ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ ᐊᐅᓚᑦᑎᓂᕐᒧᑦ ᐸᕐᓇᐅᑎᑦ ᑎᑎᕋᕐᑕᐅᒋᐊᙵᕐᑐᑦ ᑭᒃᑯᑐᐃᓐᓇᕐᓄᑦ ᑐᑭᓯᖃᑎᒌᒍᑎᑦᓴᑦ ᐅᓂᒃᑳᖑᔭᕆᐊᓖᑦ 2026

1.0 ᓇᓗᓇᐃᖅᑕᐅᓂᖏᑦ

ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ, ᑲᔾᔮᓇᑦᓯᐊᖅᑐᑦ ᓄᓇᖓ ᐃᓄᐃᑦ ᓄᓇᖓᓂ (ᐃᓄᐃᑦ ᐊᖏᕐᕋᖓᓂ), ᕿᑭᖅᑖᓗᖕᒦᑦᑐᖅ ᓄᓇᕗᒥ (ᓄᓇᙳᐊᖅ 1), ᐃᓄᐃᑦ ᓯᕗᓕᖏᓐᓂᑦ ᑕᐃᒪᙵᑐᖄᓗᖕ ᐸᐸᑦᓯᔨᐅᖏᓐᓇᐅᔭᕐᑐᑦ ᓄᓇᒥᖕ, ᓯᑯᒥᖕ ᐊᒻᒪᓗ ᐃᒪᖏᓐᓂᑦ ᐃᒻᒪᑐᖄᓗᓐᓂᑦ. ᑲᑐᔾᔨᓂᒃᑯᑦ ᐊᐅᓚᑕᐅᓪᓗᓂ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᓐᓄᑦ ᐃᓄᓐᓄᓪᓗ ᑐᙵᕕᖃᕐᑐᑦ ᐃᓄᐃᑦ ᐸᐸᑦᓯᔨᐅᖏᓐᓇᕐᓗᑎᑦ ᓴᖅᑭᔮᕐᑎᑕᐅᓗᓂ, ᐊᖏᕈᑎᒋᓯᒪᔭᖏᑦ ᐱᓂᐊᕐᓂᒃᑯᑦ ᑲᔪᓯᑎᑕᐅᓗᑎᑦ, ᖁᕐᕙᐹᓪᓕᑎᑦᓯᓗᑎᖕ ᓴᐃᒻᒪᖃᑎᒌᑉᐸᓪᓕᐊᓂᖕᒥᑦ, ᐊᒻᒪᓗ ᐃᑲᔪᕐᑐᐃᓪᓗᑎᑦ ᐊᑐᓕᕐᑎᑕᐅᓂᖏᓐᓂᑦ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᑦ ᓯᓚᕐᒥᐊᒥᐅᑦ ᑲᑎᒪᔨᕐᔪᐊᖏᓄᑦ ᐊᖏᕈᑕᐅᓯᒪᔪᑦ.

ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑕ ᑎᓕᔭᐅᔾᔪᑎᒋᓯᒪᔭᖏᑦ ᐱᔭᑦᓴᖏᑎᒍᑦ ᓴᐳᔾᔨᔨᐅᖁᓪᓗᒋᑦ ᐊᒻᒪᓗ ᐅᓂᒃᑳᖃᑦᑕᖁᓪᓗᒋᑦ ᑲᓇᑕᒥ ᓄᓇᑐᖃᕆᔭᐅᔪᓂᑦ ᐃᑲᔫᑕᐅᓂᐊᕐᖓᑕ ᐊᒻᒪᓗ ᖁᕕᐊᓱᒋᐊᕝᕕᐅᖃᑦᑕᖁᓪᓗᒋᑦ ᒫᓐᓇ ᑭᖑᓂᖔᑦᑎᓐᓂᓗ ᑭᖑᕚᕆᓂᐊᕐᑕᑎᓐᓄᑦ. ᑲᓇᑕᒥ ᒥᕐᖑᐃᓯᕐᕕᓕᕆᔩᑦ ᐱᖁᔭᖓ ᐅᖃᖅᓯᒪᒻᒪᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᐊᐅᓚᑦᑎᓂᖕᒧᑦ ᐸᕐᓇᐅᑎᓕᐅᕆᐊᖃᕐᖓᑕ ᐃᒥᒃᑰᖓᔪᓄᑦ ᑲᓇᑕᒥ ᒥᕐᖑᐃᓯᕐᕕᖏᓐᓄᑦ ᐃᓚᒋᔭᐅᕕᒋᑐᐊᖅᐸᒋᑦ ᐊᐅᓚᑦᑎᔨᐅᖃᑕᐅᓂᕐᖕᒧᑦ. ᐊᐅᔪᐃᑦᑑᑉ ᒥᕐᖑᐃᓯᕐᕕᖓᓄᓪᓕ, ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑎᑦᓴᖏᓐᓄᓪᓗ ᐊᖏᕈᑦ ᐊᐅᔪᐃᑦᑐᕐᒧᑦ, ᖁᑦᑎᓂᕐᐹᒧᑦ, ᐊᒻᒪᓗ ᓯᕐᒥᓕᒃ ᑲᓇᑕᒥ ᒥᕐᖑᐃᓯᕐᕕᖏᓐᓄᑦ (ᕿᑭᖅᑖᓗᖕᒥ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑎᑦᓴᖏᓐᓄᓪᓗ ᐊᖏᕈᑦ) ᐊᔪᕆᕐᓯᐅᔾᔨᒍᑏᑦ ᖃᓄᖅ ᐊᐅᓚᑦᑎᓂᖕᒧᑦ ᐸᕐᓇᐅᑏᑦ ᐱᕙᓪᓕᐊᔭᐅᓂᐊᕐᒪᖔᑕ ᐊᒻᒪᓗ ᐊᒃᓱᖐᓯᒪᓪᓗᑎᑦ ᐃᓄᐃᑦ ᐃᓚᒋᔭᐅᒋᐊᖃᕐᓂᖏᓐᓂᑦ ᐃᓱᒪᓕᐅᕈᑎᖃᕐᓂᐊᕐᐸᑕ ᒥᕐᖑᐃᓯᕐᕕᐅᑉ ᒥᑦᓵᓄᑦ.

ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ ᐊᐅᓚᑦᑎᓂᕐᒧᑦ ᐸᕐᓇᐅᑎ ᐃᑲᔪᖅᓱᐃᔪᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᓄᑦ ᓵᑕᐅᔪᓐᓇᕐᑐᑦ ᑲᓇᑕᒥᐅᓄᑦ, ᑐᑭᓯᓇᑦᑎᐊᖅᑐᓂᒃ ᐊᔪᕆᖅᓲᔾᔨᕙᒡᓗᑎᒃ ᐊᑯᓂ ᐊᐅᓚᑦᑎᔾᔪᑎᒃᓴᓂᒃ ᐊᒻᒪᓗ ᓇᓗᓇᐃᔭᐃᓂᖅ ᖃᓄᖅ ᐊᐅᓚᑕᐅᓂᖏᑦ ᑲᓇᑕᒥ ᒥᕐᖑᐃᓯᕐᕖᑦ ᑎᑭᐅᑎᖃᑦᑕᕐᒪᖔᑦ ᐆᒃᑐᕋᒐᒃᓴᐅᓗᑎᖕ ᖃᓄᐃᓕᖓᓕᕐᒪᖔᑕ. ᐅᓇ ᐊᐃᑉᐸᕆᓕᖅᑕᖓ ᐊᐅᓚᑦᑎᓂᕐᒧᑦ ᐸᕐᓇᐅᑎ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᖓᓐᓄᑦ, ᒪᓕᓪᓗᒋᑦ ᓯᕗᓪᓕᕐᒥ ᐱᕙᒌᔭᖅᑕᐅᓯᒪᔪᑦ ᐊᑐᓕᖅᑎᑕᐅᓚᐅᖅᓯᒪᔪᑦ 2010-ᒥ. ᐸᕐᓇᐅᑏᑦ ᐊᖅᑯᑎᒋᔭᐅᕗᑦ, ᓇᓗᓇᐃᔭᐃᓂᖅ ᓯᕗᓪᓕᖅᐸᐅᔾᔭᐅᓯᒪᔪᓂᒃ ᐊᕐᕌᒍᓄᑦ ᖁᓕᓄᑦ ᐊᒡᒋᖅᐸᓪᓕᐊᔪᓄᑦ. ᑕᑯᒃᓴᐅᑎᑦᑎᕗᑦ ᒥᕐᖑᐃᓯᕐᕕᓕᕆᓂᖕᒧᑦ ᐃᓗᓕᖏᓐᓂᒃ, ᑕᐅᑐᖑᐊᕐᓗᒋᑦ ᑖᒃᑯᐊ, ᓇᓗᓇᐃᖅᓯᕕᑦ ᖃᐅᓕᐅᖅᑕᐅᕙᓪᓕᐊᔪᓂᑦ, ᐊᒻᒪᓗ ᐋᖅᑭᒃᓯᕙᒃᐳᑦ ᐆᒃᑐᕋᒐᒃᓴᐅᔪᓂᒃ ᑐᕌᕆᔭᐅᔪᓄᑦ. ᖃᓄᐃᓕᐅᕈᑕᐅᔪᒪᔪᑦ ᐊᕙᑎᒥᒃ ᖃᐅᔨᓴᕐᓂᕐᒧᑦ, ᓇᐃᒡᓕᒋᐊᖅᓯᒪᔪᑦ ᐸᕐᓇᐅᑎᑦ, ᕿᒥᕐᕈᐊᒃᑲᓐᓂᕐᓗᑎᒃ ᓂᕆᐅᒋᔭᐅᔪᓂᒃ ᖃᓄᐃᓕᖓᖁᔭᐅᔪᑦ ᐊᑐᓕᖅᑎᑕᐅᓗᑎᒃ ᑖᒃᑯᐊ ᐸᕐᓇᐅᑏᑦ ᐊᓯᖏᓪᓗ ᐱᓕᕆᐊᒃᓴᐃᑦ ᐊᓯᔾᔨᕐᓂᕆᔭᐅᔪᑦ ᐊᒃᑐᖅᓯᑐᐃᓐᓇᕆᐊᓖᑦ ᒥᕐᖑᐃᓯᕐᕕᖕᒥᒃ.

ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ, ᐊᓯᖏᑎᑐᑦ ᑲᓇᑕᒥ ᐃᑦᑕᕐᓂᓴᖃᕐᕕᓕᑦ, ᐊᓯᔾᔨᖅᐸᓪᓕᐊᔪᒻᒪᕆᐅᒻᒪᑕ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᕙᑎᑦᑎᓃᑦᑐᑦ ᐆᒪᔫᖃᑎᒌᓪᓗ ᐊᓯᔾᔨᖃᓯᐅᑎᓕᕐᖓᑕ, ᐊᒃᑐᐃᓯᒪᔪᑦ ᐃᓕᖅᑯᓯᑐᖃᒃᑯᑦ ᐱᐅᓯᑦᑎᓐᓂᑦ ᐊᒻᒪ ᐃᓕᖅᑯᓯᑐᖃᕗᑦ ᓯᕗᓕᑦᑎᓐᓃᓐᖔᕐᑐᑦ ᓄᓇᒥᐅᑕᑦ, ᐊᑦᑕᓇᕐᑐᒦᓕᕐᑐᑎᖕ ᐱᖁᑎᕐᔪᐊᑦ ᐊᐅᓚᔪᓐᓇᐅᑏᑦ ᓄᓇᒥᐅᑕᓪᓗ, ᐊᒻᒪ ᐊᓯᔾᔨᖅᐸᓪᓕᐊᔪᑦ ᑭᒃᑯᑐᐃᓐᓇᑦ ᒥᕐᖑᐃᓯᕐᕕᒦᓐᓂᖏᓐᓂ ᐅᔾᔨᕆᕙᓪᓕᐊᔭᖏᑦ. ᐊᓯᔾᔨᕐᐸᓪᓕᐊᔪᓄᑦ ᓱᖏᐅᑎᖁᓪᓗᑕ ᐊᓯᔾᔨᖃᓯᐅᑎᓂᒃᑯᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᐃᑲᔫᑕᐅᔪᓐᓇᕐᑐᓂᑦ ᓇᓕᐊᓐᓄᑐᐃᓐᓈᖓᔪᓐᓇᕐᓂᖕᒥᓪᓗ ᐊᖅᑯᓯᐅᕋᓱᑦᑐᑦ. ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᖓᓄᓪᓕ, ᐱᖃᓯᐅᔾᔭᐅᓯᒪᔪᑦ ᖃᐅᔨᓴᕆᐊᓕᓐᓂᑦ ᐊᓯᔾᔨᖅᐸᓪᓕᐊᖏᓐᓇᑐᓂᑦ ᓇᓗᓇᐃᖅᓯᕙᓪᓗᑎᑦ ᓇᐅᒃᑯᑦ ᐋᖅᑭᒋᐊᕆᔪᑦᓴᐅᒻᒪᖔᑦᑕ, ᐊᒻᒪᓗ ᐱᓇᓱᖃᑎᒋᓗᒋᑦ ᐃᓄᐃᑦ ᑲᑐᔾᔨᖃᑎᒋᕙᑦᑕᕗᑦ ᒥᕐᖑᐃᓯᕐᕕᓕᕆᕙᑦᑐᓪᓗ ᐅᓂᒃᑳᕈᓐᓇᖁᓪᓗᒋᑦ ᐊᐅᓚᑦᑎᓂᖕᒧᑦ ᐃᓱᒪᓕᐅᕈᑕᐅᒋᐊᓕᓐᓂᑦ. ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᓱᓕ ᐱᓂᐊᕐᓂᖃᓪᓚᕆᑦᑐᑦ ᐊᕙᑎᑦᑎᓃᑦᑐᓂᑦ ᐆᒪᔫᖃᑎᒌᓕᒫᓂᓪᓗ ᐱᕈᕐᑐᓂᑦ ᐱᐅᖅᓱᐊᕆᐊᑦᓴᖅ, ᐃᓕᖅᑯᓯᑐᖃᒃᑯᑦ ᐱᐅᓯᕐᓂᑦ, ᐊᒻᒪᓗ ᑐᑭᓕᓐᓂᑦ ᖃᐅᔨᒪᑎᑦᓯᓂᒃᑯᑦ ᒫᓐᓇ ᑭᖑᕚᑦᑎᓐᓄᓪᓗ ᑐᑭᓯᐅᒪᒍᑎᑦᓴᓂᑦ, ᐊᒻᒪᓗ ᐊᓐᓇᐅᒪᑦᓯᐊᕐᓂᒃᑯᑦ ᐱᓕᕆᐊᕆᓗᒋᑦ ᐃᓕᑕᕆᓯᒪᓗᒋᑦ ᐊᐅᓚᑦᑎᓂᖕᒧᑦ, ᑮᓇᐅᔭᓕᕆᓂᖕᒧᑦ ᐊᒻᒪᓗ ᐊᕙᑎᓕᕆᓂᖕᒧᑦ ᖃᓄᐃᓕᒍᓐᓇᓗᐊᖏᑕᕗᑦ ᑭᓪᓕᖃᐅᕐᓂᖏᓐᓄᑦ.

ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ ᐊᐅᓚᑦᑎᓂᖕᒧᑦ ᐸᕐᓇᐅᑎᖓ ᐊᑐᖅᑕᐅᓂᐊᕐᖓᑦ ᐃᓱᒪᓕᐅᕆᐊᖃᓕᕋᐃᑉᐸᑕ ᓴᓇᕐᕈᑕᐅᕙᓪᓗᓂ ᖃᓄᐃᓕᐅᕐᑎᑦᓯᓂᐊᕋᐃᑉᐸᑕ ᒥᕐᖑᐃᓯᕐᕕᒻᒥ ᐊᒻᒪᓗ ᐊᔪᕆᕐᓯᐅᔾᔨᒍᑕᐅᓗᓂ ᓇᓗᓇᐃᔭᕐᓯᒪᑦᓯᐊᕐᑐᓂᑦ ᐸᕐᓇᐅᑎᓕᐅᕈᓐᓇᖁᓪᓗᑕ ᐅᓂᒃᑳᓕᐅᕐᐸᓪᓗᑕᓗ ᐊᕐᕌᒍᓄᑦ ᖁᓕᐅᓂᐊᕐᑐᑦ ᐃᓗᐊᓂ. ᐸᕐᓇᐅᑎ ᐱᔨᑦᓯᕈᑕᐅᓂᐊᕐᖓᑦ ᑖᕗᖓᓕᒫᖅ ᐅᖃᖃᑎᒌᒍᑕᐅᕙᓪᓗᓂ ᑲᔪᓯᒋᐊᓕᓐᓄᑦ, ᓄᓇᓖᑦ ᐃᓚᒋᔭᐅᑎᑕᐅᓂᖏᓐᓄᑦ ᑲᔾᔭᐅᓴᕕᒋᓯᓐᓈᑦ ᓴᐳᔾᔨᔨᐅᓯᓐᓈᕐᓗᑎᓪᓗ ᓄᓇᒥᓐᓂᖕ ᒥᕐᖑᐃᓯᕐᕕᒻᒥ ᐊᒻᒪᓗ, ᐊᑲᐅᓈᕋᐃᑉᐸᑦ, ᐅᖃᖃᑎᒌᓐᓂᒃᑯᑦ ᑐᓴᖃᑦᑕᐅᑎᕙᓪᓗᑎᑦ ᐊᐅᓚᑦᑎᓂᐅᑉ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᖓᑕ ᒥᑦᓵᓄᑦ ᐊᕐᕌᒍᓂ ᐊᒡᒋᕐᑐᓂ.

ᓄᓇᖑᐊᖅ 1: ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ ᐊᒡᒍᕐᓯᒪᔪᑎᒍᑦ ᓱᑯᑦᑎᐊᓃᒻᒪᖔᑦ

ᓄᓇᖑᐊᖅ 1: ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ ᐊᒡᒍᕐᓯᒪᔪᑎᒍᑦ ᓱᑯᑦᑎᐊᓃᒻᒪᖔᑦ — ᑎᑎᕋᖅᓯᒪᓂᖏᑦ

ᑕᕝᕙᓂ ᑲᓇᑕᐅᑉ ᐅᑭᐅᖅᑕᖅᑐᐊᑕ ᐅᖅᑯᐊᓃᑦᑐᑦ ᓄᓇᓐᖑᐊᖓ, ᓴᖅᑭᔮᕐᑐᑦ ᕿᑭᖅᑖᓗᖕᒦᑦᑐᑦ ᓄᓇᕗᒥ. ᐱᖃᓯᐅᔾᔭᐅᓯᒪᔪᑦ ᓴᐳᔾᔨᕖᑦ ᐊᐅᓚᑕᐅᔪᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᓐᓄᑦ, ᓄᓇᓖᑦ, ᕿᑭᖅᑕᒥᐅᑦ, ᐊᒻᒪ ᐃᒪᖏᑦ. ᑎᕆᕐᕈᐊᓂ ᐊᑎᖔᖓᓂ ᓇᓗᓇᐃᒃᑯᑏᑦ ᓱᑯᑦᓯᐊᓃᒻᒪᖔᑕ ᓄᓇᕗᑦ ᑲᓇᑕᐅᑉ ᐅᑭᐅᖅᑕᖅᑐᐊᑕ ᐅᖅᑯᐊᓂ.

ᓄᓇᖓ ᐊᒻᒪ ᓱᑯᑦᓯᐊᓃᒻᒪᖔᑦ: ᓄᓇᓐᖑᐊᒦᑦᑐᑦ ᐅᐊᓐᓇᖅᐸᓯᐊᓄᐊᖓᔪᑦ ᐊᒻᒪ ᕿᑭᖅᑖᓘᑉ ᕿᑎᐊᓃᑦᑐᓂ. ᑲᓇᓐᓇᖓᓃᑦᑐᖅ, ᓯᕕᑐᔪᑲᓪᓚᐅᓪᓗᓂ ᐃᑭᖓ ᓇᓗᓇᐃᖅᓯᒪᔪᖅ ᕿᑭᖅᑖᓘᑉ ᐃᑭᖓᓂᑦ, ᐊᑯᑭᑦᑐᕐᒥᐅᑦ ᑲᓛᖡᑦ ᓄᓈᓄᑦ. ᓂᒋᐊᓄᑦ ᐃᑭᕋᓴᕐᔪᐊᖅ, ᑯᐱᒃ ᐅᐊᓐᓇᖓ ᑕᐅᓇᓂᒃᑲᓐᓂᖅ.

ᑲᓇᑕᐅᑉ ᒥᕐᖑᐃᓯᕐᕕᖏᑦ

• ᐊᐅᔪᐃᑦᑑᑉ ᒥᕐᖑᐃᓯᕐᕕᖓ ᐆᔭᐅᔭᐅᓪᓗᓂ ᑖᕐᓂᖅᓴᖅ ᕿᑭᖅᑖᓘᑉ ᓂᒋᐊᑕ ᑲᓇᓐᓇᖅᐸᓯᐊᓃᑦᑐᖅ. ᓯᕕᑐᓂᖓ ᐊᑯᓐᓂᖓᓂᑦ ᐸᓐᓂᖅᑑᑉ ᑕᓯᐅᔭᖓᓂᑦ ᑎᓄᔾᔨᕕᒻᒥᑦ ᕿᑭᖅᑖᓘᑉ ᐃᑭᖓᑕ ᓯᓈᖓᓄᑦ.
• ᐊᓯᖏᑦ ᑲᓇᑕᐅᑉ ᒥᕐᖑᐃᓯᕐᕕᖏᑦ ᕿᑭᖅᑖᓗᖕᒥ ᐆᔭᐅᔭᑦ ᑖᓐᖏᓂᕐᓴᑦ;
  • ᓯᕐᖕᒥᓕᐅᑉ ᒥᕐᖑᐃᓯᕐᕕᖓ ᑲᓇᑕᒥ ᒥᑦᑎᒪᑕᓕᐅᑉ ᐃᑉᐱᐊᕐᔫᓪᓗ ᖃᓂᒋᔮᓃᑦᑐᖅ.
  • ᖃᐅᓱᐃᑦᑑᑉ ᒥᕐᖑᐃᓯᕐᕕᖓ ᑲᓇᑕᒥ ᐅᐊᓐᓇᖓᓃᑦᑐᖅ ᐱᓇᓐᓇᖅᐸᓯᐊᓂ, ᖃᐅᓱᐃᑦᑑᑉ ᐅᖓᑖᓃ.
  • ᐅᒃᑯᓯᒃᓴᓕᐅᑉ ᒥᕐᖑᐃᓯᕐᕕᖓ ᑲᓇᑕᒥ ᓇᐅᔮᑦ ᓄᓇᕕᐊᓃᑦᑐᖅ.

ᑲᓇᑕᐅᑉ ᑕᕆᐅᕐᒥᐅᑕᓂᑦ ᓴᐳᔾᔨᕕᖏᑦ

• ᑕᓪᓗᕈᑎᐅᑉ ᐃᒪᖓ ᑲᓇᑕᐅᑉ ᑕᕆᐅᕐᒥᐅᑕᓂᑦ ᓴᐳᔾᔨᕕᖓ, ᑐᖑᔪᕈᔪᑦᑐᒦᑦᑐᖅ ᓄᓇᓐᖑᐊᒥ, ᕿᑭᖅᑖᓘᑉ ᐅᐊᓐᓇᖓᓃᑦᑐᖅ ᐊᑯᓐᓂᖓᓂ ᖃᐅᓱᐃᑦᑑᑉ ᒥᑦᑎᒪᑕᓕᐅᓪᓗ.
• ᑕᖑᔪᕐᓂᖅᓴᒦᑦᑐᑦ ᐱᒋᐊᕐᐸᓪᓕᐊᔭᐅᓕᑕᐃᓐᓇᕐᑐᑦ ᑐᑦᓯᕌᖑᓯᒪᔪᑦ ᑕᕆᐅᕐᒥᐅᑕᓂᑦ ᓴᐳᔾᔨᕕᐅᖁᓪᓗᒋᑦ ᕿᑭᖅᑖᓘᑉ ᓂᒋᐊᓂ ᑲᓇᓐᓇᖓᑕᓗ ᓯᓈᖓᓂ, ᐃᓚᓕᐅᔾᔭᐅᓯᒪᔪᑦ ᐸᓐᓂᖅᑑᑉ ᑕᓯᐅᔭᕐᔪᐊᖓᓂᑦ ᑎᓄᔾᔨᕕᒻᒥᑦ ᐊᒻᒪ ᐊᒥᑦᑑᑉ ᑕᕆᐅᖓᑕ ᖃᓂᒋᔮᓄᑦ.

ᕿᑭᖅᑖᓗᖕᒥ ᓄᓇᓖᑦ ᐊᑎᖏᑦ

• ᐃᖃᓗᐃᑦ ᓂᒋᐊᓃᑦᑐᖅ (ᓄᓇᕗᒥ ᐊᖏᔪᖅᑳᒃᑯᕕᒃ).
• ᐸᓐᓂᖅᑑᖅ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᑕ ᓂᒋᐊᓃᑦᑐᖅ ᐊᒻᒪ ᑎᓄᔾᔨᕕᐅᑉ ᐅᐊᓐᓇᖓᑕ ᑲᓇᓐᓇᖅᐸᓯᐊᓂ.
• ᕿᑭᖅᑕᕐᔪᐊᖅ ᑲᓇᓐᓇᖅᐸᓯᐊᓃᑦᑐᖅ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᑕ, ᕿᑭᖅᑖᓗᖕᒥ ᐅᖅᑯᒥᐅᑦ ᓯᓈᖓᓂ.
• ᑲᖏᖅᑐᒑᐱᒃ ᐅᐊᓐᓇᖓᓃᓐᓂᖅᓴᖅ ᐅᖅᑯᒥᐅᑦ ᓯᓈᖓᓂ.
• ᒥᑦᑎᒪᑕᓕᒃ ᐃᑉᐱᐊᕐᔪᓪᓗ ᐅᐊᓐᓇᒃᑲᓐᓂᐊᓃᑦᑐᑦ.

ᐊᓯᖏᑦ ᓄᓇᓐᖑᐊᒥ ᐃᓕᓴᕐᓇᕈᑏᑦ

• ᐅᑭᐅᖅᑕᖅᑑᑉ ᑭᓪᓕᖓ ᓴᓂᒧᑦ ᑎᑎᑯᑖᑦᓯᒪᔪᖅ ᕿᑭᖅᑖᓘᑉ ᓂᒋᐊᓂᖕ ᐱᒋᐊᕐᑐᓂ, ᐊᐅᔪᐃᑦᑑᑉ ᒥᕐᖑᐃᓯᕐᕕᖓᑕ ᑭᓪᓕᖓᑕ ᓂᒋᐊᒍᑦ.
• ᐃᒪᕕᐊᓗᐃᑦ ᐊᕙᓗᐊᓃᑦᑐᑦ ᓇᓗᓇᐃᕐᓯᒪᔪᑦ, ᐱᖃᓯᐅᔾᔭᐅᓯᒪᔪᑦ ᓴᓐᓂᕈᑎᐅᑉ ᐃᒪᕕᖓ ᐅᐊᓐᓇᖓᑕ ᑲᓇᓐᓇᖅᐸᓯᐊᓂ ᐊᒻᒪ ᑕᓪᓗᕈᑎᐅᑉ ᐃᒪᖓ ᐅᐊᓐᓇᖓᑕ ᐱᓇᓐᓇᖅᐸᓯᐊᓂ.

ᐅᓂᒃᑳᖏᑦ (ᑎᑎᕋᕐᓯᒪᓪᓗᑎᖕ ᓇᓗᓇᐃᕐᓯᓯᒪᔪᑦ)

• ᐆᔭᐅᔭᖅ ᑖᕐᓂᖅᓴᖅ: ᐊᐅᔪᐃᑦᑑᑉ ᒥᕐᖑᐃᓯᕐᕕᖓ
• ᐆᔭᐅᔭᖅ ᖃᐅᒪᓂᖅᓴᖅ: ᐊᓯᖏᑦ ᑲᓇᑕᐅᑉ ᒥᕐᖑᕐᓯᕐᕕᖏᑦ
• ᑐᖑᔪᐊᖓᓂᖅᓴᖅ: ᑕᓪᓗᕈᑎᐅᑉ ᐃᒪᖓ ᑲᓇᑕᐅᑉ ᑕᕆᐅᕐᒥᐅᑕᓂᑦ ᓴᐳᔾᔨᕕᖓ
• ᑐᖑᔪᖅᑕᖅ ᑖᕐᓂᖅᓴᖅ: ᑐᑦᓯᕌᖑᓯᒪᔪᑦ ᑲᓇᑕᒥ ᑕᕆᐅᕐᒥᐅᑕᓂᑦ ᓴᐳᔾᔨᕕᑦᓴᐅᖁᔭᐅᔪᑦ
• ᕿᑭᕐᓂᖅᑕᑦ ᑯᑯᕙᑦ: ᓄᓇᓖᑦ

ᓯᕕᑐᓂᖏᑕ ᐅᖓᓯᒌᓐᓂᖏᑕ (0–200 ᑭᓚᒦᑕᑦ) ᐊᑖᓂ ᑎᑎᖅᓯᒪᔪᑦ.

2.0 ᐱᒻᒪᕆᐅᓂᖓ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ

ᑕᓪᓕᒪᒋᔭᐅᓪᓗᓂ ᐊᖏᓛᖑᖃᑕᐅᔪᖅ ᑲᓇᑕᒥ ᒥᕐᖑᐃᓯᕐᕕᒃ, ᐊᐅᔪᐃᑦᑐᖅ ᓄᓇᖓ ᐊᖏᑎᒋᔪᖅ 19,089 km² ᓯᕕᑐᓂᖓ ᓄᓇᖓ, ᐊᐅᔪᐃᑦᑐᖅ, ᐃᒪᖏᓪᓗ (ᓄᓇᖑᐊᖅ 2). ᕿᑭᖅᑕᕐᔪᐊᖅ ᐸᓐᓂᖅᑑᕐᓗ ᐊᑦᑐᐊᓪᓗᑎᖕ ᖃᓂᓐᓂᖅᐹᖕ ᓄᓇᖏᒃ. ᐃᓄᐃᑦ ᓂᕈᐊᓚᐅᕐᑕᖓᑦ ᐊᐅᔪᐃᑦᑐᖅ, ᐃᓄᒃᑎᑐᑦ ᑐᑭᓕᒃ “ᓄᓇᖓ ᐊᐅᔪᐃᑦᑐᖅ,” ᐅᑭᐅᖅᑕᖅᑑᑉ ᒥᕐᖑᐃᓯᕐᕕᖓ ᓯᕐᖕᒥᖃᐅᕐᑐᓂ, ᐊᔾᔨᒌᖏᔾᔪᑎᒋᔭᖓ ᐊᕙᑎᖓ ᖃᓄᓪᓗ ᐊᐅᓪᓚᑦᑎᕙᒻᒪᖔᑕ ᐃᓄᐃᑦ.

ᐊᐅᔪᐃᑦᑐᖅ ᐱᖅᑯᓯᓄᑦ ᐱᒻᒪᕆᐅᔪᖅ ᐃᓄᓐᓄᑦ ᐊᖏᕋᕆᔭᐅᓪᓗᓂ, ᐊᐅᓪᓚᖃᑦᑕᖅᑐᓄᑦ ᐊᖅᑯᑎᒋᔭᐅᓪᓗᓂ, ᓂᕿᔅᓴᓂᒐᓱᐊᓂᕐᒧᑦ, ᐊᒻᒪᓗ ᓇᔪᖅᑕᐅᖏᓐᓇᖅᑐᖅ ᓄᓇᐅᔪᑦ. ᐃᓄᐃᑦ ᓄᓇᖃᖅᓯᒪᔪᑦ ᑕᒫᓂ ᒥᕐᖑᐃᓯᕐᕕᐅᓕᕐᑐᒥ ᐊᑯᓂᕐᔪᐊᕌᓗᒃ ᐊᕐᕌᒍᕋᓵᓗᐃᑦ 3,500−ᖏᓐᓃᑦᑐᑦ ᓯᕗᓕᑦᑎᓐᓂᑦ, ᐱᒋᐊᕐᑐᒥᓂᐅᓂᕋᕐᑕᑦ ᐹᓕᐅ−ᐃᓄᐃᑦ ᓯᕗᓕᕕᓂᕐᐳᑦ ᑎᑭᓚᐅᕐᓯᒪᓐᓂᕐᖓᑕ ᐅᐊᓕᓂᕐᒥᑦ. ᓄᓇᖃᖅᕕᒥᓂᑐᖃᐃᑦ ᐃᑦᑕᕐᓂᓴᖏᑎᒍᑦ ᖃᐅᔨᔭᐅᓯᒪᓕᕐᑐᖅ ᑐᓃᑦ (ᑐᐊᓯᑦ) ᐃᓄᐃᑦ ᓄᓇᖃᕐᓂᑯᑐᖄᓗᐃᑦ ᕿᑭᖅᑖᓗᖕᒥ ᐊᕐᕌᒍᑦ 2,800-ᖏᓐᓂᑦ ᓯᕗᓕᑐᖃᕗᑦ, ᑭᖑᕐᕕᑦᑕᐅᓪᓗᑎᑦ ᑑᓕᓄᑦ ᐃᓄᓐᓄᑦ ᐃᒻᒪᖃ 700 ᐊᕐᕌᒍᑦ ᐊᓂᒍᕐᓯᒪᓕᕐᑐᑦ ᓄᓇᖃᕐᓂᑰᓕᕐᑐᑦ. ᐅᖃᐅᓯᒃᑯᑦ ᐅᓂᒃᑳᕐᑐᐊᑐᖃᑦ ᐅᓂᒃᑳᖃᕐᖓᑕ ᐃᖏᕐᕋᐃᓇᖅᐸᓐᓂᖏᓐᓂᑦ ᓄᓇᒥᒍᑦ ᐃᓄᐃᑦ ᐊᒻᒪᓗ ᐆᒪᔪᖅᓯᐅᖅᑎᐅᒋᐊᖏᑦ ᐊᖑᓇᓱᓐᓂᒃᑯᑦ, ᐊᒥᓱᑦ ᓄᓇᐅᔪᑦ ᐃᓄᐃᑦ ᐃᓚᒌᑦ ᐅᐸᖃᑦᑕᖅᑕᖏᑦ ᐅᓪᓗᒥ ᑲᔪᓰᓐᓇᖅᓯᒪᔪᑦ ᑭᖑᕚᕇᖃᑦᑕᐅᑎᔪᓄᑦ. ᐊᒃᓵᔫᑉ ᐊᖅᑯᑖ, ᐊᖅᑯᑎᒋᔭᐅᓪᓗᐊᑕᖅᑐᖅ ᒥᕐᖑᐃᓯᕐᕕᒃᑯᑦ, ᐊᖅᑯᑕᐅᖏᓐᓇᐅᔭᕐᑐᖅ ᑕᒫᓂᕐᒥᐅᓄᑦ ᑕᐅᖅᓰᖃᑦᑕᐅᑎᕙᑦᑐᓄᑦ ᐊᕐᕌᒍᑦ ᖁᓕᑦ ᐊᓂᒍᕐᑐᓂ, ᐊᖅᑯᑕᐅᓪᓗᐊᑕᕐᑐᓂ ᐋᓐᓂᐊᕕᓕᐊᕈᔾᔭᐅᔪᓄᑦ ᖃᓂᒋᔭᖏᓐᓂᑦ ᐃᓄᓐᓂᑦ ᓴᐃᓐᑦ ᓗᒃ ᐋᓐᓂᐊᕕᖓᓄᑦ ᐸᓐᓂᖅᑑᒥ ᐃᓅᓕᓴᕐᑕᐅᓪᓗᑎᑦ, ᒫᓐᓇᒧᑦ ᓱᓕ ᑲᓱᖅᕕᓪᓗᐊᑕᐅᔪᖅ ᑲᑎᓐᖓᔾᔪᑕᐅᓪᓗᓂ ᓄᓇᖅᑲᑎᒌᓄᑦ. ᐃᓄᐃᑦ ᖃᐅᔨᒪᔭᑐᖃᖏᑦ, ᐃᓄᑦᑎᑐᑦ ᓄᓇᐃᑦ ᐊᑎᖏᑦ, ᐊᒻᒪᓗ ᐊᑎᖃᕐᕕᖏᑦ ᑲᑎᓐᖓᑎᑦᑎᑏᓐᓇᖅᑐᑦ ᐃᓄᓐᓂᑦ, ᓯᕗᓕᕆᓚᐅᖅᑕᖏᓐᓂ, ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ.

ᑕᑎᒋᔭᐅᓂᒃᑯᑦ ᓂᐱᒋᔭᐅᓂᒃᑯᓪᓗ ᐊᒻᒪ ᓯᕗᓕᕐᑎᖃᑦᓯᐊᕐᓂᒃᑯᑦ, ᑲᓇᑕᒥ ᐃᓄᐃᑦ ᑕᐱᕇᑦ ᑲᓇᑕᒥ ᑲᑐᔾᔨᖃᑎᒌᖏᑦ ᐃᑲᔪᓪᓚᕆᓚᐅᕐᑐᑦ ᐊᓯᔾᔨᕐᑕᐅᓂᖓᓂᑦ ᑲᓇᑕᐅᑉ ᒥᕐᖑᐃᓯᕐᕕᖏᑕ ᐱᖁᔭᖓᑦ ᓴᖅᑭᓚᕿᓚᐅᕐᓯᒪᔪᖅ ᐊᐅᔪᐃᑦᑐᖅ ᐱᓐᖑᕐᑎᑕᐅᓂᖓᒍᑦ ᓄᓇᕗᒥ ᓯᕗᓪᓕᖅᐹᑦᓯᐊᖑᓪᓗᓂ ᒥᕐᖑᐃᓯᕐᕕᑦᓴᖅ ᓴᓂᕐᕙᕐᑕᐅᓪᓗᓂ 1976ᖑᑎᓪᓗᒍ. ᓄᑖᖅ ᒥᕐᖑᐃᓯᕐᕕᑦᓴᖅ ᓴᓂᕐᕙᖅᑕᐅᓂᖓᒍᑦ ᓄᓇᖃᖅᑐᑦ ᐃᓄᐃᑦ ᐊᖑᓇᓱᒍᓐᓇᕐᓯᓚᐅᕐᑐᑦ, ᐃᖃᓪᓕᐊᕈᓐᓇᕐᓯᓪᓗᑎᖕ ᐊᒻᒪ ᒥᑭᒋᔾᔨᕈᓐᓇᕐᓯᓪᓗᑎᖕ ᐊᐅᔪᐃᑦᑐᒥ, ᐊᒻᒪ ᐱᓐᖑᕐᑎᑕᐅᓂᖓ ᑲᓇᑕᐅᑉ ᒥᕐᖑᐃᓯᕐᕕᖓᑕ ᓄᖅᑲᖓᑎᑕᐅᑲᐃᓐᓇᓚᐅᕐᑐᖅ ᐱᔭᕇᕋᓱᓐᓂᖓᓂ ᓄᓇᕗᑦ ᐊᖏᕈᑎᖓ. ᐃᓄᐃᑦ ᐃᖅᑲᓇᐃᔭᕐᑏᑦ ᐊᒻᒪᓗ ᓄᓇᖃᖅᑐᑦ ᒫᓐᓇᒧᑦ ᓱᓕ ᖃᐅᔨᒪᓂᕐᒥᓂᑦ ᐃᓕᓴᐃᕙᑦᑐᑦ ᐊᔪᕆᖅᓯᐅᔾᔨᕙᑦᑐᑎᓪᓗ ᖃᓄᖅ ᐊᐅᓚᑕᐅᑦᑎᐊᑐᑦᓴᐅᒻᒪᖔᑦ ᒥᕐᖑᐃᓯᕐᕕᒃ ᐊᐅᓚᐃᓐᓇᕈᓐᓇᖁᓪᓗᒍ ᑭᖑᓂᐊᒍᑦ ᐊᕐᕌᒍᓂ, ᐃᓚᓕᐅᔾᔭᐅᓪᓗᓂ ᐃᓕᑕᕆᔭᐅᓂᒃᑯᑦ ᐃᑲᔪᖅᑎᐅᖃᑎᒌᓐᓂᒃᑯᑦ ᐊᐅᓚᑦᑎᒍᑎᑦᓴᓂᑦ ᐱᓐᖑᕐᑎᑦᓯᓪᓗᑎᑦ 2001 ᐊᕐᕌᒍᖓᓂ ᐊᑐᐃᓐᓇᓕᕐᑕᖓᓂᑦ. ᐃᓄᐃᑦ ᐃᓚᒋᔭᓪᓗᐊᑕᐅᖏᓐᓇᖅᑐᑦ ᒥᕐᖑᐃᓯᕐᕕᒻᒧᑦ ᐱᖅᑯᓯᓄᑦ ᐱᖅᑯᓯᑐᖃᖏᓐᓄᑦ ᐊᒻᒪᓗ ᐆᒪᓂᖃᖅᑐᑦ ᓇᔪᒐᕐᒥᓂᑦ.

ᐃᓗᐊᓂ ᑲᓇᑕᒥ ᒥᕐᖑᐃᓯᕐᕖᑦ ᐸᕐᓇᐅᑎᖓᓂ, ᐊᐅᔪᐃᑦᑐᖅ ᑭᒡᒐᖅᑐᐃᔪᖅ ᐅᐊᓐᓇᖓᓂ ᑕᐃᕕᔅ ᓄᓇᖓ ᐊᕕᑦᑐᖅᓯᒪᔪᒥᑦ, ᐊᕙᑎᖓ ᐃᓐᓈᕈᖃᐅᖅᑐᓂ, ᐊᐅᔪᐃᑦᑐᑦ, ᑲᖏᖅᑐᐃᑦ, ᐊᒻᒪᓗ ᐱᑕᖃᑦᑎᐊᖅᑐᑎ ᐃᒪᕐᒥᐅᑕᐃᑦ ᐆᒪᔪᐃᑦ. ᐃᓐᓈᕈᖏᑦ ᐊᐅᔪᐃᑦᑐᖃᑦᑎᐊᖅᑐᑦ ᐊᒻᒪᓗᑦᑕᐅᖅ ᐳᖅᑐᓛᖑᖃᑕᐅᔪᑦ ᐊᔾᔨᐅᖏᓐᓂᖅᐹᑦ ᐃᓐᓈᕈᖏᑦ ᑲᓇᑕᒥ, ᓲᕐᓗ ᖃᐃᖅᓱᐊᓗᒃ ᖃᑦᑕᐅᔭᖖᒍᐊᕐᓗ. ᓄᓇᖓ ᐊᑦᑎᑦᑐᒥ ᐊᒻᒪᓗ ᐃᒪᖏᑦ ᓇᔪᖅᑕᐅᒐᔪᑦᑐᑦ ᐊᔾᔨᒌᖏᑦᑐᓄᑦ ᐆᒪᔪᕐᓄᑦ ᐱᒻᒪᕆᐅᔪᑦ ᐃᓄᓐᓄᑦ, ᐱᖃᑕᐅᓪᓗᑎ ᑐᑦᑐᐃᑦ, ᐃᖃᓗᐃᑦ, ᑎᒻᒥᐊᑦ, ᐅᑲᓖᑦ, ᐊᒪᕈᑦ ᑎᕆᒐᓂᐊᓪᓗ. ᐃᒪᕐᒥᐅᑕᓕᕆᔨᒃᑯᑦ ᑲᓇᑕᒥ ᐃᓱᒪᒋᔭᖃᖅᑐᑦ ᐊᐅᔪᐃᑦᑐᖅ ᑲᖏᖅᑐᖏᑦ ᐃᓚᒋᓪᓗᓂᒋᑦ ᕿᑭᖅᑖᓗᒻᒥ ᐃᒪᐅᑉ ᑭᓪᓕᖏᑦ ᐊᕙᑎᖓᓄᑦ ᐊᒻᒪᓗ ᐆᒪᔪᓄᑦ ᐱᒻᒪᕆᐅᓪᓗᑎ ᓇᒦᓐᓂᖏᑦ. ᑖᒃᑯᐊ ᐱᑕᖃᑦᑎᐊᖅᑐᑦ ᐃᒪᐃᑦ ᐊᕙᑎᖏᑦ ᓇᔪᒐᐅᔪᑦ ᓇᓄᕐᓄᑦ, ᐃᒪᕐᒥᐅᑕᓄᑦ ᑎᒻᒥᐊᓄᑦ, ᐊᕐᕕᕐᓄᑦ, ᐃᒪᕐᒥ ᐆᒪᔪᖃᕐᕕᑦ, ᑑᒑᓖᑦ, ᐃᖃᓗᐃᑦ, ᓇᑦᑏᑦ, ᐊᐃᕖᑦ, ᕿᓚᓗᒐᕐᓄᓪᓗ. ᑕᕆᐅᖓ ᐊᑕᔪᖅ ᒥᕐᖑᐃᓯᕐᕕᐅᑉ ᑭᓪᓕᖓᓃᑦᑐᖅ ᐃᓚᒋᔭᐅᓪᓗᓂ ᑐᑦᓯᕌᖑᓯᒪᔫᑉ ᑎᓄᔾᔨᕕᒻᒥ ᐊᒻᒪᓗ ᕿᑭᖅᑖᓘᑉ ᐃᑭᕋᓴᖓᓂ ᐃᒪᕕᐊᓂᑦ ᓴᐳᔾᔨᕕᑦᓴᖓᓄᑦ.

ᐳᓚᕋᖅᑏᑦ ᑲᓇᑕᓕᒫᒦᖔᐸᑦᑐᑦ ᐊᒻᒪᓗ ᓯᓚᕐᔪᐊᒥᑦ ᐊᑐᕐᓂᖃᖅᑐᑎᑦ ᐊᐅᔪᐃᑦᑐᖅ. ᐱᐅᔪᒪᕆᐊᓗᒃ ᐊᒃᓵᔫᑉ ᐊᖅᑯᑎᖓ ᐊᑐᖅᑕᐅᔪᒪᕙᑦᑐᖅ ᐱᓱᖃᑦᑕᖅᑐᓄᑦ, ᓯᐊᕐᕆᔮᖅᑎᓄᑦ, ᐊᒻᒪᓗ ᐃᓐᓈᕈᖅᓯᐅᖅᑎᓄᑦ ᐊᒥᓱᓄᑦ ᐊᕐᕌᒍᓄᑦ. ᒥᕐᖑᐃᓯᕐᕕᒃ ᐊᒥᓱᕈᕆᐊᖅᑎᑦᑎᔪᖅ ᐱᕕᔅᓴᐅᔪᓐᓇᖅᑐᓂᑦ ᑲᓇᑕᒥᐅᑕᓄᑦ ᐃᓕᓪᓗᑎ ᐃᓄᓐᓂᑦ ᐱᖅᑯᓯᑐᖃᖏᓐᓂ ᐊᒻᒪᓗ ᐱᖅᑯᓯᖏᓐᓂ, ᑕᕝᕙᑦᓴᐃᓐᓇᕐᓗ ᑕᖅᑲᒃᑯᓄᖓ ᓴᖅᑭᔮᕐᑎᑦᓯᓂᒃᑯᑦ ᖃᕆᓴᐅᔭᒃᑰᖓᔪᓂᑦ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᓂᖕ ᓯᓚᖅᑲᑎᑦᑎᓐᓄᑦ ᑕᑯᓐᓇᕐᑕᐅᔪᓐᓇᕐᑐᓂᑦ.

ᓄᓇᖑᐊᖅ 2: ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᖓ ᓄᓇᓕᓐᓄᑦ ᖃᓂᓐᓂᖓ ᓱᑯᑦᓯᐊᓃᒻᒪᖔᑦ

ᓄᓇᖑᐊᖅ 2: ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᖓ ᓄᓇᓕᓐᓄᑦ ᖃᓂᓐᓂᖓ ᓱᑯᑦᓯᐊᓃᒻᒪᖔᑦ — ᑎᑎᕋᖅᓯᒪᓂᖏᑦ

ᑖᓐᓇ ᓄᓇᓐᖑᐊᖓ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᑕ ᐊᑯᓐᓂᖓᓃᑦᑐᖅ ᑕᓪᓗᕈᑎᐅᑉ ᓂᒋᐊᑕ ᐱᓇᓐᓇᖅᐸᓯᐊᓂᑦ ᕿᑭᖅᑖᓘᑉ ᐃᑭᖓᑕ ᐅᐊᓐᓇᖓᓄᑦ ᑲᓇᓐᓇᖅᐸᓯᐊᓄᑦ. ᒥᕐᖑᐃᓯᕐᕕᒃ ᐆᔭᐅᔭᐅᓪᓗᓂ ᐊᒻᒪ ᓄᓇᐅᓂᖓ, ᓯᕐᖕᒦᑦ ᐊᒻᒪ ᐃᒪᖃᐅᕐᓂᖏᑦ ᑖᕐᓂᖅᓴᐅᓪᓗᑎᑦ.

ᕿᑭᖅᑕᕐᔪᐊᑉ ᓄᓇᖓ ᑲᓇᓐᓇᖅᐸᓯᐊᓃᑦᑐᖅ 25 ᑭᓚᒦᑕᓂᑦ ᐅᖓᓯᓐᓂᓕᒃ ᒥᕐᖑᐃᓯᕐᕕᐅᑉ ᑭᓪᓕᖓᓂᑦ ᐊᒻᒪ ᐸᓐᓂᖅᑐᖅ ᐃᒻᒪᖃ 25 ᑭᓚᒦᑕᓂᑦ ᐅᖓᓯᓐᓂᓕᒃ ᓂᒋᐊᓃᑦᑐᓂ. ᑎᑎᑯᑖᑦᓯᒪᔪᖅ ᑲᔫᓪᓗᓂ 100 ᑭᓚᒦᑕᓂᑦ ᓯᕕᑐᓂᓕᒃ ᐃᓪᓕᓂᑐᖃᖅ ᐃᖏᕐᕋᕕᐅᕙᑦᑐᖅ ᐊᒃᓵᕐᔫᑉ ᐊᖅᑯᑖ ᓂᒋᐊᓂᑦ ᑲᓇᓐᓇᖓᓄᑦ ᒥᕐᖑᐃᓯᕐᕕᐅᑉ ᓂᒋᐊᑕ ᑲᓇᓐᓇᖓᒍᑦ. ᐃᓚᖓᒍᑦ ᐃᓄᐃᑦ ᓄᓇᖁᑎᓪᓛᔪᑦ ᒥᕐᖑᐃᓯᕐᕕᒻᒥ ᓯᐊᕐᓇᒥᖕ ᐊᒥᐊᓖᑦ. ᓯᕕᑐᓂᖏᑕ ᐅᖓᓯᒌᓐᓂᖏᑦ (0–40 ᑭᓚᒦᑕᑦ) ᓴᖅᑭᔮᕐᑐᑦ ᖁᓛᓂ ᑕᓕᖅᐱᐊᓂ.

ᓄᓇᓐᖑᐊᖅ ᐅᐊᓐᓇᖓᓄᑦ ᓵᓐᖓᓂᖅᓴᖅ. ᐅᓂᒃᑳᖏᑦ ᑭᑉᐹᕆᑦᑐᓂ ᐱᖃᓯᐅᔾᔨᓯᒪᔪᑦ ᓈᓴᐅᑎᑎᒍᑦ ᐃᓄᒃᑎᑑᖅᑐᓂᑦ ᐊᒻᒪ ᐃᓕᑕᕆᔭᐅᓯᒪᔪᑦ ᓄᓇᑐᖃᐃᑦ ᐊᑎᖏᑦ ᐃᒪᖃᐅᕐᓂᖏᑦ ᒥᕐᖑᐃᓯᕐᕕᒻᒥ. ᐊᑐᓂ ᓈᓴᐅᑎᑎᒎᖓᔪᑦ ᓄᓇᑐᖃᐃᑦ ᐊᑎᖏᑦ ᒪᓕᑦᓯᒪᔪᑦ ᓄᓇᓐᖑᐊᒥ ᓱᑯᑦᓯᐊᓃᓐᓂᖏᓐᓂᑦ.

ᒥᕐᖑᐃᓯᕐᕕᐅᑉ ᐅᐊᓐᓇᖓᑕ ᑭᓪᓕᖓ

1. ᓴᕐᕙᓕᒃ
2. ᕿᑭᖅᑖᓗᔾᔪᐊᖅ ᑲᖏᖅᑐᕈᓗᒃ ᐅᖓᓪᓕᖅ
3. ᕿᑭᖅᑖᓗᔾᔪᐊᖅ ᑲᖏᖅᑐᕈᓗᒃ ᒥᔅᓯᖅᑎ
4. ᓇᓪᓗᑦᓯᐊᖅ ᐅᖓᓪᓕᖅ
5. ᑲᖏᖅᑐᓪᓗᐊᓗᒃ
6. ᓈᖅᐸᐃᑦ
7. ᑯᐊᓐᓂᓕᒃ
8. ᖄᔪᕐᓇᖅ

ᒥᕐᖑᐃᓯᕐᕕᐅᑉ ᐱᓇᓐᓇᖓᑕ ᑭᓪᓕᖓ

9. ᒪᑦᑖᑐᔾᔭᓇ
10. ᐃᓪᓚᐅᓕᑦᑑᖅ
11. ᐸᓐᓂᖅᑑᕈᓗᒃ

ᒥᕐᖑᐃᓯᕐᕕᐅᑉ ᑲᓇᓐᓇᖓᒍᑦ ᑭᓪᓕᖓ

12. ᐱᖃᓗᔭᖅᑑᖅ

ᒥᕐᖑᐃᓯᕐᕕᐅᑉ ᓂᒋᐊᒍᑦ ᑭᓪᓕᖓ

13. ᐸᓐᓂᖅᑑᑉ ᑲᖏᖅᑐᖓ

ᐅᓂᒃᑳᖏᑦ (ᑎᑎᕋᕐᓯᒪᓪᓗᑎᖕ ᓇᓗᓇᐃᕐᓯᓯᒪᔪᑦ)

• ᓴᓂᒧᑦ ᑐᑭᓕᐊᕐᑐᖅ ᑲᔫᓪᓗᓂ: ᐃᓪᓕᓃᑦ ᐃᖏᕐᕋᕕᐅᒐᔪᑦᑐᑦ
• ᐆᔭᐅᔭᖅ: ᑲᓇᑕᐅᑉ ᒥᕐᖑᐃᓯᕐᕕᖓ
• ᓯᐊᕐᓇᐅᓂᖓ: ᐃᓄᐃᑦ ᓄᓇᖁᑎᖏᑦ

3.0 ᐸᕐᓇᐃᓂᕐᒧᑦ ᖃᓄᐃᓕᖓᓂᖏᑦ

ᒪᓕᒐᕐᑎᒍᑦ ᐊᒻᒪ ᒐᕙᒪᒃᑯᑦ ᐋᖅᑭᑦᓯᒪᓂᕆᓂᐊᕐᑕᖓ

ᓄᓇᕗᑦ ᐊᖏᕈᑎᖓ ᓵᓚᒃᓴᐃᓇᕐᓂᐊᕐᑐᖅ ᖃᓄᑐᐃᓐᓇᖅ ᒪᓕᒐᕐᑎᒍᑦ ᒪᓕᑦᑎᒌᑦᑎᐊᕐᑐᖃᕈᓐᓃᖅᑲᑦ ᐅᕝᕙᓘᓐᓃᑦ ᐊᑭᕋᕐᑑᑎᓂᐅᓴᑉᐸᑕ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᖓᑕ ᐊᐅᓚᑕᐅᓂᖓᓄᑦ, ᐱᖁᔭᑎᒍᑦ ᒪᓕᒐᓐᖑᕐᑎᑕᐅᓯᒪᔪᖅ ᐊᖅᑯᑕᐅᓪᓗᓂ ᑲᓇᑕᐅᑉ ᒥᕐᖑᐃᓯᕐᕕᖏᑕ ᐱᖁᔭᖓ. ᐱᙳᕐᑎᑕᐅᓂᑯ 1999-ᒥ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᑲᓇᑕᐅᑉ ᒐᕙᒪᖓᑦ ᐊᑎᓕᐅᓚᐅᕐᓯᒪᔪᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑎᑦᓴᖏᓐᓄᓪᓗ ᐊᖏᕈᒻᒥᑦ ᐊᐅᔪᐃᑦᑐᖅ, ᖁᑦᑎᓂᕐᐹᖅ ᐊᒻᒪᓗ ᓯᕐᒥᓕᐅᑉ ᒥᕐᖑᐃᓯᕐᕕᖏᓐᓄᑦ (ᕿᑭᖅᑖᓗᖕᒧᑦ ᐊᖏᕈᑏᑦ), ᓇᓗᓇᐃᕐᓯᓯᒪᑦᓯᐊᖅᑐᑦ ᐊᐅᓚᑦᑎᓂᐅᑉ ᐋᖅᑭᑦᓯᒪᓂᕆᓂᐊᕐᑕᖓᓂᑦ ᐃᑲᔪᕐᑎᐅᖃᑎᒌᓐᓂᒃᑯᑦ ᒥᐊᓂᕆᔾᔪᑎᑦᓴᓂᑦ. ᑲᑐᔾᔨᓂᒃᑯᑦ ᒥᕐᖑᐃᓯᕐᕕᓂᑦ ᐸᕐᓇᐃᔩᑦ ᐊᐅᓚᑦᑎᔩᓪᓗ ᑲᑎᒪᔨᕋᓛᖏᑦ, ᓇᓕᒧᒌᓪᓗᐊᓂᑦ ᑭᒡᒐᕐᑐᐃᔨᖃᕐᑐᑎᑦ ᑲᑎᒪᔨᓂᑦ ᑎᒃᑯᐊᖅᑕᐅᓯᒪᓪᓗᑎᑦ ᒥᓂᔅᑕᒧᑦ ᑲᒪᒋᔭᖃᕐᑐᒧᑦ ᑲᓇᑕᐅᑉ ᒥᕐᖑᐃᓯᕐᕕᖏᓐᓂᑦ, ᑲᑎᒪᒐᔪᑦᑐᑦ ᐊᒻᒪᓗ ᐅᖃᐅᔾᔨᒋᐊᕆᔨᐅᓪᓗᑎᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᓐᓂᑦ ᐊᐅᓚᑦᑎᓂᖕᒥᑦ ᐱᔾᔪᑎᖃᕐᑐᓂᑦ. ᕿᑭᖅᑕᓂ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑎᑦᓴᖏᓐᓄᓪᓗ ᐊᖏᕈᑦ ᐱᓇᓱᐊᕐᕕᖃᕐᑎᑦᓯᒻᒥᔪᑦ ᐃᓄᓐᓂᑦ ᖃᓂᒋᔮᓃᑦᑐᓂᑦ ᕿᑭᖅᑕᕐᔪᐊᒥᐅᓂᑦ ᐸᓐᓂᖅᑑᒥᐅᓂᓪᓗ ᑮᓇᐅᔭᓕᐅᕐᓂᒃᑯᑦ ᐱᕚᓪᓕᕈᑎᑦᓴᓂᑦ ᒥᕐᖑᐃᓯᕐᕕᒃᑯᑦ. ᐃᑲᔫᑏᑦ ᐃᓚᖃᖅᑐᑦ, ᐊᓯᖏᐅᒐᓗᐊᕐᒥᑎᓪᓗᒋᑦ, ᐱᕚᓪᓕᖅᑎᑦᓯᓂᒃᑯᑦ ᐊᖏᕈᑎᒃᑯᓪᓗ ᑳᓐᑐᓛᕐᑎᑦᓯᓂᒃᑯᑦ ᐃᓄᓐᓄᑦ ᓇᖕᒥᓂᕆᔭᐅᔪᓂᑦ ᐃᖅᑲᓇᐃᔭᕐᑎᑖᖅᐸᓪᓗᑎᓪᓗ ᐊᒻᒪᓗ ᐃᑲᔪᕐᐸᓪᓗᒋᑦ ᐃᖅᑲᓇᐃᔮᕆᔪᒪᔭᖏᓐᓂᑦ ᐱᕙᓪᓕᐊᔪᓐᓇᕐᓯᖁᓪᓗᒋᑦ ᐃᓄᐃᑦ ᐃᖅᑲᓇᐃᔭᖅᑏᑦ.

ᑖᓐᓇ ᐸᕐᓇᐅᑎ ᐆᒪᓂᖓᓂ, ᖃᑦᑎᑲᓪᓚᐃᑦ ᐊᖏᕈᑕᐅᓯᒪᔪᑦ ᐊᒃᑐᐃᓂᖃᕐᓂᐊᕐᑐᑦ ᐊᐅᓚᑦᑎᒍᑎᓂᑦ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᖓᓄᑦ. ᐊᖅᑯᑕᐅᓪᓗᓂ ᕿᑭᖅᑕᓃᒃᑯᑦ ᐱᔭᑦᓴᖏᓐᓄᑦ ᑮᓇᐅᔭᕐᑐᕈᑏᑦ ᐊᑐᐃᓐᓇᕐᓂᐊᕐᑐᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓴᖅᑮᓚᐅᕐᑐᑦ ᐃᓄᓐᓄᑦ ᐱᒋᐊᕐᑎᑕᐅᓂᑰᓪᓗᓂ ᕿᑭᖅᑖᓗᖕᒥ ᓴᐳᔾᔨᕕᑦᓴᒥᑦ ᐊᖅᑯᑕᐅᓪᓗᓂ 2025 ᓯᓈ ᐊᖏᕈᑎᖓ (ᐊᑎᖓᓗ ᐃᓄᒃᑎᑐᑦ ᑐᑭᖃᕐᑐᓂ ᓯᓈ). ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᐊᖏᓯᒪᔪᑦ ᐃᖅᑲᓇᐃᔭᖃᑎᖃᕐᓂᐊᕐᓂᕋᕐᑐᑎᖕ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ ᐊᑐᓕᕐᑎᑕᐅᖁᓪᓗᒋᑦ ᐃᓗᓕᖏᑦ ᓯᓈ ᐊᖏᕈᑎᖓᓃᑦᑐᑦ ᐊᑐᕆᐊᖃᕐᓂᖏᑦ ᒪᓕᓪᓗᒋᑦ. ᐋᔩᖃᑎᒌᒍᑕᐅᒃᑲᓂᕐᓂᖓ ᕿᑭᖅᑕᓂ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑎᑦᓴᖏᓄᓪᓗ ᐊᖏᕈᑦ ᓂᕆᐅᓇᕐᑐᖅ ᐱᒋᐊᒃᑲᓂᕋᔭᕆᐊᖓ ᐊᕐᕌᒍᓂ ᐊᒡᒋᕐᑐᓂ. ᑲᓇᑕᐅᑉ ᒥᕐᖑᐃᓯᕐᕕᖓᑕ ᓄᓇᖁᑎᖏᓐᓂᑦ ᐊᐅᓪᓛᕐᑎᑦᓯᔪᖃᙱᒃᑲᓗᐊᕐᑎᓪᓗᒍ 2024-ᒥ ᓄᓇᕗᑦ ᓄᓇᖁᑎᖏᑦ ᐃᒪᖁᑎᖏᓪᓗ ᓴᙱᓂᖅᑖᕈᑕᐅᓂᖏᑎᒍᑦ ᐊᖏᕈᑎᒃᑯᑦ, ᑲᓇᑕᐅᑉ ᓄᓇᖁᑎᖏᑦ ᖃᓂᒋᔮᓃᑦᑐᑦ ᒥᕐᖑᐃᓯᕐᕕᖓᑕ ᑭᓪᓕᖓᓄᑦ ᐊᓯᔾᔨᕐᑕᐅᓂᐅᓴᒻᒪᑦ ᒪᓕᒐᕐᑎᒍᑦ ᑭᒃᑯᑦ ᓴᙱᓂᖃᕐᓂᐊᓕᕐᒪᖔᑕ. ᓴᙱᓂᖅᑖᖅᑎᑦᓯᓂᖕᒧᑦ ᐊᖏᕈᑏᑦ ᐊᐅᓪᓛᕐᑎᑦᓯᒍᑕᐅᓂᐊᕐᖓᑕ ᒐᕙᒪᒃᑯᑦ ᓄᓇᖁᑎᖏᓐᓂᑦ, ᓄᓇᒥᐅᑕᓄᑦ, ᐊᒻᒪᓗ ᐃᒪᓕᕆᓂᖕᒧᑦ ᐱᔪᓐᓇᐅᑎᓂᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐅᓪᓗᖓᓂ ᐃᑉᐳᕈ 1, 2027. ᐱᖃᓯᐅᔾᔭᐅᓯᒪᔾᔮᖏᑦᑐᑦ ᐃᓄᐃᑦ ᓄᓇᖁᑎᖏᑦ, ᐊᐅᓚᑕᐅᖏᓐᓇᕐᓂᐊᕐᑐᑎᓪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᑭᒡᒐᕐᑐᐃᔨᐅᓪᓗᑎᑦ ᕿᑭᖅᑖᓗᖕᒥ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.

ᐃᓄᐃᑦ ᖃᐅᔨᒪᔭᑐᖃᖏᑦ ᐃᓕᖅᑯᓯᖓᓗ

ᐃᓄᐃᑦ ᖃᐅᔨᒪᔭᑎᖃᖏᑦ ᑐᑭᖃᕐᒪᑦ ᐱᖅᑯᓯᑐᖃᑦ, ᒫᓐᓇᓂᓴᑦ ᐊᒻᒪᓗ ᐱᕙᓪᓕᐊᖏᓐᓇᐅᔭᕐᓂᖏᑦ ᐃᓄᐃᑦ ᐱᓐᓇᕆᔭᖏᑕ ᑐᙵᕕᖏᑦ, ᐅᑉᐱᕆᔭᖏᑦ, ᐊᑐᖅᓯᒪᔭᖏᑦ, ᐅᔾᔨᕐᑐᕈᓯᖏᑦ ᐊᕙᑎᒥᓂᖕ ᐊᒻᒪᓗ ᖃᐅᔨᒪᓂᖏᑦ ᐊᕙᑎᑦᑎᓐᓃᑦᑐᓂᑦ, ᐊᑕᓪᓗᑎᑦ ᓄᓇᐃᑦ, ᐃᒪᖅ, ᐆᒪᔪᑦ ᐃᓄᖁᑎᖏᓪᓗ, ᐊᓪᓛᓪᓘᓐᓃᑦ ᐃᓄᐃᑦ ᐊᕙᑎᑦᑎᓐᓃᑦᑐᓕᒫᓄᑦ ᐃᓚᒋᔭᐅᓂᖏᑕ ᐅᑉᐱᕆᔭᐅᓪᓗᓂ. ᖃᐅᔨᒪᓂᐅᔪᖅ ᒪᑭᒪᑎᑦᑎᓯᒪᔪᖅ ᐅᐊᑦᑎᐊᕈᓂᓴᐃᑦ ᐊᒻᒪᓗ ᐊᑐᖅᑕᐅᓂᐊᖅᑐᑎᑦ ᐅᓪᓗᒥᐅᔪᒥᑦ ᓇᓗᓇᐃᖅᑕᐅᓗᓂ ᐊᑐᖅᑕᐅᓂᖓ ᓯᕗᓂᔅᓴᒥ. ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒻᒥ, ᐃᓄᐃᑦ ᖃᐅᔨᒪᔭᑐᖃᖏᑦ ᑭᒡᒐᖅᑐᐃᔪᑦ ᐱᒻᒪᕆᐅᓛᖑᓪᓗᑎ ᑐᑭᓯᔭᐅᓂᖏᓐᓄᑦ ᓄᓇᐃᑦ, ᐃᒪᐃᑦ, ᓯᑯᖓ, ᐆᒪᔪᐃᑦ, ᐆᒪᓂᖃᖅᑐᑦ ᓇᔪᒐᕐᒥᓂᑦ, ᐱᖅᑯᓯᑐᖃᖏᑦ, ᐊᒻᒪᓗ ᓄᓇᐃᑦ ᐱᖅᑯᓯᓄᑦ ᐱᒻᒪᕆᐅᔪᑦ ᑐᓐᖓᓂᖃᖅᑐᑦ ᐃᓅᓯᕆᔭᐅᓯᒪᔪᓂᑦ ᐊᑐᖅᑕᐅᓯᒪᔪᓂᑦ ᐃᓄᓐᓄᑦ ᑭᖑᕚᕇᖃᑦᑕᐅᑎᔪᓄᑦ. ᐃᓄᐃᑦ ᓱᓕ ᑕᐃᒪᙵᑐᖄᓗᖕ ᐃᓕᖅᑯᓯᕐᒥᓂᖕ ᐱᖅᑯᓯᖏᓐᓄᑦ ᐱᔪᓐᓇᐅᑎᖏᑦ ᐃᓗᐊᓂ ᐊᕙᑎᐊᓂᓗ ᒥᕐᖑᐃᓯᕐᕕᐅᑉ ᐱᐅᓯᕇᓐᓇᕐᑕᖏᑦ, ᐃᓄᐃᑦ ᐃᓅᖃᑎᒋᑎᒍᑦ ᐱᓐᓇᕆᔭᖏᑦ ᐅᑉᐱᕆᔭᖏᑎᒍᑦ ᐊᒻᒪᓗ ᐃᓄᑦᑎᑐᑦ ᐊᔅᓱᐊᓗᒃ ᐊᑐᕐᓂᖓᑕ ᐃᓅᓯᕐᖕᒥᓂ ᖃᐅᑕᒫᑦᓯᐊᖅ. ᐃᓄᐃᑦ ᖃᐅᔨᒪᓂᓖᑦ ᑲᑎᒪᔨᖏᑦ ᕿᑭᖅᑕᕐᔪᐊᒥ ᐸᓐᓂᖅᑑᒥᓗ ᐃᑲᔪᐃᓐᓇᐅᔭᕐᑐᑦ ᖃᐅᔨᒪᓂᕐᒥᒍᑦ ᐊᒻᒪᓗ ᐊᔪᙱᑦᑐᐊᓘᓂᖏᑎᒍᑦ ᐊᔾᔨᒌᖏᑦᑐᓂᑦ ᐱᔭᑦᓴᖃᕐᑎᑕᐅᕙᑦᑐᑎᑦ, ᐃᓚᒋᔭᐅᓪᓗᑎᑦ ᓄᓇᐃᑦ ᐊᑎᑐᖃᖏᓐᓂᑦ ᑲᑎᖅᓱᐃᓂᖅ ᒥᕐᖑᐃᓯᕐᕕᐅᑉ ᓄᓇᙳᐊᖓᓄᑦ ᐱᔭᕇᕐᑕᐅᓚᐅᖅᓯᒪᔪᑦ 2018-ᒥ. ᐃᓄᓐᓂᑦ ᐃᖅᑲᓇᐃᔭᕐᑎᖏᓐᓂᑦ ᓯᕗᓕᕐᑎᖃᖅᑐᑎᑦ ᐊᒻᒪᓗ ᐃᓚᒋᔭᐅᓪᓗᑎᑦ ᑲᑐᔾᔨᓂᒃᑯᑦ ᒥᕐᖑᐃᓯᕐᕕᓕᕆᔩᑦ ᐸᕐᓇᐃᔨᖏᑦ ᐊᒻᒪᓗ ᐊᐅᓚᑦᑎᔩᑦ ᑲᑎᒪᔨᕋᓛᖏᑦ ᐃᑲᔪᓚᐅᕐᓯᒪᒻᒥᔪᑦ ᐃᓚᓕᐅᔾᔭᐅᕙᓪᓕᐊᓂᖏᓐᓂᑦ ᐃᓄᐃᑦ ᖃᐅᔨᒪᔭᑐᖃᖏᑕ ᑐᙵᕕᖏᑦ ᐱᖅᑯᓯᖏᓪᓗ. ᑖᓐᓇ ᐸᕐᓇᐅᑎᑦ ᓴᓐᖓᑎᑦᑎᒋᐊᖅᑐᖅ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐱᓂᐊᕐᓂᒃᑯᑦ ᐊᖏᖅᓯᒪᓂᖏᓐᓂᑦ ᓴᖅᑭᓚᑦᑖᕐᑎᑦᑎᓂᖕᒥᑦ ᐃᓄᐃᑦ ᖃᐅᔨᒪᔭᑐᖃᖏᓂᑦ ᒥᕐᖑᐃᓯᕐᕕᐅᑉ ᐊᐅᓚᑕᐅᔾᔪᑎᖏᑎᒍᑦ ᐊᒻᒪᓗ ᐊᐅᓚᑦᑎᕕᖏᑎᒍᑦ.

ᓄᓇᓖᑦ ᓯᕗᓕᖏᓐᓃᙶᕐᑐᑦ

ᑭᖑᓂᑦᑎᓐᓂ ᒐᕙᒪᐅᓯᒪᔪᑦ ᐊᑐᐊᒐᖏᑦ ᐊᖏᔪᒥᑦ ᐊᑦᑐᐃᓂᖃᖅᓯᒪᔪᑦ ᐃᓄᓐᓂᑦ ᐃᓚᖓᒍᑦ ᐅᓪᓗᒥᒧᑦ ᐃᑉᐱᓂᖅᑕᐅᓂᖃᖅᑐᑦ. ᐊᒥᓱᑦ ᐃᓄᐃᑦ ᕿᑭᖅᑖᓗᒻᒥ ᓄᓇᓕᐅᓚᐅᖅᑐᑦ, ᓄᓇᓕᕋᓛᑦ ᓯᕗᓕᖅᑎᖃᖅᑐᑎᑦ, 1950−ᖏᓐᓂ. ᕿᑭᖅᑕᓂ ᐃᓄᐃᑦ ᓱᓕᔪᓂᒃ ᑲᑎᒪᔩᑦ ᓇᓗᓇᖅᓯᔪᑦ ᐊᕐᕌᒎᓯᒪᔪᓂᑦ ᑭᖑᓂᐊᒍᑦ ᓄᓇᓕᖑᖅᑎᑕᖑᓕᖅᑎᓪᓗᑕ, “ᑕᐃᔅᓱᒪᓂ ᖃᓄᐃᓕᐅᕐᓂᖃᖅᑎᓪᓗᑕ (ᓯᓚᑖᓂ ᐊᔭᐅᖅᑕᐅᔪᑦ) ᓄᓇᓕᓐᖑᖅᑎᑕᐅᓚᐅᖅᑐᑦ”. ᒐᕙᒪᒃᑯᓐᓂ ᐱᔪᓐᓇᐅᑎᓖᑦ ᐊᔭᐅᓯᓚᐅᖅᑐᑦ ᐃᓄᓐᓂᑦ ᐸᓂᖅᑑᒨᖅᑎᑕᐅᓪᓗᑎ ᐊᒻᒪᓗ ᕿᑭᕐᑕᖅᔪᐊᖅ ᓱᓕᓂᕋᖅᑐᑎᑦ ᐃᓕᓐᓂᐊᓂᕐᒥᑦ, ᐋᓐᓂᐊᖅᑐᓕᕆᓂᕐᒧᑦ ᑲᒪᒋᔭᖃᓂᕐᒧᑦ, ᐃᖅᑲᓇᐃᔭᓂᕐᒧᑦ, ᐊᒻᒪᓗ ᑮᓇᐅᔭᑎᒍᑦ ᐃᑲᔪᖅᑕᐅᓗᑎ. ᕿᕕᑦᑑᒥ, ᐃᓗᐃᑦ ᐱᒋᔭᐅᔪᓪᓗ ᓴᓕᒍᖅᑕᐅᓚᐅᖅᑐᑦ ᐊᐅᓪᓛᖅᑕᐅᓂᑯᐃᑦ ᓅᑦᑎᖅᑕᐅᓗᑎ 1963−ᒥᑦ, ᑕᐃᒪᐃᒃᑲᓗᐊᖅᑎᓪᓗᒍ ᐊᒥᓲᓂᖅᓴᐃᑦ ᐃᓄᐃᑦ ᓅᑦᑎᑕᐅᓚᐅᖅᑐᑦ ᐹᓪᓚᕕᒻᒥ ᕿᑭᕐᑕᖅᔪᐊᒧᑦ 1968−ᒥᑦ. ᐸᓖᓯᒃᑯᑦ ᐊᒥᓱᐊᓗᖕᓂᑦ ᕿᒻᒦᔭᐃᓚᐅᖅᓯᒪᒻᒪᑕ ᑕᒪᑐᒪᓂ, ᐃᓄᐃᑦ ᐃᓚᖐᑦ ᐃᖏᕐᕋᔾᔪᑎᑐᐊᖏᓐᓂᑦ ᓂᕿᑦᓴᖅᓯᐅᕈᑎᖏᓐᓂᓪᓗ ᓱᒃᑯᑎᑦᓯᓯᐊᕐᑐᑎᑦ. ᐊᒥᓲᓂᖅᓴᐃᑦ ᐃᓄᐃᑦ ᓄᓇᖃᓚᐅᖅᑐᑦ ᓄᓇᓕᓐᓂᑦ 1970−ᖏᓐᓂ ᐊᒻᒪᓗ ᐃᑉᐱᒍᓱᓚᐅᖅᑐᑦ ᑐᑭᒧᐊᖅᑎᑕᐅᑲᒻᒪᔅᓯᒪᓪᓗᑎ: ᐱᐅᓂᖓ ᐃᓅᓯᖅ ᐱᐅᓯᒋᐊᓚᐅᖏᑦᑐᖅ ᐊᒻᒪᓗ ᐱᔨᑦᑎᖅᑕᐅᔪᑦ ᓈᒻᒪᖐᓐᓇᓚᐅᖅᑐᑦ. ᑲᓇᑕᒥᐅᑕᐃᑦ ᐱᔪᓐᓇᐅᑎᓖᑦ ᓴᓇᓯᒪᔪᓕᐅᓚᐅᖅᑐᑦ ᐊᒻᒪᓗ ᐊᑐᓕᖅᑎᑎᓪᓗᑎ ᑖᒃᑯᓂᖓ ᐊᑐᐊᒐᕐᓂᑦ ᑐᓴᖅᑎᑦᑎᓯᒪᑦᑎᐊᕋᑎ, ᓇᓗᓇᐃᔭᐃᓯᒪᑦᑎᐊᕋᑎ, ᐅᕝᕙᓘᓐᓃᑦ ᓈᒻᒪᑦᑐᓂᑦ ᑮᓇᐅᔭᖃᖅᑎᑦᑎᓇᑎ ᒪᑭᒪᑎᓪᓗᒋᑦ ᐱᓕᕆᐊᑦ. ᕿᑭᖅᑕᓂ ᓱᓕᔪᓂᒃ ᑲᑎᒪᔩᑦ ᑭᖑᓪᓕᖅᐹᒥ ᐅᓂᒃᑳᖏᑦ, ᐃᓚᓕᐅᔾᔨᓂᖅ ᐊᒥᓱᓂᑦ ᐊᓂᒍᐃᓯᒪᔪᓂᑦᐅᓂᒃᑲᐅᓯᕐᓂᒃ, ᓇᓗᓇᐃᔭᐃᔪᑦ ᑖᒃᑯᐊ ᐊᔅᓱᕈᓐᓇᖅᑐᑦ ᐊᕐᕌᒎᓯᒪᔪᓂᑦ ᕿᑭᕐᑕᖅᔪᐊᒥ ᐸᓐᓂᖅᑑᒥᓗ. ᐃᓄᐃᑦ ᑕᐃᒪᙵᑦ ᐊᓯᔾᔨᕐᐸᓪᓕᐊᖏᓐᓇᐅᔭᕐᑐᓄᑦ ᓱᖏᐅᑎᓂᒃᑯᑦ ᒪᓕᑦᓴᐃᓐᓇᕆᐊᓖᑦ ᐊᒻᒪᓗ ᐊᑦᓱᕈᕐᓇᕐᑐᓂᑦ ᐊᐳᕈᑎᓖᑦ ᐊᐅᓚᑦᑎᔾᔪᓰᑦ ᓯᓚᑎᑦᑎᓐᓂᑦ ᐊᒃᑐᖅᑕᐅᓂᒃᑯᑦ ᓄᓇᐃᖅᓯᓯᒪᔪᓄᑦ ᐊᑐᐊᒐᑦᓴᓕᐅᕈᔾᔭᐅᓪᓗᑎᖕ ᐊᒻᒪᓗ ᑕᐃᒪᙵᑦ ᒪᑭᒪᔾᔪᑎᑦᓴᖃᑦᓯᐊᖏᑦᑐᑦ ᓄᓇᕗᒥ ᓄᓇᓖᑦ ᑐᓂᓯᔭᐅᒡᒐᐃᓇᖃᑦᑕᒧᑦ.

ᐊᕙᑎᓕᕆᓂᖅ ᐃᓗᐊᓂ, ᐱᖃᓯᐅᑎᓪᓗᒍ ᓯᓚᐅᑉ ᓂᕈᒥᑦᓯᕙᓪᓕᐊᓂᖓᓄᑦ ᐊᓯᔾᔨᕐᐸᓪᓕᐊᓂᖅ

ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᖓ ᐃᑲᔪᕐᓂᖃᖅᑑᒐᓗᐊᖅ ᐅᑭᐅᖅᑕᖅᑑᑉ ᐆᒪᔪᖁᑎᖏᑦ ᐊᒻᒪᓗ ᓄᓇᒥᐅᑕᑦ ᐊᕙᑎᑦᑎᓐᓃᑦᑐᑦ ᐆᒪᔫᖃᑎᒌᖏᓐᓂᑦ ᐱᐅᖅᓱᐊᕈᑕᐅᔫᒐᓗᐊᖅ ᓴᐳᔾᔨᓂᒃᑯᑦ, ᓯᓚᐅᑉ ᐊᓯᔾᔨᕐᐸᓪᓕᐊᓪᓚᕆᑦᓯᒪᓂᖓ ᐊᑦᓱᐊᓗᖕ ᐊᓯᔾᔩᓯᒪᒻᒪᑦ ᒥᕐᖑᐃᓯᕐᕕᓐᓂᑦ ᐊᒻᒪᓗ ᕿᑭᖅᑖᓗᖕᒥᑦ. ᐆᒪᔪᑦ ᐃᓄᐃᓴᓪᓕᓗᐊᕋᓱᒋᔭᐅᓕᕐᑐᑦ ᐱᑕᖃᐅᖅᑐᑦ ᒥᕐᖑᐃᓯᕐᕕᒻᒥ, ᐱᖃᓯᐅᔾᔭᐅᓯᒪᔪᑦ ᓇᓄᑦ, ᐅᑉᐱᔾᔪᐊᑦ, ᑐᑦᑐᑦ, ᐅᖅᑯᒥᐅᑦ ᐊᐃᕕᖏᑦ. ᐊᕙᑎᐊᓃᑦᑐᑦ ᖃᓄᐃᙱᑦᓯᐊᕋᓗᐊᕐᒪᖔᑕ ᓇᐅᑦᑎᖅᓱᖅᑏᑦ ᐊᐅᔪᐃᑦᑐᕐᒧᑦ ᖃᐅᔨᓴᕐᐸᑦᑐᑎᑦ ᓄᓇᒥᖕ ᐊᒻᒪᓗ ᓯᕐᖕᒥᓂᖕ ᒥᕐᖑᐃᓯᕐᕕᐅᑉ ᐊᖏᓛᖑᓂᖏᑦ, ᖃᐅᔨᓴᖅᐸᑦᑐᑎᑦ ᐊᓯᔾᔨᕐᐸᓪᓕᐊᔪᓂᑦ ᖃᖓᓚᐅᓪᓚᒃᑯᑦ. ᐊᕐᕌᒍᓂ ᐊᓂᒍᕋᑖᖅᑐᓂ, ᓯᓚᐅᑉ ᐊᓯᔾᔨᕐᐸᓪᓕᐊᓂᖓ ᓂᕆᐅᓇᓐᖏᑦᑐᒥᖕ ᐊᓯᔾᔨᕐᑕᓕᓚᐅᕐᖓᑦ, ᐆᓇᔪᓐᓂᖓ ᓂᕈᒥᓐᓂᕐᓴᐅᓕᕐᑐᓂ ᑕᐃᒪᐃᒐᔪᓐᖏᑦᑐᒥᖕ, ᐊᒻᒪ ᐊᓯᔾᔨᕐᑕᖅᑐᒻᒪᕆᐅᓪᓗᓂ ᓯᓚᕈᔫᓕᕐᐸᑦᑐᓂ, ᐊᒻᒪ ᓯᓚᐅᑉ ᐆᓇᔪᓐᓂᖓ ᐅᖅᑰᓯᕙᓪᓕᐊᑐᐃᓐᓇᕐᓂᕐᑐᕆᔭᐅᔪᖅ. ᐃᓚᖏᓪᓗ ᐅᔾᔨᕐᓇᖅᑐᑦ ᓯᓚᒃᑯᑦ ᐊᓯᔾᔨᕐᐸᓪᓕᐊᔪᑦ ᓄᓇᐅᑉ ᐃᑭᐊᖓ ᐊᐅᑉᐸᓪᓕᐊᓂᖓᓄᑦ ᖁᐊᕇᖃᑦᑕᖏᓐᓂᖓᓄᑦ ᐊᒻᒪ ᓯᕐᖕᒦᑦ ᐊᐅᑉᐸᓪᓕᐊᓪᓚᕆᓂᖏᓐᓂᑦ, ᐊᑯᓂᐅᓂᕐᓴᐅᕙᓕᕐᓂᖓ ᐃᒪᖃᕐᓂᖓ ᖁᐊᕐᓇᓵᖃᑦᑕᕐᓂᖓᓄᑦ, ᓄᓇᐅᓪᓗ ᓱᕋᑦᑎᐸᓪᓕᐊᓂᖓ, ᐊᓯᔾᔨᕐᓯᒪᓕᕐᓂᖓ ᐆᒪᔪᑦ ᓯᐊᕝᕕᒋᕙᑦᑕᖏᑦ, ᓯᓚᓗᒐᔪᓕᕐᓂᖓ ᑕᑦᓯᕋᔪᑦᑐᓂᓗ, ᓯᓚ ᓂᕈᒥᑦᓲᔭᖃᑦᑕᓕᕐᓂᖓ ᐅᖅᑰᓯᕙᓪᓕᐊᒧᑦ, ᓯᓚᓗ ᐊᓯᔾᔨᕐᑕᓗᐊᕐᓂᖓᓄᑦ ᓯᓚᕈᔫᖃᑦᑕᓕᕐᓂᖓ ᐅᔾᔨᕆᔭᐅᓯᒪᔪᖅ ᐊᒻᒪ ᓯᑯᓇᓵᖃᑦᑕᓕᕐᓂᖓ. ᖃᐅᔨᓴᖃᑦᑕᑲᓐᓂᕆᐊᖃᖅᐳᖅ ᐊᒻᒪᓗ ᖃᐅᔨᓴᓂᕐᒧᑦ ᐱᔭᐅᔭᕆᐊᖃᖅᑐᑦ ᑐᑭᓯᑦᑎᐊᓂᖅᓴᕆᓗᒋᑦ ᐊᑦᑕᓇᕈᑎᐅᔪᑦ ᐃᓄᓐᓄᑦ ᐊᑦᑕᓇᐃᖅᓯᒪᑎᑦᑎᓂᕐᒧᑦ ᐊᒻᒪᓗ ᓇᓗᓇᐃᕐᓗᒋᑦ ᓈᒻᒪᑦᑐᓂᑦ ᐱᓗᐊᕐᔭᐃᖅᓯᒪᑎᑦᑎᓂᕐᒧᑦ ᐸᕐᓇᐅᑏᑦ. ᖃᓄᐃᓕᐅᕐᐸᓪᓕᐊᔪᑦ ᓄᓇᒥᓪᓗ ᓱᕋᑦᑎᕆᔪᑦ ᐊᖏᓂᕐᓴᒥᑦ ᓱᕋᑦᑎᕆᔪᓐᓇᕐᑐᑦ ᕿᑭᖅᑖᓗᖕᒥᖕ ᐊᓯᔾᔩᔪᓐᓇᕐᑐᑦ ᒥᕐᖑᐃᓯᕐᕕᒻᒥ ᐆᒪᔫᖃᑎᒌᑦ ᓄᓇᒥᐅᑕᓪᓗ ᐊᐅᓚᓂᖏᓐᓂᑦ. ᐸᕐᓇᐅᑏᑦ ᐊᕙᑎᑦᑎᓐᓂᑦ ᖃᐅᔨᓴᕈᑎᑦᓴᑦ ᑕᕝᕙᓂ ᐊᐅᓚᑦᑎᓂᖕᒧᑦ ᐸᕐᓇᐅᑎᓃᑦᑐᑦ (ᐃᓚᖓᓂ 9.0) ᓇᓗᓇᐃᕐᓯᓯᒪᔪᑦ ᐊᒥᓱᕈᕐᐸᓪᓕᐊᓂᐊᕐᓂᖏᑕ ᐃᖃᓗᒐᓱᑦᑏᑦ ᓂᐅᕐᕈᑎᑦᓴᓕᐅᕐᑐᑦ ᐃᒪᕕᒻᒥ ᐅᑎᖅᑕᖃᑦᑕᕐᑐᑦ, ᐅᔭᕋᓐᓂᐊᕐᑏᑦ, ᐅᔭᕋᑦᓯᐅᕐᑐᑦ ᑮᓇᐅᔭᓕᐅᕈᑎᑦᓴᓂᑦ, ᓂᐅᕐᕈᑎᑦᓴᓕᐅᕐᑐᑦ ᑕᕆᐅᕐᒥᐅᑕᓂᑦ ᐃᖃᓗᒐᑦᓴᓂᑦ, ᐊᒻᒪᓗᑦᑕᐅᖅ ᓴᓇᔭᐅᓂᖓ ᐊᐅᓚᓂᐊᕐᓂᖓᓗ ᐃᑎᔪᒥ ᑐᓚᑦᑕᕐᕕᑦᓴᖅ ᕿᑭᖅᑕᕐᔪᐊᒥ ᓴᓇᔭᐅᑉᐸᑦ ᑲᑎᑉᐸᓪᓕᐊᓂᐊᕋᓱᒋᔭᐅᒻᒪᑕ ᐊᒃᑐᐃᓂᐊᕐᑐᑦ, ᒥᕐᖑᐃᓯᕐᕕᐅᑉ ᓯᓚᑖᓃᓐᖔᑐᑦ, ᓯᓚᐅᑉ ᐊᓯᔾᔨᕐᐸᓪᓕᐊᓂᖓ ᓯᕗᓪᓕᖅᐹᖑᓂᐊᕐᑐᒋᔭᐅᓪᓗᓂ ᓱᓕ ᐊᓯᔾᔨᕐᐸᓪᓕᐊᓂᖓᓄᑦ ᓯᓚᕗᑦ ᐊᕐᕌᒍᓂ ᐊᒡᒋᕐᑐᓂ.

ᓄᓇᓕᐅᔪᖅ ᐱᓕᕆᖃᑦᑕᐅᑎᓂᖓ ᐊᒻᒪ ᐃᓚᒋᔭᐅᑎᑦᑎᓂᕐᒧᑦ

ᐊᖏᔪᒥᑦ ᐱᔪᒪᓂᖅᑕᖃᖅᑐᖅ ᒥᕐᖑᐃᓯᕐᕕᒻᒥ ᓄᓇᓕᓐᓂᑦ ᕿᑭᕐᑕᖅᔪᐊᖅ ᐸᓐᓂᖅᑑᒥᓗ. ᐊᒥᓱᐊᓗᐃᑦ ᐃᓄᐃᑦ ᐃᓚᔮᕇᓪᓗ ᓄᓇᖃᕐᓂᑰᒻᒪᑕ ᒥᕐᖑᐃᓯᕐᕕᒻᒥ ᐊᒻᒪᓗ ᐊᐅᓪᓛᖅᓯᒪᕙᑦᑐᑦ ᓱᓕ ᓄᓇᒥᓄᑦ ᐊᖑᓇᓱᒋᐊᕐᑐᑎᓪᓗ ᐆᒪᔪᕐᓯᐅᕐᕕᖏᓐᓄᑦ. ᒥᕐᖑᐃᓯᕐᕕᐅᑉ ᐊᓪᓚᕝᕕᖓ ᕿᑭᖅᑕᕐᔪᐊᒥ ᐸᓐᓂᖅᑑᒥᓗ, ᐃᖅᑲᓇᐃᔭᕐᑎᖃᓕᕐᑐᑎᑦ 100 ᐳᓴᑦᑎᓂᑦ ᐃᓘᓐᓇᑎᑦ ᐃᓄᐃᓐᓇᐅᓪᓗᑎᖕ ᐊᕐᕌᒍᓂ ᐊᓂᒍᕋᑖᖅᑐᓂ, ᑐᙵᓇᑦᓱᐊᓕᕐᑐᓂ ᐅᐸᒍᒥᓇᕐᓯᓪᓗᓂ ᐊᒻᒪᓗ ᐃᑲᔪᕐᑎᖃᖅᑐᑎᑦ ᓄᓇᒃᑲᑕᖏᓐᓂᑦ ᐊᐅᓚᕐᐸᑦᑐᓂᑦ. ᓄᓇᖃᖅᑐᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᓐᓂᑦ ᖃᓄᐃᓕᐅᕐᑎᑦᓯᕚᓪᓕᖁᔨᒐᓗᐊᕐᖓᑕ ᐃᓚᒋᔭᐅᕙᓪᓗᑎᑦ ᐃᓅᓱᑦᑐᑦ ᐊᒻᒪ ᑲᔪᖏᕐᑐᖅᑕᐅᓪᓗᓂ ᓯᕗᓕᖏᓐᓂᑦ ᑭᖑᕚᖏᓐᓄᑦ ᖃᐅᔨᒪᔭᒥᓐᓂᖕ ᐃᓕᓴᐃᕙᓪᓗᑎᖕ, ᐱᓗᐊᕐᑐᒥᖕ ᓄᓇᒧᑦ ᐊᐅᓪᓚᖃᑦᑕᕐᓂᒃᑯᑦ, ᓱᓕᒃᑲᓐᓂᖅ ᐊᔪᕈᕐᓃᖅᓴᐃᓂᒃᑯᑦ ᐊᒻᒪᓗ ᐱᓇᓱᐊᕐᕕᑦᓴᓂᑦ ᓄᓇᖃᖅᑐᑦ ᐳᓚᕋᑦᑐᓕᕆᓂᒃᑯᑦ ᒪᑭᑉᐸᓪᓕᐊᖁᓪᓗᒋᑦ. ᐊᕐᕌᒎᕋᑖᖅᓯᒪᔪᓂᑦ, ᑭᖑᕐᕕᖅᑕᐅᖃᑦᑕᕐᓂᖏᑦ ᐊᖏᔪᖅᑲᐅᑏᑦ ᐃᖅᑲᓇᐃᔭᖅᑏᑦ ᐃᓛᓐᓂᒃᑯᑦ ᐊᔅᓱᕈᖅᑎᑦᑎᕙᑦᑐᑦ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐃᓚᒋᔭᐅᑎᑦᑎᓗᑎ ᐱᓕᕆᖃᑎᖏᓐᓂ ᐊᒻᒪᓗ ᑐᓂᓯᖃᑦᑕᖅᑐᑦ ᑐᑭᓯᒋᐊᕈᑎᓂᑦ. ᓇᓗᓇᐃᖅᓯᒪᑦᑎᐊᖅᑐᓂᑦ ᑐᓴᖅᑎᑦᑎᓂᐅᔪᑦ ᐃᑲᔪᖅᑐᒋᑦ ᐃᓄᐃᑦ ᐱᔪᓐᓇᐅᑎᖏᑦ ᐊᒻᒪᓗ ᐱᔾᔪᑎᖃᖅᑐᓂᑦ ᒪᓕᑦᑕᐅᔭᕆᐊᓕᓐᓂᑦ ᑮᓇᐅᔭᓕᐅᕋᓱᐊᖅᑐᓄᑦ ᐊᒻᒪᓗ ᐳᓚᕋᖅᑎᓄᑦ ᐱᓕᕆᔭᐅᔪᓂᑦ ᐱᑕᖃᕆᐊᖃᖅᑐᑦ ᑐᓴᖅᑎᑦᑎᓂᕐᒧᑦ ᐊᒻᒪᓗ ᑲᔪᓰᓐᓇᑎᓪᓗᒍ ᐱᓕᕆᖃᑎᒌᓐᓂᐅᔪᖅ.

ᒥᕐᖑᐃᓯᕐᕕᒻᒧᑦ ᐳᓚᕋᕐᓂᐅᔪᖅ

ᐊᐅᔪᐃᑦᑐᖅ ᐊᒥᓲᓂᕆᒐᔪᓚᐅᖅᑕᖏᑦ 319 ᐳᓚᕋᖅᑏᑦ ᐊᑕᐅᓯᕐᒥ ᐊᕐᕌᒍᒥ ᐊᑯᓐᓂᖏᓐᓂ 2010 ᐊᒻᒪᓗ 2025. ᒪᕐᕉᒃ ᐊᕐᕌᒎᒃ ᐃᓗᐊᓂᐳᓚᕋᖅᑐᖃᒃᑲᔪᖅᑐᖅ: ᓄᖑᓕᖅᑎᓪᓗᒍ ᐅᑭᐅᖅ ᑎᑭᑦᑐᒍ ᐅᐱᕐᖓᔅᓵᒧᑦ ᓯᐊᕆᔮᖅᑐᓄᑦ, ᐊᒻᒪᓗ ᐊᐅᔭᒃᑯᑦ ᐱᓱᑦᑐᓄᑦ ᐃᓐᓈᕈᖅᓯᐅᖅᑐᓄᓪᓗ. ᑕᒪᒃᑮᖕ ᓄᓇᓖᖕ ᒥᕐᖑᐅᓯᕐᕕᒻᒧᑦ ᐊᑕᔪᑦ ᖃᖓᑕᕕᐅᔪᓐᓇᕐᑐᐃᓐᓇᐅᓪᓗᑎᖕ ᖃᖓᑕᓲᒃᑯᑦ ᐃᓂᑦᓴᓕᐅᕐᓯᒪᓪᓗᓂ ᐃᖃᓗᓐᓃᙶᕐᑐᓂᑦ. ᐊᐅᓪᓚᕈᔾᔨᔩᑦ ᕿᑭᖅᑕᕐᔪᐊᒥ ᐸᓐᓂᖅᑑᒥᓗ ᒥᕐᖑᐃᓯᕐᕕᓕᐊᕈᔾᔨᕙᑦᑐᑦ ᐳᓚᕋᑎᓂᑦ ᐃᖅᑲᓇᐃᔭᕐᑎᓂᓪᓗ. ᑭᓯᐊᓂᓕ, ᖃᑦᓰᓐᓇᑯᓘᒻᒪᑕ ᐊᐅᓚᕈᔾᔨᕙᑦᑐᑦ, ᐅᓯᖃᑦᑕᕈᓐᓇᕐᑐᑦ ᖃᑦᓰᓐᓇᐅᓪᓗᑎᑦ, ᐃᖅᑲᓇᐃᔭᖅᑏᓪᓗ ᑐᐊᕕᕐᓇᖅᑐᖃᖅᐸᑦ ᐅᐸᒍᑎᑲᐅᖅᑐᕈᓐᓇᕋᑎᖕ ᐊᑐᐃᓐᓇᖅᑕᖃᙱᑉᐸᑦ. ᐊᒥᓲᓂᖅᓴᑦ ᐳᓚᕋᖅᑏᑦ ᐊᒃᓵᔫᑉ ᐊᖅᑯᑎᖓᒎᖃᑦᑕᓚᐅᖅᑐᑦ, ᑕᑯᒥᓇᖅᑐᖅ ᐊᖅᑯᑎᖓ ᒥᕐᖑᐃᓯᕐᕕᖕᒥ ᐊᖅᑯᑎᑐᐊᑦᑎᐊᖅ ᐊᐅᓚᔪᓐᓇᐅᑎᑐᐊᖏᓐᓂᑦ ᓴᓇᓯᒪᔪᑦ ᐱᖁᑎᕐᔪᐊᓂᑦ: ᐃᖅᑲᓇᐃᔭᕐᑏᑦ ᐃᓪᓗᕋᓛᖏᑦ, ᑐᐊᕕᕐᓇᖅᑐᓄᑦ ᐃᓪᓗᕋᓛᑦ, ᕿᓐᓂᓯᒪᔪᑦ, ᐊᒻᒪ ᐊᓇᕐᕖᑦ. ᐊᕐᕌᒍᖓᓂ 2025, ᒥᕐᖑᐃᓯᕐᕕᐅᑉ ᓈᓚᐅᑎᖏᑦ ᐋᖅᑭᑦᓯᐊᕐᑕᐅᕋᑖᓚᐅᕐᑐᑦ ᖃᖓᑦᑕᖅᑎᑕᐅᓯᒪᔪᒃᑯᑦ ᐊᑐᕈᓐᓇᕐᓯᓪᓗᑎᑦ, ᑐᓴᐅᒪᖃᑦᑕᐅᑎᑕᖃᓕᕐᑐᓂ ᒥᕐᖑᐃᓯᕐᕕᐅᑉ ᐊᓪᓚᕝᕕᖓᓂ ᐊᒻᒪ ᑐᐊᕕᕐᓇᖅᑐᖃᕐᑎᓪᓗᒍ ᐃᓪᓗᕋᓛᓂ ᑕᒻᒫᕐᕕᐅᕙᑦᑐᓂ ᐊᒃᓵᕐᔫᑉ ᐊᖅᑯᑖᒍᑦ. ᐊᒥᓲᖏᑦᑐᑦ ᐳᓚᕋᖅᑏᑦ ᐊᓯᖏᓐᓅᖃᑦᑕᓚᐅᖅᑐᑦ ᐊᐅᔪᐃᑦᑐᕐᒥ, ᐳᓛᕆᐊᕈᒪᓂᕐᓴᕈᖅᐸᓪᓕᐊᔪᑦ ᐃᒪᒃᑯᑦ−ᑐᓐᖓᕕᓖᑦ ᐳᓚᕋᖅᑐᓕᕆᓂᕐᒥᑦ ᐱᕕᒃᓴᐅᔪᓂᒃ ᑕᒫᓂ ᐊᕕᑦᑐᖅᓯᒪᔪᒥᑦ. ᐅᖓᓯᑦᑑᑕᐅᓂᖏᓐᓄᑦ ᓄᓇᖓᓃᑦᑐᑦ ᐊᒻᒪᓗ ᐊᑭᑐᓂᖓᓄᑦ ᐃᖏᕐᕋᔾᔪᑏᑦ, ᖃᕆᓴᐅᔭᒃᑰᕐᑐᓂᑦ ᑐᓴᐅᑎᑕᖃᕐᓂᖅ ᐃᑲᔫᑎᓪᓚᕆᐅᕙᓕᕐᑐᖅ ᐊᐅᔪᐃᑦᑐᓕᐊᕐᓯᒪᔪᑦ ᑐᑭᓯᐅᒪᓂᕐᓴᐅᔪᓐᓇᕐᓯᓗᑎᖕ.

ᐊᐅᓚᑦᑎᒍᑎᑦ ᐃᓗᐊᓂ

ᐅᖓᓯᑦᑑᑕᐅᓂᖏᓐᓄᑦ, ᓯᓚᖓ ᐊᔾᔨᒌᖏᓐᓇᖏᓐᓂᖓᓄᑦ, ᐊᒻᒪᓗ ᓄᓇᖏᓂ ᐱᔨᑦᓯᕐᑎᖃᑦᓯᐊᖏᒧᑦ ᖃᓄᖅᑑᕈᑕᐅᖏᓐᓇᕆᐊᓖᑦ ᐊᐅᔪᐃᑦᑑᑉ ᐊᐅᓚᓂᖓᑕ ᐸᕐᓇᐅᑎᖏᓐᓄᑦ, ᑭᓯᐊᓂ ᒥᕐᖑᐃᓯᕐᕕᒻᒨᖅᐸᑦᑐᑦ ᐃᑲᔪᖅᑕᐅᓪᓚᕆᑉᐸᑦᑐᑦ ᖃᐅᔨᒪᓂᖃᑦᓯᐊᕐᑐᓂᑦ ᐊᒻᒪᓗ ᐊᐅᓚᕈᔾᔨᓕᒻᒪᑦᑐᓂᑦ ᐃᑲᔪᖅᑎᖃᖅᑐᑎᑦ ᐊᓯᔾᔨᖅᑕᖅᑐᒻᒪᕆᒃᑯᑦ ᐊᑦᓱᕈᕐᓇᕐᑐᒃᑯᓪᓗ ᐃᖏᕐᕋᔭᕆᐊᖃᖅᑎᓪᓗᒋᑦ. ᐊᑐᕆᐊᖅᑕᖃᕐᓇᓂ ᓇᓪᓕᐊᓐᓂᑐᐃᓐᓇᖅ ᓄᓇᓖᓐᓂ, ᒥᕐᖑᐃᓯᕐᕕᒃ ᐅᐸᑦᑕᐅᕙᑦᑐᖅ ᐅᒥᐊᒃᑯᑦ, ᖃᒧᑕᐅᔭᒃᑯᑦ, ᖃᖓᑕᓲᒃᑯᑦ, ᐅᕝᕙᓘᓐᓃᑦ ᐱᓱᑦᑐᑎ. ᐃᒪᐅᓂᖓᓂ, ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᒫᓐᓇ ᐅᒥᐊᖁᑎᖃᙱᒻᒪᑕ ᓄᓇᓕᓐᓂ, ᐃᖅᑲᓇᐃᔭᖅᑏᑦ ᐊᐅᓪᓚᕈᔾᔨᔨᒧᑦ ᐅᓯᔭᐅᒋᐊᓖᑦ ᐅᕝᕙᓘᓐᓃᑦ ᓵᑕᖅᓯᒪᓪᓗᑎᖕ ᖁᓛᒎᓕᒥᑦ ᒥᕐᖑᐃᓯᕐᕕᒻᒧᑦ ᐅᐸᒍᒪᔭᖏᓐᓄᑦ, ᐃᓚᓕᐅᑎᓪᓗᒋᑦ ᑐᐊᕕᕐᓇᖅᑐᖃᖅᐸᑦ ᐊᐃᔭᐅᒋᐊᓕᓐᓂᑦ. ᐊᐅᓪᓚᕐᓂᐅᔪᖅ ᐱᒡᒐᓇᕈᓐᓇᖅᑐᖅ ᐅᕝᕙᓘᓐᓃᑦ ᐊᑐᕋᔅᓴᐅᖏᑦᑐᖅ ᓯᑯᓕᖅᑎᓪᓗᒍ ᐊᒻᒪᓗ ᓯᑯᐃᔭᓕᖅᑎᓪᓗᒍ ᐊᒻᒪᓗᑦᑕᐅᖅ ᓯᓚᑲᒻᒪᐅᑎᓪᓗᒍ. ᖃᓄᐃᑦᑐᑐᐃᓐᓇᐃᑦ ᓱᓇᒃᑯᑖᑦ ᐊᑐᐃᓐᓇᐅᖏᑦᑐᑦ ᐸᓐᓂᖅᑑᒥ ᕿᑭᕐᑕᖅᔪᐊᒥᓘᓐᓃᑦ ᐅᓯᔭᐅᔭᕆᐊᓖᑦ ᖃᖓᑕᓲᒃᑯᑦ ᐅᒥᐊᕐᔪᐊᒃᑯᓪᓘᓐᓃᑦ, ᓯᕗᓂᐊᒍᑦ ᐸᕐᓇᐃᒋᐊᖃᖅᑎᑎᓪᓗᑎ ᐊᒻᒪᓗ ᐊᑭᑦᑐᕆᐊᖅᑎᑎᓪᓗᐊᑲᓪᓚᑦᑐᑎᑦ ᐊᑭᖏᓐᓂ. ᓇᓗᓇᕈᑎᐅᔪᑦ ᐊᐅᓚᑕᐅᓂᖏᓐᓄᑦ ᐊᖏᓂᖅᓴᓄᑦ ᐱᓕᕆᐊᓄᑦ ᐊᔅᓱᕈᓐᓇᕈᓐᓇᖅᑐᑦ ᐃᖅᑲᓇᐃᔭᖅᑎᓄᑦ ᐊᐅᓚᓗᒋᑦ ᐊᓯᖏᑦᑕᐅᖅ ᐃᖅᑲᓇᐃᔮᖑᒋᐊᓖᑦ ᓲᕐᓗ ᐳᓚᕋᖅᑎᓄᑦ ᐱᔨᑦᑎᕋᐅᑎᖃᖅᑎᑦᑎᓂᖅ ᐊᒻᒪᓗ ᖃᐅᔨᓴᖃᑦᑕᕐᓂᖅ ᒥᕐᖑᐃᓯᕐᕕᒻᒥ, ᐱᓗᐊᖅᑐᒥᑦ ᕿᓚᒥᐅᔪᒥᑦ ᑭᓯᐊᓂ ᐱᓕᕆᒻᒪᕆᑦᑐᓂᑦ ᐳᓚᕋᖅᑎᑕᖃᖅᑲᔪᑎᓪᓗᒍ. ᑕᐃᒪᙵᓕᒫᖅ ᐃᓪᓗᑭᑦᓴᐃᓇᖅᑎᓪᓗᒋᑦ ᑕᒪᒃᑮᓐᓂ ᓄᓇᓖᓐᓂ, ᓈᒻᒪᑦᑐᓂᑦ ᐊᐅᓚᑦᑎᐊᕐᑐᓂᓪᓗ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑕ ᐃᖅᑲᓇᐃᔭᕐᑎᖏᑦ ᐃᓪᓗᖃᑦᓯᐊᕆᐊᓖᑦ ᐊᐅᓚᑦᑎᐊᓂᐊᕐᐸᑦ ᐊᐅᔪᐃᑦᑑᑉ ᒥᕐᖑᐃᓯᕐᕕᖓ. ᑕᐃᒫᑦᑕᐅᖅ ᐃᓪᓗᖃᕆᐊᖃᕐᓂᐊᖅᑐᑦ ᓯᕗᓂᑦᑎᓂ ᐊᐅᓚᔾᔭᑉᐸᑦ ᑎᓄᔾᔨᕕᐅᑉ ᑕᓯᐅᔭᖓ ᐊᒻᒪ ᐃᑭᕋᓴᐅᑉ ᑕᕆᐅᖓ ᓴᐳᔾᔨᕕᐅᓕᖅᐸᑦ.

ᐊᒡᒍᕐᓯᒪᖃᑕᐅᓪᓗᓂ ᓴᐳᔾᔨᕕᐅᓂᖓᑕ ᐃᓗᓕᖏᑦ

ᐊᐅᔪᐃᑦᑑᑉ ᒥᕐᖑᐃᓯᕐᕕᖓ ᐃᓚᒋᔭᐅᒻᒪᑦ ᐊᒥᓱᐊᓗᖕᓄᑦ ᐊᔾᔨᒌᖏᑦᑐᓂᑦ ᐊᐅᓚᑦᑎᒍᑎᖃᕐᑐᑦ ᓄᓇᖓᓂᑦ ᒪᓕᒐᕐᑎᒍᑦ, ᐃᓚᒋᔭᐅᓪᓗᑎᑦ ᓴᐳᔾᔨᕖᑦ. ᕿᑭᖅᑖᓗᒻᒥ, ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐊᐅᓚᑦᑎᔪᑦ ᐱᖓᓱᓂᑦ ᐊᓯᖏᓐᓂ ᒥᕐᖑᐃᓯᕐᕕᓂᑦ - ᓯᕐᒥᓕᒃ, ᖃᐅᓱᐃᑦᑐᖅ, ᐊᒻᒪᓗ ᖁᑦᑎᓂᕐᐹᖅ - ᐊᒻᒪᓗᑦᑕᐅᖅ ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᑕᕆᐅᕐᒥᐅᑕᓄᑦ ᓴᐳᒻᒥᔭᐅᔪᑦ. ᓄᑖᖅ ᒪᕐᕈᐃᓕᖓᓪᓗᓂ ᑎᒃᑯᐊᖅᑕᐅᓯᒪᔪᖅ ᓄᓇᖃᖅᑳᖅᓯᒪᔪᑦ ᓴᐳᔾᔨᕕᑦᓴᖓ ᑲᓇᑕᒥ ᐃᑭᕋᓴᐅᑉ ᐃᒪᕕᐊᓂ ᓴᐳᔾᔨᕕᑦᓴᖅ, ᑐᑦᓯᕌᖑᓚᐅᖅᑐᖅ 2025-ᒥ ᐊᖅᑯᑕᐅᓪᓗᓂ ᓯᓈ ᐊᖏᕈᑎᖓ ᐊᒻᒪᓗ ᓴᐳᔾᔨᕕᐅᓂᐊᕐᑐᖅ ᑕᕆᐅᕐᒥᐅᑕᓂᑦ ᒥᕐᖑᐃᓯᕐᕕᐅᑉ ᑭᓪᓕᖓ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᐅᓚᑦᑎᔨᐅᓪᓗᑎᑦ ᖃᑦᓯᑲᓪᓚᓐᓂᑦ ᐃᓄᓐᓄᑦ ᓄᓇᖁᑕᐅᔪᓂᑦ ᓯᓈᖓᒍᑦ ᐊᑕᔪᓂᑦ ᒥᕐᖑᐃᓯᕐᕕᐅᑉ ᑭᓪᓕᖓᓄᑦ. ᐊᕙᑎᓕᕆᔨᒃᑯᑦ ᐊᒻᒪᓗ ᓯᓚᖓᓄ ᐊᓯᔾᔨᕐᓂᖓᓄᑦ ᑲᓇᑕᒥ ᐊᐅᓚᑦᑎᔪᑦ ᖃᓂᒋᔭᖏᓐᓃᑦᑐᑦ ᓴᐳᒻᒥᔭᐅᔪᑦ ᓇᒦᓐᓂᖏᑦ ᐊᒻᒪᓗᑦᑕᐅᖅ; ᐊᒃᐸᐃᑦ ᐊᒻᒪᓗ ᖃᖁᓪᓗᐃᑦ ᑲᓇᑕᒥ ᐆᒪᔪᖃᕐᕕᑦ, ᓂᒋᖓᓂ ᐊᒻᒪᓗ ᑲᓇᓐᓇᖓᓂ ᐊᐅᔪᐃᑦᑐᖅ, ᓴᐳᒻᒥᑦᑎᔪᑦ ᐊᒥᓱᓂᑦ ᐃᒪᕐᒥᐅᑕᓂᑦ ᑎᒻᒥᐊᓂᑦ ᑲᑎᓐᖓᔪᓂᑦ, ᐱᖃᓯᐅᑎᓪᓗᒋᑦ ᐃᕙᕖᑦ ᐊᒻᒪᓗ ᓂᕆᕕᒋᕙᑦᑕᖏᑦ ᓇᔪᖃᑦᑕᖅᑕᖏᑦ. ᖃᓂᒋᔭᖓᓂ ᐸᓐᓂᖅᑑᖅ, ᓄᓇᕗᑦ ᒐᕙᒪᒃᑯᑦ ᐊᐅᓚᑦᑎᔪᑦ ᒪᕐᕉᓐᓂ ᓄᓇᕗᒻᒥ ᒥᕐᖑᐃᓯᕐᕖᓐᓂ: ᕿᑭᖅᑕᑦ, ᐱᖅᑯᓯᑐᖃᕐᓄᑦ ᓇᔪᖅᑕᐅᔪᖅᐅᖅᓱᓕᐅᕐᕕᒥᓂᖅ, ᐊᒻᒪᓗ ᐱᓱᒃᑎᓄ ᑐᓐᖓᕕᒃ, ᑰᖓᑕ ᑐᐱᖅᓯᒪᕕᐅᔪᖅ.

4.0 ᐱᕙᓪᓕᐊᑎᑕᐅᓂᖓ ᐊᐅᓚᑦᑎᓂᕐᒧᑦ ᐸᕐᓇᐅᑎ

ᑖᓐᓇ ᐊᐅᓚᑦᑎᓂᖕᒧᑦ ᐸᕐᓇᐅᑎ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᖓᓄᑦ ᐋᖅᑭᑦᓱᖅᑕᐅᓂᑯ ᒥᕐᖑᐃᓯᕐᕕᐅᑉ ᐸᕐᓇᐃᔨᖏᓐᓄᑦ ᐃᓚᖃᖅᑐᑎᖕ ᑎᒃᑯᐊᖅᑕᐅᓯᒪᔪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐊᒻᒪᓗ ᑲᓇᑕᐅᑉ ᒥᕐᖑᐃᓯᕐᕕᖓᓄᑦ, ᒪᓕᑦᑐᒍ ᕿᑭᖅᑖᓗᖕᒧᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑎᑦᓴᖏᓐᓄᓪᓗ ᐊᖏᕈᑦ.

ᐊᐅᓚᑦᑎᒍᑎᑦᓴᓂᑦ ᐸᕐᓇᐅᑎᓕᐅᕐᐸᓪᓕᐊᓪᓗᓂ ᐱᒋᐊᕐᕕᖃᖅᐸᑦᑐᑦ ᖃᓄᐃᓕᖓᓕᕐᒪᖔᑦ ᒥᕐᖑᐃᓯᕐᕕᒃ ᐊᒻᒪᓗ ᐱᓪᓗᐊᑕᐅᓂᖏᑦ ᐃᓱᒪᖅᓴᖅᓯᐅᕈᑕᐅᒋᐊᓖᑦ ᐊᕐᕌᒍᓄᑦ ᖁᓕᓄᑦ ᐊᐅᓚᔾᔪᑕᐅᓂᐊᕐᑐᓂ. ᒥᕐᖑᐃᓯᕐᕕᒃ ᖃᓄᐃᓕᖓᓕᕐᒪᖔᑦ ᖃᐅᔨᓴᕐᑕᐅᓚᐅᕐᑐᓂ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᖓ ᐊᕐᕌᒍᖓᓂ 2019, ᒥᕐᖑᐃᓯᕐᕕᐅᑉ ᐸᕐᓇᐃᔨᖏᑦ ᐊᑲᐃᓪᓕᕈᑕᐅᕙᑦᑐᓂᑦ ᖃᐅᔨᓴᓚᐅᖅᑐᑦ ᐊᒻᒪᓗ ᐱᓇᓱᕝᕕᐅᔪᓐᓇᕐᑐᓂᑦ ᖃᓄᖅᑑᕈᑕᐅᓂᐊᕐᖓᑕ ᐊᐅᓚᑦᑎᓂᖕᒧᑦ ᐸᕐᓇᐅᑎᒃᑯᑦ, ᓄᕙᕐᔪᐊᕐᓇᖅ-19 ᓯᐊᒻᒪᑦᓯᒪᓂᖓᓄᑦ ᑭᖑᕙᕆᐊᕐᓯᒪᓕᓚᐅᕐᑐᑦ ᐱᔭᑦᓴᕗᑦ. ᒥᕐᖑᐃᓯᕐᕕᐅᑉ ᐸᕐᓇᐃᔨᖏᑦ ᖃᐅᔨᒋᐊᓚᐅᕐᑐᑦ ᐅᖃᐅᔾᔫᓯᐊᑎᒍᑦ ᑲᑐᔾᔨᓂᒃᑯᑦ ᒥᕐᖑᐃᓯᕐᕕᒻᒥᑦ ᐸᕐᓇᐃᔩᑦ ᐊᒻᒪᓗ ᐊᐅᓚᑦᑎᔩᑦ ᑲᑎᒪᔨᕋᓛᖏᓐᓂᑦ ᖃᐅᔨᓴᕐᓂᖏᓐᓂ ᐱᕙᓪᓕᐊᒋᐊᓕᓐᓂᑦ ᐊᒻᒪᓗ ᐃᖏᕐᕋᖃᑎᒋᕙᑦᑐᒋᑦ ᐊᐅᓪᓚᖅᓯᒪᓪᓗᑎᑦ ᒥᕐᖑᐃᓯᕐᕕᒻᒧᑦ ᐊᕐᕌᒍᖓᓂ 2023.

ᐊᕐᕌᒍᖓᓂ 2024, ᒥᕐᖑᓱᕐᕕᒻᒧᑦ ᐸᕐᓇᐃᔩᑦ ᑲᑎᒪᑎᑦᓯᑲᑕᑦᑐᑎᑦ ᓄᓇᖃᖅᑐᓂᑦ ᐊᒻᒪᓗ ᑲᑐᔾᔨᖃᑎᒌᓂᑦ ᕿᑭᖅᑕᕐᔪᐊᒥ ᐸᓐᓂᖅᑑᒥᓗ ᐊᒻᒪᓗ ᒥᕐᖑᐃᓯᕐᕕᓕᕆᔾᔪᐊᑕᐅᕙᑦᑐᓂᑦ ᑎᒥᐅᔪᓂᑦ. ᑐᓴᕐᕕᒋᓪᓗᒋᑦ ᑲᑐᔾᔨᓂᒃᑯᑦ ᒥᕐᖑᐃᓯᕐᕕᒻᒧᑦ ᐸᕐᓇᐃᔩᑦ ᐊᒻᒪᓗ ᐊᐅᓚᑦᑎᔩᑦ ᑲᑎᒪᔨᕋᓛᖏᑦ, ᐃᓄᐃᑦ ᐱᔪᓐᓇᐅᑎᖏᓐᓂᑦ ᑎᒍᒥᐊᖅᑏᑦ, ᐊᖑᓇᓱᑦᑐᓕᕆᔩᑦ ᑲᑐᔾᔨᖃᑎᒌᖏᑦ, ᕼᐋᒪᓚᒃᑯᑦ ᑲᑎᒪᔨᖏᑦ, ᐃᓄᐃᑦ ᖃᐅᔨᒪᓂᓖᑦ ᑲᑎᒪᔨᖏᑦ, ᓄᓇᖏᓐᓂ ᓇᖕᒥᓂᓖᑦ, ᓄᓇᕗᑦ ᒐᕙᒪᖓᑦ, ᐳᓚᕋᑦᑐᓕᕆᔩᑦ, ᐊᒻᒪᓗ ᑲᓇᑕᐅᑉ ᒥᕐᖑᐃᓯᕐᕕᖓᑕ ᐃᖅᑲᓇᐃᔭᖅᑎᖏᑦ ᐅᓂᒃᑳᕆᖃᑦᑕᓚᐅᕐᑕᖏᑦ ᐃᓗᐊᓅᖅᑕᐅᓚᐅᖅᑐᑦ ᑎᑎᕋᕐᑕᐅᒋᐊᙵᕐᑐᑦ ᐊᐅᓚᑦᑎᓂᖕᒧᑦ ᐸᕐᓇᐅᑏᑦ. ᐃᓚᓕᐅᔾᔭᐅᖁᔭᐅᔪᑦ ᓄᓇᖃᖅᑐᓄᑦ ᐃᓚᓕᐅᔾᔭᐅᑲᑎᒋᓪᓗᑎᑦ ᐸᕐᓇᐅᑏᑦ ᑕᑯᓐᓇᙳᐊᕐᓯᒪᔭᖏᓐᓄᑦ ᑐᕌᕐᑕᓄᑦ, ᐱᓪᓗᐊᑕᐅᓂᖏᓐᓄᑦ ᐸᕐᓇᐅᑎᑦᓴᓄᑦ, ᑐᕌᒐᑦᓴᓄᑦ ᑎᑭᑕᐅᔪᒪᔪᓄᓪᓗ ᑲᔪᓯᑎᑕᐅᓂᖏᑎᒍᑦ.

5.0 ᑕᑯᓐᓇᖅᑕᐅᔪᖅ

ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ ᓴᐳᒻᒥᑦᑎᔪᑦ ᐱᐅᔪᕐᔪᐊᕌᓗᖕᒥᑦ, ᓯᓚᕐᔪᐊᒥ ᐃᓕᓴᕆᔭᐅᓯᒪᔪᒥᖕ ᐃᓄᐃᑦ ᐱᖅᑯᓯᖏᑦ ᐊᐅᓚᓂᖃᑦᑎᐊᖏᓐᓇᕐᓂᖏᓂᑦ ᐃᒻᒪᑐᖄᓗᖕᓂᑦ ᓯᕗᓕᑦᑎᓐᓂᑦ. ᓯᑯᖓ, ᐃᒪᖓ, ᐊᒻᒪ ᐊᓄᕆᖓ ᐊᓯᔾᔨᕐᑎᕆᑦᓯᐊᓲᖑᒻᒪᑦ ᓄᓇᖓᓂᖕ ᐊᒻᒪ ᐃᓄᓐᓄᑦ ᐊᑐᖅᑕᐅᕙᓐᓂᖓ; ᐃᒻᒥᓃᓐᓇᖅ ᐱᕙᓪᓕᐊᓲᖑᓂᖓᓄᑦ ᐱᓐᖑᕐᑎᑦᓯᓲᖅ ᒪᓃᑦᑐᒥᑦ ᐊᒻᒪ ᐊᔾᔨᐅᖏᑦᑐᒥᑦ ᑲᔾᔭᓇᕐᑐᐊᓗᖕᒥᑦ ᐱᖃᓯᐅᔾᔨᔪᓂᑦ ᐱᖃᓗᔭᕐᓂᑦ, ᑲᑕᓐᓂᓕᓐᓂᑦ, ᐊᐅᔪᐃᑦᑐᓂᑦ, ᑕᓯᕐᓂᑦ, ᓯᕕᑐᔪᑦ ᓇᖅᓴᐃᑦ, ᐊᒻᒪᓗ ᐃᓐᓈᕈᐃᑦ. ᐊᕙᑎᐊᓃᑦᑐᑦ ᓄᓇᖓᓃᑦᑐᓪᓗ ᐊᓰᓐᓇᓕᔭᐅᑦᑕᐃᓕᓗᑎᖕ ᒥᕐᖑᐃᓯᕐᕕᒃ ᓂᕿᑦᓴᖃᑦᓯᐊᖁᓪᓗᒍ ᓇᔪᖅᐸᑦᑕᖏᑦ ᐆᒪᔪᑦ ᐊᒻᒪᓗ ᑲᓱᖅᓯᒪᔪᑦ ᐊᕙᓗᐊᓃᑦᑐᓕᒫᑦ. ᓇᓄᐃᑦ, ᑑᒑᓖᑦ, ᑐᑦᑐᐃᑦ, ᓇᑦᑏᑦ, ᕿᓚᓗᒐᐃᑦ, ᐊᒻᒪᓗ ᐊᐃᕖᑦ ᐅᑭᐅᑕᖅᑐᒥ ᐆᒪᔪᓪᓗᐊᑕᐅᔪᑦ ᓇᓂᔭᐅᔪᑦ ᑕᕝᕙᓂ. ᐃᓄᐃᑦ ᒥᕐᖑᐃᓯᕐᕕᒨᖅᐸᑦᑐᑦ ᐊᖑᓇᓱᑦᑐᑎ ᐊᒻᒪᓗ ᐃᓚᖏᓐᓂ ᐃᓚᖃᖅᑐᑎᑦ, ᑲᔪᓯᑎᑦᑎᓪᓗᑎ ᐊᑯᓂᐅᔪᒥᑦ ᐱᖅᑯᓯᑐᖃᕐᓂᑦ ᐊᒻᒪᓗ ᑐᓂᓯᓪᓗᑎ ᖃᐅᔨᒪᓂᐅᔪᓂᑦ ᒪᒃᑯᓂᖅᓴᓄᑦ ᑭᖑᕚᖏᓐᓄᑦ.

ᐃᓄᐃᑦ ᓯᕗᓕᖅᑎᐅᓗᑎᑦ ᓇᐅᒃᑯᓕᒫᑦᓯᐊᖅ ᐊᐅᓚᒋᐊᓕᓐᓂᑦ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᓂ ᒐᕙᒪᑎᒍᑦ ᐊᐅᓚᑦᑎᒍᑎᖏᑎᒍᑦ, ᐃᓚᒋᔭᐅᓪᓗᑎᑦ ᓄᓇᓕᓐᓄᑦ ᐊᒻᒪᓗ ᑲᑐᔾᔨᖃᑎᖏᓐᓄᑦ ᑎᒥᐅᔪᓄᑦ, ᐊᒻᒪᓗ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᒃᑯᑦ ᐃᖅᑲᓇᐃᔭᖅᑎᖏᑎᒍᑦ. ᐱᓕᕆᖃᑎᒌᓐᓂᒃᑯᑦ ᐊᐅᓚᑦᑎᓂᕐᒧᑦ ᐅᐱᒍᓱᑦᑐᑦ ᑲᑐᑎᔭᐅᔪᓂᑦ ᑲᔪᖏᖅᑕᐅᓯᒪᔪᓂᑦ, ᓯᕗᒧᒋᐊᖅᑎᑦᑎᔪᑦ ᐱᕕᔅᓴᐅᔪᓐᓇᖅᑐᓂᑦ ᐊᒻᒪᓗ ᐃᑲᔫᓯᐊᓂ ᐃᓄᓐᓄᑦ, ᐊᒻᒪᓗ ᐱᕈᖅᑎᑦᑎᔪᑦ ᐅᕐᑉᐱᕆᖃᑦᑕᐅᑎᒌᓐᓂᕐᒥᑦ. ᐊᑕᖐᔪᓂᑦ ᖃᐅᔨᒪᔭᐅᔪᓂᑦ ᐊᑐᖅᑕᐅᔪᖅ, ᐃᓄᐃᑦ ᖃᐅᔨᒪᔭᑐᖃᖏᑦ ᑐᑭᒧᐊᖅᑎᑦᑎᔪᑦ ᑲᔪᓰᓐᓇᕐᓂᖃᖅᑐᓂᑦ ᐱᓯᒪᑦᑎᔨᐅᓂᕐᒧᑦ ᐊᒻᒪᓗ ᓴᐳᒻᒥᑦᑎᓂᕐᒧᑦ ᐱᒻᒪᕆᐅᔪᓂᑦ ᓄᓇᒦᖔᖅᑐᓂᑦ.

ᑭᒃᑯᑐᐃᓐᓇᑦᓯᐊᑦ ᑲᓇᑕᒥᐅᑦ ᓯᓚᕐᔪᐊᕐᒥᐅᓪᓗ ᐳᓛᕆᐊᕈᒪᔪᓪᒪᕆᐅᕙᒻᒪᑕ ᑕᑯᔭᕆᐅᕈᒪᒧᑦ ᐃᓕᖅᑯᓯᑐᖃᕐᖕᒥᑦ ᐊᒻᒪᓗ ᓯᕗᓕᑦᑎᓐᓃᙶᕐᑐᑐᖃᕐᓂᑦ ᐱᖁᑎᑐᖃᕐᓂᑦ ᐊᐅᔪᐃᑦᑑᑉ ᑲᓇᑕᒥ ᒥᕐᖑᐃᓯᕐᕕᖓᓂ. ᖃᐃᖅᑯᔭᐅᕗᑦ ᐃᖏᕐᕋᑦᓯᐊᕐᓗᑎᒃ ᐊᑦᑕᓇᓐᖏᑦᑐᒥ ᐃᑉᐱᒍᓱᑦᑎᐊᕐᓂᒃᑯᓪᓗ ᐊᕙᑎᒥᓂᒃ ᒥᕐᖑᐃᓯᕐᕕᒻᒦᖁᓪᓗᒋᑦ, ᐃᓄᐃᑦ ᐱᖅᑯᓯᖏᓐᓂᑦ ᒪᓕᑦᑎᐊᕐᓗᑎᖕ. ᐳᓚᕋᖅᑕᐅᓂᖓ ᐃᑲᔪᖅᑐᑦ ᓄᓇᓕᒻᒥ ᓇᒻᒥᓂᕆᔭᐅᔪᓂᑦ ᐸᓐᓂᖅᑑᒥ ᕿᑭᕐᑕᖅᔪᐊᕐᒥᓗ, ᐱᔨᑦᑎᖅᑕᖏᑦ ᐃᑲᔪᖅᑐᑦ ᐃᓄᐃᑦ ᐊᑐᕐᓂᖃᕐᓗᑎ ᐊᒻᒪ ᖁᕕᐊᒋᔭᖃᕐᓗᑎ ᑖᔅᓱᒥᖓ ᐊᔾᔨᐅᖏᑦᑐᒥᑦ ᓄᓇᐅᔪᒥᑦ. ᑲᓇᑕᒥᐅᑕᐃᑦ ᑐᑭᓯᑦᑎᐊᓂᕐᓴᐅᔪᓐᓇᕐᖓᑕ ᐊᐅᔪᐃᑦᑑᑉ ᐱᖅᑯᓯᑐᖃᖓᓂ ᓯᕗᓕᑦᑎᓐᓃᓐᖔᕐᑐᓂᑦ ᑐᓴᐅᒪᑎᑦᓯᓂᒃᑯᑦ ᐱᓪᓗᐊᑕᐅᓂᖏᓐᓂᑦ ᐃᓄᐃᑦ ᑕᑯᓐᓇᕐᑕᖏᓐᓂᑦ ᐅᓂᒃᑳᕐᑐᐊᖏᓐᓂᓪᓗ ᐊᒻᒪᓗᑦᑕᐅᖅ ᐃᓄᒃᑎᑐᑦ ᑕᐃᒎᓯᓂᑦ ᓄᓇᐃᓪᓗ ᐊᑎᑐᖃᖏᓐᓂᑦ ᑐᑭᓯᐊᒪᓕᕈᑎᖕ.

ᒥᕐᖑᐃᓯᕐᕕᒃ ᓄᓇᐅᒻᒥᔪᖅ ᑕᑯᓗᓂ ᐊᒻᒪᓗ ᐃᓕᓪᓗᓂ ᐱᔾᔪᑎᖃᖅᑐᓂ ᓯᓚᖓᓄ ᐊᓯᔾᔨᕐᓂᖓᓄᑦ ᐊᑦᑐᖅᑕᐅᔪᓂᑦ ᑲᓇᑕᐅᑉ ᐅᑭᐅᑕᖅᑐᖓᓂ. ᑕᐃᒪᙵᓕᒫᖅ ᓇᐅᑦᑎᖅᓱᖃᑦᑕᕐᓂᒃᑯᑦ ᑲᓇᑕᐅᑉ ᒥᕐᖑᐃᓯᕐᑯᓕᕆᔨᖏᑦ ᐊᑐᓕᕐᑎᑦᓯᔪᓐᓇᕐᑐᑦ ᐸᕐᓇᐅᑎᓂᑦ ᒥᕐᖑᐃᓯᕐᕕᒻᒨᖅᐸᑦᑐᑦ ᐊᑦᑕᓇᖅᑐᒦᖁᓇᒋᑦ ᑕᕝᕙᑦᓴᐃᓐᓇᖅ ᐊᕙᓗᐊᓃᑦᑐᓕᒫᑦ ᐊᒻᒪᓗ ᐃᓕᖅᑯᓯᑐᖃᖅ ᑲᔪᓰᓐᓇᕈᓐᓇᖁᓪᓗᒍ. ᑕᖏᓖᑦ ᐆᑦᑐᕋᐅᑏᑦ ᐊᓯᔾᔨᖅᑐᓂᑦ ᐊᒻᒪᓗ ᐊᑐᓕᕈᓐᓇᓂᕐᒧᑦ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒻᒥ ᐱᔪᒪᓂᖃᖅᑎᑦᑎᔪᑦ ᐃᓄᓐᓂᑦ ᑕᑯᓗᑎ ᐊᒻᒪᓗ ᖃᓄᐃᓕᓯᒋᐊᕐᓂᖃᕐᓗᑎ ᓇᒻᒥᓂᖅ ᐃᓅᓯᖏᓐᓂ.

6.0 ᐸᕐᓇᐅᑎᓪᓗᐊᑕᐅᔪᑦ

ᐱᖓᓱᑦ ᐸᕐᓇᐅᑏᑦ ᑐᑭᒧᐊᖅᑎᑦᑎᔪᑦ ᐊᐅᓚᑕᐅᓂᖓᓄᑦ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ ᖁᓕᓄᑦ ᐊᕐᕌᒍᓄᑦ. ᐊᑕᐅᑦᓯᒃᑰᕐᑕᕐᓗᑎᑦ, ᐊᐅᓚᑦᑎᒍᑕᐅᕙᑦᑐᑦ ᖃᓄᐃᓕᕐᑎᑦᓯᔪᖃᕐᓂᐊᕋᐃᒻᒪᑦ ᒥᕐᖑᐃᓯᕐᕕᒻᒥ ᐊᒻᒪᓗ ᐃᑲᔪᕐᑎᖃᐃᓐᓇᕐᓗᑎᑦ ᐃᓄᓐᓂᑦ, ᑮᓇᐅᔭᑎᒍᑦ, ᐊᓯᖏᑎᒍᓪᓗ ᐱᓇᓱᐊᕈᑎᑦᓴᒃᑯᑦ ᐊᑐᕐᓂᓕᒫᖓᓂ ᐸᕐᓇᐅᑏᑦ ᑕᑯᓐᓇᙳᐊᕐᑕᐅᓯᒪᔪᑦ ᑐᕌᒐᑦᓴᖏᑦ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᓄᑦ ᑲᔪᓯᔪᓐᓇᖁᓪᓗᒋᑦ.

ᐸᕐᓇᐅᑎᓪᓗᐊᑕᖅ 1
ᐊᖏᕈᑎᒋᓯᒪᔭᖏᑦ ᐱᓂᐊᕐᓂᒃᑯᑦ ᑲᔪᓯᑎᑉᐸᓪᓗᒋᑦ ᐊᒻᒪ ᐃᓚᒋᔭᐅᑎᑦᓯᓂᒃᑯᑦ ᓄᓇᓕᓐᓂᑦ

ᓴᓐᖏᔪᒥᑦ ᐃᓄᓐᓂᑦ ᑲᑎᓐᖓᑎᑦᑎᓂᖅ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃᑯᓐᓄᑦ ᓴᖅᑭᑎᑦᑎᓯᒪᔪᑦ ᑭᖑᕚᕇᖃᑦᑕᐅᑎᔪᑎᒍᑦ ᓄᓇᖃᖅᑐᓂ ᓄᓇᒥ, ᐊᐅᓪᓚᓂᕐᒥᑦ, ᐊᖑᓇᓱᓐᓂᕐᒥᑦ, ᐱᓯᒪᔭᐅᖏᓐᓇᖅᑐᑎ ᐱᖅᑯᓰᑦ, ᐊᒻᒪᓗ ᑐᓂᓯᓂᕐᒧᑦ ᖃᐅᔨᒪᓂᐅᔪᓂᑦ. ᐃᓄᐃᑦ ᐊᑐᖅᐸᒻᒪᑕ ᓄᓇᕗᑦ ᐊᖏᕈᑎᖓᒍᑦ ᐱᔪᓐᓇᐅᑎᖏᓐᓂᑦ ᐊᒻᒪ ᐸᐸᑦᓯᔨᐅᖏᓐᓇᐅᔭᕐᑐᑎᖕ ᐊᕙᑎᑦᑎᓃᑦᑐᓕᒫᓂᑦ ᐆᒪᔫᖃᑎᒌᓂᑦ ᓯᓚᑦᑎᑦᑎᓄᓪᓗ ᒥᕐᖑᐃᓯᕐᕕᐅᑉ ᐃᓗᐊᓂ ᐅᖓᑖᓂᓗ. ᒥᕐᖑᐃᓯᕐᕕᒃ ᑲᑐᔾᔨᓂᒃᑯᑦ ᐊᐅᓚᑕᐅᔪᖅ ᐅᖃᐅᔾᔨᒋᐊᕆᔨᖃᖅᑐᑕ ᑲᑐᔾᔨᓂᒃᑯᑦ ᐸᕐᓇᐃᔨᓂᑦ ᐊᒻᒪᓗ ᐊᐅᓚᑦᑎᔩᑦ ᑲᑎᒪᔨᕋᓛᖏᓐᓂᑦ, ᐃᓚᒋᔭᐅᖏᓐᓇᕐᓂᐊᕐᖓᑕ ᐃᓄᐃᑦ ᐸᕐᓇᐅᑎᓕᐅᕐᓂᖏᓐᓂ ᐊᒻᒪᓗ ᐃᓱᒪᓕᐅᕆᐊᖃᕋᐃᑉᐸᑕ. ᓱᓕᒃᑲᓐᓂᖅ ᖃᓄᖅᑑᕈᓐᓇᕐᑐᑦ ᓄᓇᓖᑦ ᐊᑐᐃᓐᓇᖃᐃᓐᓇᖁᓪᓗᒋᑦ ᒥᕐᖑᐃᓯᕐᕕᒻᒥᑦ, ᐱᖃᓯᐅᑎᓪᓗᑎ ᓴᖅᑭᑎᑦᑎᓂᕐᒥᑦ ᐱᕕᔅᓴᐅᔪᓐᓇᖅᑐᓂᑦ ᖃᐅᔨᒪᓂᐅᔪᓂᑦ ᐊᐅᓪᓛᖅᑕᐅᓂᖏᓐᓄᑦ, ᐃᓚᒋᔭᐅᑎᑦᑎᖃᑦᑕᓂᖅᓴᐅᓂᕐᒧᑦ ᓄᓇᓕᒻᒥ ᑲᑐᔾᔨᖃᑎᒌᓂᑦ, ᐊᒻᒪᓗ ᒪᓕᑦᑎᒌᓕᕐᑎᑕᐅᓗᑎᑦ ᐱᓕᕆᔾᔪᑎᑦᓴᑦ ᐃᓄᐃᑦ ᓯᕗᓪᓕᐅᑎᒍᒪᔭᖏᓐᓄᑦ. ᐃᑲᔪᕐᑐᐃᓗᑎᑦ ᐊᔪᕈᕐᓃᖅᓴᐃᓂᒃᑯᑦ ᐃᖅᑲᓇᐃᔭᕐᑎᑖᖅᐸᓪᓕᐊᓗᑕ, ᓴᙵᑦᑎᕆᓂᒃᑯᑦ ᐃᓚᒌᓐᓂᖕᒥᑦ, ᐃᑲᔪᖅᑎᐅᖃᑎᖃᕐᓂᖕᒥᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ, ᐊᒻᒪᓗ ᓈᓚᑉᐸᓪᓗᒋᑦ ᓄᓇᓖᑦ ᑭᙴᒪᔭᖏᑦ ᐊᖅᑯᑕᐅᔪᓐᓇᕐᖓᑕ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᐃᑲᔪᕈᓐᓇᖁᓪᓗᒋᑦ ᐃᓄᓐᓄᑦ ᐃᑲᔫᑕᐅᔪᓐᓇᕐᔫᒥᔪᓂᑦ ᐱᓇᓱᑦᑎᑎᕙᓪᓕᐊᓂᒃᑯᑦ.

ᑐᕌᒐᖓ 1.1

ᐃᓄᐃᑦ ᒥᔅᓯᖃᑦᑎᐊᖅᑐᒥᑦ ᐃᓚᒋᔭᐅᖃᑕᐅᔪᑦ ᐊᑕᖏᖅᑐᒋᑦ ᐃᓱᒪᒋᔭᐅᔪᓂᑦ ᐊᐅᓚᑕᐅᓂᖓᓄᑦ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ.

• 1.1.1: ᑲᑐᔾᔨᓂᒃᑯᑦ ᒥᕐᖑᐃᓯᕐᕕᒻᒧᑦ ᐸᕐᓇᐃᔩᑦ ᐊᐅᓚᑦᑎᓂᖕᒧᓪᓗ ᑲᑎᒪᔩᑦ ᐊᐅᓚᑦᑎᖃᑕᐅᕙᑦᑐᑦ ᒥᕐᖑᐃᓯᕐᕕᒻᒥ ᐊᒻᒪᓗ ᐊᐅᓚᑦᑎᓂᖕᒧᑦ ᐊᖑᒻᒪᑏᓐᓇᕐᑐᑎᒃ ᐅᖓᑕᐅᔾᔨᒻᒪᕆᑦᑐᑎᓪᓘᓐᓃᑦ ᐱᔭᔅᓴᖏᓐᓂᑦ ᕿᑭᖅᑖᓗᒻᒥ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑎᑦᓴᖏᓐᓄᓪᓗ ᐊᖏᕈᑎᖓᓃᑦᑐᓂᑦ ᖃᓄᑎᒋ ᑲᑎᒪᖃᑦᑕᑐᔅᓴᐅᒻᒪᖔᑕ ᐊᕌᒍᑕᒫᑦ (ᑕᐃᒫᒃ ᓇᓗᓇᐃᖅᑕᐅᓯᒪᒻᒪᑦ ᕿᑭᖅᑖᓗᖕᒥ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑎᑦᓴᖏᓐᓄᓪᓗ ᐊᖏᕈᑎᖓᓂ ᐃᓚᖓᓂ 5.1.13).
• 1.1.2: ᐱᓕᕆᐊᖑᔪᑦ ᐃᓄᐃᑦ ᖃᐅᔨᒪᔭᖏᓐᓂ ᑲᑎᒪᔨᖏᓐᓄᑦ ᐸᓐᓂᖅᑑᒥ ᕿᑭᖅᑕᕐᔪᐊᒥᓗ ᑲᔪᓯᑎᑦᑎᒍᑕᐅᕙᒻᒪᑕ ᐃᓄᐃᑦ ᓯᕗᓪᓕᐅᔾᔭᐅᖁᔭᖏᓐᓂᑦ ᐱᐅᖅᓱᐊᕐᓂᕐᒧᑦ ᐊᒥᖅᑳᑲᑎᖃᕐᓂᕐᒧᓪᓗ ᒥᕐᖑᐃᓯᕐᕕᐅᑉ ᐃᑦᑕᕐᓂᓴᖁᑎᖏᓐᓂᒃ.
• 1.1.3: ᑲᑐᔾᔨᓂᒃᑯᑦ ᒥᕐᖑᐃᓯᕐᕕᒻᒧᑦ ᐸᕐᓇᐃᔩᑦ ᐊᐅᓚᑦᑎᓂᖕᒧᓪᓗ ᑲᑎᒪᔩᑦ ᐊᒻᒪ ᐃᓄᐃᑦ ᖃᐅᔨᒪᔭᖏᓐᓂ ᑲᑎᒪᔨᕋᓛᑦ ᐃᓛᓐᓂᓚᐅᓱᖓᒃᑯᑦ ᑲᑎᒪᕙᑦᑐᑦ ᒥᕐᖑᐃᓯᕐᕕᒻᒥ ᖃᖓᓚᐅᓪᓚᒃᑯᑦ ᐊᔪᕐᓇᙱᑐᐊᕋᐃᑉᐸᑦ, ᐊᒻᒪ ᒪᕐᕈᐃᓱᕐᑐᑎᖑᓐᓃᑦ ᑲᑎᒪᕙᑦᑐᑦ ᐊᑐᓕᕐᑎᑕᐅᕙᓪᓕᐊᓂᖏᓂ ᑖᒃᑯᐊ ᐊᐅᓚᑦᑐᑎᓂᖕᒧᑦ ᐸᕐᓇᐅᑏᑦ. ᑕᐃᒫᖕ ᑲᑎᒪᒐᐃᒐᑦᑕ ᓄᓇᖃᖅᑐᑦ ᐊᐅᓪᓛᕐᓯᒪᔪᓐᓇᕐᓯᒪᕙᒻᒪᑕ ᓄᓇᒧᑦ ᑲᔾᔭᐅᓴᒋᐊᕐᓯᒪᓯᓐᓈᑦ.
• 1.1.4: ᒐᕙᒪᑎᒍᑦ ᐊᐅᓚᑦᑎᒍᑎᑦ ᐊᓯᔾᔨᕐᐸᑕ ᐱᔾᔪᑎᒋᓪᓗᒍ ᓯᓈ ᐊᖏᕈᑎᖓ, ᕿᑭᖅᑖᓗᖕᒥ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑎᑦᓴᖏᓐᓄᓪᓗ ᐋᔩᒃᑲᓐᓂᕈᑕᐅᒋᐊᓖᑦ, ᐊᒻᒪᓗ ᐊᓯᓕᒫᖏᑦ ᓄᑖᑦ ᐊᖏᕈᑏᑦ ᐊᑐᓕᕐᑎᑕᐅᕙᓪᓗᑎᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᓐᓇᑦ ᐱᔭᕇᕐᕕᑦᓴᐅᑎᖏᑎᒍᑦ ᐱᔭᕇᕐᑕᐅᕙᓪᓗᑎᖕ.

ᑐᕌᒐᖓ 1.2

ᐃᓄᐃᑦ ᕿᑭᕐᑕᖅᔪᐊᒥ ᐸᓐᓂᖅᑑᒥᓗ ᐃᑲᔫᓯᐊᖃᑦᑕᖅᑐᑦ ᑮᓇᐅᔭᓕᕆᓂᕐᒧᑦ ᐱᕕᔅᓴᐅᔪᓐᓇᖅᑐᓂᑦ ᐊᑦᑐᐊᓂᓕᓐᓄᑦ ᒥᕐᖑᐃᓯᕐᕕᒻᒧᑦ.

• 1.2.1: ᐃᓄᓐᓄᑦ ᓇᖕᒥᓂᕆᔭᐅᔪᑦ ᓄᓇᓕᓐᓂᓗ ᓇᖕᒥᓂᓖᑦ ᓴᖅᑭᔮᖅᑎᑕᐅᕙᓪᓗᑎᖕ ᐳᓚᕋᑎᓄᑦ ᑐᓴᕋᑦᓴᑎᒍᑦ ᑲᑎᖅᓱᖅᑕᐅᕙᑦᑐᓂ, ᒥᕐᖑᐃᓯᕐᕕᐅᑉ ᐃᑭᐊᖅᑭᕕᖓᒍᑦ, ᐊᒻᒪᓗ ᑐᓴᖅᑕᐅᒋᐊᓕᓐᓂ ᐳᓛᕆᐊᕐᓯᒪᔪᓄᑦ ᐅᖃᓕᒫᒐᕐᓂ.
• 1.2.2: ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᓇᖕᒥᓂᓕᓐᓄᑦ ᓚᐃᓴᑖᖅᑎᑦᑎᓲᖑᒻᒪᑕ ᐊᖏᕈᑎᒃᑯᑦ ᐃᓄᓐᓂᑦ ᐊᐅᓪᓚᕈᔾᔨᕙᑦᑐᓂᑦ ᐊᒻᒪᓗ ᐱᓕᒻᒪᔅᓴᕈᑎᔅᓴᓕᐅᖅᐸᑦᑐᑦ ᐋᖅᑭᑦᓱᐃᓕᕋᐃᒻᒪᑕ ᐃᖅᑲᓇᐃᔭᕐᑎᓄᑦ ᐃᓕᓐᓂᐊᕋᔅᓴᓂᑦ (ᓲᕐᓗ ᓄᓇᑐᐃᓐᓇᕐᒥ ᐋᓐᓂᖅᑐᓕᕆᓂᖕᒧᑦ ᐃᓕᓐᓂᐊᕈᑏᑦ) ᕿᑭᖅᑕᕐᔪᐊᒥ ᐸᓐᓂᖅᑑᒥᓗ.
• 1.2.3: ᐊᑐᓕᕐᑎᑕᐅᓂᖏᑎᒍᑦ 2026-2036 ᐊᕐᕌᒍᖏᓐᓄᑦ ᐃᓄᐃᑦ ᐃᖅᑲᓇᐃᔮᖅᑖᖁᓪᓗᒋᑦ ᐸᕐᓇᐅᑏᑦ, ᐊᐅᔪᐃᑦᑐᖅ ᒥᕐᖑᐃᓯᕐᕕᖓᓂ ᐃᖅᑲᓇᐃᔭᖅᑎᖃᐃᓐᓇᕐᑐᑦ 100% ᐳᓴᑦᑎᓂᑦ ᑕᒪᐃᓐᓂᒃ ᑲᔪᓯᑎᑦᑎᓯᒪᔪᑦ ᐊᒻᒪ ᐃᑲᔪᖅᓱᐃᔾᔪᑎᓂᑦ ᐃᓄᐃᑦ ᐃᖅᑲᓇᐃᔭᖅᑎᖏᑦ ᖃᓄᐃᓐᖏᑦᑎᐊᖁᓪᓗᒋᑦ ᐊᓐᓇᐅᒪᔾᔪᑎᑦᓴᖏᓐᓂᑦ.
• 1.2.4: ᐃᑲᔫᑏᑦ ᐃᓄᓐᓄᑦ ᐊᖅᑯᑕᐅᓪᓗᓂ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑎᑦᓴᖏᓐᓄᓪᓗ ᐊᖏᕈᑦ.
• 1.2.5: ᒪᓕᑦᑐᒋᑦ ᐊᑐᐊᕆᐊᓖᑦ ᐃᓚᖓᓂ 24 ᓄᓇᕗᑦ ᐊᖏᕈᑎᖓᑕ, ᐃᓄᓐᓄᑦ ᓇᖕᒥᓂᕆᔭᐅᔪᑦ ᑲᔪᖏᖅᑐᖅᑕᐅᕙᑦᑐᑦ ᐊᖏᕈᑎᓂᑦ ᑳᓐᑐᓛᕐᑖᕋᓱᖁᓪᓗᒋᑦ, ᓂᐅᕕᐊᔅᓴᓖᑦ ᐱᔨᑦᑎᕋᖅᑏᓪᓗ ᐊᑐᐃᓇᐅᔪᑦ ᕿᑭᖅᑕᕐᔪᐊᒥ ᐸᓐᓂᖅᑑᒥᓗ ᓇᓗᓇᐃᕐᑕᐅᓯᒪᓪᓗᑎᑦ ᐊᒻᒪᓗ ᖃᐅᔨᒋᐊᖅᕕᐅᖅᑳᐸᓪᓗᑎᒃ ᐊᑐᖅᑐᐊᖅᑕᐅᔪᓐᓇᕐᓂᖏᓐᓂᑦ.
• 1.2.6: ᐃᓚᒋᔭᐅᑎᑦᑎᓂᒃᑯᑦ ᐊᖑᓇᓱᑦᑐᓕᕆᔩᑦ ᑲᑐᔾᔨᖃᑎᒌᖏᓐᓂᑦ ᐊᒻᒪ ᑲᓇᑕᐅᑉ ᐃᒪᕐᒥᐅᑕᓕᕆᔨᖏᓐᓂᑦ ᐋᖅᑭᑦᓱᐃᒍᑕᐅᕙᒻᒪᑦ ᐃᓄᐃᑦ ᓂᐅᕐᕈᑎᔅᓴᒧᑦ ᐃᖃᓗᒐᓱᒍᓐᓇᖁᓪᓗᒋᑦ ᒥᕐᖑᐃᓯᕐᕕᒻᒥ, ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᐱᔭᕇᔭᕐᓯᒪᕙᒻᒪᑕ ᐊᓪᓚᕝᕕᒃᑯᑦ ᐱᔭᕇᔭᕆᐊᓕᓐᓂᑦ ᐅᓪᓗᕐᓯᐅᑎᓄᑦ ᓈᒻᒪᓈᕐᓯᒪᖁᓪᓗᒋᑦ ᐃᑲᔪᖅᑐᖅᑕᐅᖁᓪᓗᒋᑦ ᐃᖃᓗᓕᕆᓂᖕᒧᑦ ᖃᐅᔨᓴᕐᑕᐅᒋᐊᓖᑦ ᑲᓇᑕᐅᑉ ᐃᒪᕐᒥᐅᑕᓕᕆᔨᖏᓐᓄᑦ.

ᑐᕌᒐᖓ 1.3

ᑖᕗᖓᓕᒫᖅ ᖃᓄᖅᑑᖃᑎᒋᔭᐅᕙᓪᓗᑎᑦ ᕿᑭᖅᑕᕐᔪᐊᒥᐅᑦ ᐸᓐᓂᖅᑑᒥᐅᓪᓗ ᑲᔪᖅᓯᒪᐃᓐᓇᕐᓂᐊᕐᑕ ᒥᕐᖑᐃᓯᕐᕕᒻᒧᑦ.

• 1.3.1: ᐊᑕᐅᓯᐊᕐᓗᑎᖑᓐᓃᑦ ᐃᓅᓱᑦᑐᓂᑦ ᕿᑭᖅᑕᕐᔪᐊᒥᐅᓂᑦ ᐸᓐᓂᖅᑑᒥᐅᓂᓪᓗ ᐊᕐᕌᒍᑕᒫᑦ ᐃᓚᐅᑎᑦᓯᕙᓪᓗᑎᖕ, ᒥᕐᖑᐃᓯᕐᕕᒻᒥ ᖁᕕᐊᓱᒋᐊᕐᓯᒪᓗᑎᖕ ᐊᑲᐅᓈᓕᑐᐊᕋᐃᑉᐸᑦ.
• 1.3.2: ᓄᓇᖃᖅᑐᑦ ᑲᑐᔾᔨᖃᑎᒌᓪᓗ ᖃᐅᔨᒪᑎᑕᐅᖏᓐᓇᕐᓗᑎᑦ ᒥᕐᖑᐃᓯᕐᕕᐅᑉ ᐊᐅᓚᕙᓪᓕᐊᓂᖓᓂᑦ ᑐᓴᐅᒪᑎᑦᓯᓂᒃᑯᑦ ᐊᕐᕌᒍᑕᒫᑦ ᑲᑎᒪᕕᔾᔪᐊᕐᑎᑦᓯᓂᒃᑯᑦ (ᓲᕐᓗ ᐆᒪᔪᕐᓂᐊᕐᑏᑦ ᑲᑎᒪᔨᖏᓐᓂᑦ ᐊᒻᒪᓗ ᕼᐋᒪᓚᒃᑯᑦ ᑲᑎᒪᔨᖏᓐᓂᑦ), ᐃᓛᓐᓂᓚᐅᓱᖓᒃᑯᑦ ᓄᓇᓖᑦ ᖃᓄᐃᓕᐅᕐᑎᑕᐅᑎᓪᓗᒋᑦ ᐊᒻᒪᓗ ᑎᑎᖅᑲᒃᑯᑦ ᑎᑎᕋᕐᕕᐅᒐᔪᑦᑐᑎᑦ.
• 1.3.3: ᓄᓇᓕᓐᓄᑦ ᑐᓴᐅᒪᑎᑦᓯᒍᑎᑦ ᑐᓂᐅᖅᑲᖅᑕᐅᓂᒃᑯᑦ ᓇᓗᓇᐃᕐᓯᓯᒪᑦᓯᐊᕐᖓᑕ ᐃᓄᐃᑦ ᐱᔪᓐᓇᐅᑎᖏᓐᓂᑦ ᒥᕐᖑᐃᓯᕐᕕᒻᒥ ᐊᒻᒪᓗᑦᑕᐅᖅ ᓴᖅᑭᔮᕐᑎᑦᓯᓪᓗᑎᖕ ᐱᖁᔭᓂᑦ ᐊᑐᖅᑕᐅᒋᐊᓕᓐᓂᑦ ᐳᓚᕋᑎᓄᑦ, ᐱᖃᓯᐅᔾᔭᐅᓪᓗᑎᖕ ᓄᓇᖃᖃᑕᐅᔪᑦ ᐃᓄᒻᒪᕆᐅᖏᑦᑐᑦ ᐊᑎᖃᖃᑕᐅᙱᑦᑐᑦ ᓄᓇᕗᑦ ᐊᖏᕈᑎᖓᓂ, ᐊᒻᒪ ᓂᐅᕐᕈᑎᑦᓴᓕᐅᕐᓂᖕᒧᑦ ᑐᕌᖓᔪᑦ.

ᐸᕐᓇᐅᑎᓪᓗᐊᑕᖅ 2
ᑲᓱᖅᑎᑦᓯᓂᖅ ᒥᕐᖑᐃᓯᕐᕕᒻᒧᑦ ᐊᑦᑕᓇᖏᓪᓗᓂ ᐊᒻᒪ ᑐᑭᓕᓐᓂᑦ ᐃᑉᐱᓐᓇᕐᑐᓂᑦ ᖃᐅᔨᔪᓐᓇᖁᓪᓗᒋᑦ ᐊᑐᖅᑕᒥᒍᑦ

ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ ᐃᑲᔪᖃᑦᑕᖅᑐᑦ ᐊᔾᔨᒌᖏᑦᑐᓂᑦ ᐊᑐᖅᑕᐅᕙᓪᓕᐊᓂᐅᔪᓂᑦ: ᐃᓄᐃᑦ ᐃᖏᕐᕋᕙᑦᑐᑦ ᐊᒻᒪᓗ ᐱᔪᓐᓇᐅᑎᒥᒍᑦ ᖃᓄᐃᓕᐅᕈᓐᓇᐅᑎᖏᑎᒍᑦ ᓄᓇᒥᓅᖃᑦᑕᕈᓐᓇᕐᑐᑦ ᐊᕐᕌᒍᓕᒫᖅ ᖃᖓᑐᐃᓐᓇᒃᑯᑦ, ᐳᓚᕋᑏᑦ ᐊᕐᕌᒎᑉ ᐃᓚᐃᓐᓇᖓᒍᑦ ᐳᓛᕆᐊᕐᐸᑦᑐᑦ ᑲᔾᔭᐅᓴᒋᐊᕐᑐᑎᑦ, ᐊᓯᖏᓪᓗᑦᑕᐅᖅ ᓲᕐᓗ ᖃᐅᔨᓴᖅᑏᑦ ᐊᒻᒪᓗ ᑕᕐᕆᔮᑦᓴᓕᐅᕐᑏᑦ ᐃᓛᓐᓂᓚᐅᓱᖓᒃᑯᑦ ᒥᕐᖑᐃᓯᕐᕕᒻᒨᐸᒻᒥᔪᑦ. ᑐᙵᓱᑦᑎᑦᓰᓐᓇᖅᑐᑦ ᐳᓚᕋᑎᓂᑦ ᐊᓕᐊᓇᐃᒍᓱᖁᓪᓗᒋᑦ ᑕᕝᕙᑦᓴᐃᓐᓇᖅ ᒪᓕᑦᓯᐊᕐᓗᑎᑦ ᐃᓄᐃᑦ ᐱᔪᓐᓇᐅᑎᖏᓐᓂᑦ ᐊᑐᖅᑐᑎᑦ ᐊᐅᓪᓚᕐᓯᒪᑎᓪᓗᒋᑦ ᐊᒻᒪᓗ ᐅᑉᐱᕆᔭᖏᑕ ᑐᓐᖓᕕᖏᑦ ᓯᕗᓪᓕᐅᔾᔭᐅᓪᓗᑎᖕ. ᒪᑭᑕᑎᑦᓯᓯᐊᖏᓐᓇᕐᓗᑎᖕ ᐊᐅᔪᐃᑦᑐᕐᒨᕐᑐᑦ ᐱᐅᓛᒥᖕ, ᐱᓪᓚᕆᐊᓗᖕᒥᖕ ᐳᓛᕆᐊᕐᓯᒪᔪᑦ ᑕᑯᔪᓐᓇᖁᓪᓗᒋᑦ, ᑐᑭᓯᐅᒪᔾᔪᑎᑦᓴᓂᑦ ᐅᓂᒃᑳᕐᑕᖃᕐᓂᒃᑯᑦ, ᐃᓪᓗᕋᓛᖃᕐᓂᒃᑯᑦ ᐊᒻᒪᓗ ᐱᓕᕆᔾᔪᑎᑦᓴᓂᑦ ᐱᕙᓪᓕᐊᖏᓐᓇᐅᔭᕐᑎᓪᓗᒍ ᐊᖑᒻᒪᑎᔪᓐᓇᖁᓪᓗᑕ ᑭᙴᒪᔭᐅᔪᓄᑦ. ᐃᓚᐅᑎᑦᑎᖏᓐᓇᕐᓂᒃᑯᑦ ᓄᓇᓕᓐᓂᑦ ᐊᒡᒍᕐᓯᒪᔪᓂᓪᓗ ᑲᑐᔾᔨᖃᑎᒌᓂᑦ, ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᐅᖃᖃᑎᒌᖏᓐᓇᓕᒫᕐᓗᑎᒃ ᓄᓇᓕᓐᓂ ᐳᓚᕋᖅᑐᓕᕆᓂᕐᒧᑦ ᐱᕙᓪᓕᐊᑎᑦᑎᓂᕐᒥᒃ ᓇᓗᓇᐃᖅᓯᓗᑎᓪᓗ ᐃᑲᔪᖅᓱᐃᔪᑎᔅᓴᓂᒃ ᐱᔪᓐᓇᕐᓂᖅᑖᖅᐸᓪᓕᐊᓂᕐᒧᑦ. ᑭᒃᑯᑐᐃᓐᓇᑦ ᐊᑦᑕᓇᕐᔭᐃᕐᓯᒪᒋᐊᖃᕐᓂᖏᑦ ᓯᕗᓪᓕᐅᑏᓐᓇᕐᑕᕗᑦ ᓯᓚ ᐊᓯᔾᔨᖅᐸᓪᓕᐊᔪᒻᒪᕆᐅᑎᓪᓗᒍ ᐊᑦᓱᐊᓗᖕ ᐊᒃᑐᐃᕙᒻᒪᑦ ᐃᖏᕐᕋᕕᐅᕙᑦᑐᓂᑦ ᒥᕐᖑᐃᓯᕐᕕᒻᒥ; ᓇᓗᓇᐃᖅᓯᓂᖅ, ᓇᐅᑦᑎᖅᓱᕐᓂᖅ, ᐊᒻᒪᓗ ᑐᓴᐅᒪᑎᑦᓯᕙᓐᓂᒃᑯᑦ ᐅᓗᕆᐊᓇᖅᑐᓂᑦ ᐃᑲᔫᑕᐅᕙᒻᒪᑕ ᒥᕐᖑᐃᓯᕐᕕᒻᒨᕐᑐᑦ ᐸᕐᓇᓯᒪᑦᓯᐊᖁᓪᓗᒋᑦ ᐊᒻᒪᓗ ᐅᐸᓗᖓᐃᕐᓯᒪᑦᓯᐊᖁᓪᓗᒍ ᑭᓱᑐᐃᓐᓇᕐᒧᑦ.

ᑐᕌᒐᖓ 2.1

ᐳᓚᕋᑏᑦ ᐃᖅᑲᐅᒪᓇᑦᓯᐊᕐᑐᒥᖕ ᐊᔾᔨᐅᖏᑦᓯᐊᕐᑐᒥᖕ ᖃᐅᔨᕚᓪᓕᖃᑦᑕᕐᖓᑕ ᑲᔾᔮᓇᕐᑐᒥᑦ ᐃᓕᓐᓂᐊᕐᓯᓐᓈᑦ ᒥᕐᖑᐃᓯᕐᕕᐅᑉ ᐃᓕᖅᑯᓯᖓᓂᑦ ᐊᓰᓐᓇᓕᓯᒪᙱᑦᑐᒥᓪᓗ ᐊᕙᙶᓘᕐᑐᒥᖕ ᓯᕗᓕᑦᑎᓐᓃᓐᖔᕐᑐᓂᑦ ᕿᒥᕐᕈᐊᓯᓐᓈᑦ.

• 2.1.1: ᓄᑖᙳᕆᐊᕐᓯᒪᔪᑦ ᓴᖅᑭᔮᖅᑐᑦᓴᑦ ᐸᓐᓂᖅᑑᑉ ᒥᕐᖑᐃᓯᕐᕕᖓᑕ ᐊᓪᓚᕝᕕᖓᓂ ᐋᖅᑭᑦᓱᕐᑕᐅᓗᑎᑦ ᐃᓕᐅᖅᑲᖅᑕᐅᓗᑎᓪᓗ ᑖᓐᓇ ᐸᕐᓇᐅᑦ ᐊᑐᕐᓂᓕᒫᖓᓂ.
• 2.1.2: ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐃᑲᔪᖅᑐᐃᑦᑎᐊᕐᑐᑦ ᕿᓂᖅᑐᖃᕈᒪᑉᐸᑦ ᓄᑖᓂᑦ ᐳᓚᕋᖅᑎᓄᑦ ᐅᐸᑦᑕᐅᔪᒥᓇᕐᑐᓂᑦ ‒ ᐱᖃᓯᐅᑎᓗᒋᑦ ᖃᓄᐃᓕᐅᕐᕕᐅᔪᒥᓇᕐᑐᑦ ᒥᕐᖑᐃᓯᕐᕕᐅᑉ ᑕᕆᐅᖓᓂ ‒ ᑐᔅᓯᕌᖑᓯᒪᔪᑦ ᐊᐅᓚᑕᐅᓪᓗᑎᓪᓗ ᐊᐅᓪᓚᕈᔾᔨᔨᓄᑦ, ᐳᓚᕋᑐᓕᕆᔨᓄᓪᓗ ᐊᐅᓚᑦᑎᔨᓄᑦ.
• 2.1.3: ᐃᑲᔪᖅᑎᐅᖃᑎᒌᓪᓗᑎᒃ ᕿᑭᖅᑕᕐᔪᐊᑉ ᐸᓐᓂᖅᑑᓪᓗ ᕼᐋᒪᓚᒃᑯᖏᑦ ᓇᓗᓇᐃᕐᓯᖃᑦᑕᕐᓗᑎᒃ ᐊᒻᒪ ᐊᑐᓕᖅᑎᑦᑎᓂᕐᒥᓪᓗ ᐳᓚᕋᑎᓄᑦ ᐅᐸᒍᒥᓇᕐᑐᓂᑦ ᒪᓕᑦᑐᓂᑦ ᓄᓇᓖᑦ ᐳᓚᕋᑦᑐᓕᕆᓂᖕᒧᑦ ᓯᕗᓪᓕᐅᑎᒍᒪᔭᖏᑦ ᒥᕐᖑᐃᓯᕐᕕᓐᓄᓪᓗ ᐊᐅᓚᑦᑎᔩᑦ ᑐᕌᒐᖏᑦ.
• 2.1.4: ᐳᓛᕆᐊᖅᑐᖅ ᑲᔪᖏᖅᓴᖅᑕᐅᕙᓪᓗᑎᒃ ᕿᑭᖅᑕᕐᔪᐊᒦᓐᓂᖏᓐᓂ ᐸᓐᓂᖅᑑᒥᓗ ᑲᓱᖃᑎᖃᖃᑦᑕᖁᓪᓗᒋᑦ ᐱᔨᑦᑎᕐᑎᓂᑦ ᑐᓴᐅᒪᑎᑕᐅᓪᓗᑎᒃ ᐃᓄᐃᑦ ᐃᓕᖅᑯᓯᖏᓐᓂᑦ ᐃᓕᓴᐃᕙᑦᑐᓂᑦ.

ᑐᕌᒐᖓ 2.2

ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ ᑭᐅᓂᖃᖅᑐᑦ ᑐᓴᖅᑎᑦᑎᒍᑎᓂᑦ ᐊᒻᒪᓗ ᐱᑕᖃᖅᑎᑎᓪᓗᑎ ᓈᒻᒪᑦᑐᓂ ᖁᕝᕙᓯᓐᓂᖏᓐᓂ ᐱᔨᑦᑎᖅᑕᓂᑦ ᐃᑲᔪᕐᓗᒋᑦ ᒥᕐᖑᐃᓯᕐᕕᒻᒥ ᐊᑐᖃᑦᑕᖅᑐᑦ ᐊᑦᑕᓇᐃᖅᓯᒪᓂᕐᒧᑦ, ᖁᕕᐊᒋᔭᖃᓂᕐᒧᑦ, ᐊᒻᒪᓗ ᖁᕕᐊᓱᒍᑎᖃᓂᕐᒧᑦ ᓇᒦᓐᓂᖓᓄᑦ.

• 2.2.1: ᐳᓚᕋᖅᑏᑦ ᖃᐅᔨᖃᑦᑕᖅᓯᒪᔭᖏᑦ ᑐᓐᓂᖅᑯᓯᐊᕆᕙᑦᑕᖏᓪᓗ ᕿᒥᕐᕈᔭᐅᕙᓪᓗᑎᑦ ᐊᕐᕌᒍᑦ ᐱᖓᓱᑦ ᓈᔭᕋᐃᑉᐸᑕ ᐊᑑᑎᖃᓕᕋᓗᐊᕐᒪᖔᑕ ᐊᒻᒪ ᑲᔪᓯᑎᑦᓯᔪᓐᓇᖁᓪᓗᒋᑦ ᐊᔾᔨᐅᖏᑦᑐᓂᒃ ᐊᑐᖅᑕᒥᑎᒍᑦ ᕿᒥᕐᕈᔪᓐᓇᖁᓪᓗᒋᑦ.
• 2.2.2: ᒪᓕᒐᕐᑎᒍᑦ ᐊᑐᓕᕐᑎᑦᓯᔩᑦ ᐃᑲᔪᖅᐸᓪᓗᑎᖕ ᐅᓄᕐᓯᕙᓪᓕᐊᓗᑎᓪᓗ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᓃᑦᑐᑦ ᐃᑲᔪᖅᑎᖃᑎᖃᕐᓂᒃᑯᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑕ ᒪᓕᒐᕐᑎᒍᑦ ᐊᑐᓕᕐᑎᑦᓯᔨᖏᓐᓂᑦ ᐊᒻᒪ ᓄᓇᕗᑦ ᒐᕙᒪᒃᑯᖏᓐᓂᑦ.
• 2.2.3: ᖃᓄᐃᓕᖓᓕᕐᓂᕆᔭᖏᑦ ᓇᐅᑦᑎᖅᑐᕐᑕᐅᓂᖓᓂᑦ ᐃᒪᒃᑯᑦ-ᑐᙵᕕᓕᓐᓂ ᐳᓛᕆᐊᖃᕐᑕᖅᑐᑦ ᒥᕐᖑᐃᓯᕐᕕᒻᒧᑦ ᕿᒥᕐᕈᔭᐅᕙᓪᓗᑎᒃ ᐱᓗᐊᑦᑕᐃᓕᒪᒍᑎᑦᓴᑦ ᐅᕝᕙᓘᓐᓃᑦ ᑭᓪᓕᖃᕐᑎᑦᑎᒋᐊᖃᕐᒪᖔᑕ ᐊᑐᓕᖅᑎᑦᑎᔭᕆᐊᖃᕐᒪᖔᑕ ᑲᑎᑉᐸᓪᓕᐊᔭᑦᑐᑦ ᐱᓗᖅᑯᑏᑦ ᐊᑲᐅᖏᑦᑐᒧᑦ ᐊᔅᓱᔾᔫᒥᐅᖁᓪᓗᒋᑦ.
• 2.2.4: ᓈᒻᒪᑦᑐᓂᑦ ᐊᑦᓱᔾᔫᒥᐅᒍᑎᑦᓴᓂᑦ ᓇᓗᓇᐃᕐᓯᓗᑎᖕ ᖃᐅᔨᓴᕐᓂᖏᓐᓂ ᓄᑖᓂᑦ ᐳᓚᕋᑎᓄᑦ ᐅᐸᒍᒥᓇᕐᑐᑦ ᒪᓕᑦᓯᐊᕐᓂᐊᕐᖓᑕ ᐱᔪᓐᓇᐅᑎᑖᕋᓱᓕᕐᐸᑕ ᑐᑦᓯᕋᐅᑎᓂᑦ ᕿᒥᕐᕈᒍᑕᐅᕙᑦᑐᓂᓪᓗ.

ᑐᕌᒐᖓ 2.3

ᑭᒃᑯᑐᐃᓐᓇᑦ ᐊᑦᑕᕐᓇᖅᑐᒦᖁᓇᒋᑦ ᖃᐅᔨᓴᐅᑏᑦ ᐊᑑᑎᖃᑦᓯᐊᕈᓐᓇᕐᑐᑦ ᑭᓯᐊᓂ ᖃᐅᔨᓴᑦᓯᐊᖃᑦᑕᖃᑕ ᐊᒻᒪᓗ ᑐᓴᐅᒪᑎᑦᓯᕙᑉᐸᑕ ᓇᐅᒃᑯᑦ ᐅᓗᕆᐊᓇᖅᑐᖃᕐᒪᖔᑦ ᐱᕐᕈᓗᐊᕿᑐᐃᓐᓇᕆᐊᓕᓐᓂᑦ ᓯᕘᕋᓇᙱᑦᑐᒃᑰᕐᓗᑎᑦ ᒥᕐᖑᐃᓯᕐᕕᓕᐊᕐᓯᒪᔪᑦ ᑲᔾᔭᐅᓴᕙᓐᓂᐊᕐᖓᑕ.

• 2.3.1: ᐳᓚᕋᑏᑦ ᐊᒻᒪᓗ ᑭᒃᑯᑐᐃᓐᓇᕐᓄᑦ ᐊᑦᑕᓇᕐᔭᐃᕈᑎᑦ ᑐᓴᐅᒪᔾᔪᑎᑦᓴᖏᑦ ᐃᓚᓕᐅᔾᔨᓯᒪᕙᓪᓗᑎᖕ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᐊᑦᑕᓇᙱᑦᑐᒃᑯᑦ ᐃᖏᕐᕋᖃᑦᑕᓕᕐᐸᑕ ᐸᕐᓇᓯᒪᑦᓯᐊᖁᓪᓗᒋᑦ ᐊᔾᔨᒌᖏᑦᑐᓄᑦ ᐅᐸᕝᕕᑦᓴᖃᕐᓗᑎᑦ ᐊᒻᒪᓗ ᖃᖓᒃᑯᑦ ᐊᕐᕌᒎᑉ ᐃᓗᐊᓂ.
• 2.3.2: ᑕᐃᒪᙵᓕᒫᖅ ᖃᐅᔨᓴᖅᑕᐅᓂᖏᑎᒍᑦ ᐱᕐᕈᓗᐊᕿᑐᐃᓐᓇᕆᐊᓖᑦ ᒥᕐᖑᐃᓯᕐᕕᒻᒥ, ᒫᓐᓇᓂᓴᐅᓂᕐᐹᓂᑦ ᐊᑐᐃᓐᓇᖃᖃᑦᑕᓂᐊᕐᖓᑕ ᑐᓴᕋᑦᓴᓂᑦ ᐳᓚᕋᑎᑦ ᐊᒻᒪᓗ ᐊᑐᐃᓐᓇᐅᓗᑎᑦ ᑭᒃᑯᑐᐃᓐᓇᑦᓯᐊᓄᑦ ᒥᕐᖑᐃᓯᕐᕕᓕᐊᕐᐸᑦᑐᓄᑦ.
• 2.3.3: ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪᓗ ᖃᐅᔨᓴᖅᑎᒻᒪᕇᑦ ᖃᐅᔨᓴᕐᓂᖏᑎᒍᑦ ᐊᑐᓕᖁᔨᔾᔪᑏᑦ ᖃᐅᔨᒪᔾᔪᑕᐅᕙᓐᓂᐊᕐᖓ ᑖᕗᖓᓕᒫᖅ ᐅᓗᕆᐊᓇᖅᑐᒦᖁᓇᑕ ᐸᕐᓇᐅᑎᓂ ᐊᒻᒪᓗ ᐊᑐᐊᖅᑕᐅᕙᓪᓗᑎᖕ ᐊᑐᓕᕐᑎᑕᐅᕙᓪᓕᐊᓂᖏᓐᓂ ᑭᒃᑯᑐᐃᓐᓇᑦ ᐊᑦᑕᓇᖅᑐᒦᖁᓇᒋᑦ ᐸᕐᓇᐅᑏᑦ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᓄᑦ.
• 2.3.4: ᐃᑲᔪᖅᑎᖃᕐᓗᑎᖕ ᐸᖅᓴᐃᔨᓂᑦ ᕿᓂᖅᑐᑎᓂᓪᓗ ᓄᓇᓕᓐᓃᑦᑐᓂᑦ, ᓄᓇᕗᒥ, ᐊᒻᒪᓗ ᒐᕙᒪᑐᖃᒃᑯᓐᓂ ᑐᐊᕕᕐᓇᕐᑐᖃᓕᖅᐸᑦ ᐅᐸᓗᖓᐃᖅᓯᒪᐃᓐᓇᕐᓗᑎᖕ, ᐊᑕᐅᑦᓯᒃᑯᓪᓗ ᐃᓕᓐᓂᐊᕐᑎᑕᐅᕙᓪᓗᑎᑦ ᐱᓕᒻᒪᑦᓴᖅᑕᐅᓂᒃᑯᑦ.

ᑐᕌᒐᖓ 2.4

ᒥᕐᖑᐃᓯᕐᕕᐅᑉ ᐱᖁᑎᕐᔪᐊᖏᑦ ᐊᐅᓚᑕᐅᑦᓯᐊᕐᓗᑎᖕ ᐊᓐᓇᐅᒪᔪᓐᓇᕐᓂᐊᕐᖓᑕ ᐊᑐᕈᓐᓇᐃᓐᓇᖁᓪᓗᒋᑦ ᐊᑯᓂᐅᔪᒧᑦ ᐊᐅᓚᓂᖓᓄᑦ ᐊᐅᓚᔾᔪᑎᑦᓴᖏᓐᓂᑦ.

• 2.4.1: ᓴᓇᔭᐅᒋᐊᓖᑦ ᐸᕐᓇᓯᒪᕙᓪᓗᒋᑦ ᐃᓪᓗᐃᑦ ᐱᑐᖃᕈᖅᐸᓪᓕᐊᔭᓐᓂᖏᓐᓄᑦ ᓴᓇᔭᐅᒋᐊᓖᑦ ᓂᕆᐅᒋᔭᐅᔪᑦ ᓯᓚᒧᑦ ᐱᓗᐊᖅᑐᖅ ᓱᕋᑉᐸᓪᓕᐊᓂᖏᓐᓄᑦᓴᓇᔭᐅᒋᐊᓖᑦ ᐸᕐᓇᓯᒪᕙᓪᓗᒋᑦ ᐃᓪᓗᐃᑦ ᐱᑐᖃᕈᖅᐸᓪᓕᐊᔭᓐᓂᖏᓐᓄᑦ ᓴᓇᔭᐅᒋᐊᓖᑦ ᓂᕆᐅᒋᔭᐅᔪᑦ ᓯᓚᒧᑦ ᐱᓗᐊᖅᑐᖅ ᓱᕋᑉᐸᓪᓕᐊᓂᖏᓐᓄᑦ.
• 2.4.2: ᓯᕗᕐᖓᒍᑦ ᑎᓄᔾᔨᕕᒻᒥ ᐊᒻᒪ ᐃᑭᕋᓴᐅᑉ ᐃᒪᖓᓂ ᓴᐳᔾᔨᕕᑦᓴᖅ ᐱᙳᕐᑎᑕᐅᓚᐅᖏᓂᖓᓂ, ᐊᐅᔪᐃᑦᑑᑉ ᓄᓇᖓᑕ ᐱᖁᑎᖏᑦ ᐊᒻᒪ ᓅᑕᐅᔪᓐᓇᕐᑐᑦ ᐱᖁᑎᖏᑦ ᖃᐅᔨᓴᕐᑕᐅᖅᑳᕆᐊᓖᑦ ᐊᑐᖅᑕᐅᕙᒻᒪᖔᑕ ᓇᓗᓇᐃᖁᓪᓗᒋᑦ ᐊᒻᒪ ᐊᓯᒃᑲᓐᓂᖏᓐᓂᑦ ᓴᓇᔭᕆᐊᖃᕐᒪᖔᑕ ᐃᓪᓗᑦᓴᓂᑦ ᐅᕝᕙᓘᓐᓃᑦ ᐅᒥᐊᑦᓴᓂᑦ ᐱᖃᕆᐊᖃᕐᒪᖔᑕ ᐊᐅᓚᔾᔪᑎᓄᑦ ᐃᑲᔫᑕᐅᔪᓐᓇᕐᑐᑦ ᐊᑦᑕᓇᓐᖏᑲᓗᐊᕐᒪᖔᑕ ᐊᒻᒪ ᐊᑑᑎᖃᕈᓐᓇᕐᑐᓂᑦ ᐃᑲᔫᑎᑦᓴᓄᑦ ᑲᔪᓯᔾᔪᑕᐅᓂᐊᕐᑐᑦ.
• 2.4.3: ᐊᑐᐊᖅᑕᐅᓂᐊᕐᑐᓂᑦ ᐋᖅᑮᓗᑕ ᐱᖁᑏᑦ ᓄᑖᓐᖑᕆᐊᓖᑦ ᖃᓄᐃᓕᔭᐅᔾᔪᑎᑦᓴᖏᓐᓂᑦ ᓴᓇᒋᐊᖃᓕᕋᐃᑉᐸᑕ ᓄᓇᓕᓐᓃᑦᑐᑦ ᐃᖅᑲᓇᐃᔭᕐᑏᑦ ᐃᑲᔪᕐᑎᒋᓗᒋᑦ, ᑐᓴᕋᑦᓴᑦ ᖃᓄᐃᓕᖓᓕᕐᒪᖔᑕ ᐱᖁᑎᕗᑦ ᐱᔨᑦᓯᕈᑏᓪᓗ ᐊᑐᐃᓐᓇᐅᑦᑕᐅᑎᒋᒐᓗᐊᕐᒪᖔᑕ ᖃᐅᔨᒪᐃᓐᓇᕐᓂᐊᕋᑦᑎᒍ.

ᐸᕐᓇᐅᑎᓪᓗᐊᑕᖅ 3
ᐱᕈᖅᑎᑦᑎᓂᖅ ᐊᒻᒪᓗ ᑐᓂᓯᓂᕐᒧᑦ ᖃᐅᔨᒪᓂᐅᔪᓂᑦ

ᐃᓄᐃᑦ ᖃᐅᔨᒪᔭᑐᖃᖏᑦ, ᐊᑕᖏᖅᑐᒍ ᑐᑭᓯᔭᐅᓂᖏᓐᓄ ᑐᓐᖓᓂᖃᖅᑐᑦ ᐃᓅᓯᕆᓯᒪᔭᖏᓐᓂ ᐊᒻᒪᓗ ᑐᓂᔭᐅᓯᒪᔪᓂᑦ ᐊᑐᖅᑕᐅᓯᒪᔪᓂᑦ ᐃᓄᓐᓄᑦ, ᑐᓐᖓᕕᒋᔭᖏᑦ ᖃᐅᔨᒪᓂᐅᔪᓂᑦ ᐱᔾᔪᑎᖃᖅᑐᓂ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ. ᐱᖃᓯᐅᔾᔨᔪᑦ ᑕᑯᔭᐅᔪᓂᑦ ᐱᔾᔪᑎᖃᖅᑐᓂ ᖃᓄᐃᓐᓂᕆᔭᖓᓂ ᐊᒻᒪᓗ ᐊᓯᔾᔨᖅᑐᓂᑦ ᐃᓗᐊᓂ ᒥᕐᖑᐃᓯᕐᕕᒻᒥ ᐊᕙᑎᖏᓐᓂ, ᐃᓱᒪᒋᔭᐅᔪᑦ ᑲᑎᓐᖓᓪᓗᑎ ᑐᑭᓯᐊᕈᑎᑦ ᓄᐊᑕᐅᓯᒪᔪᑦ ᐃᓚᒋᓪᓗᓂᐅ ᐊᐅᔪᐃᑦᑐᒧᑦ ᐊᕙᑎᖓᓄᑦ ᐊᑕᐅᓯᐅᓂᖓᓄ ᖃᐅᔨᓴᖃᑦᑕᓂᕐᒧᑦ ᐱᓕᕆᐊᖅ. ᑎᑎᕋᕐᑕᐅᒋᐊᓐᖓᕐᑐᑦ ᐱᖅᑯᓯᑐᖃᖅᑎᒍᑦ ᐱᖁᑎᑦᑕ ᐅᓂᒃᑳᖏᑦ ᒥᕐᖑᐃᓯᕐᕕᒻᒥ ᐋᖅᑭᑦᑕᐅᓚᐅᕐᓯᒪᔪᑦ 2014-ᖑᑎᓪᓗᒍ, ᑭᓯᐊᓂ ᐊᓯᒃᑲᓐᓂᖏᑦ ᐃᖅᑲᓇᐃᔮᑦᓴᓂᑦ ᑎᑎᕋᒃᑲᓐᓂᕆᐊᖃᖅᑐᒍᑦ, ᑐᑭᓯᒃᑲᓂᕐᓗᑕ, ᐊᒻᒪᓗ ᖃᓄᖅ ᐸᐸᑦᑎᐊᑲᓐᓂᕈᓐᓇᕐᒪᖔᑦᑎᒍ ᐃᓕᖅᑯᓯᑐᖃᒃᑯᑦ ᐊᒻᒪᓗ ᐃᑦᑕᕐᓂᓴᖁᑎᕗᑦ ᐱᖁᑎᑐᖃᐃᑦ ᒥᕐᖑᐃᓯᕐᕕᒻᒥ. ᖃᐅᔨᓴᕐᓂᐅᔪᑦ ᐱᕕᔅᓴᖃᖅᑎᑦᑎᔪᑦ ᐃᓄᓐᓄᑦ ᐱᕈᖅᑎᑦᑎᓗᑎ ᐱᓕᕆᔪᓐᓇᕐᓂᖏᓐᓄᑦ ᐊᔾᔨᒌᖏᑦᑐᓂᑦ ᐊᑐᖅᑎᑕᐅᔪᓂᑦ, ᓯᐊᒻᒪᖅᑎᒋᐊᕐᓗᒍ ᑐᑭᓯᔭᐅᓂᖏᑦ ᐱᔾᔪᑎᖃᖅᑐᑦ ᓯᕗᓪᓕᐅᔾᔭᐅᔭᕆᐊᓕᓐᓂᑦ ᐅᖃᐅᓯᐅᔪᓂᑦ, ᐊᒻᒪᓗ ᑲᔪᖏᖅᓴᐃᓗᑎ ᑐᓂᓯᖃᑦᑕᐅᑎᓂᕐᒧᑦ ᖃᐅᔨᒪᓂᐅᔪᓂᑦ. ᐱᓕᕆᕕᐅᔪᑦ ᓄᑖᒥ ᕿᑭᕐᑕᖅᔪᐊᒥ ᖃᐅᔨᓴᕐᕕᒃ ᐃᑲᔪᕈᓐᓇᖅᑐᑦ ᐱᔪᒥᓇᖅᑎᑎᑦᑎᓗᑎ ᖃᐅᔨᓴᒃᑲᓂᓂᕐᒥᑦ ᐱᔪᒪᓂᕆᔭᐅᔪᓂᑦ ᐊᒻᒪᓗ ᐱᓕᕆᐊᓄᑦ ᐊᕕᑦᑐᖅᓯᒪᔪᒧᑦ ᐊᒡᒋᖅᑐᓄᑦ ᐊᕐᕌᒍᓄᑦ. ᑐᓴᖅᑎᑦᑎᒋᐊᕐᓂᖅ ᐱᑕᖃᖅᑎᑦᑎᔪᖅ ᑐᓂᔭᐅᔪᓂᑦ ᖃᐅᔨᒪᓂᐅᔪᓂᑦ ᐱᔾᔪᑎᖃᖅᑐᓂᑦ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ ᓯᐊᒻᒪᖅᓯᒪᓂᖅᓴᒥᑦ, ᐱᖃᓯᐅᑎᓗᒋᑦ ᐃᓄᐃᑦ ᐱᖁᑎᑐᖃᖏᑦ ᓄᓇᖃᖅᕕᒥᓂᖏᓐᓂ ᑕᕝᕙᑦᓴᐃᓐᓇᖅ ᓴᖅᑭᖅᓯᒪᔪᑦ ᐊᔾᔨᒌᖏᑦᑐᓂᑦ ᐊᐅᓚᑦᑎᓂᖕᒧᑦ ᐱᕙᓪᓕᐊᓯᒪᔪᓂᑦ.

ᑐᕌᒐᖓ 3.1

ᑲᔪᓯᕙᓪᓕᐊᓂᖃᖅᑐᖅ ᐊᕙᑎᖓᓂ ᖃᐅᔨᓴᖃᑦᑕᕐᓂᖅ ᐊᒻᒪᓗ ᐃᓚᒋᔭᐅᖃᑕᐅᓂᖅ ᐆᒪᔪᐃᑦ ᐅᓗᕆᐊᓇᕐᑐᒦᑦᑐᑦ ᐱᓕᕆᔭᐅᔪᓂᑦ ᐃᑲᔪᖅᑐᑦ ᒪᑭᒪᑎᑕᐅᓪᓗᓂ ᐊᕙᑎᖓ ᒥᕐᖑᐃᓯᕐᕕᒻᒥ.

• 3.1.1: ᑐᑭᓯᐅᒪᑦᑎᐊᕐᓗᓂ ᐊᕙᑎᑦᑎᓃᑐᓕᒫᑦ ᓱᕐᕋᕐᓯᒪᙱᑦᑐᑦ ᐊᓰᓐᓇᓕᔭᐅᑦᑕᐃᓕᒋᐊᖃᕐᓂᖏᑕ ᒥᕐᖑᐃᓯᕐᕕᒻᒦᑦᑐᑦ ᖃᐅᔨᒪᔭᐅᔪᑦ ᐃᓄᐃᑦ ᖃᐅᔨᒪᔭᑐᖃᖏᑎᒍᑦ ᐊᒻᒪᓗ ᖃᓪᓗᓈᑦ ᑭᓪᓕᓯᓂᐊᕈᓯᖏᑦ ᐊᑐᖅᑕᐅᓗᑎᑦ.
• 3.1.2: ᐊᑐᖅᑕᐅᓂᖏᑦ ᖃᐅᔨᓴᕈᑏᑦ ᐊᐅᔪᐃᑦᑐᓂᑦ ᒥᕐᖑᐃᓯᕐᕕᒻᒥ ᐊᑐᖅᑐᑎ ᑮᓇᐅᔭᖅᑐᓗᐊᖏᑦᑐᓂᑦ, ᒪᑭᑕᑦᑎᐊᖅᑐᓂᑦ, ᐊᒻᒪᓗ ᐊᑦᑕᓇᖏᑦᑐᓂ ᐊᑐᓕᕐᑎᑕᐅᖁᓪᓗᒋᑦ ᐊᕐᕌᒍᑦ ᑕᓪᓕᒪᑦ ᐃᓗᐊᓂ.
• 3.1.3: ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᐱᖃᑕᐅᓗᑎᑦ ᐅᑎᖅᐸᓪᓕᐊᖁᓪᓗᒋᑦ ᐊᒻᒪᓗ ᐊᐅᓚᑕᐅᓂᖏᓐᓂᑦ ᐆᒪᔪᐃᑦ ᐅᓗᕆᐊᓇᕐᑐᒦᑦᑐᑦ ᒥᕐᖑᐃᓯᕐᕕᒻᒥ.

ᑐᕌᒐᖓ 3.2

ᐃᓄᐃᑦ ᐃᓚᒋᔭᐅᖃᑕᐅᓂᖏᑦ ᐱᖅᑯᓯᓄᑦ ᐱᖅᑯᓯᑐᖃᕐᓄᑦ ᐊᐅᓚᑦᑎᓂᕐᒧᑦ ᐃᑲᔪᖅᑐᑦ ᑲᔪᓰᓐᓇᖅᑐᒥ ᐱᓯᒪᑦᑎᔨᐅᓂᕐᒧᑦ ᐊᒻᒪᓗ ᑲᑐᑎᔭᐅᔪᓂᑦ ᑐᑭᓯᔭᐅᓂᖓᓄᑦ ᒥᕐᖑᐃᓯᕐᕕᒃ ᐱᖅᑯᓯᑐᖃᖓ.

• 3.2.1: ᐊᕐᕌᒍᑦ ᑕᓪᓕᒪᑦ ᐃᓗᐊᓂ, ᓇᐅᑦᑎᖅᓱᕆᐊᓖᑦ ᓯᕗᓪᓕᐅᔾᔭᐅᒋᐊᓖᑦ ᐃᓕᖅᑯᓯᑐᖃᒃᑯᑦ ᐸᐸᑦᓯᒍᓰᑦ ᓇᐅᑦᑎᖅᓲᑎᑦᓴᑦ ᒥᕐᖑᐃᓯᕐᕕᒻᒥ ᓇᓗᓇᐃᕐᑕᐅᓗᑎᒃ ᐊᒻᒪ ᖃᐅᔨᒪᔾᔪᑕᐅᓂᐊᕐᖓᑕ ᐊᐅᓚᑦᑎᓂᖕᒧᑦ ᑲᔪᓯᑎᑦᓯᒍᑎᑦᓴᓄᑦ.
• 3.2.2: ᐃᓘᓐᓇᑎᑦ ᓇᐅᑦᑎᖅᓱᕈᓰᑦ ᐊᒻᒪᓗ ᐃᓕᖅᑯᓯᑐᖃᒃᑯᑦ ᓄᓇᖃᖅᕕᒥᓃᑦ ᐋᖅᑭᑦᑕᐅᓯᒪᓗᑎᒃ ᐊᒻᒪᓗ ᐊᑐᓕᖅᑎᑕᐅᓗᑎᒃ ᐅᖃᐅᔾᔪᐃᒋᐊᕈᑎᖏᒍᑦ ᑲᑐᔾᔨᓗᑎᒃ ᒥᕐᖑᐃᓯᕐᕕᓕᕆᓂᕐᒧᑦ ᐸᕐᓇᐃᔩᑦ ᐊᐅᓚᑦᑎᓂᖕᒧᓪᓗ ᑲᑎᒪᔨᕋᓛᑦ, ᐊᒻᒪᓗ ᒪᓕᓪᓗᑎᒃ ᕿᑭᖅᑖᓗᖕᒥ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑎᑦᓴᖏᓐᓄᓪᓗ ᐊᖏᕈᑎᖓᑕ ᐃᓚᖓᓃᑦᑐᓂᑦ 4.1.2.
• 3.2.3: ᑐᓴᕋᑦᓴᑦ ᖃᐅᔨᒪᔭᐅᔪᓪᓗ ᐃᓕᓐᓂᐊᕐᑕᐅᔪᑦ ᐃᓕᖅᑯᓯᓕᕆᔨᒃᑯᑎᒍᑦ ᑐᓴᐅᒪᔭᐅᑎᑕᐅᕙᓪᓗᑎᑦ ᓴᖅᑭᔮᖁᓪᓗᒋᑦ ᐊᒻᒪᓗ ᖁᕕᐊᓲᑕᐅᖁᓪᓗᒋᑦ ᐃᓄᐃᑦ ᓯᕗᓕᖏᓐᓂᑦ, ᐅᓂᒃᑳᖅᑐᐊᓂᑦ, ᐊᒻᒪᓗ ᐱᖅᑯᓯᑐᖃᕐᓂᑦ ᐊᑕᔪᓂᑦ ᒥᕐᖑᐃᓯᕐᕕᒻᒧᑦ.
• 3.2.4: ᐃᓕᖅᑯᓯᑐᖃᒃᑯᑦ ᖃᓄᐃᓕᐅᕐᓂᐅᕙᑦᑐᑦ ᐃᓚᓕᐅᔾᔭᐅᓗᑎᒃ ᐃᓐᓇᑐᖃᐃᑦ ᐃᓕᓴᐃᔪᓐᓇᖁᓪᓗᒋᑦ ᑭᖑᕚᖏᓐᓂᑦ ᐃᓅᓱᓐᓂᕐᓴᓄᑦ ᐃᓕᑦᑕᐅᕙᓪᓕᐊᖁᓪᓗᒋᑦ.

ᑐᕌᒐᖓ 3.3

ᖃᐅᔨᓴᕐᓂᐅᔪᖅ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒻᒥ ᐱᓕᕆᐊᖃᖅᑐᑦ ᓯᕗᓪᓕᐅᔾᔭᐅᔭᕆᐊᓕᓐᓂᑦ ᐅᖃᐅᓯᐅᔪᓂᑦ ᐊᒻᒪᓗ ᓴᓐᖓᑎᑦᑎᒋᐊᖅᑐᑎ ᐃᓄᐃᑦ ᐃᓚᒋᔭᐅᖃᑕᐅᓂᖏᓐᓄᑦ ᖃᐅᔨᓴᓂᕐᒧᑦ ᐱᓕᕆᔭᐅᔪᓂᑦ.

• 3.3.1: ᑎᑎᕋᕐᑕᐅᓗᑎᒃ ᖃᐅᔨᓴᖅᑕᐅᒋᐊᓖᑦ ᓯᕗᓪᓕᐅᔾᔭᐅᖁᔭᐅᔪᑦ ᐊᐅᔪᐃᑦᑐᒥ ᕿᒥᕐᕈᔭᐅᒋᐊᓖᑦ ᐊᕐᕌᒍ ᐊᓂᒍᖅᐸᑦ ᐊᒻᒪᓗ ᐊᕐᕌᒍᑦ ᑕᓪᓕᒪᓄᓐᓃᑦ ᐊᓂᒍᕋᐃᑉᐸᑕ ᑭᖑᓂᐊᒍᑦ.
• 3.3.2: ᑐᑭᓯᐅᒪᓂᕗᑦ ᓯᓚᐅᑉ ᐊᓯᔨᕐᐸᓪᓕᐊᓂᖓ ᖃᓄᖅ ᐊᒃᑐᐃᕙᒻᒪᖔᑦ ᒥᕐᖑᐃᓯᕐᕕᐅᑉ ᓯᓚᖓᓂᑦ ᐊᕙᓗᐊᓃᑦᑐᓂᓪᓗ ᐆᒪᔫᖃᑎᒋᓕᒫᓂᑦ, ᐃᓕᖅᑯᓯᑐᖃᒃᑯᑦ ᐱᖁᑎᓂᑦ, ᐊᒻᒪ ᑭᒃᑯᑐᐃᓐᓇᑦ ᐊᑦᑕᓇᕐᑐᒃᑰᕐᓂᖅᓴᐅᕙᓕᕐᓂᖏᑦ, ᑲᓇᑕᐅᑉ ᒥᕐᖑᐃᓯᕐᕕᒃᑯᖏᑦ ᐊᒃᓱᔾᔫᒥᐅᒍᑎᑦᓴᓂᑦ ᐊᒃᑐᐃᕙᓪᓕᐊᔪᓄᑦ ᖃᓄᖅᑑᐸᓪᓗᑎᖕ, ᓇᐅᒃᑯᑐᐃᓐᓇᖅ ᒪᑭᑕᔪᓐᓇᕐᐸᑦ, ᐊᒻᒪ ᓴᖅᑭᔮᕐᑎᑦᓯᕙᓪᓗᑎᖕ ᐊᓐᓇᐅᒪᔾᔪᑎᒋᔪᓐᓇᕐᑕᖏᓐᓂᑦ.
• 3.3.3: ᐃᑲᔪᖅᑎᒋᕙᓪᓗᒋᑦ ᐊᓯᖏᑦ ᒐᕙᒪᒃᑯᑦ ᐱᓕᕆᕝᕕᖏᑦ, ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑕ ᑎᒥᖁᑎᖏᑦ ᑭᒃᑯᑐᐃᓐᓇᕐᓂᑦ ᐱᔨᑦᓯᕐᑏᑦ ᓯᕗᓪᓕᐅᑎᒋᐊᓖᑦ ᖃᐅᔨᓴᕋᑦᓴᑦ ᖃᐅᔨᕐᑕᐅᑦᓯᐊᖁᓪᓗᒋᑦ.
• 3.3.4: ᖃᐅᔨᓴᖅᑕᐅᕙᓪᓗᑎᖕ ᑐᕌᖓᓪᓚᕆᑦᑐᑦ ᐃᑲᔫᑕᐅᓂᐊᕐᑐᓪᓗ ᐃᓄᓐᓄᑦ, ᐱᔭᑦᓴᑦ ᖃᐅᔨᓴᖅᑕᐅᒋᐊᓖᑦ ᓯᕗᓪᓕᐅᔾᔭᐅᖁᔭᐅᔪᑦ ᑲᔪᓯᒍᑎᒋᓂᐊᕐᑕᖏᓐᓂᑦ ᒥᕐᖑᐃᓯᕐᕕᒻᒥ ᐊᒻᒪ ᑐᓐᖓᕕᖃᕐᓗᑎᖕ ᐃᓚᓕᐅᔾᔭᐅᓂᖏᑎᒍᑦ ᐃᓄᐃᑦ ᖃᐅᔨᒪᔭᑐᖃᖏᑦ, ᑲᔪᖏᖅᓲᑕᐅᓪᓚᕆᑦᑐᑦ.
• 3.3.5: ᖃᐅᔨᓴᕈᒪᔪᑦ ᐊᖏᖅᑕᐅᓚᐅᖏᓂᖏᓐᓂ ᒪᓕᒐᖃᕐᑎᑕᐅᕙᓪᓗᑎᖕ ᖃᐅᔨᔭᖏᑦ ᓄᓇᓕᓐᓄᑦ ᐅᓂᒃᑳᕆᔭᐅᑦᓯᐊᖃᑦᑕᕐᓗᑎᖕ (ᐆᑦᑑᑎᒋᓗᒍ ᑲᑎᓐᖓᖃᑎᒋᓗᒋᑦ ᐅᓂᒃᑳᕐᕕᐅᓗᑎᒃ, ᓈᓚᐅᑎᒃᑯᑦ ᑐᓴᕐᑎᑦᓯᕙᓪᓗᑎᖕ, ᖃᕆᓴᐅᔭᒃᑯᑦ ᑐᓴᐅᑎᒃᑯᑦ) ᐊᕐᕌᒎᑉ ᐃᓗᐊᓂ ᐱᔭᕇᕐᕕᒋᓂᐊᕐᑕᖓᓂ ᐊᒻᒪ ᓄᓇᓖᑦ ᓂᓪᓕᕈᓐᓇᕐᕕᖃᕐᑎᑕᐅᕙᓪᓗᑎᖕ ᑎᑎᕋᕐᑕᒥᓃᑦ ᑕᐃᒫᑦᓯᐊᖑᒐᓗᐊᕐᒪᖔᑕ ᑐᑭᓯᐅᒪᑦᓯᐊᕐᓗᑎᖕ ᓯᕗᓂᑦᑎᓐᓂ ᖃᐅᔨᓴᖃᑦᑕᓂᐊᕐᖓᑕ ᐊᒻᒪ ᓇᐅᑦᓯᖅᑐᕆᐊᓖᑦ ᓇᐅᑦᓯᖅᑐᖅᑕᐅᕙᓪᓗᑎᖕ.
• 3.3.6: ᒪᓕᒐᖃᕐᑎᑕᐅᓗᑎᒃ ᖃᓄᖅ ᓄᐊᑦᓯᒋᐊᖃᕐᒪᖔᑕ, ᐊᑐᕆᐊᖃᕐᒪᖔᑕ ᐊᒻᒪ ᐊᑦᑕᓇᕐᔭᐃᕐᑕᐅᒍᓯᑦᓴᖏᓐᓂᑦ ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪ ᐃᓄᐃᑦ ᖃᐅᔨᒪᔭᖏᑦ ᖃᐅᔨᓴᕈᓰᑦ ᐋᖅᑭᑦᓱᑕᐅᓗᑎᖕ ᓄᓇᓖᑦ ᐃᓚᒋᔭᐅᓗᑎᒃ ᐊᕐᕌᒍᑦ ᑕᓪᓕᒪᑦ ᐃᓗᐊᓂ.

ᑐᕌᒐᖓ 3.4

ᑲᓇᑕᒥᐅᑕᐃᑦ ᐅᔾᔨᕈᓱᓐᓂᖏᑦ ᐱᔾᔪᑎᖃᖅᑐᓂᑦ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ ᐊᒻᒪᓗ ᖁᕕᐊᒋᔭᖃᓂᕐᒧᑦ ᐱᖅᑯᓯᑐᖃᖓᓄᑦ ᐱᒻᒪᕆᐅᓂᖓᓂ ᖁᕝᕙᕆᐊᖅᑎᑦᑎᔪᑦ ᑐᓴᖅᑎᑦᑎᓂᒃᑯᑦ.

• 3.4.1: ᑕᖅᑲᒃᑯᓄᖓ ᐊᒻᒪᓗ ᓂᐅᕕᐊᑦᓴᐅᓲᑦ ᑐᓴᕋᔅᓴᓪᓗ ᒥᕐᖑᐃᓯᕐᕕᐅᑉ ᒥᑦᓵᓄᑦ ᑐᓴᐅᒪᑎᑦᑎᓗᑎᒃ ᐃᓄᐃᑦ ᐅᔾᔨᕆᓯᒪᔭᖏᓐᓂᑦ, ᐊᑐᖅᑕᐅᓗᑎᒃ ᐃᓄᐃᑦ ᓄᓇᖏᑕ ᐊᑎᑐᖃᖏᑦ ᐊᒻᒪᓗ ᐃᓄᑦᑎᑑᖅᐸᓪᓗᑎᑦ ᐅᓂᒃᑳᕆᔭᐅᑎᓪᓗᒋᑦ ᓄᓇᖓᑕ ᒥᔅᓵᓄᑦ.
• 3.4.2: ᐊᐅᓚᓂᖓᓄᑦ ᐱᔭᑦᓴᑦ ᐊᒻᒪ ᐃᑲᔫᑏᑦ, ᓲᕐᓗ ᓄᓇᒥᐅᑕᖁᑎᓂᑦ ᓇᐅᑦᓯᖅᑐᕐᓂᖅ ᐊᒻᒪ ᐱᒋᐊᕐᐸᓪᓕᐊᔭᐅᔪᑦ ᓯᕗᓕᕐᑎᖃᕐᑐᑎᖕ ᐃᓄᐃᑦ ᖃᐅᔨᒪᔭᖏᓐᓂ ᑲᑎᒪᔨᕋᓛᓂᑦ, ᑐᓂᔭᐅᔪᑦ ᑐᓴᖅᑎᑦᑎᓂᒃᑯᑦ ᐊᒻᒪ ᐃᓚᒋᓕᐅᔾᔭᐅᓗᑎ ᓇᓗᓇᐃᒃᑯᑏᑦ ᐅᓂᒃᑳᖏᓐᓄᑦ.
• 3.4.3: ᐃᑭᐊᖅᑭᕕᒃᑯᑦ ᐊᒻᒪᓗ ᐃᓅᖃᑎᖐᓄᑦ ᐅᖃᖃᓯᔮᕐᕖᑦ ᖃᕆᓴᐅᔭᒃᑯᑦ ᓴᖅᑭᔮᖅᑎᑦᑎᔪᑦ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᖓᓂᑦ ᐱᓪᓚᑦᑖᖅᑎᑐᑦ ᑕᕐᕆᔮᔅᓴᓕᐅᕐᓗᑎᑦ ᓯᓚᕐᔪᐊᕐᒥᐅᖃᑎᒌᓄᑦ ᑕᑯᓐᓇᕐᑕᐅᔪᓐᓇᕐᑐᓂᑦ.

7.0 ᑭᓪᓕᖃᖅᑎᑦᑎᓂᖅ

7.1 ᑭᓪᓕᖃᖅᑎᑦᑎᓂᕐᒧᑦ ᐸᕐᓇᐅᑎ

ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᑲᓇᑕᒥ ᒥᕐᖑᐃᓯᕐᕕᓂ ᑭᓪᓕᖃᖅᑎᑦᑎᓂᕐᒧᑦ ᐊᑐᖅᑕᐅᔪᖅ ᐃᓚᒋᓕᐅᔾᔨᓪᓗᓂ ᐊᑐᖅᑕᐅᔪᖅ ᖃᓄᐃᑦᑑᓂᖃᖅᑎᑦᑐᒋᑦ ᓄᓇᐃᑦ ᐊᒻᒪᓗ ᐃᒪᐃᑦ ᓇᒦᓐᓂᖏᑦ, ᓇᓗᓇᐃᖅᓯᓂᖃᖅᑐᑎᑦ ᓇᒻᒥ ᐱᓕᕆᔭᐅᔪᑦ ᓴᖅᑭᕈᓐᓇᕐᒪᖔᑕ ᑐᓐᖓᓂᖃᖅᑐᑦ ᐃᑲᔪᕈᓐᓇᕐᓂᖏᓐᓄᑦ ᑖᒃᑯᓂᖓ ᐊᑐᖅᑕᐅᔪᓂᑦ. ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᖓ ᐱᖓᓲᓕᖓᔪᓂᑦ ᑭᓪᓕᓕᐅᕐᑕᐅᓯᒪᔪᖅ (ᓄᓇᖑᐊᖅ 3):

• ᑭᓪᓕᖓ I: ᓱᕐᕋᑦᑕᐅᑎᑦᑎᑦᑕᐃᓕᓂᖅ;
• ᑭᓪᓕᖓ II: ᓄᓇᑐᐃᓐᓇᖅ; ᐊᒻᒪᓗ
• ᑭᓪᓕᖓ III: ᐃᓄᓐᓄᑦ ᓱᕐᕋᒃᑕᐅᓯᒪᙱᑦᑐᖅ ᐊᕙᑎ.

ᒪᓕᑦᑐᒍ ᓄᓇᕗᒻᒧᑦ ᐊᖏᕈᑎ, ᑭᓪᓕᖓ I ᐊᒻᒪᓗ II ᓇᒦᓐᓂᖏᑦ ᐃᓗᓕᓪᓗᐊᑕᕆᔭᖏᑦ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒻᒥ, ᓇᓗᓇᐃᖅᑕᐅᓯᒪᔪᑦ ᓇᒦᓐᓂᖏᑦ ᓇᓗᓇᐃᖅᑕᐅᓯᒪᔪᑦ ᑭᓪᓕᖓ III ᐊᑐᖅᑕᐅᓂᖓᓄᑦ. ᐱᒻᒪᕆᐅᓂᖃᖅᑐᒥᓪᓕ, ᑖᒃᑯᐊ ᑭᓪᓕᖃᖅᑎᑦᑎᓂᕐᒧᑦ ᐃᓚᒍᑕᖏᑦ ᐊᑐᖅᑎᑕᐅᖏᑦᑐᑦ ᐃᓄᐃᑦ ᐊᑐᕐᓗᑎ ᐱᔪᓐᓇᐅᑎᖏᓐᓂ ᐊᑖᓂ ᓄᓇᕗᒻᒧᑦ ᐊᖏᕈᑎ.

ᑖᓐᓇ ᐸᕐᓇᐅᑦ ᑭᓪᓕᖃᖅᑎᑦᑎᔪᖅ ᐅᐊᓐᓇᖓᓂ ᑲᖏᖅᑐᖏᓐᓂ ᓇᒦᓐᓂᖓ, ᑎᑭᐅᒪᓂᖃᖅᑐᑦ ᐅᐊᓐᓇᖓᓄ ᐊᒻᒪᓗ ᑲᓇᓐᓇᖓᓄ ᖃᔪᕐᓂᖅ ᐊᒻᒪᓗ ᑭᓪᓕᖃᖅᑎᑕᐅᓚᐅᖏᑦᑐᖅ 2010−ᒥ ᐊᐅᓚᑦᑎᓂᕐᒧᑦ ᐸᕐᓇᐅᑎᒥᑦ. ᑲᑎᒪᖃᑎᖃᖅᐸᑦᑐᑕ ᕿᑭᖅᑕᕐᔪᐊᒥᐅᓂᑦ, ᐃᓚᒋᔭᐅᓗᑎᒃ ᓇᑦᑎᕙᒃ ᐆᒪᔪᕐᓂᐊᕐᑏᑦ ᑲᑎᒪᔨᖏᑦ ᐊᒻᒪᓗ ᕼᐋᒪᓚᒃᑯᑦ ᑲᑎᒪᔨᖏᑦ, ᖃᓄᖅᑑᕈᓐᓇᕐᓯᓚᐅᖅᑐᒍᑦ ᖃᓄᖅ ᑭᓪᓕᓕᐅᓂᐊᕐᒪᖔᑦᑕ, ᑲᔪᖏᕈᑕᐅᓪᓗᓂ ᐃᓄᐃᑦ ᓯᕗᓕᖅᑎᐅᓪᓗᑎᖕ ᐊᒻᒪᓗ ᐃᑲᔪᖅᑕᐅᔪᓐᓇᕐᓯᖁᓪᓗᒋᑦ ᐳᓚᕋᑎᓄᑦ ᐊᑭᓕᐅᑎᓂᑦ ᑕᕝᕙᑦᓴᐃᓐᓇᕐᓗ ᐊᕙᑎᓕᒫᑦᑎᓂ ᐆᒪᔫᖃᑎᒌᓕᒫᓪᓗ ᐸᕕᓴᑦᑕᐅᑦᑕᐃᓕᓗᑎᑦ ᓱᕐᕋᑦᑕᐅᖁᓇᒍ.

ᑭᓪᓕᖓ I: ᓱᕐᕋᑦᑕᐅᑎᑦᑎᑦᑕᐃᓕᓂᖅ

ᓴᐳᒻᒥᔭᐅᓂᖓ ᐃᓱᒪᒋᔭᓪᓗᐊᑕᐅᔪᖅ ᑭᓪᓕᖓᓂ I ᓇᒦᓐᓂᖏᑦ, ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ ᐱᖃᓯᐅᔾᔨᔪᑦ ᓄᓇᓂᑦ ᓴᐳᒻᒥᔭᐅᓯᒪᑦᑎᐊᖅᑐᓂᑦ ᐱᖅᑯᓯᓄᑦ ᓇᔪᖅᑕᐅᔪᑦ ᑭᒡᒐᖅᑐᐃᔪᑦ ᓇᓗᓇᐃᖅᓯᒪᔪᓂᑦ ᖃᖓᒃᑰᓂᖏᑦ ᓇᔪᖅᑕᐅᓂᖓᓄᑦ. ᐃᑉᐱᒋᔭᐅᑦᑎᐊᖁᓪᓗᒍ ᓄᓇᖓ ᐊᒻᒪᓗ ᐱᔮᖅᑯᑕᐅᓐᖏᑦᑐᒥᑦ ᐸᕝᕕᓵᖃᖁᓇᒋᑦ, ᐳᓚᕋᑏᑦ ᐊᐃᑉᐸᖃᕆᐊᓖᑦ ᐃᓕᓐᓂᐊᕐᓯᒪᔪᒥᑦ ᐃᓕᖅᑯᓯᑐᖃᒃᑯᑦ ᐊᐅᓪᓚᕈᔾᔨᓕᒻᒪᑦᑐᒥᑦ, ᑲᓇᑕᐅᑉ ᒥᕐᖑᐃᓯᕐᕕᖓᑕ ᐃᖅᑲᓇᐃᔭᕐᑎᖓᓂᑦ ᐅᕝᕙᓘᓐᓃᑦ ᐃᓄᒻᒥᑦ ᕿᑭᖅᑕᕐᔪᐊᒥᐅᒥᑦ ᐸᓐᓂᖅᑑᒥᐅᒥᓪᓘᓐᓃᑦ. ᓄᓇᓯᐅᑎᒃᑯᑦ ᐃᓯᕆᐊᖃᙱᑦᑐᑦ, ᑭᓯᐊᓂ ᐊᐅᓚᑕᐅᓪᓚᕆᑦᑐᓂᑦ ᐃᖏᕐᕋᔪᓐᓇᕐᑐᒃᑯᑦ ᖃᐅᔨᓴᕆᐊᕈᓐᓇᕐᑐᑦ ᐊᒻᒪᓗ ᒥᕐᖑᐃᓯᕐᕕᒻᒨᕈᓐᓇᕐᑐᑦ ᐊᖏᖅᑕᐅᓯᒪᒍᑎᖕ ᐱᔪᓐᓇᐅᑎᒃᑯᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᓐᓄᑦ.

ᒪᕐᕉᒃ ᑭᓪᓕᖓ I ᓇᒦᓐᓂᖏᑦ ᒥᕐᖑᐃᓯᕐᕕᒻᒥ.

ᒪᑦᑖᑦᑐᔾᔭᓈ ᐅᐊᓐᓇᖓᑕ ᓯᓈᖓᒍᑦ

ᒪᑦᑖᑦᑐᔾᔭᓈ ᐅᐊᓐᓇᖓᑕ ᓯᓈᖓᒍᑦ, ᖃᑦᓯᑲᓪᓚᐅᒻᒪᑕ ᓄᓇᖃᖅᕕᒥᓂᑐᖃᐃᑦ ᐃᑦᑕᕐᓂᓴᓖᑦ ᓄᓇᒥᓂᖏᑦ (ᑐᓃᑦ). ᑑᓕ ᐃᓄᐃᑦ, ᐊᒻᒪᓗ ᐅᓪᓗᒥ ᐃᓄᑦᑎᒍᑦ ᓄᓇᒋᕙᑦᑕᕗᑦ. 550 m ᑭᓪᓕᖃᖅᑎᑕᐅᓂᖓ ᑎᑭᓯᒪᓂᖃᖅᑐᑦ ᓄᓇᐃᓐᓇᖓᓄ ᐃᓚᐅᑉ ᑭᓪᓕᖓᓂ ᓴᐳᒻᒥᑦᑎᒍᑦ ᖁᓕᐅᖏᒑᖅᑐᓂᑦ ᓇᔪᖅᑕᐅᔪᓂᑦ ᑕᒪᑐᒪ ᓴᓂᕌᓂ ᑲᖏᖅᑐᒥ. ᓇᔪᖅᑕᐅᔪᑦ ᐊᔾᔨᒌᖏᑦᑐᓂᑦ ᖃᓄᐃᑦᑑᓂᖃᖅᑐᑦ ᑭᓯᐊᓂ ᐱᖃᓯᐅᔾᔨᔪᑦ ᐊᔾᔨᒌᖏᑦᑐᓂ ᐃᓪᓗᓂᑦ ᐊᒻᒪᓗ ᐊᓯᖏᓐᓂ ᖃᓄᐃᓕᖓᓂᖏᓐᓂ, ᐃᓄᐃᑦ ᐊᑐᐃᓐᓇᖃᑦᑕᖅᑐᑎ ᐃᓚᖏᓐᓂ ᓇᒦᓐᓂᖏᓐᓂ ᐊᕐᕌᒍ ᐃᓗᐊᓂ.

ᓇᓪᓗᖅᓯᐊᖅ ᓂᒋᐊᒍᑦ ᓄᕗᑯᑖᑦᑕᖃᕐᖓᑦ

ᓇᓪᓗᖅᓯᐊᖅ ᓂᒋᐊᒍᑦ ᓄᕗᑯᑖᑦᑕᖃᕐᖓᑦ, ᐊᕕᑦᓯᒪᓪᓗᑎᖕ ᐹᖏᖕ ᓇᓪᓗᖅᓯᐊᖅ ᐅᖓᓪᓕᖅ ᐊᒻᒪ ᑲᖏᖅᑐᓪᓗᐊᓘᑉ, ᐅᖓᓯᑦᑐᒥ ᐊᒻᒪᓗ ᓱᕐᕋᓐᓂᐅᖏᑦᓯᐊᕐᑐᒥᖕ ᓄᓇᖃᖅᕕᒥᓂᖅᑕᖃᖅᑐᖅ ᐊᑯᓂᕐᔪᐊᕌᓗᖕ ᓯᕗᓕᑦᑎᓐᓂᑦ ᓇᔪᖅᑕᐅᖃᑦᑕᕐᓂᑯ ᐊᒻᒪᓗ ᐱᐅᓯᑐᖃᒃᑯᑦ ᐆᒪᔪᕋᓱᕝᕕᓪᓚᕆᒃ. ᑐᑦᑐᐃᑦ ᖃᐅᔨᔭᐅᓯᒪᔪᑦ ᑕᕝᕘᓇ ᐱᓱᑦᑐᑎ ᓅᓕᕋᐃᒻᒪᑕ ᓇᓪᓗᖅᓯᐊᒥ, ᕿᑭᖅᑕᐅᔪᖅ ᐊᑭᖓᓂ ᓂᕈᑭᑦᑐᒥ ᐊᖅᑯᑎᖓᓂ ᐅᐊᓐᓇᖓᓄᑦ.

ᑭᓪᓕᖓ II: ᓄᓇᑐᐃᓐᓇᖅ

ᑭᓪᓕᖓ II ᓱᕐᕋᓐᓂᐅᖏᑦᑐᖅ ᐅᑭᐅᖅᑕᖅᑑᑉ ᐊᕙᓗᓕᒫᖓ ᐆᒪᔫᖃᑎᒌᓂᓪᓗ ᓴᐳᔾᔨᕕᐅᕙᑦᑐᖅ ᕿᑭᖅᑖᓘᑉ ᐃᑭᖓᑕ ᐅᐊᓐᓇᕐᐸᓯᐊᓃᑦᑐᓂᑦ. ᖃᓄᐃᓕᐅᕐᕕᐅᔪᓐᓇᕐᖓᑦ ᐳᓚᕋᑎᓄᑦ ᐊᐅᓚᐅᑎᓕᓐᓂᑦ ᐊᑐᓐᖏᓗᑎᑦ ᐃᓪᓗᑕᖃᐅᓐᖏᑦᑐᒥ. ᑕᐃᒪᐃᓐᓂᖓᓄᑦ, ᐃᒻᒥᓂᒃ ᐊᐅᓚᔪᓐᓇᑎᐊᓂᕐᒧᑦ, ᓇᐅᒃᑰᕆᐊᔅᓴᖅ ᖃᐅᔨᒪᓂᖃᓂᕐᒧᑦ, ᐊᒻᒪᓗ ᐸᕐᓇᐃᓂᖃᑦᑎᐊᖅᓯᒪᓂᕐᒧᑦ ᐱᑕᖃᕆᐊᖃᖅᑐᑦ ᐊᑦᑕᓇᐃᖅᓯᒪᓂᕐᒧᑦ. ᓄᓇᓯᐅᑎᒃᑯᑦ ᐃᓯᕆᐊᖃᙱᑦᑐᑦ, ᑭᓯᐊᓂ ᐊᐅᓚᑕᐅᓪᓚᕆᑦᑐᓂᑦ ᐃᖏᕐᕋᔪᓐᓇᕐᑐᒃᑯᑦ ᖃᐅᔨᓴᕆᐊᕈᓐᓇᕐᑐᑦ ᐊᒻᒪᓗ ᒥᕐᖑᐃᓯᕐᕕᒻᒨᕈᓐᓇᕐᑐᑦ ᐊᖏᖅᑕᐅᓯᒪᒍᑎᖕ ᐱᔪᓐᓇᐅᑎᒃᑯᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᓐᓄᑦ.

ᐊᓯᖏᓐᓂ ᓴᓂᐊᓂ ᓇᒦᓂᖏᑦ ᓇᓗᓇᐃᖅᑕᐅᓯᒪᑦᑎᐊᖅᑐᑦ ᑭᓪᓕᒋᓪᓗᓂᐅᒃ I ᐅᕝᕙᓘᓐᓃᑦ ᑭᓪᓕᖓ III, ᐊᓯᓕᒫᖏᑦ ᓇᒦᓐᓂᖓ ᐊᒻᒪᓗ ᐊᖏᓂᖅᓴᐅᔪᑦ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ ᑭᓪᓕᒋᔭᖓ II.

ᑭᓪᓕᖓ III: ᐃᓄᓐᓄᑦ ᓱᕐᕋᒃᑕᐅᓯᒪᙱᑦᑐᖅ ᐊᕙᑎ

ᓇᒦᓐᓂᖏᑦ ᐱᕕᔅᓴᖃᖅᑎᑦᑎᔪᑦ ᐊᑦᑎᑦᑐᒥ ᐊᑦᑐᖅᑕᐅᔪᓂᑦ ᐳᓚᕋᖅᑎᓄᑦ ᐱᓕᕆᔭᐅᔪᓂᑦ ᓇᓗᓇᐃᖅᑕᐅᓯᒪᔪᑦ ᑭᓪᓕᒋᓪᓗᓂᐅᒃ III. ᐊᐅᓚᐅᑎᓕᓐᓄᑦ ᐳᓚᕋᖅᑎᓄᑦ ᐅᐸᑦᑕᐅᓂᖓᓄᑦ ᐊᐅᓚᑕᐅᔪᑦ.

ᒪᕐᕉᔫᒃ ᑭᓪᓕᖓᓂ III ᓇᒦᓐᓂᖏᑦ ᒥᕐᖑᐃᓯᕐᕕᒻᒥ.

ᑲᖏᖅᑐᖏᑦ

ᑲᖏᖅᑐᖏᑦ ᑕᕆᐅᒃᑯᑦ ᒥᕐᖑᐃᓯᕐᕕᒻᒨᕐᕕᑦᓴᖅ ᕿᑭᖅᑕᕐᔪᐊᒥᖕ, ᐃᓯᕐᕕᐅᔪᓐᓇᕐᑐᓂᓗ ᐸᓐᓂᖅᑑᕈᓗᒃᑯᑦ ᓂᒋᐊᓂ ᓴᕐᕙᓕᒃᓗ ᐅᐊᓐᓇᖓᓂ. ᐃᒪᕕᒻᒥᑦ ᑕᕆᐅᕐᒥᑦ ᑲᓱᖅᓯᒪᔪᖅ ᑲᖏᖅᑐᖏᓐᓄᑦ, ᐱᖃᓯᐅᔾᔭᐅᓪᓗᑎᑦ ᖃᓂᒋᔮᓂ ᓇᖅᓴᐃᑦ ᓯᕐᖕᒦᓪᓗ, ᒥᕐᖑᐃᓯᕐᕕᐅᑉ ᑲᖏᖅᑐᖏᑎᒍᑦ ᐃᖏᕐᕋᕕᐅᔪᓐᓇᕐᖓᑕ ᓄᓇᖅᐸᓯᒧᑦ ᐊᒻᒪᓗ ᑕᕆᐅᒃᑯᑦ ᐃᖏᕐᕋᓗᓂ ᑲᔾᔭᐅᓴᕕᐅᔪᓐᓇᑦᑎᐊᕐᑐᓂ. ᐊᕐᕌᒎᑉ ᐃᓚᐃᓐᓇᖓᓂ ᐊᖅᑯᑕᐅᕙᑦᑐᖅ ᑭᓪᓕᖓ III ᐊᖅᑯᑎᒋᔭᐅᕙᑦᑐᖅ ᐃᑎᓪᓕᑯᓗᒻᒥ, ᐊᑯᓐᓂᖓᓂ ᑭᕕᑑᖅ ᓇᖅᐸᐃᓪᓗ, ᐱᔪᓐᓇᑎᑦᑎᕗᖅ ᓚᐃᓴᓖᑦ ᐊᐅᓪᓚᕈᔾᔨᔩᑦ ᐃᖏᕐᕋᔪᓐᓇᕐᖓᑕ ᖃᒧᑕᐅᔭᒃᑯᑦ ᐃᖏᕐᕋᕕᐅᕙᑦᑐᒃᑯᑦ ᐊᐅᓪᓛᕐᕕᒥᓄᑦ ᐊᖅᑯᑕᐅᒐᔪᑦᑐᑦ ᐅᐊᓐᓇᖅᐸᓯᐊᒍᑦ ᑲᖏᖅᑐᒃᑯᑦ ᐊᑐᕋᑦᓴᐅᖏᒐᐃᒻᒪᑦ ᐊᐳᑎᖃᑦᑎᐊᖏᒧᑦ ᓯᑯᓯᒪᑦᑎᐊᖏᒧᓪᓘᓐᓃᑦ.

ᐊᒃᓵᔫᑉ ᐊᖅᑯᑎᖓ

ᐊᒃᓵᔫᑉ ᐊᖅᑯᑎᖓ, ᐳᓛᕆᐊᕐᑕᐅᖑᓛᖑᕙᑦᑐᖅ ᒥᕐᖑᐃᓯᕐᕕᒻᒥ, ᐊᖅᑯᑎᓪᓗᐊᑕᐅᒻᒪᑦ ᐃᖏᕐᕋᕕᐅᖃᑦᑕᓕᓂᐊᓗᖕ ᕿᑭᖅᑕᕐᔪᐊᕐᒥᐅᓄᑦ ᐸᓐᓂᖅᑑᒥᐅᓄᓪᓗ – ᐊᒻᒪᓗᑦᑕᐅᖅ ᐅᐸᒐᓪᓚᕆᐅᓪᓗᓂ ᐳᓛᕆᐊᕈᒪᔪᓄᑦ. ᐊᖅᑯᑎᖓ ᑎᑎᖅᑕᐅᓯᒪᖏᑦᑐᖅ ᐊᒻᒪᓗ ᒪᓕᓐᓂᖃᖅᑐᖅ ᓯᕕᑐᔪᒥᑦ ᓇᖅᓴᒥᑦ ᑰᖃᐅᖅᑐᓂ ᑕᓯᖃᐅᖅᑐᓂᓗ. ᐃᓚᖓᓂ 8.0 ᑕᕝᕙᓂ ᐸᕐᓇᐅᑎᓂ ᓇᓗᓇᐃᕐᓯᑲᓐᓂᕐᑐᑦ ᐃᓱᒪᖅᓴᖅᓯᐅᕈᑕᐅᒋᐊᓕᓐᓂᑦ ᐊᒻᒪᓗ ᐊᐅᓚᑦᑎᓂᖕᒧᑦ ᑐᕌᒐᑦᓴᓂᑦ ᐊᒃᓵᖅᔪᒃ ᐊᖅᑯᑖ ᐊᐅᓚᑕᐅᔾᔪᑎᑦᓴᖓᓂᑦ.

ᐳᓚᕋᖅᑏᑦ ᐋᖅᑭᔅᓯᔭᕿᐊᓖᑦ ᐃᖏᕋᑎᑕᐅᓗᑎ ᓚᐃᓴᓐᓯᖃᖅᑐᒧᑦ ᐊᐅᓪᓚᕈᔾᔨᔨᒧᑦ ᖃᓄᐃᑦᑐᑐᐃᓐᓇᕐᓄᑦ ᐊᐅᓚᐅᑎᖃᖅᑐᓄᑦ ᐅᐸᑦᑕᐅᓂᖓᓄᑦ ᐅᕝᕙᓘᓐᓃᑦ ᑭᓪᓕᖓ III ᓇᒦᓐᓂᖏᓐᓄᑦ. ᐊᐅᓪᓚᕈᔾᔨᔩᑦ ᕿᑭᕐᑕᖅᔪᐊᒥᐸᓐᓂᖅᑑᒥᓗ ᐊᑐᖃᑦᑕᖅᓯᒪᔪᑦ ᐊᒻᒪᓗ ᖃᐅᔨᒪᓂᖃᖅᑐᑎ ᐊᑦᑕᓇᖏᑎᑦᑎᓗᑎ, ᐊᑦᑐᐃᓂᖃᓗᐊᖏᑦᑐᓂᑦ ᐃᖏᕋᑎᑦᑎᓂᕐᒧᑦ ᒥᕐᖑᐃᓯᕐᕕᒻᒧᑦ ᖃᒧᑕᐅᔭᒃᑯᑦ ᐅᒥᐊᒃᑯᓪᓗ. ᐳᓚᕋᖅᑏᑦ ᐊᐅᓪᓚᐅᑎᓕᓐᓂᑦ ᐃᖏᕋᔾᔪᑎᓂᑦ ᐅᒥᐊᓂᓪᓘᓐᓃᑦ (ᑎᖏᕐᕋᐅᑎᓖᓪᓗ) ᒥᕐᖑᐃᓯᕐᕕᒻᒥ ᐊᑐᕆᐊᖃᓐᖏᑦᑐᑦ. ᑎᓴᒪᓖᑦ ᐊᒻᒪᓗ ᑯᑭᓖᓪᓗ (ᐊᒃᓴᓗᐊᒐᓴᓖᑦ) ᐳᓚᕋᑎᓄᑦ ᐊᑐᖅᑕᐅᖏᐊᖃᓐᖏᑦᑐᑦ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᖓᓂ.

ᐊᔪᙱᑎᑕᐅᔫᒐᓗᐊᑦ, ᐊᑯᓂᐊᓗᖕ ᓄᓇᖃᖅᑐᑦ ᕿᑭᖅᑕᕐᔪᐊᒥ ᐸᓐᓂᖅᑑᒥᓗ ᐃᓄᒻᒪᕆᐅᖏᑦᑐᑦ ᐊᑎᖃᖃᑕᐅᖏᑦᑑᒐᓗᐊᑦ ᓄᓇᕗᑦ ᐊᖏᕈᑎᖓᒍᑦ, ᓄᓇᖃᖅᓯᒪᔪᑦ ᓄᓇᖓᓂ ᐊᕐᕌᒍᑦ ᑕᓪᓕᒪᑦ ᐅᖓᑖᓂ, ᐱᓇᓱᐊᕈᓐᓇᕐᑐᑦ ᐱᔪᓐᓇᐅᒻᒥᑦ ᐃᒻᒥᓂᒃ ᖃᒧᑕᐅᔭᒃᑯᑦ ᐅᒥᐊᒥᒍᓪᓘᓐᓃᑦ ᐊᐅᓪᓚᕈᓐᓇᖁᓪᓗᒋᑦ ᑭᓪᓕᓕᒃ III ᓄᓇᖓᓄᑦ. ᐊᔪᙱᑎᑕᐅᓚᕿᔪᑦ ᐃᓚᒋᔭᐅᔪᓐᓇᖁᓪᓗᒋᑦ ᐱᔪᓐᓇᐅᑎᖃᙱᑦᑑᒐᓗᐊᑦ ᓄᓇᖃᖅᑐᑐᖃᑦ ᒪᕐᕉᓐᓂ ᓄᓇᓕᓐᓂ ᐃᓅᖃᑎᖐᓄᑦ ᐃᓕᖅᑯᓯᑐᖃᒃᑯᓪᓗ ᖁᕕᐊᓱᒋᐊᖅᑐᓄᑦ ᐃᓚᒋᔭᐅᔪᓐᓇᖁᓪᓗᒋᑦ ᐃᓄᓐᓄᑦ. ᓱᓕᒃᑲᓐᓂᖅ ᐱᔪᓐᓇᐅᒻᒥᑦ ᑲᓇᑕᐅᑉ ᒥᕐᖑᐃᓯᕐᕕᖓᓂᑦ ᐱᓚᐅᕐᓗᑎᑦ ᖃᒧᑕᐅᔭᕈᓐᓇᐅᒻᒥᑦ ᐅᒥᐊᒃᑯᓪᓘᓐᓃᑦ ᒥᕐᖑᐃᓯᕐᕕᒻᒥ, ᐊᔪᙱᑎᑕᐅᔪᑦ ᐱᔪᓐᓇᐅᑎᖃᓐᖏᑦᑑᒐᓗᐊᑦ ᓄᓇᓕᑐᖃᑦ ᐊᑎᓕᐅᖅᑳᕆᐊᓖᑦ ᐊᐅᓪᓚᓚᐅᖏᓐᓂᖏᓂ ᐊᒻᒪᓗ ᐃᓕᓐᓂᐊᕐᑎᑕᐅᒋᐊᖃᕐᒥᔪᑦ, ᑕᐃᒫᑦᓴᐃᓐᓇᖅ ᐳᓚᕋᑎᓄᑦ. ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᖃᐅᔨᓴᖃᑦᑕᓂᐊᖅᑐᑦ ᑕᒪᑐᒥᖓ ᐱᕙᓪᓕᐊᓂᖓᓂ, ᐊᒻᒪᓗ ᐃᓚᒍᑕᒃᑲᓐᓂᖏᓐᓂ ᐊᐅᓚᓂᖏᓐᓄᑦ ᐊᑐᐊᒐᐃᑦ ᓴᖅᑭᖅᑎᑕᐅᒋᐊᖃᕈᓐᓇᖅᑐᑦ ᑲᑎᒪᖃᑎᖃᕐᓗᑎ ᑲᑐᔾᔨᓗᑎᒃ ᒥᕐᖑᐃᓯᕐᕕᓕᕆᓂᕐᒧᑦ ᐊᐅᓚᑦᑎᔨᑦ ᑲᑎᒪᔨᕋᓛᖏᑦᓄᑦ ᐊᒻᒪᓗ ᐊᑦᑐᐊᓂᖃᖅᑐᑦ ᓄᓇᓖᑦ.

ᐅᒥᐊᕐᔪᐊᒃᑯᑦ ᐳᓚᕋᑏᑦ ᐃᓚᖏᓐᓄᑦ ᑲᖏᖅᑐᒧᕉᓐᓇᕐᑎᑕᐅᑐᐃᓐᓇᕆᐊᓖᑦ ᒪᓕᑦᓯᐊᑐᐊᖅᐸᑕ ᓄᓇᓖᑦ ᓯᕗᓪᓕᐅᔾᔭᐅᖁᔭᖏᓐᓂᑦ ᓄᓇᓕᓐᓄᑦ ᐳᓚᕋᑦᑐᓕᕆᓂᖕᒥᑦ ᐱᕙᓪᓕᐊᖁᓪᓗᒋᑦ.

ᐳᓚᕋᖅᑎᓄᑦ ᑭᓪᓕᖃᖅᑎᑕᐅᔪᑦ ᐊᒻᒪᓗ ᒪᑐᔭᐅᔪᑦ ᐊᑦᑐᐃᓂᖃᖅᑐᑦ ᐅᐸᒐᔅᓴᐅᓂᖏᓐᓄᑦ ᓇᓗᓇᐃᖅᓯᒪᔪᑦ ᓇᒦᓐᓂᖏᑦ ᐊᒻᒪᓗ ᓇᓗᓇᐃᖅᓯᒪᔪᓂᑦ ᖃᖓᒃᑰᓂᖏᓐᓄᑦ ᐊᕐᕌᒍᒥ ᓇᓗᓇᐃᖅᑕᐅᓯᒪᔪᑦ ᐃᓚᖓ 7.2 ᐊᒻᒪᓗ 7.3.

ᓄᓇᖑᐊᖅ 3: ᑭᓪᓕᖃᖅᑎᑦᑎᓂᖅ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒻᒥ

ᓄᓇᖑᐊᖅ 3: ᑭᓪᓕᖃᖅᑎᑦᑎᓂᖅ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒻᒥ — ᑎᑎᕋᖅᓯᒪᓂᖏᑦ

ᑖᓐᓇ ᓄᓇᓐᖑᐊᖅ ᓇᓗᓇᓗᓇᐃᕐᓯᓯᒪᔪᖅ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᑕ ᑭᓪᓕᖏᓐᓂᑦ. ᐊᑕᐅᓯᐅᓪᓗᓂ ᐊᔾᔨᓐᖑᐊᖅ, ᐊᑎᓕᒃ ᒥᕐᖑᐃᓯᕐᕕᓕᒫᑉ ᑭᓪᓕᖓ, ᒥᕐᖑᐃᓯᕐᕕᓕᒫᖅ ᓴᖅᑭᔮᖅᑐᖅ ᑎᓴᒪᑦ ᐊᕙᓗᐊᓂ ᐊᔾᔨᓐᖑᐊᑦ, ᐊᑎᓕᑦ 1 ᓇᓪᓗᑦᓯᐊᖅ, 2 ᐃᑎᓪᓕᑯᓗᒃ ᐃᓪᓕᓂᖓ ᐃᖏᕐᕋᕕᒃ, 3 ᒪᑦᑖᑐᔾᔭᓇ, ᐊᒻᒪ 4 ᐊᒃᓵᕐᔫᑉ ᐊᖅᑯᑖ. ᐃᓘᓐᓇᑎᑦ ᓄᓇᓐᖑᐊᖏᑦ ᐅᐊᓐᓇᖓᓄᑦ ᓵᓐᖓᔪᑦ.

ᒥᕐᖑᐃᓯᕐᕕᓕᒫᑉ ᑭᓪᓕᖓ

ᒥᕐᖑᐃᓯᕐᕕᓕᒫᑉ ᓄᓇᓐᖑᐊᖓ ᓴᖅᑭᔮᕐᑎᑦᓯᔪᖅ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᓂᑦ ᐱᒋᐊᕐᑐᒍ ᑎᓄᔾᔨᕕᐅᑉ ᑕᓯᐅᔭᕐᔪᐊᖓᓂᑦ ᓂᒋᐊᑕ ᐱᓇᓐᓇᖓᓂᑦ ᐊᒻᒪ ᕿᑭᖅᑖᓘᑉ ᐃᑭᖓᓄᑦ ᐅᐊᓐᓇᖓᑕ ᑲᓇᓐᓇᖅᐸᓯᐊᓄᑦ. ᒥᕐᖑᐃᓯᕐᕕᐅᓂᖓ ᐆᔭᐅᔭᐅᓪᓗᓂ ᖃᐅᒪᓂᖅᓴᖅ ᐊᒻᒪ ᑖᕐᓂᖅᓴᐅᓪᓗᑎᖕ ᖃᖅᑲᖏᑦ, ᓯᕐᖕᒦᑦ, ᐃᒪᖃᐅᕐᓂᖏᓪᓗ. ᕿᑭᖅᑕᖅᔪᐊᑉ ᓄᓇᖓ ᑲᓇᓐᓇᖅᐸᓯᐊᓃᑦᑐᖅ 25 ᑭᓚᒦᑕᓂᑦ ᐅᖓᓯᓐᓂᓕᒃ ᒥᕐᖑᐃᓯᕐᕕᐅᑉ ᑭᓪᓕᖓᓂᑦ ᐊᒻᒪ ᐸᓐᓂᖅᑐᖅ ᐃᒻᒪᖃ 25 ᑭᓚᒦᑕᓂᑦ ᐅᖓᓯᓐᓂᓕᒃ ᓂᒋᐊᓂᑦ. ᐃᓚᖓᒍᑦ ᐃᓄᐃᑦ ᓄᓇᖁᑎᓪᓛᔪᑦ ᒥᕐᖑᐃᓯᕐᕕᒻᒥ ᓯᐊᕐᓇᒥᖕ ᐊᒥᐊᓖᑦ. ᐃᓚᖓ 0-40 ᑭᓚᒦᑕᑦ ᑭᓚᒦᑕᑦ ᓯᕕᑐᓂᖏᑕ ᐅᖓᓯᒌᓐᓂᖏᑦ ᓴᖅᑭᔮᕐᑐᑦ ᖁᓛᓂ ᑕᓕᖅᐱᐊᓂ.

ᑎᓴᒪᑦ ᓈᓴᐅᑎᒃᑯᑦ ᓇᓗᓇᐃᕐᓯᒪᔪᑦ ᐊᒻᒪ ᒥᕐᖑᐃᓯᕐᕕᐅᑉ ᓄᓇᓐᖑᐊᖓᓂ ᑎᑎᖅᓯᒪᔪᑦ:

• 1 ᓇᓪᓗᑦᓯᐊᖅ ᑎᑎᖅᓯᒪᔪᖅ ᒥᕐᖑᐃᓯᕐᕕᐅᑉ ᐅᐊᓐᓇᖓᑐ ᑭᓪᓕᖓᓂ
• 2 ᐃᑎᓪᓕᑯᓗᒃ ᐃᓪᓕᓂᖓ ᐃᖏᕐᕋᕕᒃ ᓇᓗᓇᐃᖅᑕᐅᓯᒪᔪᖅ ᑲᓇᓐᓇᖓᓂ ᑭᓪᓕᖓᓂ ᒥᕐᖑᐃᓯᕐᕕᐅᑉ
• 3 ᒪᑦᑖᑐᔾᔭᓈ ᑎᑎᖅᓯᒪᔪᖅ ᒥᕐᖑᐃᓯᕐᕕᐅᑉ ᓂᒋᐊᑕ ᑲᓇᓐᓇᕐᐸᓯᐊᑕ ᑭᓪᓕᖓᓂ
• 4 ᐊᒃᓵᕐᔫᑉ ᐊᖅᑯᑖ ᑎᑎᖅᓯᒪᔪᖅ ᒥᕐᖑᐃᓯᕐᕕᐅᑉ ᓂᒋᐊᑕ ᑭᓪᓕᖓᓂ

1 ᓇᓪᓗᑦᓯᐊᖅ

ᓯᕗᓪᓕᖅ ᓄᓇᓐᖑᐊᑉ ᐃᓗᐊᓃᖃᑕᐅᔪᖅ ᖂᑭᑦᑐᑯᑖᕈᓗᒃ ᓄᕗᑯᑖᖅ ᓇᓪᓗᑦᓯᐊᖅ ᓂᒋᐊᓂ. ᐃᓱᐊᓂ ᖂᑭᑦᑐᑯᑖᖅ ᓄᕗᑯᑖᖅ ᐊᐅᐸᖅᑑᓪᓗᓂ ᓄᓇᖓ ᓂᒋᐊᓃᑦᑐᖅ ᐅᔭᐅᔭᐅᓪᓗᓂ ᖃᐅᒪᓂᕐᓴᖅ. ᓇᓪᓗᑦᓯᐊᖅ ᕿᑭᖅᑕᖓ ᒥᕐᖑᐃᓯᕐᕕᐅᑉ ᑭᓪᓕᖓᑕ ᓯᓚᑖᓃᑦᑐᖅ. ᐃᓚᖓ 0-1 ᑭᓚᒦᑕᑦ ᓯᕕᑐᓂᖏᑕ ᐅᖓᓯᒌᓐᓂᖏᑦ ᓴᖅᑭᔮᕐᑐᑦ ᐊᑖᓂ ᑕᓕᖅᐱᐊᓂ.

2 ᐃᑎᓪᓕᑯᓗᒃ ᐃᓪᓕᓂᖓ ᐃᖏᕐᕋᕕᒃ

ᐊᐃᑉᐸᖓ ᓄᓇᓐᖑᐊᑉ ᑐᖑᔪᕈᔪᑦᑐᒥᒃ ᑐᑭᓕᐊᖅᑐᒥᒃ ᑕᑯᔅᓴᐅᑎᑦᑎᔪᖅ ᑲᓇᓐᓇᖅ−ᐱᖓᓐᓇᕐᒧᑦ ᐊᖅᑯᑎᒋᔭᐅᕙᑦᑐᖅ ᓈᖅᐸᐃᑦ ᐊᒻᒪᓗ ᑲᖏᖅᑐᓗᒃ ᐊᑯᓐᓂᖓᓂ ᕿᕕᑦᑑᑉ ᖃᓂᒋᔮᓂ. ᐊᖅᑯᑖ ᓄᓇᒃᑰᖅᐳᖅ ᒥᕐᖑᐃᓯᕐᕕᒻᒥ, ᑕᑯᔅᓴᐅᑎᑕᐅᓪᓗᓂ ᑐᖑᔪᕈᔪᑦᑐᒥᒃ. ᐊᖅᑯᑎᐅᑉ ᐅᐊᓐᓇᖓᓃᑦᑎᐊᖅᑐᖅ ᒥᕐᖑᐃᓯᕐᕕᐅᑉ ᑭᓪᓕᖓ, ᐃᓄᐃᑦ ᓄᓇᖁᑎᖏᑕ ᓴᓂᐊᓂᑦᑎᐊᖅᑐᖅ. ᐃᓚᖓ 0-2 ᑭᓚᒦᑕᑦ ᓯᕕᑐᓂᖏᑕ ᐅᖓᓯᒌᓐᓂᖏᑦ ᓴᖅᑭᔮᕐᑐᑦ ᐊᑖᓂ ᓴᐅᒥᐊᓂ.

3 ᒪᑦᑖᑐᔾᔭᓇ

ᐱᖓᔪᐊᑦ ᐊᔾᔨᓐᖑᐊᑉ ᐃᓗᐊᓃᑦᑐᖅ ᒪᑦᑖᑐᔾᔭᓇ, ᐃᓪᓚᐅᓕᑦᑑᖅ, ᐊᒻᒪ ᐸᓐᓂᖅᑑᕈᓘᑉ ᐹᖓ. ᓄᓇᖓ ᖂᑭᑦᑐᑯᑕᖑᓪᓗᓂ ᐅᐊᓐᓇᖅᐸᓯᐊᓂ ᒪᑦᑖᑐᔾᔭᓇ ᐊᐅᐸᖅᑐᒥᖕ ᐊᒥᐊᓕᒃ. ᐊᐅᓱᐃᑦᑐᑦ ᑐᖑᔪᖅᑕᐅᓪᓗᑎᖕ ᐊᒻᒪ ᒥᕐᖑᐃᓯᕐᕕᐅᑉ ᓄᓇᖓ ᐆᔭᐅᔭᐅᓪᓗᓂ. 0-10 ᑭᓚᒦᑕᓂᑦ ᓯᕕᑐᓂᖏᑕ ᐅᖓᓯᒌᓐᓂᖏᑦ ᖁᓛᓃᑦᑐᑦ ᑕᓕᖅᐱᐊᓂ. ᓄᓇᖏᑕ ᐊᑎᖏᑦ ᐃᓄᒃᑎᑐᑦ ᑎᑎᕋᕐᓯᒪᔪᑦ ᐃᒫᖕ:

• ᐅᔭᕋᓱᔾᔪᓕᒃ ᐊᒻᒪ ᐊᐅᓚᑦᑎᕕᒃ ᕿᑎᐊᓃᑦᑐᑦ ᒪᑦᑖᑐᔾᔭᓇ ᐅᐊᓐᓇᖓᑕ ᓯᓈᖓᓂ.
• ᐊᑯᓕᐊᖃᑦᑕᖅ ᓄᓇᖓ ᐊᑯᓐᓂᖓᓃᑦᑐᖅ ᒪᑦᑖᑐᔾᔭᓇ ᐊᒻᒪ ᐃᓪᓚᐅᓕᑦᑑᑉ.
• ᐆᒻᒫᓇᖅ, ᕿᑭᖅᑕᑲᓪᓚᕈᓗᒃ ᐃᓪᓚᐅᓕᑦᑑᖅ ᐹᖓᓂ.
• ᐊᑦᑎᓐᓂᕈᓗᒃ ᐃᓪᓚᐅᓕᑦᑑᖅ ᐅᐊᓐᓇᖓᑕ ᓯᓈᖓᓂ ᕿᑎᐊᓃᑦᑐᖅ.
• ᐊᐅᐸᓗᑭᓵᖅ ᓄᓇᖓ ᐊᑯᓐᓂᖓᓃᑦᑐᖅ ᐃᓪᓚᐅᓕᑦᑑᖅ ᐊᒻᒪ ᐸᓐᓂᖅᑑᕈᓘᑉ.
• ᐅᑭᐊᓪᓕᕕᒥᓂᖅ ᑲᓇᓐᓇᖓᓂ ᐸᓐᓂᖅᑑᕈᓘᑉ ᐅᐊᓐᓇᖓᑕ ᓯᓈᖓᓂ, ᐃᓪᓗᕋᑖᖅᑕᓕᒃ ᑐᐊᕕᕐᓇᕐᑎᓪᓗᒍ ᑕᒻᒫᕐᕕᒻᒥᖕ ᓇᓗᓇᐃᕐᓯᒪᔪᖅ.

4 ᐊᒃᓵᕐᔫᑉ ᐊᖅᑯᑖ

ᑎᓴᒪᖓᑦ ᐊᔾᔨᖑᐊᑦ ᐃᓗᐊᓂ ᐊᒃᓵᕐᔫᑉ ᐊᖅᑯᑖ. ᐊᖅᑯᑖ 2.7 ᑭᓚᒦᑕᑦ ᓴᓂᒧᑦ, 100 ᑭᓚᒦᑕᑦ ᓯᕕᑐᓂᖓ ᐆᔭᐅᔭᒥᖕ ᐊᒥᐊᓕᒃ. ᐃᓚᖓ ᐸᓐᓂᖅᑑᕈᓘᑉ ᕿᓐᖑᐊᑕ ᑰᖓᑕ ᓇᖅᓴᐅᓂᖓ ᐅᐊᓐᓇᖅᐸᓯᐊᓂ, ᑕᓯᕈᓗᒃ ᕿᑎᐊᓂ, ᐊᒻᒪ ᐸᓐᓂᖅᑑᑉ ᑰᖓᑕ ᕿᓐᖑᐊ ᓂᒋᐊᓂ. ᐃᖏᕐᕋᕕᐅᕙᑦᑐᖅ ᐊᒃᓵᖅᔫᑉ ᐊᖅᑯᑖᒍᑦ ᑲᔫᓪᓗᓂ ᑎᑎᖅᓯᒪᔪᖅ. ᑎᓴᒪᐅᔪᕐᖏᕋᕐᑐᓂᑦ ᐊᑕᐅᓯᕐᒥᓪᓗ ᐃᓪᓗᕋᓛᖃᐅᖅᑐᖅ ᑐᐊᕕᕐᓇᕐᓯᑉᐸᑦ ᑕᒻᒫᕐᕕᓂᑦ ᐊᒃᓵᕐᔫᑉ ᐊᖅᑯᑖᒍᑦ, ᐅᖓᓯᒌᓐᓂᖏᑦ 10 ᑭᓚᒦᑕᐅᓪᓗᑎᖕ (ᐅᐊᓐᓇᖓᓂᑦ ᓂᒋᐊᓄᑦ): ᐸᓐᓂᖅᑑᕈᓘᑉ ᕿᓐᖑᐊᓂ, ᐸᓐᓂᖅᑑᕈᓘᑉ ᕿᓐᖑᐊᑕ ᑰᖓᓂ, ᑐᓄᓲᑉ ᐊᑖᓂ, ᑕᓯᕈᓗᒃ ᐊᑖᓂ, ᑕᓯᕈᓗᒃ, ᓴᖑᖓᓂᕐᒥ, ᐊᖅᑯᓪᓘᑎᐅᑉ ᐊᑖᓂ, ᐅᓗ, ᐊᒻᒪ ᐸᓐᓂᖅᑑᑉ ᕿᙳᐊ - ᓴᖑᖓᓂᖅ. ᐃᖅᑲᓇᐃᔭᖅᑏᑦ ᐃᓪᓗᕋᓛᖏᑦ ᑕᓯᕈᓗᖕᒥ ᐊᒻᒪ ᐊᖅᑯᓪᓘᑎᐅᑉ ᐊᑖᓂ. ᐱᑎᑦᓯᓐᖑᐊᑦ ᑎᒃᑯᐊᖓᔪᑦ ᐸᓐᓂᖅᑑᒧᑦ ᓂᒋᐊᑕ ᐱᓇᓐᓇᖓᓄᑦ ᐊᒻᒪ ᕿᑭᖅᑕᕐᔪᐊᒧᑦ ᐅᐊᓐᓇᖓᓄᑦ. 0-10 ᑭᓚᒦᑕᑦ ᓯᕕᑐᓂᖓ ᑐᑭᓕᐊᕐᑐᖅ ᐊᑖᓂ ᑕᓕᖅᐱᐊᓂ.

ᐅᓂᒃᑳᖏᑦ (ᑎᑎᕋᕐᓯᒪᓪᓗᑎᖕ ᓇᓗᓇᐃᕐᓯᓯᒪᔪᑦ):

• ᐊᐅᐸᖅᑐᖅ: ᑭᓪᓕᖓ I – ᐱᑐᐃᓐᓇᐅᖏᑦᑐᑦ ᐱᐅᖅᓱᐊᕆᐊᓖᑦ
• ᐆᔭᐅᔭᖅ ᖃᐅᒪᓂᖅᓴᖅ: ᑭᓪᓕᖓ II – ᐆᒪᔪᖃᐅᕐᓂᖓ ᓄᓇᑐᐃᓐᓇᖅ
• ᐆᔭᐅᔭᖅ ᑖᕐᓂᖅᓴᖅ: ᑭᓪᓕᖓ III – ᐊᕙᑎᐊᓃᑦᑐᑦ ᓱᕐᕋᓐᓂᐅᖏᑦᑐᑦ (ᓄᓇ)
• ᑐᖑᔪᖅᑕᖅ: ᑭᓪᓕᖓ III – ᐊᕙᑎᐊᓃᑦᑐᑦ ᓱᕐᕋᓐᓂᐅᖏᑦᑐᑦ (ᐃᒪᖅ)
• ᓯᐊᕐᓇᖅ: ᐃᓄᐃᑦ ᓄᓇᖁᑎᖏᑦ
• ᐆᔭᐅᔭᖅ ᑖᕐᓂᖅᓴᖅ ᐃᔾᔪᔫᓪᓗᓂ ᑎᑎᑯᑖᑦᓯᒪᔪᖅ: ᒥᕐᖑᐃᓯᕐᕕᐅᑉ ᑭᓪᓕᖓ
• ᑲᔪᖅ ᓴᓂᒧᑦ ᑎᑎᖅᓯᒪᔪᖅ: ᐊᖅᑯᑏᑦ
• ᐃᓪᓗᕋᓛᓐᖑᐊᑦ ᓇᓗᓇᐃᒃᑯᑎᖏᑦ: ᑐᐊᕕᕐᓇᖅᑐᖃᕐᑎᓪᓗᒍ ᐃᓪᓗᕋᓛᑦ
• ᐃᓪᓗᕋᓛᓐᖑᐊᑦ ᐃᓄᓐᖑᐊᓪᓗ ᓇᓗᓇᐃᒃᑯᑎᖏᑦ: ᐃᖅᑲᓇᐃᔭᖅᑏᑦ ᐃᓪᓗᕋᓛᖏᑦ

7.2 ᓇᒦᓐᓂᖓ ᐱᒻᒪᕆᐅᔪᑦ ᐃᓄᓐᓄᑦ

ᕿᑭᖅᑖᓗᒻᒥ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᑦ (ᐃᓚᖓ 8.1.12) ᐱᑕᖃᕆᐊᖃᖅᑎᑦᑎᔪᑦ ᐅᓇ ᐊᐅᓚᑦᑎᓂᕐᒧᑦ ᐸᕐᓇᐅᑦ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒻᒧᑦ ᐱᖃᓯᐅᔾᔨᔪᖅ ᓇᓗᓇᐃᖅᓯᒪᔪᓂᑦ ᖃᓄᐃᓕᓯᒋᐊᓂᕐᒧᑦ ᐱᔪᓐᓇᖅᑎᑕᐅᖏᑦᑐᑦ ᐅᕝᕙᓘᓐᓃᑦ ᑭᓪᓕᖃᖅᑎᑕᐅᓗᑎ ᐳᓚᕋᖅᑎᓄᑦ ᐅᐸᒍᓐᓇᖅᑕᖏᓐᓂ ᓇᒦᓐᓂᖏᓐᓄᑦ ᐱᒻᒪᕆᐅᔪᓄᑦ ᐃᓄᓐᓄᑦ, ᓇᓕᐊᓐᓂᑐᐃᓐᓇᖅ ᐊᑐᖅᑕᐅᑲᐃᓐᓇᖅᑐᒥᑦ ᐅᕝᕙᓘᓐᓃᑦ ᐊᑐᖅᑕᐅᖏᓐᓇᖅᑐᒥᑦ.

ᕿᑭᖅᑕᕐᔪᐊᒥᐅᑦ ᐃᓄᐃᑦ ᓇᓗᓇᐃᕐᓯᓯᒪᒻᒪᑕ ᒪᑦᑖᑐᔾᔭᓈ ᐊᒻᒪᓗ ᐃᓪᓚᐅᓕᑦᑑᖅ ᐱᒻᒪᕆᐅᒋᔮᒃ ᐃᓄᓐᓄᑦ (ᓄᓇᙳᐊᖅ 4) ᐱᖅᑯᓯᑐᖃᖅᑎᒍᑦ ᐊᐅᓪᓛᕐᕕᐅᓯᒪᕙᒻᒪᑦ ᐊᐅᔭᐅᑉ ᓄᙳᐊᓂ, ᕿᓚᓗᒃᑭᐊᕐᕕᐅᓂᖏᓐᓄᑦ ᑐᒑᓕᓐᓂᑦ, ᓄᓂᕙᒋᐊᕐᕕᐅᕙᒻᒪᑦ, ᐃᓪᓗᕋᓛᖏᓐᓃᖃᑦᑕᓂᖏᓐᓄᓪᓗ. ᐅᐸᑦᑕᐅᖁᔭᐅᕙᓐᖏᑦᑑᖕ ᑲᖏᖅᑐᖏᒃ ᐋᒋᓯ 25-ᒥ ᓯᑯᒐᓱᓐᓂᖓᓄᑦ ᐊᕐᕌᒍᑕᒫᑦ ᐃᓄᐃᑦ ᐸᕝᕕᓴᑦᑕᐅᖁᓇᒋᑦ ᐊᐅᓪᓛᕐᓯᒪᓂᖏᓂ. ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐃᖅᑲᓇᐃᔭᖃᑎᖃᓂᐊᖅᑐᑦ ᐃᓕᓴᕕᒻᒥ ᐊᐅᓚᑦᑎᔨᓂᑦ ᕿᑭᕐᑕᖅᔪᐊᒥ ᐅᐸᒐᔅᓴᐅᓂᖓᓄᑦ ᐅᐊᓐᓇᖓᓂ ᓯᔾᔭᖓᓂ ᒪᑦᑖᑐᔾᔭᓇ ᐱᖅᑯᓯᓄᑦ ᐱᓕᕆᔭᐅᔪᓄᑦ ᐱᓕᕆᔭᐅᔪᑦ ᑕᐃᑲᓂ ᐃᓚᒋᓪᓗᓂᐅᒃ ᐊᕐᕌᒍᑕᒫᑦ ᐃᓕᓴᐃᔩᑦ ᓇᓗᓇᐃᔭᐃᕕᐅᓂᖏᓐᓄᑦ.

ᓄᓇᖑᐊᖅ 4: ᓇᒦᓐᓂᖓ ᐊᔾᔨᐅᖏᑦᑐᒥ ᐱᒻᒪᕆᐅᔪᖅ ᐃᓄᓐᓄᑦ

ᓄᓇᖑᐊᖅ 4: ᓇᒦᓐᓂᖓ ᐊᔾᔨᐅᖏᑦᑐᒥ ᐱᒻᒪᕆᐅᔪᖅ ᐃᓄᓐᓄᑦ — ᑎᑎᕋᖅᓯᒪᓂᖏᑦ

ᑕᕝᕙᓂ ᓄᓇᓐᖑᐊᒥ ᐊᓐᓂᕆᔭᐅᔪᑦ ᐃᓄᓐᓄᑦ ᐱᒻᒪᕆᐅᓂᖏᓐᓄᑦ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᑕ ᓂᒋᐊᑕ ᑲᓇᓐᓇᖓᓂ. ᒥᕐᖑᐃᓯᕐᕕᒻᒥ ᐆᔭᐅᔭᖅ ᖃᐅᒪᓂᖅᓴᖅ ᐊᒻᒪ ᑖᕐᓂᖅᓴᐅᓪᓗᑎᖕ ᖃᖅᑲᖏᑦ, ᓯᕐᖕᒥᖏᑦ, ᐃᒪᖃᐅᕐᓂᖏᓪᓗ. ᓄᓇᓐᖑᐊᒥ ᐱᖓᓲᓕᖓᔪᑦ ᑲᖏᖅᑐᖏᑦ ᒥᕐᖑᐃᓯᕐᕕᒻᒥ. ᑐᖑᔪᖅᑕᒥᖕ ᐊᒥᐊᓖᑦ ᖃᑯᖅᑐᒥᖕ ᑎᑎᑯᑖᑦᓯᒪᔪᑦ ᐃᒪᖓ ᒪᑦᑖᑐᔾᔭᓈ ᐊᒻᒪ ᐃᓪᓚᐅᓕᑦᑑᑉ ᓇᓗᓇᐃᕐᓯᓯᒪᔪᖅ ᐳᓚᕋᑎᓄᑦ ᒪᑐᓯᒪᕙᓐᓂᖓᑕ ᐊᓪᓚᓐᖑᐊᓂ ᕿᓚᓗᒃᑭᐊᕐᓇᐅᑎᓪᓗᒍ ᐊᒻᒪ ᐊᓯᖏᓐᓂᑦ ᐃᓄᐃᑦ ᖁᕕᐊᓱᒋᐊᕐᓯᒪᑎᓪᓗᒋᑦ ᐋᒋᓯ 25ᒥᖕ ᓯᑯᒐᓱᐊᕐᓂᖓᓄᑦ. ᐸᓐᓂᖅᑑᕈᓗᒃ ᑐᖑᔪᖅᑕᒥᖕ ᖃᐅᒪᓂᕐᓴᒥᑦ ᐊᒥᐊᓕᒃ.

ᕿᑭᖅᑕᕐᔪᐊᑉ ᓄᓇᖓ 25 ᑭᓚᒦᑕᓂᑦ ᐅᖓᓯᓐᓂᓕᒃ ᒥᕐᖑᐃᓯᕐᕕᐅᑉ ᑭᓪᓕᖓᓄᑦ ᐅᐊᓐᓇᖓᑕ ᑲᓇᓐᓇᖅᐸᓯᐊᓂ. ᐃᓄᐃᑦ ᓄᓇᖁᑎᖏᑦ ᐱᑕᖃᐅᓪᓛᔪᑦ ᒥᕐᖑᐃᓯᕐᕕᒻᒥ ᓯᐊᕐᓇᐅᓗᑎᖕ ᐊᒥᐊᖏᑦ. ᓯᕕᑐᓂᖓ ᑐᑭᓕᐊᕐᑐᖅ (0-5 ᑭᓚᒦᑕᑦ) ᑎᑎᖅᓯᒪᔪᖅ ᐊᑖᓂ ᓴᐅᒥᐊᓂ.

ᓄᓇᓐᖑᐊᖅ ᐅᐊᓐᓇᒧᑦ ᓵᓐᖓᔪᖅ. ᑎᕆᕐᕈᐊᓂ ᑭᑉᐹᕆᑦᑐᑯᓗᖕ ᐊᑖᓃᑦᑐᖅ ᑕᓕᖅᐱᐊᓂ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᑕ ᓯᓈᖓ ᓂᒋᐊᑕ ᑲᓇᓐᓇᖅᐸᓯᐊᓂ.

ᐅᓂᒃᑳᖏᑦ (ᑎᑎᕋᕐᓯᒪᓪᓗᑎᖕ ᓇᓗᓇᐃᕐᓯᓯᒪᔪᑦ):

• ᐆᔭᐅᔭᖅ: ᒥᕐᖑᐃᓯᕐᕕᐅᑉ ᑭᓪᓕᖓ
• ᑐᖑᔪᖅᑕᖅ ᖃᑯᖅᑕᐅᓪᓗᓂ ᑭᑉᐹᕆᑦᑐᖅ: ᕿᓚᓗᒃᑭᐊᕐᕕᒃ ᐊᒻᒪ ᐊᓯᖏᓐᓂᑦ ᐃᓄᐃᑦ ᑲᔾᔭᐅᓴᒋᐊᕐᕕᖏᑦ (ᐋᒋᓯ 25ᒥᖕ ᓯᑯᒐᓱᐊᕐᓂᖓᓄᑦ)
• ᓯᐊᕐᓇᖅ: ᐃᓄᐃᑦ ᓄᓇᖁᑎᖏᑦ

ᐊᓯᖏᑦ ᐳᓚᕋᖅᑎᓄᑦ ᑭᓪᓕᖃᖅᑎᑕᐅᔪᑦ ᐊᒻᒪᓗ ᒪᑐᔭᐅᓂᖏᓐᓄᑦ

ᐃᓚᖓ 8.1.10 ᕿᑭᖅᑖᓗᖕᒥ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑎᑦᓴᖏᓐᓄᓪᓗ ᐊᖏᕈᑦ ᐅᖃᖅᓯᒪᒻᒪᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᓇᓗᓇᐃᖅᓯᔪᓐᓇᕐᓂᖏᓐᓂᑦ ᐳᓚᕋᑏᑦ ᐃᓯᕐᕕᒋᔪᓐᓇᕐᑕᑐᐊᖏᓐᓂᑦ ᐊᐃᑉᐸᖃᑐᐊᖅᐸᑕ ᑭᓯᐊᓂ ᓇᖕᒥᓂᖃᕐᓂᖕᒧᑦ ᓚᐃᓴᓐᓯᓕᒻᒥᑦ ᖃᐅᔨᒪᑦᑎᐊᖅᑐᒥᑦ ᓄᓇᖓᓂᑦ.

ᐊᐅᓚᐅᑎᓕᒃᑯᑦ ᐃᖏᕐᕋᔪᓐᓇᕐᓂᖅ ᑭᓪᓕᓕᒃ III ᓄᓇᖓᓄᑦ ᐅᐊᓐᓇᖅᐸᓯᖓᓂ ᑲᖏᖅᑐᖏᑦ, ᐱᒋᐊᕐᑐᒍ ᑲᖏᖅᑐᕐᓗᐊᓗᒃᒥᒃ ᓴᕐᕙᓕᒻᒧᑦ, ᐳᓚᕋᑏᑦ ᐃᓚᖃᕆᐊᓖᑦ ᓄᓇᕗᒥᐅᑕᒥᒃ ᐃᓄᒻᒥᒃ (ᓄᓇᖑᐊᖅ 5). ᐃᓄᐃᑦ ᐊᐅᓪᓚᕐᕕᒋᒐᔪᑦᑕᖓ ᑕᒪᓐᓇ ᐃᓚᖓ ᒥᕐᖑᐃᓯᕐᕕᒃ ᐃᖃᓗᒐᓱᐊᓂᕐᒧᑦ, ᐊᖑᓇᓱᓐᓂᕐᒧᑦ, ᐊᐅᓪᓛᖅᓯᒪᓂᕐᒧᑦ, ᓄᓂᕙᓐᓂᕐᒧᑦ, ᐊᒻᒪᓗ ᐊᓯᖏᓐᓄ ᐱᓕᕆᔭᐅᔪᓄᑦ ᐊᕐᕌᒍᓕᒫᒥ. ᑖᓐᓇ ᐅᖓᓯᑦᑐᖅ ᑭᓯᐊᓂ ᑕᑯᒥᓇᑦᑎᐊᖅᑐᖅ ᓇᒦᓐᓂᖓ ᐊᒥᓱᒐᓚᓐᓂᑦ ᐳᓚᕋᖅᑎᖃᖅᓯᒪᔪᖅ ᐅᐊᑦᑎᐊᕈ ᑭᓯᐊᓂ ᐊᐅᓪᓚᕐᓂᖅ ᑕᕝᕗᖓ ᐱᕕᔅᓴᖃᖅᑎᑦᑎᔪᓐᓇᖅᑐᖅ ᐳᓚᕋᖅᑎᓄᑦ ᖁᕕᐊᒋᔭᖃᓂᕐᒧᑦ ᐊᒻᒪᓗ ᖁᕕᐊᓱᒍᑎᖃᓂᕐᒧᑦ ᐱᐅᓂᖓᓄ ᐅᑭᐅᖅᑕᖅᑐᒥ ᓄᓇᖏᑦ, ᑕᐃᒃᑯᓄᖓ ᐸᕐᓇᓯᒪᑦᑎᐊᖅᑐᓄᑦ, ᐊᑯᓂᐅᓂᖅᓴᖅ ᐊᐅᓚᖅᓯᒪᒍᓐᓇᖅᑐᑎ, ᐊᒻᒪl ᒪᓕᓪᓗᑎ ᐊᑦᑕᓇᖏᑦᑐᒥ ᐊᑐᖅᑕᐅᕙᑦᑐᓂᑦ. ᐳᓚᕋᑏᑦ ᐊᐅᓪᓚᕈᔾᔭᐅᒋᐊᓖᑦ ᐃᓄᖕᒧᑦ ᓄᓇᕗᑦ ᐊᖏᕈᑎᖓᒍᑦ ᐊᑎᖃᖃᑕᐅᔪᒧᑦ ᐊᐅᓚᐅᑎᓕᒃᑯᑦ ᐊᐅᓪᓚᕈᔾᔭᐅᓂᐊᕐᐸᑕ ᑮᓇᐅᔭᓕᐅᕋᓱᓐᓂᖕᒧᑦ ᒪᑭᒪᔾᔪᑕᐅᖁᓪᓗᒍ ᐃᓄᓐᓄᑦ ᐊᒻᒪᓗ ᐃᑉᐱᒍᓱᑦᑎᐊᕐᓂᒃᑯᑦ ᐃᖏᕐᕋᖁᓪᓗᒋᑦ ᐅᐊᓐᓇᖓᑕ ᑲᖏᖅᑐᖏᑎᒍᑦ.

ᐃᓚᖓ 8.1.8 ᕿᑭᖅᑖᓗᒻᒥ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᑦᓇᓗᓇᐃᖅᓯᔪᑦ ᑖᒃᑯᐊ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᑭᓪᓕᖃᖅᑎᑦᑎᔪᓐᓇᖅᑐᑦ ᐅᕝᕙᓘᓐᓃᑦ ᐱᔪᓐᓇᖅᑎᑕᐅᖏᓪᓗᑎ ᐳᓚᕋᖅᑏᑦ ᐅᐸᔅᓯᓗᑎ ᐊᑕᐅᓯᕐᒥᑦ ᐊᒥᓲᓂᖅᓴᓂᓪᓘᓐᓃᑦ ᐊᕐᕌᒍᖓᓂ, ᐃᓄᓐᓂᑦ ᐊᑦᑕᓇᐃᖅᓯᒪᑎᑦᑎᓂᕐᒧᑦ ᐱᔾᔪᑎᖃᖅᑐᑎᑦ.

• ᓇᓄᐃᑦ ᑎᓯᖏᓐᓃᓕᕐᑎᓪᓗᒋᑦ ᒪᑐᕙᑦᑐᑦ ᐅᐊᓐᓇᖓᒍᑦ ᑲᖏᖅᑐᑦ, ᑲᖏᖅᑐᓪᓗᐊᓗᒥᖕ ᓴᕐᕙᓕᒻᒧᑦ (ᓄᓇᖑᐊᖅ 5). ᓇᓄᖃᖃᑦᑕᒻᒪᕆᑦᑐᖅ ᐅᐱᕐᖓᓵᒃᑯᑦ, ᐊᕐᓇᖏᑦ ᐊᑎᖅᑕᓛᖏᓪᓗ ᕿᒪᐃᒐᐃᒻᒪᑕ ᑎᓯᖏᓐᓂ ᐊᒻᒪᓗ ᓇᑦᑎᓯᐅᖅᑐᑎ ᓯᑯᒥ. ᐳᓚᕋᖅᑎᓄᑦ ᒪᑐᔭᐅᓂᖓ ᐃᓂᖓᓃᑦᑐᖅ ᐱᒋᐊᖅᑐᓂ ᒫᔅᓯ 1 ᑎᑭᑦᑐᒍ ᒪᐃ 31 ᐊᕐᕌᒍᑕᒫᑦ ᐃᑲᔪᕐᓗᓂ ᐳᓚᕋᖅᑏᑦ ᐊᑦᑕᓇᐃᖅᓯᒪᓂᖏᓐᓄᑦ ᐊᒻᒪᓗ ᐸᕕᓴᐃᓗᐊᔭᐃᑎᑦᑎᓂᕐᒧᑦ ᓇᓄᕐᓂᑦ ᑕᒪᑐᒪᓂᐅᑎᓪᓗᒍ ᐱᒻᒪᕆᐅᔪᒥᑦ ᖃᖓᒃᑰᓂᖓ.

ᓄᓇᖑᐊᖅ 5: ᐊᓯᖏᑦ ᑭᓪᓕᖃᖅᑎᑕᐅᔪᑦ ᐳᓚᕋᖅᑎᓄᑦ ᐊᒻᒪᓗ ᒪᑐᔭᐅᓂᐅᔪᑦ

ᓄᓇᖑᐊᖅ 5: ᐊᓯᖏᑦ ᑭᓪᓕᖃᖅᑎᑕᐅᔪᑦ ᐳᓚᕋᖅᑎᓄᑦ ᐊᒻᒪᓗ ᒪᑐᔭᐅᓂᐅᔪᑦ — ᑎᑎᕋᖅᓯᒪᓂᖏᑦ

ᑕᕝᕙᓂ ᓄᓇᓐᖑᐊᒥ ᐳᓚᕋᑏᑦ ᖃᓄᐃᓕᐅᑦᑕᐃᓕᒋᐊᓕᖏᑦ ᐊᒻᒪ ᒪᑐᓯᒪᕙᑦᑐᑦ ᑲᖏᖅᑐᖏᑦ ᐅᐊᓐᓇᖓᓂ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᓂ, ᐊᑯᓐᓂᖓᓂ ᓴᕐᕕᓕᐅᑉ ᐊᒻᒪ ᑲᖏᖅᑐᓪᓗᐊᓗᒃ.

ᐱᖓᓲᔪᕐᑐᑦ ᑲᖏᖅᑐᑦ ᕿᕐᓂᖅᑕᐅᓗᑎᖕ ᑎᑎᑯᑖᑦᓯᒪᔪᑦ ᓇᓗᓇᐃᕐᓯᔾᔪᑏᑦ ᒪᑐᓯᒪᕙᓐᓂᖏᑦ ᐳᓚᕋᑎᓄᑦ ᓇᓄᐃᑦ ᑎᓯᖏᓐᓃᑎᓪᓗᒋᑦ ᐊᑯᓐᓂᖓᓂ ᒫᔾᔨ 1 ᐊᒻᒪ ᒪᐃ 31. ᑖᒃᑯᓴᐃᓐᓇᑦ ᐱᖓᓲᔪᕐᑐᑦ ᑲᖏᖅᑐᑦ ᖃᑯᖅᑕᑦ ᑭᑉᐹᕆᑦᑐᑦ ᑎᑎᑯᑖᑦᓯᒪᒻᒥᔪᑦ ᓇᓗᓇᐃᒃᑯᑎᑦ ᐳᓚᕋᑏᑦ ᐊᐅᓪᓚᖃᑎᖃᕐᓯᒪᒋᐊᓖᑦ ᐃᓄᓐᓂᖕ ᐊᑎᖃᖃᑕᐅᔪᒥᑦ ᓄᓇᕗᑦ ᐊᖏᕈᑎᖓᓂ ᐊᐅᓚᐅᑎᓕᓐᓄᑦ ᐊᐅᓪᓚᕐᓯᒪᓂᖏᓐᓂ. ᐅᓂᒃᑳᖏᓐᓂ ᓇᓗᓇᐃᕐᓯᒪᔪᑦ ᑲᖏᖅᑐᒋᑦ ᐃᓄᒃᑎᑐᑦ ᐊᑎᖏᑎᒍᑦ ᐊᒻᒪ ᐃᓕᑕᕆᔭᐅᓯᒪᔪᑦ ᐊᑎᖏᑎᒍᑦ:

1. ᓴᕐᕙᓕᒃ
2. ᕿᑭᖅᑖᓗᔾᔪᐊᑉ ᑲᖏᖅᑐᕈᓗᒃ ᐅᖓᓪᓕᖅ
3. ᕿᑭᖅᑖᓗᔾᔪᐊᖅ ᑲᖏᖅᑐᕈᓗᒃ ᒥᔅᓯᖅᑎ
4. ᑭᑦᑐᕆᔭᐅᑉ ᑲᖏᖅᑐᐊᕐᔪᕈᓗᐊ
5. ᓇᓪᓗᑦᓯᐊᖅ ᐅᖓᓪᓕᖅ
6. ᑲᖏᖅᑐᓪᓗᐊᓗᒃ

ᓄᓇᓐᖑᐊᖅ ᐅᐊᓐᓇᒧᑦ ᓴᓐᖓᔪᖅ. ᓯᕕᑐᓂᖓ ᑐᑭᓕᐊᕐᑐᖅ (0-20 ᑭᓚᒦᑕᑦ) ᑎᑎᖅᓯᒪᔪᖅ ᖄᖓᓂ ᑕᓕᖅᐱᐊᓂ. ᒥᑭᔪᑯᓗᒃ ᑭᑉᐹᕆᑦᑐᖅ ᐊᑖᓂ ᑕᓕᖅᐱᐊᓂ ᓇᓗᓇᐃᖅᓯᓯᒪᔪᖅ ᐅᐊᓐᓇᖓᑕ ᑲᖏᖅᑐᖏᓐᓂᑦ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᑕ ᓯᓈᖓᓂᑦ ᐅᐊᓐᓇᖅᐸᓯᐊᓂ.

ᐅᓂᒃᑳᖏᑦ (ᑎᑎᕋᕐᓯᒪᓪᓗᑎᖕ ᓇᓗᓇᐃᕐᓯᓯᒪᔪᑦ)

• ᑐᖑᔪᖅᑐᖅ ᕿᕐᓂᖅᑕᓂᑦ ᑎᑎᑯᑖᑦᓯᒪᓪᓗᑎᑦ: ᐳᓚᕋᑎᓄᑦ ᐊᑦᑕᓇᕐᑎᓪᓗᒍ ᒪᑐᓯᒪᕙᑦᑐᖅ − ᓇᓄᐃᑦ ᑎᓯᒦᓐᓂᖏᓐᓂ (ᒫᔾᔨᒥᑦ−ᒪᐃᒧᑦ)
• ᑐᖑᔪᖅᑕᖅ ᖃᑯᖅᑕᓂᑦ ᑎᑎᑯᑖᑦᓯᒪᓪᓗᑎᖕ: ᐊᐅᓪᓚᖃᑎᖃᕆᐊᓖᑦ ᐃᓄᓐᓂᖕ (ᐊᐅᓚᐅᑎᓕᓐᓄᑦ ᐃᖏᕐᕋᓂᐊᕐᐸᑕ)
• ᐆᔭᐅᔭᖅ: ᒥᕐᖑᐃᓯᕐᕕᐅᑉ ᑭᓪᓕᖓ
• ᓯᐊᕐᓇᖅ: ᐃᓄᐃᑦ ᓄᓇᖁᑎᖏᑦ

ᐅᑎᕐᕕᒃ ᖁᓛᓄᑦ

 

---

8.0 ᐊᒃᓵᔫᑉ ᐊᖅᑯᑎᖓ ᐊᐅᓚᑕᐅᓂᖓᓄᑦ ᓇᒦᓐᓂᖓ

ᐊᒃᓵᔫᑉ ᐊᖅᑯᑎᖓ ᐃᑳᕐᓂᖃᖅᑐᖅ ᐸᓐᓂᖅᑑᖅ ᐃᑭᖓᓂ ᓄᓇᖓᒍᑦ ᓯᕕᑐᔪᒃᑯᑦ ᓇᖅᓴᒃᑯᑦ ᑭᓪᓕᒋᓪᓗᓂᒋᑦ ᐃᓐᓈᕈᐃᑦ. ᐊᒥᓱᓄᑦ ᐊᕐᕌᒍᓄᑦ ᑖᓐᓇ ᐊᖅᑯᑎᐅᔪᖅ ᑲᑎᑦᑎᑦᓯᒪᔪᑦ ᐃᓄᓐᓂᑦ ᓄᓇᖃᖅᑐᓂ ᓄᓇᓖᑦ ᐊᒻᒪᓗ, ᒫᓐᓇᕋᑖᖑᓯᒪᔪᒥᑦ, ᓄᓇᓕᐅᔪᑦ ᐸᓐᓂᖅᑑᖅ ᕿᑭᕐᑕᖅᔪᐊᒥᓗ. ᐊᑦᑎᖅᑕᐅᔾᔪᑎᒋᓯᒪᔭᖓ, ᐊᒃᓵᕐᔪᒃ, ᐊᓯᕙᖅᑎᓪᓚᕆᒥᓈᓗᒃ ᐊᕐᕙᓂᐊᕐᑎᐅᓪᓗᓂᓗ ᕿᑭᖅᑕᓂ (ᕿᑭᖅᑕᓐ), ᐃᖏᕐᕋᖃᑦᑕᓚᐅᕐᓯᒪᔪᖅ ᐊᖅᑯᑖᒍᑦ 1900ᖏᓐᓂ, ᑕᐃᑦᓱᒪᓂ ᐃᓄᓐᓄᑦ ᐊᑐᖅᑕᐅᒐᔪᓚᐅᓐᖏᑦᑐᖅ ᑎᓄᔾᔨᕕᐅᑉ ᓄᕗᐊᓄᑦ. ᐊᒥᓲᓂᕐᓴᑦ ᐃᓪᓕᓂᖓᓂᑦ ᐊᖅᑯᑎᖃᖅᐸᓕᓚᐅᕐᑐᑦ, ᐃᓚᒋᔭᐅᓪᓗᓂ ᐊᒃᓵᕐᔫᑉ ᐃᕐᓂᑦᓴᖓ, ᐃᑦᑐᐊᖓᑦ ᐊᒃᓵᕐᔪᒃ, ᐊᓯᕙᖅᑎᐅᓚᐅᖅᑐᖅ ᐊᒻᒪ ᐊᐅᓪᓚᖃᑦᑕᑎᒻᒪᕆᐅᓪᓗᓂ ᑕᒪᐅᓈᕋᔪᖃᑦᑕᓚᐅᖅᑐᖅ ᕿᒧᑦᓯᒃᑯᑦ. ᐊᑖᑕᑦᓴᖓᑕ ᐊᖅᑯᑎᒋᕙᑦᑕᒥᓂᖓᓂᑦ ᐃᓕᓐᖓᔭᒥᒍᑦ, ᐃᓄᓐᓂᑦ ᓄᓇᖏᓐᓂᑦ ᐊᐃᔅᓯᖃᑦᑕᕐᑐᓂ ᐸᓐᓂᖅᑑᒧᑦ ᐋᓐᓂᐊᕐᕕᓕᐊᕆᐊᓕᓐᓂᑦ. ᐊᐃᔅᓯᖃᑦᑕᖅᑐᓂ ᖃᓂᒋᔭᖏᓐᓂ ᐸᓐᓂᖅᑑᒧᑦ ᐋᓐᓂᐊᕕᓕᐊᕐᑐᑦᓴᓂᑦ. ᐃᑦᑐᐊᖓᑦ ᐊᒃᓵᕐᔪᒃ ᐱᔾᔪᓯᐊᖅᑎᑕᐅᓚᐅᖅᑐᖅ ᖁᓯᓂᕐᐹᒥᑦ ᐃᓕᓴᕆᔭᐅᓂᕐᒧᑦ ᑲᓇᑕᒥ 1995−ᒥ. ᐃᓄᐃᑦ ᓱᓕ ᐊᑐᖃᑦᑕᖅᑕᖓ ᐊᖅᑯᑎᖓ, ᐅᑭᐅᒃᑰᓗᐊᖅᑐᖅ ᐊᒻᒪᓗ ᐅᐱᕐᖓᓵᒃᑯᑦ ᐊᐅᓪᓚᖅᑐᓄᑦ ᐊᑯᓐᓂᖏᓐᓂ ᓄᓇᓕᓐᓂᑦ.

ᑖᓐᓇ 98 ᑭᓚᒦᑕᐃᑦ ᐊᖅᑯᑎᖓ ᐅᐸᑦᑕᐅᕙᑦᑐᖅ ᐊᑕᖏᐸᓗᑦᑐᓄᑦ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒻᒧᑦ ᐳᓚᕋᖅᑎᓄᑦ, ᐊᒥᓲᓂᖅᓴᐃᑦ ᐱᓱᖃᑦᑕᖅᑐᑦ, ᓯᐊᕐᕆᔮᖅᑐᑦ, ᐅᕝᕙᓘᓐᓃᑦ ᐃᓐᓈᕈᖅᓯᐅᖅᑐᑦ. ᐃᓄᐃᑦ ᐊᐅᓪᓚᕈᔾᔨᔩᑦ ᐅᓯᕙᑦᑐᑦ ᓄᕗᑯᑖᖏᓐᓄᑦ ᐸᓐᓂᖅᑑᕈᓘᑉ ᐊᒻᒪᓗ ᐸᓐᓂᖅᑑᑉ ᑲᖏᖅᑐᖓᓄᑦ. ᓇᓗᓇᐃᒃᑯᑎᖃᓐᖏᑦᑑᒐᓗᐊᖕ, ᐊᖅᑯᑖ ᑰᒐᓚᑦᑐᓂ ᑭᐳᑦᑕᖅᑐᓂᑦ ᐊᒻᒪᓗ ᓇᖅᓵᓗᒃᑯᑦ. ᖁᓕᐅᓐᖏᒑᖅᑐᑦ ᑐᐊᕕᕐᓇᖅᑐᓄᑦ ᐃᓪᓗᕋᓛᑦ ᐊᒻᒪᓗ ᐊᓇᕐᕖᑦ ᐅᖓᓯᒌᓐᓂᖃᖅᑐᑦ 10 ᑭᓚᒦᑕᓂᑦ, ᐊᒻᒪᓗ ᑐᐊᕕᕐᓇᖅᑐᓄᑦ ᐱᕈᔭᐅᓯᒪᔪᑦ ᖃᓂᒋᔭᖏᓐᓃᑦᑐᑦ ᐃᒪᒃᑯᑦ ᐃᑳᕐᕕᖏᓐᓂ. ᐊᖅᑯᑖᒍᑦ ᐳᓛᕆᐊᕐᓯᒪᔪᑦ ᑕᑯᓂᐊᖅᑐᑦ ᑲᔾᔮᓇᓛᖑᖃᑕᐅᔪᒥᑦ ᓯᓚᕐᔪᐊᒥ ᐃᖏᕐᕋᓪᓗᑎᖕ ᐱᐅᓯᑐᖃᒃᑯᑦ ᑐᓪᓕᓂᑐᖄᓗᒃᑯᑦ ᐊᔾᔨᒌᖏᑦᑐᕈᓘᔭᓂᓪᓗ ᐅᑭᐅᖅᑕᖅᑑᑉ ᓄᓇᑯᓗᐊᓂᑦ ᐊᕙᓗᐊᓃᑦᑐᓂᑦ ᐆᒪᔪᕐᓂᓪᓗ, ᑲᖏᖅᑐᑦ ᓯᓈᖓᓂᑦ ᐊᒻᒪᓗ ᒪᓂᕋᒃᑯᑦ ᓄᓇᒃᑰᓚᐅᕐᑐᑎᖕ ᓯᕐᖕᒥᒃᑰᓕᖅᐸᑦᑐᑦ ᐊᒻᒪᓗ ᐃᓐᓈᕈᐊᓗᒃᑯᑦ, ᐊᒃᓵᖅᔫᑉ ᐊᖅᑯᑕ ᑕᐃᒪᙵᑐᖄᓗᖕ ᒫᓐᓇᒧᓪᓗ ᖃᐅᔨᓴᕐᑎᒻᒪᕆᓐᓄᑦ ᖃᐅᔨᓴᖅᕕᐅᔪᖅ, ᖃᐅᔨᓴᓗᐊᙳᐊᕐᑐᑦ ᓯᕐᖕᒥᓂᑦ ᓄᓇᖓᓂᓪᓗ.

ᑭᓪᓕᖓ III ᓇᓗᓇᐃᖅᑕᐅᓂᖓ ᐊᒃᓵᔫᑉ ᐊᖅᑯᑎᖓ ᐊᐅᓚᑦᑎᓂᕐᒧᑦ ᓇᒦᓐᓂᖓ (ᓄᓇᖑᐊᖅ 6) ᑕᑯᔅᓴᐅᑎᑦᑎᔪᑦ ᓇᒦᓐᓂᖓᓄ ᐱᕕᔅᓴᐅᔪᓐᓇᖅᑐᓂᑦ ᐊᑦᑐᐃᓂᖃᓗᐊᖏᑦᑐᓄᑦ ᐱᓐᖑᐊᑐᐃᓐᓇᓂᕐᒧᑦ, ᐱᓕᕆᕕᖃᖅᑐᓂ ᐃᑲᔪᖅᑐᓂ ᐃᓄᓐᓂᑦ ᐊᑦᑕᓇᐃᖅᓯᒪᑎᑦᑎᓂᕐᒧᑦ. ᐳᓚᕋᖅᑏᑦᑕ ᐱᖃᑦᑕᖅᑐᑦ ᐊᒥᓱᓂᒃ ᐅᓪᓗᓂᑦ ᐊᐅᓪᓚᕐᓂᐅᔪᓄᑦ ᐊᖅᑯᑎᖓᓂ, ᓇᓪᓕᐊᓐᓂᑐᐃᓐᓇᖅ ᓂᕈᐊᕐᓂᖅ ᐃᒻᒥᓂ ᐃᑲᔪᕐᓗᓂ ᐅᕝᕙᓘᓐᓃᑦ ᐃᓚᒋᔭᐅᓗᓂ ᑐᑭᒧᐊᕈᑎᓕᓐᓂ ᑲᑎᓐᖓᔪᓂ. 2014−ᒥᓂᑦ, ᐸᓐᓂᖅᑑᒦᑦᑐᖅ ᐊᐅᓪᓚᕈᔾᔨᔨ ᐊᐅᓚᓂᖃᖅᑎᑦᑎᓯᒪᔪᖅ ᐅᓪᓘᓐᓂ ᒪᕐᕉᓂᒃ ᐊᐅᓪᓚᖅᓯᒪᓂᐅᔪᓂᑦ ᐱᓕᕆᖃᑎᖃᖅᑎᒋᓪᓗᒋᑦ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ, ᐊᐅᓪᓚᓂᕐᒧᑦ ᒥᕐᖑᐃᓯᕐᕕᒻᒧᑦ ᐅᐸᔅᓴᐅᓂᖓᓄᑦ ᐊᒥᓱᒃᑲᓂᕐᓄᑦ ᐃᓄᓐᓄᑦ.

ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓄᓇᖓ ᓱᕋᑦᑎᕈᓘᔭᖅᓯᒪᕙᑦᑐᖅ ᐊᒃᓵᖅᔪᒃ ᐊᖅᑯᑖᒍᑦ, ᐱᓗᐊᕈᑕᐅᓪᓗᓂ ᓯᓚᐅᑉ ᐊᓯᔾᔨᖅᑕᖅᑐᒻᒪᕆᐅᓂᖓᓄᑦ ᓯᓚᕈᔫᓂᖅᓴᐅᕙᓐᓂᖓᓗ. ᓴᖑᑎᑦᑎᓪᓗᓂ ᖃᖓᒃᑰᓂᖓ ᖁᐊᖃᑦᑕᕐᓂᖓ ᐊᐅᖃᑦᑕᕐᓂᖓ ᓯᑯᖓ, ᓄᖑᑉᐸᓕᐊᓂᖅ ᐊᒻᒪᓗ ᐅᔭᖅᑲᐃᑦ ᑎᓲᖅᑐᑦ, ᖄᒥᖃᑦᑕᖅᑐᑦ, ᓱᒃᑲᓕᒋᐊᖅᓯᒪᔪᓂᑦ ᐊᐅᔪᐃᑦᑐᑦ ᐊᐅᖃᑦᑕᕐᓂᖏᑦ ᐊᒻᒪᓗ ᓄᓇᖓ ᒪᑭᑕᑦᑎᐊᖏᓐᓂᖓᓄᑦ ᐊᑦᑐᐃᓂᖃᖅᓯᒪᔪᑦ ᐊᖅᑯᑎᖓᓂ ᐊᕐᕌᒎᕋᑖᖅᓯᒪᔪᓂᑦ.

ᐊᒃᓵᔫᑉ ᐊᖅᑯᑎᖓ ᐊᐅᓚᑦᑎᕕᖓ ᓂᕆᐅᓇᕐᑐᖅ ᐊᖅᑯᑕᐅᓂᖅᐹᖑᖃᑦᑕᓂᐊᕐᑐᖅ ᒥᕐᖑᐃᓯᕐᕕᓕᐊᖅᑐᓄᑦ ᓯᕗᓂᑦᑎᓐᓂ, ᐊᒻᒪᓗ ᑐᕌᒐᑦᓴᑦ ᐅᓇᓂ ᑎᑎᕋᕐᓯᒪᔪᑦ ᖃᓄᖅᑑᖅᓯᒪᔪᑦ ᐊᐅᓚᑦᑎᓂᖕᒧᑦ ᐊᑲᐅᓪᓕᐅᕈᑎᑕᖃᖅᐸᑦ ᐱᓪᓗᒍ ᐊᔾᔨᐅᖏᓐᓂᖓ ᐊᐅᔪᐃᑦᑑᒻ.

ᑐᕌᒐᖓ 1

ᑐᑭᓯᒋᐊᕈᑏᑦ ᐊᒻᒪᓗ ᑭᓱᓕᕆᔾᔪᑏᑦ ᐃᑲᔪᕐᓗᑎ ᐊᑦᑕᓇᐃᖅᓯᒪᓂᕐᒥᑦ, ᒪᓕᓐᓂᖃᖅᑐᓂᑦ ᐊᐅᓪᓚᓂᕐᒧᑦ ᐊᒃᓵᔫᑉ ᐊᖅᑯᑎᖓᒍᑦ ᐊᑐᐃᓐᓇᐅᔪᑦ ᒥᕐᖑᐃᓯᕐᕕᒻᒥᑦ ᐊᑐᖃᑦᑕᖅᑐᓕᒫᓄᑦ.

• 1.1: ᓇᐅᑦᑎᖅᑐᕐᓂᖅ ᐊᒻᒪᓗ ᐊᑦᓱᔾᔫᒥᐅᒍᑎᑦᓴᑦ ᖃᓄᖅᑑᕈᑕᐅᓯᒪᔪᑦ ᐋᖅᑭᑦᓱᖅᑕᐅᓯᒪᔪᑦ, ᐊᑐᖅᑐᑎᖕ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᐊᒻᒪᓗ ᖃᓪᓗᓈᑦ ᖃᐅᔨᓴᕈᓯᖏᓐᓂᑦ, ᐊᑐᖅᑕᐅᖃᑦᑕᓂᐊᕐᑐᓂᑦ ᓄᓇᐅᑉ ᐊᓯᔾᔨᖅᐸᓪᓕᐊᓪᓚᕆᓐᓂᖓᓄᑦ ᑎᓲᖅᑐᓄᑦ ᐊᒃᓵᕐᔫᑉ ᐊᖅᑯᑖᒍᑦ.
• 1.2: ᒫᓐᓇᐅᔪᒥ ᑐᐊᕕᕐᓇᖅᑐᓄᑦ ᐃᓪᓗᕋᓛᑦ, ᐊᓇᕐᕖᑦ, ᐊᒻᒪ ᐃᖅᑲᓇᐃᔭᖅᑏᑦ ᐃᓪᓗᕋᓛᖏᑦ ᓇᐅᑦᑎᖅᓱᖅᑕᐅᕙᑦᑐᑦ ᓱᕋᑉᐸᓪᓕᐊᖏᒃᑲᓗᐊᕐᒪᖔᑕ ᓯᓚᐅᑉ ᐊᓯᔾᔨᕐᐸᓪᓕᐊᓂᖓᓄᑦ ᐊᒻᒪ, ᐊᔪᕐᓇᓐᖏᒐᐃᑉᐸᑦ, ᓴᓇᔭᐅᕙᑦᑐᑦ ᐅᕝᕙᓘᓐᓃᑦ ᐋᖅᑭᒋᐊᕐᑕᐅᔪᒥᓃᑦ ᐱᐅᓂᕐᓴᒻᒪᕆᐅᓕᕐᐸᑦᑐᑦ 2019ᒥ ᖃᓄᐃᓐᓂᕆᓚᐅᕐᑕᖓᓂᑦ ᒥᕐᖑᐃᓯᕐᕕᒃᑯᓐᓄᑦ ᖃᐅᔨᓴᕐᑕᐅᒻᒪᑕ.
• 1.3: ᐊᖅᑯᑕᐅᓗᓂ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑕ ᐸᕐᓇᐅᑎᖏᑦ ᐊᑐᕐᓂᐊᖅᐸᑕ ᐊᒡᒍᕐᓯᒪᔪᓂᑦ ᖃᖓᑕᓲᓂᑦ ᖁᓛᒎᓕᓐᓂᑦ ᐊᒻᒪᓗᑦᑕᐅᖅ ᐊᓯᖏᑦ ᒐᕙᒪᒃᑯᑦ ᐱᓕᕆᕝᕕᖏᑦ, ᖃᖓᑕᖑᓐᓇᕐᑐᓕᒫᑦ ᒪᓕᑦᑕᕆᐊᖃᕐᑐᑦ ᑲᓇᑕᒥ ᒥᕐᖑᐃᓯᕐᕖᑦ ᐱᖁᔭᖓᓂᑦ ᐊᒻᒪᓗ ᑲᓇᑕᐅᑉ ᐃᖏᕐᕋᔪᓕᕆᔨᖏᑕ ᐊᑦᑕᓇᕐᔭᐃᓂᖕᒧᑦ ᐱᖁᔭᖏᓐᓂᑦ.

ᑐᕌᒐᖓ 2

ᐊᒃᓵᔫᑉ ᐊᖅᑯᑎᖓ ᐃᖅᑲᐅᒪᓇᖅᑐᓂᑦ ᐊᑐᕐᓂᖃᖅᑎᑦᑎᔪᖅ ᐊᒻᒪᓗ ᖃᐅᔨᒃᑲᓐᓂᕋᔅᓴᖃᖅᑎᑎᑦᑐᓂ ᐊᖅᑯᑎᖓᓂ ᐃᓄᓐᓄᑦ ᐱᖅᑯᓯᑐᖃᖏᓐᓂ.

• 2.1: ᐃᓄᐃᑦ ᐱᖅᑯᓯᑐᖃᖏᑦ ᐊᒃᓵᔫᑉ ᐊᖅᑯᑎᖓᓄ, ᐱᖃᓯᐅᑎᓪᓗᑎ ᐱᖅᑯᓯᑐᖃᖓ ᐊᒻᒪᓗ ᐱᒻᒪᕆᐅᓂᖓ ᐃᓄᓐᓄᑦ ᓄᓇᐃᑦ ᐊᑎᖏᑦ, ᑕᑯᔅᓴᐅᑎᑕᐅᔪᑦ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᓱᓇᒃᑯᑖᖏᑎᒍᑦ.
• 2.2: ᐊᕐᕌᒍ ᐃᓗᐊᓂ ᐅᓪᓗᐃᓐᓇᖅ ᐊᐅᓪᓚᓂᕐᒧᑦ ᐱᕕᔅᓴᐅᔪᓐᓇᖅᑐᑦ ᑖᔅᓱᒧᖓ ᐱᐅᒋᔭᐅᓛᖑᔪᖅ ᐃᓚᖓ ᒥᕐᖑᐃᓯᕐᕕᒻᒥ ᐱᑕᖃᖅᑎᑕᐅᖏᓐᓇᖅᑐᖅ ᐊᒻᒪᓗ ᓴᖅᑭᔮᖅᑎᑕᐅᓪᓗᓂ.
• 2.3: ᐊᐅᓪᓚᕈᔾᔨᔩᑦ ᐃᑲᔪᖅᑐᑦ ᐳᓚᕋᖅᑎᓂᑦ ᐊᒻᒪᓗ ᐃᖅᑲᓇᐃᔭᖅᑎᓂᑦ ᐅᐸᑦᑕᐅᓪᓗᓂ ᐊᖅᑯᑎᖓ, ᐊᒻᒪᓗ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᑲᔪᓯᑎᑦᑎᔪᑦ ᐃᑲᔪᖅᑐᑎ ᐱᓕᕆᖃᑎᒌᓐᓂᐅᔪᓂᑦ ᑖᒃᑯᓂᖓ ᐱᔨᑦᑎᕋᐅᑎᖃᖅᑎᑦᑎᔪᓄᑦ.

ᓄᓇᖑᐊᖅ 6: ᐊᒃᓵᔫᑉ ᐊᖅᑯᑎᖓ ᐊᐅᓚᑦᑎᓂᕐᒧᑦ ᓇᒦᓐᓂᖓ

ᓄᓇᖑᐊᖅ 6: ᐊᒃᓵᔫᑉ ᐊᖅᑯᑎᖓ ᐊᐅᓚᑦᑎᓂᕐᒧᑦ ᓇᒦᓐᓂᖓ — ᑎᑎᕋᖅᓯᒪᓂᖏᑦ

ᓄᓇᓐᖑᐊᖓ ᐊᒃᓵᕐᔫᑉ ᐊᖅᑯᑖᑕ ᐊᐅᔪᐃᑦᑑᑉ ᒥᕐᖑᐃᓯᕐᕕᖓᑕ ᓂᒋᐊᓃᑦᑐᖅ. ᐊᖅᑯᑖ ᓴᓂᒧᑦ 2.7 ᑭᓚᒦᑕᐅᓪᓗᓂ, 100 ᑭᓚᒦᑕᑦ ᓯᕕᑐᓂᖓ ᐊᖅᑯᑖ ᑖᕐᓂᖅᓴᒥᖕ ᐆᔭᐅᔭᒥᑦ ᐊᒥᐊᓕᒃ. ᐱᖃᓯᐅᔾᔨᓯᒪᔪᖅ ᐸᓐᓂᖅᑑᕈᓘᑉ ᑰᖓᑕ ᓇᖅᓴᖓ ᐅᐊᓐᓇᖅᐸᓯᐊᒍᑦ, ᑕᓯᕈᓗᒃ ᕿᑎᐊᒍᑦ, ᐊᒻᒪ ᐸᓐᓂᖅᑑᑉ ᕿᓐᖑᐊᑕ ᓇᖅᓴᖓ ᓂᒋᐊᓂ. ᐃᖏᕐᕋᕕᐅᕙᑦᑐᑦ ᐊᒃᓵᕐᔫᑉ ᐊᖅᑯᑖᒍᑦ ᓇᓗᓇᐃᕐᓯᒪᔪᑦ ᑲᔪᕐᒥᖕ ᑎᑎᑯᑖᑦᓯᒪᓪᓗᑎᖕ.

ᑎᓴᒪᐅᔪᕐᖏᕋᕐᑐᓂᑦ ᐊᑕᐅᓯᕐᒥᓪᓗ ᐃᓪᓗᕋᓛᖃᐅᖅᑐᖅ ᑐᐊᕕᕐᓇᕐᓯᑉᐸᑦ ᑕᒻᒫᕐᕕᓂᑦ ᐊᒃᓵᕐᔫᑉ ᐊᖅᑯᑖᒍᑦ, ᐅᖓᓯᒌᓐᓂᖏᑦ 10 ᑭᓚᒦᑕᐅᓪᓗᑎᖕ (ᐅᐊᓐᓇᖓᓂᑦ ᓂᒋᐊᓄᑦ): ᐸᓐᓂᖅᑑᕈᓘᑉ ᕿᓐᖑᐊᓂ, ᑐᓄᓲᑉ ᐊᑖᓂ, ᑕᓯᕈᓗᒃ ᐊᑖᓂ, ᑕᓯᕈᓗᒃᒥ, ᓴᖑᖓᓂᕐᒥ, ᐊᖅᑯᓪᓘᑎᐅᑉ ᐊᑖᓂ, ᐅᓗᒥ, ᐊᒻᒪ ᐸᓐᓂᖅᑑᑉ ᕿᙳᐊᓂ - ᓴᖑᖓᓂᖅᒥ. ᐃᖅᑲᓇᐃᔭᖅᑏᑦ ᐃᓪᓗᕋᓛᖏᑦ ᑕᓯᕈᓗᖕᒥ ᐊᒻᒪ ᐊᖅᑯᓪᓘᑎᐅᑉ ᐊᑖᓂ. ᓇᓗᓇᐃᖅᓯᒪᒻᒥᔪᑦ ᐱᖓᓲᓕᖓᔪᑦ ᖃᖅᑳᓗᐃᑦ ᖃᓂᒋᔮᓃᑦᑐᑦ (ᐅᐊᓐᓇᖓᓂᑦ ᓂᒋᐊᓄᑦ): ᐃᓐᓇᑦᑎᐊᕚᓗᒃ, ᖃᑦᑕᐅᔭᓐᖑᐊᖅ ᐊᒻᒪ ᖃᐃᖅᓱᐊᓗᒃ.

ᐊᓯᖏᑦ ᐃᓗᐊᓃᑦᑐᑦ ᒥᕐᖑᐃᓯᕐᕕᐅᑉ ᑭᓪᓕᖓᑕ ᓇᓗᓇᐃᕐᓯᒪᔪᑦ ᐆᔭᐅᔭᐅᓪᓗᓂ ᖃᐅᒪᓂᖅᓴᖅ (ᓄᓇ) ᐊᒻᒪ ᑐᖑᔪᖅᑐᑦ ᑖᕐᓂᓴᑦ (ᐃᒪᖃᐅᕐᓂᖏᑦ). ᖃᖅᑲᖏᑦ ᑖᕐᓂᖅᓴᐅᓪᓗᑎᖕ, ᓯᕐᖕᒦᑦ, ᐃᒪᖃᐅᕐᓂᖏᓪᓗ. ᐅᑭᐅᖅᑕᖅᑑᑉ ᑭᓪᓕᖓᑕ ᓇᓗᓇᐃᒃᑯᑎᖓ ᑎᑎᑯᑖᑦᓯᒪᔪᖅ ᓄᓇᓐᖑᐊᑉ ᐊᑖᓂ, ᐅᐊᓐᓇᖅᐸᓯᐊᓂ ᓴᖑᖓᓂᖅ ᑕᒻᒫᕐᕕᖓᓂ.

ᓄᓇᓐᖑᐊᖅ ᐅᐊᓐᓇᖓᓄᑦ ᓵᓐᖓᔪᖅ. ᓯᕕᑐᓂᖓ ᑐᑭᓕᐊᕐᑐᖅ (0-10 ᑭᓚᒦᑕᑦ) ᑎᑎᖅᓯᒪᔪᖅ ᐊᑖᓂ ᑕᓕᖅᐱᐊᓂ.

ᐅᓂᒃᑳᖏᑦ (ᑎᑎᕋᕐᓯᒪᓪᓗᑎᖕ ᓇᓗᓇᐃᕐᓯᓯᒪᔪᑦ):

• ᐃᓪᓗᕋᓛᓐᖑᐊᑦ ᓇᓗᓇᐃᒃᑯᑎᖏᑦ: ᑐᐊᕕᕐᓇᖅᑐᖃᕐᑎᓪᓗᒍ ᐃᓪᓗᕋᓛᑦ
• ᐃᓪᓗᕋᓛᓐᖑᐊᑦ ᐃᓄᓐᖑᐊᓪᓗ ᓇᓗᓇᐃᒃᑯᑎᖏᑦ: ᐃᖅᑲᓇᐃᔭᖅᑏᑦ ᐃᓪᓗᕋᓛᖏᑦ
• ᑲᔪᑦ ᓴᓂᒧᑦ ᑎᑎᖅᓯᒪᔪᑦ: ᐊᖅᑯᑏᑦ
• ᐆᔭᐅᔭᖅ ᖃᐅᒪᓂᖅᓴᖅ: ᑭᓪᓕᖓ II – ᐆᒪᔪᖃᐅᕐᓂᖓ ᓄᓇᑐᐃᓐᓇᖅ
• ᐆᔭᐅᔭᖅ ᑖᕐᓂᖅᓴᖅ: ᑭᓪᓕᖓ III – ᐊᕙᑎᐊᓃᑦᑐᑦ ᓱᕐᕋᓐᓂᐅᖏᑦᑐᑦ (ᓄᓇ)
• ᑐᖑᔪᖅᑕᖅ: ᑭᓪᓕᖓ III – ᐊᕙᑎᐊᓃᑦᑐᑦ ᓱᕐᕋᓐᓂᐅᖏᑦᑐᑦ (ᐃᒪᖅ)

9.0 ᓇᓗᓇᐃᔭᖅᓯᒪᓂᖏᑦ ᑎᑎᕋᖅᑕᐅᒋᐊᓐᖓᖅᓯᒪᔪᑦ ᐊᑐᖅᑕᐅᓂᐊᖅᑐᓂᑦ ᐊᕙᑎᓕᕆᓂᕐᒧᑦ ᖃᐅᔨᓴᓂᕐᒥᑦ

ᐊᑕᖏᖅᑐᑎ ᑲᓇᑕᒥ ᒥᕐᖑᐃᓯᕐᕕᒻᒥ ᐊᐅᓚᑦᑎᓂᕐᒧᑦ ᐸᕐᓇᐅᑏᑦ ᖃᐅᔨᓴᖅᑕᐅᔪᑦ ᐊᑐᖅᑕᐅᓂᐊᖅᑐᓂ ᐊᕙᑎᓕᕆᓂᕐᒧᑦ ᖃᐅᔨᓴᕐᓂᒃᑯᑦ ᓇᓗᓇᐃᕐᓗᒍ ᑲᑎᖅᓱᐸᓪᓕᐊᔪᓂᑦ ᐊᑦᑐᖅᑕᐅᔪᓂᑦ ᐊᐅᓚᑦᑎᓂᕐᒧᑦ ᖃᓄᐃᒍᑕᐅᔪᓂᑦ ᐊᒻᒪᓗᑦᑕᐅᖅ ᐊᓯᖏᓐᓂ ᐱᔾᔪᑎᖃᖅᑎᑦᑎᔪᓂᑦ. ᑖᓐᓇ ᑐᑭᓯᔭᐅᓂᖓ ᐃᑲᔪᕐᓂᖃᖅᑐᖅ ᖃᐅᔨᔭᐅᓯᒪᔪᓂᑦ ᑐᓐᖓᓂᖃᖅᑐᑦ ᐃᓱᒪᓕᐅᓂᕐᒧᑦ ᐃᑲᔪᖅᑐᓂᑦ ᐊᕙᑎᖓᓂ ᐊᑕᐅᓯᐅᓂᖓᓄᑦ ᒪᑭᒪᑎᑕᐅᔪᖅ ᐅᕝᕙᓘᓐᓃᑦ ᐅᑎᖅᑎᑕᐅᓯᒪᔪᖅ ᐊᑐᕈᓐᓇᕐᓂᓕᒫᖓᓂᑦ ᐸᕐᓇᐅᑎᑦ.

ᒥᕐᖑᐃᓯᕐᕕᐅᑉ ᐸᕐᓇᐃᔨᖏᑦ ᐊᒻᒪᓗ ᑲᑐᔾᔨᓂᒃᑯᑦ ᒥᕐᖑᐃᓯᕐᕖᑦ ᐸᕐᓇᐃᔨᖏᓐᓄᑦ ᐊᒻᒪᓗ ᐊᐅᓚᑦᑎᓂᖕᒧᑦ ᑲᑎᒪᔨᕋᓛᑦ ᐅᖃᖃᑎᒌᓚᐅᕐᓯᒪᔪᑦ ᐃᓱᒪᖅᓴᖅᓯᐅᕈᑎᑦᓴᓂᑦ ᐊᕙᑎᐅᑉ ᖃᐅᔨᓴᕐᑕᐅᓂᖓᓄᑦ ᐸᕐᓇᐅᑎᑦᓴᓂᑦ ᐊᕐᕌᒍᖓᓂ 2024. ᑲᑎᒪᖃᑎᒋᔭᐅᓪᓗᑎᖕ ᑲᑐᔾᔨᖃᑎᒌᑦ ᐸᓐᓂᖅᑑᒥ ᕿᑭᖅᑕᕐᔪᐊᒥᓗ ᑕᕝᕙᓂᑦᓴᐃᓐᓇᖅ ᐊᕐᕌᒍᖓᓂ ᐱᓪᓗᐊᑕᐅᓂᖏᓐᓂᑦ ᓇᓗᓴᐃᕐᓯᓚᐅᖅᑐᑦ ᓄᓇᓖᑦ ᐅᔾᔨᕆᓯᒪᔭᖏᓐᓂᑦ ᐱᓐᓇᕆᔭᐅᔪᑦ ᐃᓚᓕᐅᔾᔭᐅᓯᒪᒋᐊᖃᕐᓂᖏᑦ (ᐱᒻᒪᕆᐅᓛᖑᔪᑦ ᐃᓱᒪᒋᔭᐅᔪᑦ ᐊᕙᑎᖓᓂ ᒥᕐᖑᐃᓯᕐᕕᒻᒥ) ᐊᒻᒪᓗ ᐊᔾᔨᒌᖏᑦᑐᑦ ᐊᔅᓱᕈᕈᑎᖃᖅᑎᑦᑎᔪᑦ. ᑐᓴᒃᑲᓐᓂᖃᑦᑕᖅᑐᑕ ᑲᑎᒪᒋᐊᖃᓕᕋᐃᒐᑦᑕ ᑲᑎᒪᓪᓗᑕ ᐊᒻᒪᑦᑕᐅᖅ ᓄᓇᖃᖅᑐᑦ ᐅᖃᖃᑎᒋᕙᑦᑐᒋᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑕ ᐃᖅᑲᓇᐃᔭᖅᑎᖏᑦ ᐃᓚᓕᐅᑎᓯᒪᒻᒥᔪᑦ ᖃᐅᔨᓴᕐᑕᑦᑕ ᐱᕙᓪᓕᐊᓂᖓᓄᑦ.

ᐊᑦᑐᖅᑕᐅᔪᓂᑦ ᓴᖅᑭᖅᑎᑕᐅᔪᑦ ᐅᖃᖃᑎᒌᑦᑎᓪᓗᒋᑦ ᐊᒻᒪᓗ ᑲᑎᒪᖃᑎᖃᓂᕐᒧᑦ ᐱᖃᓯᐅᔾᔨᓚᐅᖅᑐᑦ ᓯᓚᖓ ᐊᓯᔾᔨᕐᓂᖓ, ᐱᓕᕆᔭᐅᔪᑦ ᐊᒻᒪᓗ ᐱᕙᓪᓕᐊᑎᑕᐅᔪᑦ ᓯᓚᑖᓂ ᒥᕐᖑᓯᕐᕕᒻᒧᑦ ᑭᓪᓕᖓᓂ, ᐊᒻᒪᓗ ᐃᒪᒃᑯᑦ ᐅᒥᐊᑦ ᐃᓗᐊᓂ ᖃᓂᒋᔭᖓᓂᓗ ᒥᕐᖑᐃᓯᕐᕕᐅᑉ ᑲᖏᖅᑐᖓᓂ. ᐃᓄᐃᑦ ᓇᓗᓇᐃᖅᓯᓚᐅᖅᑐᑦ ᐊᒥᓱᒐᓚᓐᓂᑦ ᐱᒻᒪᕆᔭᐅᔪᓂᑦ ᐃᓗᓕᖏᓐᓂ ᐃᓗᐊᓂ ᐊᐅᔪᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ, ᓲᕐᓗ ᐅᑭᐅᑕᖅᑐᒥ ᐆᒪᔪᐃᑦ (ᐱᖃᓯᐅᑎᓪᓗᑎ ᐃᖃᓗᐃᑦ, ᑎᒻᒥᐊᑦ, ᐊᒻᒪᓗ ᑐᑦᑐᐃᑦ) ᐊᒻᒪᓗᑦᑕᐅᖅ ᐃᓄᐃᑦ ᐱᖅᑯᓯᖏᓐᓄᑦ ᐊᑐᖅᑕᐅᓂᖓ ᓲᕐᓗ ᐊᐅᓪᓚᓂᕐᒧᑦ ᐊᖑᓇᓱᓐᓂᕐᒧᓪᓗ.

ᓯᓚᖓ ᐊᓯᔾᔨᕐᓂᖓ ᓂᕆᐅᒋᔭᐅᔪᖅ ᐊᑦᑐᐃᓂᖃᖅᔪᑎᓪᓗᐊᑕᐅᓂᐊᖅᑐᓂ ᒥᕐᖑᐃᓯᕐᕕᒻᒥ ᖁᓕᐅᓂᐊᖅᑐᓂᑦ ᐊᕐᕌᒍᓂᑦ ᐊᒡᒋᖅᑐᓂᑦ. ᖃᓄᖅᑑᕈᑕᐅᕙᑦᑐᑦ ᓯᓚᐅᑉ ᐊᓯᔾᔨᕐᐸᓪᓕᐊᓂᖓᓄᑦ ᐊᑑᑎᖃᓪᓗᐊᑕᕐᓂᐊᕐᖓᑕ ᖃᐅᔨᓴᕐᑕᐅᓂᖏᓐᓂ ᐱᔭᑦᓴᑦ ᐊᒻᒪ ᖃᓄᐃᓕᐅᕆᐊᓖᑦ ᒥᕐᖑᐃᓯᕐᕕᐅᑉ ᐃᓗᐊᓂ, ᐊᒻᒪᓗ ᓯᕗᓂᐊᒍᑦ ᖃᐅᔨᒪᓇᓱᓐᓂᖅ ᐊᑐᖅᑕᐅᓂᖓ ᐱᓕᕆᐊᖑᓂᐊᖅᑐᖅ ᐱᒻᒪᕆᒋᔭᐅᔪᓄᑦ ᐃᓗᓕᖏᓐᓄᑦ ᐊᑐᖅᑕᐅᓯᒪᔭᕇᖅᑐᓄᑦ ᓯᓚᖓᓄ ᐊᓯᔾᔨᕐᓂᖓᓄᑦ.

ᐊᐅᓚᑦᑎᓂᕐᒧᑦ ᐸᕐᓇᐅᑦ ᑐᕌᖅᑕᖏᑦ ᐱᐅᓯᑎᒋᐊᖅᑕᐅᓗᑎ ᑐᑭᓯᔭᐅᓂᖏᓐᓄᑦ ᐊᓯᔾᔨᖅᑐᑦ ᐱᒻᒪᕆᒋᔭᐅᔪᓄᑦ ᐃᓗᓕᖏᓐᓄᑦ, ᐱᖃᓯᐅᑎᓪᓗᑎ ᑲᔪᓯᑎᑕᐅᔪᒃᑯᑦ ᐊᕙᑎᖓ ᐊᑕᐅᓯᐅᓂᖓᓄᑦ ᖃᐅᔨᓴᖃᑦᑕᓂᕐᒥᑦ, ᐱᓕᕆᐊᑦ ᑐᑭᒧᐊᖅᑎᑕᐅᔪᑦ ᓯᕗᓕᕐᑎᖃᕐᑐᑎᖕ ᐃᓄᐃᑦ ᖃᐅᔨᒪᔨᑕᑦ ᑲᑎᒪᔨᕋᓛᖏᓂᑦ ᖃᓄᖅᑑᕈᑎᖃᕐᓂᐊᕐᑐᑦ ᐃᓄᐃᑦ ᓯᕗᓪᓕᐅᔾᔭᐅᖁᔭᖏᓐᓂᑦ, ᐊᒻᒪᓗ ᐃᓱᒪᒋᔭᐅᓂᖏᓐᓄᑦ ᑕᒪᒃᑭ ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪᓗ ᖃᓪᓗᓈᓄᑦ ᖃᐅᔨᓴᕐᓂᐅᔪᑦ ᑐᑭᓯᒋᐊᕈᑏᑦ. ᑐᓐᖓᕕᒋᓪᓗᒋᑦᐊᑐᖅᑕᐅᓂᐊᖅᑐᓂ ᐊᕙᑎᓕᕆᓂᕐᒧᑦ ᖃᐅᔨᓴᕐᓂᒃᑯᑦ, ᐱᑕᖃᖏᑦᑐᖅ ᐊᖏᔪᓂᑦ ᐱᐅᖏᑦᑐᓂᑦ ᐊᕙᑎᖓᓄ ᐊᑦᑐᖅᑕᐅᔪᓂᑦ ᐊᑐᓕᖅᑎᑕᐅᓂᖓᓄᑦ ᑖᓐᓇ ᐸᕐᓇᐅᑎ. ᐱᓕᕆᐊᓕᒫᑦ ᒥᕐᖑᐃᓯᕐᕕᒻᒥ ᖃᐅᔨᓴᖅᑕᐅᔭᕆᐊᖃᖅᑐᑦ, ᓇᓕᐊᓂᑐᐃᓐᓇᖅ ᐊᑖᓂ ᓄᓇᕗᒻᒥ ᐸᕐᓇᐃᓂᕐᒧᑦ ᐊᒻᒪᓗ ᐱᓕᕆᐊᓂᑦ ᖃᐅᔨᓴᓂᕐᒧᑦ ᐱᖁᔭᖅ ᐅᕝᕙᓘᓐᓃᑦ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐊᑦᑐᖅᑕᐅᔪᓂᑦ ᖃᐅᔨᓴᓂᕐᒧᑦ ᐱᕙᓪᓕᐊᓂᖓᑎᒍᑦ.