦ ᐃᓚᓕᐅᔾᔭᐅᓯᒪᓂᖏᓐᓂᒃ ᐊᒻᒪᓗ ᐅᖃᐅᓯᐅᓯᒪᔪᓂᒃ ᐃᓚᒋᔭᐅᔪᒪᕙᓪᓕᐊᓂᐊᖅᑐᓄᑦ ᓄᑖᓄᑦ, ᓲᕐᓗ ᒐᕙᒪᑐᖃᒃᑯᓐᓂ ᐱᓕᕆᒡᕕᖏᑦ, ᐃᒪᕐᒥᐅᑕᓕᕆᔨᒃᑯᑦ ᐃᖏᕐᕋᔪᓕᕆᔨᕐᔪᐊᒃᑯᑦ ᐊᕙᑎᓕᕆᔨᒃᑯᓪᓗ ᐊᒻᒪᓗ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ.
- ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᔪᖅ ᓴᖅᑭᖅᑕᐅᕙᓪᓕᐊᔪᖅ ᐅᑭᐅᕋᓵᓗᓐᓂ ᐱᓕᕆᐊᖑᖃᑦᑕᕐᓯᒪᓪᓗᓂ ᐃᓄᓐᓄᑦ ᐊᒻᒪᓗ ᐊᑐᕐᓂᕐᒥᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ (ᐃᓄᐃᑦ ᐱᖅᑯᓯᕐᒥᒃ ᖃᐅᔨᒪᓂᖏᑦ) ᑲᑎᖅᓱᖅᑕᐅᖃᑦᑕᕐᓯᒪᔪᓂᒃ ᐃᓄᐃᑦ ᓄᓇᓕᖏᓐᓂᒃ ᐱᖕᒪᕆᐅᓂᖓᓂᒃ ᑕᒪᓐᓇ ᓄᓇᖓ.
- ᐃᓄᐃᑦ ᖃᐅᔨᒪᔭᑐᖃᖏᑦ (ᐃᓄᐃᑦ ᐱᖅᑯᓯᕐᒥᒃ ᖃᐅᔨᒪᓂᖏᑦ) ᑲᔪᓯᓂᐊᖅᑐᑦ ᑐᓴᐅᒪᑎᑦᓯᒍᑕᐅᓗᓂ ᓯᕗᓂᕐᒥ ᐃᓱᒪᓕᐅᕈᑕᐅᖃᑦᑕᓂᐊᖅᑐᓄᑦ ᐊᐅᓚᑦᓯᓂᕐᒥᒃ ᑕᓪᓗᕈᑎᐅᑉ ᐃᒪᖓᓂᒃ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᔪᖅ.
ᓴᖅᑭᖅᑕᐅᓂᖓ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᔪᖅ, ᐊᒻᒪᓗ ᐊᑎᓕᐅᖅᑕᐅᓂᖓ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᑎᒃᓴᖏᓐᓄᑦ ᐊᖏᖃᑎᒌᒍᑏᑦ, ᒪᑭᒪᔾᔪᑕᐅᓂᐊᖅᑐᑦ ᐊᒻᒪᓗ ᐃᓅᓯᕐᒧᑦ ᐃᑲᔫᑎᓂᒃ ᐃᓄᓐᓄᑦ ᓄᓇᖏᓐᓂ ᓲᕐᓗ ᐊᑐᐃᓐᓇᖃᕐᓂᕐᒥᒃ ᐃᖅᑲᓇᐃᔮᓂᒃ, ᐱᓕᖕᒪᒃᓴᐅᑎᓂᒃ ᐊᒻᒪᓗ ᐱᖁᑎᕐᔪᐊᓂᒃ/ᐃᓱᕐᕆᐅᓂᒃ ᐱᑕᖃᕆᐊᓕᓐᓂᒃ.
ᑖᒃᑯᓄᖓ ᐊᑕᔪᖅ ᑎᑎᕋᕐᓯᒪᔪᖅ
ᑕᓪᓗᕈᑎᐅᑉ ᐃᒪᖓᓄᑦ ᐆᑦᑐᕋᐅᑎᒧᑦ ᐅᓂᒃᑳᖅᐊᒃᑐᐊᔪᑦ ᑖᒃᑯᓄᓐᖓᖓᔪᑦ
- 30 -
ᖃᐅᔨᒋᐊᕐᕕᒃᓴᑦ
ᑳᓚᐃ ᑎᐅᕆᐅ
ᓰᒪ ᓴᕼᐊ ᔨᕆᕼᐃ
ᐊᓪᓚᑉᕕᖓ ᐊᕙᑎᓕᕆᔨᒃᑯᑦ ᐊᒻᒪᓗ ᓯᓚᐅᑉ ᐊᓯᔾᔨᐸᓪᓕᐊᓂᖓ
819-938-3813
caroline.theriault2@canada.ca
ᑐᓴᐅᒪᔾᔪᑎᓄᑦ ᑐᑭᒧᐊᒃᑎᑦᑎᔨ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ
867-975-8413 ᐅᑉᕙᓘᓐᓃᑦ 1-800-667-2742
szerehi@qia.ca
ᐱᕙᓪᓕᐊᔪᓕᕆᔨᒃᑯᑦ
ᒥᕐᖑᐃᓯᕐᕕᓕᕆᖦᕐᔪᐊᒃᑯᑦ ᑎᒥᖓ
855-862-1812
pc.media-media.pc@canada.ca
- Date de modification :